Dou Kakua ni Rere
Kemuni na taciqu kei na ganequ lomani, eda soqoni vata ena bogi nikua baleta na loloma eda duavata kina me baleta na Siganisucu kei na gauna ni Siganisucu. E dua beka na ka e talei cake mai na ivakatagi kei na sere ni Siganisucu, noda soqo vata vakamatavuvale kei na veitokani, na matadredredre, kei na nodra nanamaki kei na mamarau na gonelalai? Na gauna ni Siganisucu e koto kina e dua na idre vakalou me kauti keda vata mai vakamatavuvale, veitokani, vakakina na veitikotiko. Eda nanamaki ki na veisoli ka ni loloma ka marautaka vata e dua na kakana ni gauna ni vakacagicagi.
Ena A Christmas Carol, ka vola na dauvolaivola ni Igiladi o Charles Dickens, a vakamacalataka vakavinaka na vugoi Scrooge tagane na draki matalia ni gauna bibi oqo ena nona kaya au dau raica na gauna ni Siganisucu me dua na gauna vinaka; dua na gauna ni yalovinaka, ni veivosoti, gauna ni loloma, ka gauna vinaka: na gauna duadua ga au kila, ena ivolanivula ni dua na yabaki, e vaka ni ra dau yalovata kina na tagane kei na yalewa ka dolava vakarawarawa na yalodra dau tasogo tu, ka nanumi ira na tamata [tale eso]. …O koya … e dina ni se bera niu bau ciqoma e dua na ilavo me kena isau, au vakabauta ni sa levu na ka vinaka sa cakava vei au, kanacakava vei au eso na ka vinaka; kau kaya kina, me vakalougatataka na Kalou!” (A Christmas Carol [1858], 5–6).
Niu dua na itubutubu, ka dua na tubunigone ena gauna oqo, sa dau vakananumi vei au na cakamana ni Siganisucu niu saravi ira toka na luvequ, kei ira na luvedra ena gauna oqo, ena nodra marautaka na sucu ni iVakabula ka veimarautaki ni keitou soqo vata vakamatavuvale. Au kila ni ko ni a sarava tiko me vakataki au, na marau dina kei na savasava ni yalo vagone era dau nanamaki ka marautaka na gone ena gauna ni vakacagicagi talei oqo. Ni da raica na nodra reki e vakananuma tale vei keda na Veisiganisucu sa sivi. A dikeva talega o Dickens, “E vinaka me da gone ena so na gauna, vakauasivi duadua ga ena gauna ni Siganisucu, me vaka ni a gone talega o Koya a vakatekivuna” (A Christmas Carol, 67).
Au a tubu cake volekati Los Angeles, ka vakavolivolita na neitou itikotiko na veimoli, ka ra sobi tu na vuna ena vua ni moli ena gauna oya. Ena dua na bogi ena Veisiganisucu yadua, erau dau sureti ira mai na lewe ni matavuvale, na itokani, kei ira era tiko voleka na noqu itubutubu me keimami lagalagasere ni Siganisucu ka vakayagataka na ivakalomavinaka. E dua na ivakarau taleitaki vei keimami kece, ka dau ia tu na lagalagasere me vica na auwa. Keimami na gone keimami dau lagasere me yacova ni keimami kila sa rauti keimami, keimami dau qai vakalutu lo yani ki veimoli me keimami laki qito.
Keirau talega kei na watiqu o Kathy, keirau a susuga cake neirau matavuvale ena Ceva kei California, voleka sara ki baravi. E dau ivakatakilakila ni Siganisucu mai kea na suwaigelegele ni veivuni niu ena mudre ni cagi. Era dau namaka na luvei keirau e veiyabaki me ra lako sobu yani ki baravi me ra sarava nodra voleni vakayabaki na waqa ena Siganisucu. E drau vakadrau na waqa rairai totoka, ena kedra veicina duiroka, era soko wavolita na toba ni keimami sarasara tu ena qoroqoro.
Ena gauna oqo ni keitou sa tiko e Salt Lake City, keirau sa vakayacora kei Kathy me dua na ivakarau tudei na neirau dau kauti ira na luvei keirau kei na makubui keirau ena kena vakatasuasuataki eke na drama A Christmas Carol. Ena veiyabaki yadua, ni keitou sarava na cakamana ni nona veisau o Ebenezer Scrooge mai na dua e daunanumi koya ga ki na dua na itokani mamarau ka vakasinaiti ena reki ni Siganisucu, keitou vakila na idre me keitou laiva na bula vaka-Scrooge e lomai keitou. Keitou vakauqeti me keitou vinaka cake vakalailai ena neitou bula ka muria na nona ivakaraitaki ni yalololoma ki na tamata kecega na iVakabula.
Na yalo ni veisau ena gauna ni Siganisucu e yavutaki ena mana ni nona veivueti o Jisu Karisito me veisautaka na noda bula me vinaka cake. Na itukutuku lomani ni nona sucu na Luve ni Kalou ena sivia na ruanaudolu na yabaki sa oti mai Peceliema e volai ena ivola i Luke:
“Ena gauna ko ya, sa tukuni yani na lewa i Sisa Akusito me volai na lewe ni vanua taucoko. …
“A ra sa dui lako kecega na tamata me ra volai, ko ira yadua ki na nona koro.
“Sa lako cake talega ko Josefa e Kalili mai na koro ko Nasareci, ki Jutia, ki na koro i Tevita, a yacana ko Peceliema; …
“Me volai kei Meri, ko koya sa musu vua me watina, a sa bukete tiko.
“Ia ni rau sa tiko mai kea, sa yaco na nona siga me vakasucu kina.
“A sa vakasucuma na nona ulumatua na gonetagane, a sa viviraka vua na isulu ni gone, ka vakadavora ena nodra tikina na manumanu; ni sa sega na tiki ni bure me nodratou.
“A sa so na ivakatawa ni sipi ena vanua ko ya, a ra sa tiko mai na vanua veico, a ra veivuke me vakatawana na sipi ena bogi.
“Ka raica, sa dua na agilosi ni turaga a sa rairai vei ira, a sa cila vakavolivoliti ira na iukuuku ni Turaga, a ra sa rere vakalevu.
“A sa kaya vei ira na agilosi. Dou kakua ni rere: raica au sa kauta mai vei kemudou e dua na itukutuku vinaka mo dou reki vakalevu kina, kei ira kecega na tamata.
“Ni sa sucu vei kemudou ena siga oqo, ena koro i Tevita, nai Vakabula, ko koya na Karisito na Turaga.
“Ia oqo na kena ivakatakilakila vei kemudou; Dou na kunea na gone sa viviraki vua na isulu ni gone, a sa davo ena nodra tikina na manumanu.
“A ra sa lewevuqa na kai lomalagi era sa tiko vakasauri vata kaya na agilosi a ra vakavinavinaka vua na Kalou, ka kaya,
“Sa nona na Kalou na vakarokoroko ena veiyasana e cake sara, A sa veivinakati rawa ko ira e vuravura, sa lomani ko ira na tamata” (Luke 2:1, 3–14).
Sa raica rawa na agilosi na nodra rere na ivakatawa ni sipi ena nona rairai vei ira, ka kaya kina vei ira “dou kakua ni rere.” Na lagilagi veivakurabuitaki ni Kalou, ka serau mai vua na italai vakalomalagi sega ni namaki, sa kauta mai na rere ki yalodratou. Ia na itukutuku e mai tukuna vei iratou na agilosi e sega ni ka me rerevaki. Sa lako mai o koya me mai tukuna e dua na cakamana, me kauta mai na ulumatua ni itukutuku vinaka, me tukuna vei ira ni sa qai tekivutaki na nodra vueti na kawatamata. E sega tale ni dua na italai mai liu se me tekivu mai na gauna oya me kauta mai na itukutuku marautaki cake. Sa mai tekivuna na Luvena e Duabau Ga na Tamana na Nona ilakolako ena bula oqo: “Ni sa sucu vei kemudou ena siga oqo ena koro i Tevita na iVakabula, ko Koya na Karisito na Turaga.” Oqo dina na itukutuku rogo vinaka me marautaki vakalevu.
Eda dau sotava yadua ena noda bula na gauna e vaka me dau levei keda ka vakayawaki keda kina na marau levu ka yalataka na agilosi. O keda yadua eda na sotava na malumalumu kei na dredre ni bula—na tauvimate, na druka, yalorarawa, ka, kena itinitini na mate. E levu na tamata era vakalougatataki ena veitaqomaki vakayago, e levu nikua e sega. E levu sa bau dredre sara ga na nodra sotava na gagadre ni bula kei na kena isoqoni vakayago vakakina vakayalo.
Ia, e dina ni tu na dredre ni bula, na nona itukutuku na Turaga vei keda yadua e tautauvata nikua me vaka vei ira na ivakatawa ni sipi era a vakatawa tiko ena ruanaudolu na yabaki sa oti: “Dou kakua ni rere.” De rairai na nona vosa na agilosi me kakua na rere e baleti keda vakalevu cake nikua mai na kena a vakaruruya na nodratou rere na ivakatawa ena imatai ni bogi ni Siganisucu oya. E rawa beka ni a nakita me da kila ni ena vukuna na iVakabula, ena sega ni rawa ni qaqa na rere? Me vakadeitaka ni sega sara ni na vakadonui na rere? Me vakananuma vei keda ni sega ni dua na leqa vakavuravura e tudei, ni sega ni dua vei keda ena sega ni rawa ni vueti?
Na isolisoli kamica duadua ena soli ena Siganisucu sai koya ga na kena e solia vei keda na iVakabula vakataki Koya: Nona vakacegu uasivi sara. E a kaya o Koya: “Au sa laiva vei kemudou na vakacegu, au sa solia vei kemudou na noqu vakacegu: au sa sega ni solia vei kemudou me vaka sa solia ko vuravura. Me kakua ni rarawa na yalomudou, se rere” (Joni 14:27). Ena dua na vuravura sa rui yawa sara kina na vakacegu, e rawa ni bula tu e yaloda na nona isolisoli ni vakacegu na iVakabula se cava ga na keda ituvaki. Kevaka eda ciqoma na nona veisureti na iVakabula me da muri Koya, sa na seyavu yani vakadua na rere. Sa vakataudeitaki na noda veisiga ni mataka. Sai koya oqo, “na itukutuku vinaka me da reki vakalevu kina na tamata kecega.” “Kakua ni ko rere,” e vakananuma vei keda na parofita o Aisea, “niu sa tiko vata kei iko: kakua ni ko taqaya; niu sa nomu Kalou: kau na vakaukauwataki iko; io, kau na vukei iko; io, kau na tokoni iko ena ligaqu imatau sa dau dina” (Aisea 41:10).
Ena vukuna na iVakabula ka a sucu ena rua na udolu na yabaki sa oti e Peceliema, sa tu kina na inuinui—kei na vuqa tale na ka. Sa yaco kina na veivueti, na veisereki, na qaqa kei na lagilagi. “The wrong shall fail, the right prevail [Ena druka na cala, qaqa na dina]” (“I Heard the Bells on Christmas Day,” Hymns, naba 214). Sa rauta me rairai mai vakasauri e dua na matasere ni agilosi me ivakatakilakila vakalomalagi ena nona kacivaka e dua na agilosi ni sa sucu na iVakabula, ka ra lagata, “Me lagilagi na Kalou e cake sara, ki vuravura na sautu, itukutuku vinaka vua na tamata.” E sega ni dua na itukutuku veivakadeitaki cake. E sega tale ni dua na itukutuku me vakasinaiti ena vakanuinui vinaka ki na tamata.
Me gauna ni vakacegu kei na marau vei keda kece sara na gauna oqo, “ni sa sucu vei keda ena siga ko ya ena koro i Tevita e dua na iVakabula, ko Karisito na Turaga.” Ena yaca i Jisu Karisito, emeni.