O Koya na Daulomasoli

Mai vei Peresitedi Dieter F. Uchtdorf

Karua ni Daunivakasala ena Mataveiliutaki Taumada

E sega beka ni dua na gauna dokai me da marautaka na yakavi totoka nikua ena kena iserau na noda parofita lomani, o Peresitedi Thomas S. Monson?

Na Siganisucu sai koya na gauna dau yaco mai vakavudua oya—eda dau raici ira kina na tani ena ivakarau ni rai vou, na gauna eda dau dolava kina vakalevu cake na yaloda ki na veika totoka e wavoliti keda ka dolele yani vei ira eso ena yalovinaka kei na loloma.

Ni da tamata bula, kevaka eda kalougata, ena veigauna eso e rawa ni da toboka tale kina vakalalai na ivakarau ni yalo e vaka na gone.

Na vakanananu ni dua eda dau lomana e cakava tiko e dua na ka vinaka me baleti keda—kei na yalonanamaki me baleta na veika vinaka eda nakita tiko me baleti ira—e dau ragita na yaloda ka vakasinaiti keda ena loloma kei na vakanuinui. Vakuria kina na cina serau, na iukuuku taleitaki, na ivakatakarakara totoka ni sucu i Karisito, ka sega kina ni vakabekataki ni Siganisucu e dua na gauna taleitaki.

Oti qai mai tu yani na sere kei na ivakatagi. E sega ni dua na ka e rawa ni tukuna vakavinaka na bibi ni ibalebale titobu kei na yalo malumu ni gauna oqo me vaka e dua na sere ni Siganisucu. Se vakatubu marau, vakavure vakasama, se kauta lesu mai na vakanananu na kena rorogo, e dua na ka me baleta na Siganisucu e dau vakauqeta mai na ivakatagi kei na sere lagilagi. Na veisere vakasakiti oqori ni Siganisucu e dau laveta na yaloda ka vakananuma vei keda na ibalebale ni noda reki.

Nikua eda kalougata vakalevu ena madigi me da rogoca na sere kei na ivakatagi vakalomalagi era vakaitavi kina na Mataivakatagi ni Lomanibai ni Valetabu kei na Matasere na Mormon Tabernacle.

Sa rui veivakauqeti dina na sere kei na ivakatagi era vakarautaka na ilawalawa oqo au dau taleitaka meu raitayaloyalotaka ni ra dau gole sobu mai na agilosi ni lomalagi ena so na gauna me ra vakarorogo ka lagasere talega.

Sere ni Lali Kaukamea

Eratou se qai lagata na matasere e dua vei ira na sere totoka duadua ni Siganisucu se qai bau volai, na sere veivakamarautaki “Carol of the Bells,” (Sere ni Lali Kaukamea) ka a lagati taumada e Amerika ena 1921.

Taumada, a sega sara ga ni sere ni Siganisucu. A yavutaki mai na dua na sere vakavanua mai Ukraine ka vakatokai me “Shchedryk,” ka dau vakadewataki wasoma me “O Koya na Daulomasoli.”

Era dau lagata na sere oqo na veimatavuvale mai Ukraine ena itekivu ni dua na yabaki vou. Na qaqana taumada e tukuni kina e dua na manumanu ka a vuka yani ena nodratou itikotiko e dua na matavuvale ka laki tukuna na kalougata vakasakiti eso sa waraki iratou ena loma ni yabaki sa roro mai.¹

Au taleitaka na ka au vakila ena italanoa oya.

Au taleitaka na kena itukutuku ni vakanuinui kei na nanamaki.

E sega beka ni o koya oqo na itukutuku ni Siganisucu? Kevaka sara mada ga e vakaturubuto tu na irairai kei vuravura—ni sega ni donu na veika e yaco tiko, ni vakasinaiti na yaloda ena rarawa kei na lomaleqa, ena maliwa sara mada ga ni yalorarawa kei na yaluma—eda lagata “me da marau” kei na “sa lomani ko ira na tamata” ² ena vukui Karisito, o koya sa lako mai “me vakararamataki ira sa tiko ena butobuto.”³

E Dua na Gauna ni Lomasoli

Sa veiganiti vinaka kina, ena gauna oya, ni sere ni Siganisucu lomani eda se qai rogoca a yacana taumada “O Koya na Daulomasoli.” Na Siganisucu, na gauna ni lomasoli.

Ni da vakauqeti ena yalo oya, eda dau vaqara tu me vica na auwa e dua na iloloma vinaka me soli vua na noda itokani kei ira na noda matavuvale. Eda dau vaqara na sala me da dau veivuke ka marau kina. Eda dau vakauqeti me da tiko vakabalavu kei ira eda dau lomana. Sa dau yaco me da kauwaitaki ira vakalevu cake era vakaleqai tu, ka da dau soli keda ena lomasoli me da vukei ira. Na veika kece oqo na noda ivakarau sega ni taucoko sara ni vakavoqataka na nona lomasoli na noda iVakabula, o koya eda vinakata me da rokova na nona sucu.

Ia eda kila kece ena vuqa na gauna e dau buwawa ka yali yani na yalo ni Siganisucu ena levu ni osooso ni volivoli, sausaumi, kei na ituvatuva tale eso.

Au sega ni via vakauqeta na ivakarau vaka-Grinch, ia au via kaya ni so na noqu vakanananu talei ni Siganisucu na veisoli ka ni loloma, noqu maliwai ira na lewevuqa, kei na veisoqo ni marau lalai kei na ka lelevu ka dau kauta vata mai na tamata ena gauna oqo.

Io e levu tu na vuna me da marautaka kina na veika oqo. Ia e levu cake tale tu na ka.

O koya, au sureti keda yadua me da raica e dua na gauna ena Siganisucu oqo, me gauna e vakanomodi kina na yaloda me da vakadinadinataka ka vakavinavinaka kina mai vuniyaloda vei “Koya na Daulomasoli.”

Me da vakasamataka na nona loloma cecere, yalololoma, ka dauloloma tawayalani na Tamada Vakalomalagi.

Ni da voli ka ni loloma—ni da solia ka ciqoma—me da taura talega na gauna me da vakasamataka vakamalua na iloloma vakaitamera sa vakatauca tiko mai vei keda, na Luvena, na Kalou.

Na iLoloma ni Vakavinavinaka

Au nanuma ni sa itovo vakatamata me da dau taura tu ga vakamamada na ka—na veika sara mada ga e cecere na kena yaga. Oqo e dua na lesoni eda vulica mai na italanoa ni tini na vukavuka ena gauna nei Jisu. Ni ra vakararawataki tu ena dua na mate veivakayalolailaitaki, sa tawasei ira tani mai vei ira na nodra itokani, nodra matavuvale, kei na bula sara mada ga, era vakatakekere na tamata vukavuka kune rarawa oqo ka vakabulai mai vua na Luve ni Kalou.

Me vaka ko ni kila, ni oti na cakamana lagilagi oqo e ciwa vei iratou na vukavuka oqo eratou lako yani ka rekitaka na nodratou vakalougatataki.

E dua ga a lesu mai.

E dua ga vei ira na tini e mai vakaraitaka na nona vakavinavinaka. E dua ga vei ira na lewe tini, “ni sa raica sa vakabulai, sa lesu tale, a sa vakarokorokotaka na Kalou ena domo levu, a sa cuva vakatoboicu ki na yavai koya, ka vakamolimoli vua.”⁴

Na ivakaraitaki yalomalumalumu ni vakavinavinaka dina vakaoqo sa na tu yaduadua sara beka ena gauna oqo me vaka ena gauna ni italanoa oqo. Ia ni ra yaco mai, era na tara na yaloda ka vakauqeti keda me da wilika na noda veivakalougatataki.

E dua na ivakaraitaki au vulica e baleta e dua na tamata mai Aferika. Baleta na lokiloki, a sega vakadua ni rawa ni lako na tamata oqo. Sa mani tu ga kina ena nodrau vale na nona itubutubu ena vuqa na gauna ni nona bula. E sega ni rawa ni cakacaka; e sega ni rawa ni gade vata kei ira na nona itokani; e sega ni rawa ni cakava na veika rawarawa mada ga eda dau vakawalena tu ena vuqa na gauna.

Qai rogoca e dua na ka taleitaki! Sa vakauta mai na Lotu i Jisu Karisito ni Yalododonu Edaidai na wilijea ki na dua na soqoni voleka i nodratou!

A kerea e dua nona itokani me kauti koya ki na soqo oya, e kea a sarava kina nodra vakavodoki e vicavata na turaga, marama, kei na gonelalai lokiloki ki na wilijea taliva vovou.

Sa dua na ka nona vinakata me dabe ena dua vei ira na idabedabe oya! Ena veisautaka na nona bula ena dua na gauna lailai kevaka e rawa me veitosoyaki ga ena nona kaukauwa!

A wawa tu ena laini me yacova ni sa qai yaco mai nona gauna.

E rau laveti koya e rua na turaga ki na dua na idabedabe ka, ena imatai ni gauna ena nona bula … sa rawa ni veitosoyaki ga vakataki koya!

Taumada e ririko taka nona veitosoyaki. Ia ni sa matau mai vua na wilijea, sa tekivu me toso ena yaloqaqa.

E gole, cowiri, totolo vakasauri, ka qiqi ga na taya e muri. E yaloyalo e ligana ruarua ni qiqi sivita na nona itokani.

E vuka!

E laurai e matana na reki.

Ni oti e dua na gauna, sa vaqiqica tale yani vakamalua na idabedabe vei ira na kena vo ka tukuna e matana ni sa tuvakarau me vakasoburi yani.

“Na cava o via cakava?” a taroga na nona itokani.

E matadredre ga na turaga oqo ka kurea na tabana. “Nona gauna e dua tale,” e kaya yani.

E tekiduru e yasana na daukaulotu ni Lotu dauveiqaravi raraba ka kaya, “Sa nomu na wilijea oqo.”

E sega ni vakabauta na turaga oqo. A nanuma voli mai ni soqo oqo me mai vakaraitaki ga kina na ivakarau ni vodo wilijea.

“Sa noqu dina?” e taroga.

“Io.”

“E sega tu vei au na ilavo.”

“Sa nomu. Qo na nodra iloloma na tamata era lomani iko.”

Ni sa qai lutuki koya na dina ni veika sa yaco tiko, a raici nona itokani na turaga yalomalumalumu oqo.

Raica na daukaulotu.

E tovolea me tarova na wainimatana, ia sa sega ni rawa. Ni tagi voli, a dredrevaka na reki cecekia ni veika e vakila.

Erau tagi vata kei koya na nona itokani kei na daukaulotu.

“Vinaka vakalevu,” a vakasolokakanataka mai.

A mokoti rau ruarua, dabe yani ena nona idabedabe, ena dua na “kaila ni marau!” a qiqi tale yani ena matadredredre.

“Au sa rawa ni vuka!” e kailavaka ni veiqiqiyaki ena bati ni sala.

E kila na turaga oqo na vakavinavinaka.

Na Loloma Soliwale ni Kalou

Eda sa bau vakila mada na mataqali vakavinavinaka savasava tawayalani vakaoqo? Ena gauna ni Siganisucu oqo, kei na loma ni yabaki taucoko, au masuta ni da na daunanumi Koya na Daulomasoli—na noda Kalou, na Tamada, na noda iVakatawa ni sipi lomani ka Daunivakasala.

Ni Sai Koya na Dausolia na iLoloma!

O Koya na Daulomasoli!

Ni da kere madrai, o keda na Luvena, e sega ni solia o Koya vei keda na vatu.⁵ Ia, e vakalougatataki keda o Koya ena isolisoli, na kena vakalou kei na kena talei e sega ni rawa vei keda me da kila vakavinaka se da raitayaloyalotaka mada ga. E solia vei keda o Koya na:

Vakacegu.
Reki.
Sautu.
Veitaqomaki.
Veisolisoli.
Veitotaki.
iNuinui.
Yalodei.
Loloma.
Veivakabulai.
Bula Tawamudu.

Ena gauna ni Siganisucu oqo eda marautaka na isolisoli cecere duadua vei ira kece, o koya sa rawa kina na isolisoli kece tale—na nona sucu na gonelailai mai Peceliema. Ena Vukuna, “sa sega kina na kaukauwa ni ibulubulu, io sa vakaotia sara ko Karisito na batigaga nei mate. Sai Koya na rarama kei na vu ni bula kei vuravura, io na rarama sa tawamudu ka sega ni tabonaki rawa, kei na bula sa tawamudu ni sa sega tale na mate.”⁶

Au vakavinavinaka ena yaloreki vua na Kalou ena Nona lomasoli.

Sa vakabulai keda o Koya mai na galili, mai na bula lala, kei na tawakilikili.

E dolava o koya na matada kei na daligada. E veisautaka na butobuto ki na rarama, na yaluma ki na inuinui, kei na galili ki na loloma.

Sa sereki keda mai na noda veisiga sa oti ni vakabobulataki kei na kocokoco ka dolava na sala ki na gauna oqo ni bula vakainaki kei na veisiga ni mataka ni vakataucokotaki.

Sai Koya oqo eda qarava.

Oqo na noda Kalou.

Sai koya oqo na Daulomasoli.

Sai Koya oqo ka daulomani ira vakataucoko na Luvena me solia kina na Luvena e Duabau ga sa Vakatubura me ra kakua kina ni rusa ko ira kece era dau muri Koya ia me ra rawata ga na bula tawamudu.⁷

Ena vukui Jisu Karisito, eda na sega sara kina ni vulagi tale. Eda na tucake vata kei ira na buladodonu ni sa lesu mai ko Koya! Ia ena vuku ni Nona bula sa uasivi sara kei na nona isoro tawamudu, ena dua na siga eda na rawa ni tucake vata kei ira na agilosi ni lomalagi ka rawata vata kei ira e dua na iloloma tawamudu.⁸

Me da nanuma na Tamada Vakalomalagi lomasoli ena gauna ni Siganisucu oqo ka vakaraitaka na noda vakavinavinaka cecekia mai vuniyaloda vua na noda Kalou Kaukauwa, o koya sa solia vei ira kece na Luvena na tabadra me ra vuka. Oqo na noqu masu malumalumu yalodina kei na veivakalougatataki mai vuniyaloqu ena gauna ni Siganisucu oqo kei na veigauna kecega, ena yacana na noda iVakabula lomani, o Jisu Karisito, emeni.