សេចក្ដីអំណរដ៏ពិតនៃបុណ្យគ្រីស្ទម៉ាស់
ដោយប្រធាន ថូម៉ាស អេស ម៉នសុន
បងប្អូនប្រុសស្រីជាទីស្រឡាញ់ ខ្ញុំមានក្ដីអំណរខ្លាំងណាស់ ដោយបាននៅជាមួយនឹងអ្នកនាល្ងាចនេះ ខណៈដែលយើងអបអរដល់ការប្រសូតនៃព្រះអង្គសង្គ្រោះយើង---គឺព្រះយេស៊ូវគ្រីស្ទ ដោយវាចា និងបទចម្រៀង ។
បុណ្យគ្រីស្ទម៉ាស់ជារដូវកាលមួយដ៏ស្រស់ត្រកាល ។ វាក៏ជាពេលមួយដ៏មមាញឹកសម្រាប់យើងដែរ ។ ខ្ញុំសង្ឃឹម ហើយអធិស្ឋានថា យើងនឹងមិនវក់វីនឹងភាពមមាញឹកនៃរដូវកាលនេះ រហូតធ្វើឲ្យយើងផ្ដោតទៅលើរឿងដែលមិនសំខាន់ ហើយខកខាន នឹងក្ដីអំណរដ៏សាមញ្ញនៃការចងចាំដល់ការប្រសូត នៃព្រះដ៏បរិសុទ្ធនៅភូមិបេថ្លេហិមឡើយ ។
ការស្វែងរកក្ដីអំណរពិតនៃបុណ្យគ្រីស្ទម៉ាស់ ពុំមែនកើតចេញពីការប្រញ៉ាប់ប្រញ៉ាល់ធ្វើកិច្ចការឲ្យបានច្រើននោះទេ ។ យើងរកឃើញក្ដីអំណរពិតនៃបុណ្យគ្រីស្ទម៉ាស់ ពេលយើងផ្ដោតដួងចិត្តទៅលើព្រះអង្គសង្គ្រោះ ។
ប្រសូតក្នុងក្រោលសត្វ បានផ្ទំនៅក្នុងស្នូក ទ្រង់យាងពីស្ថានសួគ៌មករស់នៅលើផែនដីជាមនុស្សរមែងស្លាប់ ហើយស្ថាបនានគរព្រះឡើង ។ ដំណឹងល្អដ៏រុងរឿងរបស់ទ្រង់បានផ្លាស់ប្ដូរទស្សនៈនៃពិភពលោក ។ ទ្រង់បានរស់ ហើយបានសុគតដើម្បីយើង ។ តើយើងអាចថ្វាយអ្វីដល់ទ្រង់វិញ ?
ខ្ញុំចូលចិត្តកំណាព្យដែលនិពន្ធដោយកវីជនជាតិអង់គ្លេសឈ្មោះ គ្រីស្ទីណា រ៉ូសែតធី ៖
តើខ្ញុំអាចថ្វាយអ្វីដល់ទ្រង់
បើខ្ញុំក្រឥតអ្វីផ្ទឹម?
បើខ្ញុំជាអ្នកគង្វាល
ខ្ញុំនឹងថ្វាយជាចៀម ។
បើខ្ញុំជាហោរា
ខ្ញុំបំពេញតាមផ្នែករបស់ខ្ញុំ
ចុះតើខ្ញុំអាចថ្វាយអ្វីដល់ទ្រង់ ?
មានតែដួងចិត្តខ្ញុំប៉ុណ្ណោះ ។ 1
ការអបអររបស់យើងចំពោះបុណ្យគ្រីស្ទម៉ាស់ គប្បីជាការឆ្លុះបញ្ចាំងមួយពីក្ដីស្រឡាញ់ និងក្ដីសប្បុរសដែលព្រះអម្ចាស់បានបង្រៀន ។ ការផ្ដល់អំណោយឥតសំណង នាំឲ្យបុណ្យគ្រីស្ទម៉ាស់ កាន់តែមានភាពរីករាយ ។ យើងមានចិត្តសប្បុរសចំពោះគ្នាច្រើនជាងមុន ។ យើងឈោងដៃទៅជួយជន ដែលសោកសៅដោយក្ដីស្រឡាញ់ ។ ចិត្តយើងមានភាពទន់ភ្លន់ ។ យើងអត់ទោសឲ្យសត្រូវ នឹកចាំពីមិត្តភក្ដិ ហើយគោរពតាមព្រះ ។ វិញ្ញាណបុណ្យគ្រីស្ទម៉ាស់ បំភ្លឺឲ្យយើងឃើញយ៉ាងច្បាស់ ហើយពេលយើងមើលទៅជីវិតដ៏មមាញឹកក្នុងពិភពលោកនេះ យើងកាន់តែមានការចាប់អារម្មណ៍ទៅលើមនុស្សច្រើនជាងវត្ថុទាំងឡាយ ។ ដើម្បីយល់ពីអត្ថន័យពិតពីវិញ្ញាណនៃគ្រីស្ទម៉ាស់ យើងត្រូវលុបពាក្យខាងក្រោយចេញ ហើយវានឹងក្លាយជាព្រះវិញ្ញាណនៃព្រះគ្រីស្ទ ។
ប្រធាន ដេវីឌ អូ មិកឃេ បានថ្លែងថា ៖ « សុភមង្គលពិត កើតចេញពីការធ្វើឲ្យអ្នកដទៃរីករាយប៉ុណ្ណោះ---ជាការអនុវត្តដ៏សំខាន់នៃគោលលទ្ធិរបស់ព្រះអម្ចាស់ ស្ដីពីការលះបង់ជីវិត ដើម្បីទទួលបានវាវិញ ។ និយាយឲ្យខ្លីទៅ វិញ្ញាណនៃបុណ្យគ្រីស្ទម៉ាស់ ជាវិញ្ញាណនៃព្រះគ្រីស្ទ ដែលធ្វើឲ្យចិត្តយើងរីករាយក្នុងក្ដីស្រឡាញ់ និងមិត្តភាពជាបងប្អូន ហើយវាបំផុសយើងឲ្យធ្វើការបម្រើដោយសប្បុរស ។
« វាជាវិញ្ញាណនៃដំណឹងល្អនៃព្រះយេស៊ូវគ្រីស្ទ ជាការប្រតិបត្តិដែលនឹងនាំមកនូវ ‹ក្ដីសុខដល់ផែនដី› ដោយសារវាមានន័យថា---សូមក្ដីសុខ មានដល់មនុស្សលោក » ។ 2
សូមឲ្យយើងធ្វើដូចជាព្រះគ្រីស្ទបានធ្វើ ។ ការលះបង់ខ្លួនឯង ជាអំណោយមួយដ៏បរិសុទ្ធ ។ យើងធ្វើទុកជាការចងចាំមួយនូវរាល់អ្វី ដែលព្រះគ្រីស្ទបានធ្វើ ។ សូមឲ្យយើងផ្ដល់អំណោយដែលមានតម្លៃអស់កល្ប រួមនឹងអំណោយដែលអាចបាក់បែក ឬបំភ្លេចចោលនៅថ្ងៃណាមួយផងដែរ ។ តើពិភពលោកនេះ ប្រសើរឡើងបែបណាទៅ បើយើងផ្ដល់អំណោយនៃការយល់ចិត្ត និងក្ដីមេត្តា នៃការបម្រើ និងមិត្តភាព នៃក្ដីសប្បុរស និងភាពទន់ភ្លន់នោះ ។
ខណៈដែលបុណ្យគ្រីស្ទម៉ាស់នេះរុំព័ទ្ធយើងដោយសិរីទាំងឡាយ សូមឲ្យយើងស្វែងរកពន្លឺផ្កាយមួយ ដើម្បីដឹកនាំក្នុងការអបអរដល់ការប្រសូតរបស់ព្រះអម្ចាស់ ដូចជាពួកហោរាដែរ ។ សូមឲ្យយើងធ្វើដំណើរទៅភូមិបេថ្លេហិមដោយព្រះវិញ្ញាណ ដោយយកទៅជាមួយយើងនូវចិត្តទន់ទាប ហើយខ្វល់ខ្វាយ ជាអំណោយថ្វាយដល់ព្រះគ្រីស្ទ ។
បងប្អូនប្រុសស្រីរបស់ខ្ញុំ ខ្ញុំសង្ឃឹមថាអ្នកគ្រប់គ្នានឹងមានបុណ្យគ្រីស្ទម៉ាស់ដ៏រីករាយ ។ នេះជាក្ដីសង្ឃឹម និងការអធិស្ឋានខ្ញុំ ក្នុងព្រះនាមពិសិដ្ឋនៃព្រះអង្គសង្គ្រោះយើង ព្រះយេស៊ូវគ្រីស្ទ អាម៉ែន ។