Mai Vakarokoroko vei Karisito—kei na iTuvatuva!
Me vaka e vuqa vei kemuni, o au kei na watiqu totoka o Craig, keirau dau taleitaka vakalevu na sere kei na ivakatagi totoka ni Siganisucu. Kevaka keirau na vola na lisi ni neirau sere taleitaki, ena voleka sara toka e cake na “Tou Mai Gole Vata.” Na veiqaqana ni “marau” kei na “qaqa” e sureti keda me da “lako mai” ka “vakarokoroko” vua na noda iVakabula, o Jisu Karisito—nodra “Tui na agilosi.”1 Au vakila deivaki, ena gauna ni noda bula taumada ka vulica tiko na ituvatuva ni veivakabulai, eda a sega walega ni raica ka vakarokorokotaka ia eda a kaila ena reki ena Nona lomasoli ena yalomalumalumu me iVakabula kei vuravura.2 Ena lima na vosa vakaibalebale duadua me qai bau cavuti, a kaya kina o Koya ena yalomalua, “Koi au oqo, mo ni talai au.”3
Me vaka na iApositolo ko Pita, e vakaroti keda o Peresitedi Monson me da “vakarau tiko [me] da tukuna … na vu ni inuinui sa tu e [lomada].”4 Niu wasea eso na noqu vakanananu ni Siganisucu, au nuitaka ni o ni na rawa ni raica na vuna e tu kina na noqu inuinui vua na iVakabula, vua na “Kalou [na Tamada Tawamudu, o koya] sa lomani ira na kai vuravura, ka solia kina na Luvena e duabauga,”5 kei na nona ituvatuva uasivi sara ka lagilagi ni bula marau na Tamada.
Vakanananu Naba 1 ni Siganisucu
Niu yabaki 14, a tiko na neitou matavuvale mai Niu Siladi. Se tamata gone o tamaqu yabaki 30 ena nona kacivi me peresitedi ni kaulotu.
Sa yaco mai na Siganisucu, keitou se tovolea tikoga kei iratou na taciqu lewe lima me keitou matau ki na neitou itikotiko vou. Dua toka na ka dredre vei au—e dua na yabaki tinivakacaca yalowai—meu tu tani mai vale, itokani, kei na matavuvale. Au vakacudrucudru voli, kau nanuma na veivanua matau, na rorogo, kei na marautaki ni Siganisucu—na ivakatagi, na cina, na vunikau ni Siganisucu, na ucacevata, ka vakabibi cake na matavuvale. Au nanumi ira na tavale, na nei, kei na momo kau kila ni ra sa baci vakarau soqo vata yani ena vale nei Tutu Kjar e Salt Lake City me baleta na soqo ni marau ni Siganisucu ni matavuvale na Kjar ka dau yaco e veiyabaki.
Oqo na bogi ni bera na Siganisucu ena 1966. Au lomalomarua ena noqu laki duavata kei iratou na noqu matavuvale kei ira na daukaulotu ena lotu vakamatavuvale ena itikotiko ni kaulotu, kau kila tu ni soqoni oqo ena kena vinaka duadua ena dua na isosomi malumalumu ni soqo ni marau vakamatavuvale na Kjar kau vakananuma tiko vakalevu. Au sega ni nanuma rawa se na gauna cava a taqiri mai kina na talevoni, ia na qiri mai oya a veisautaka sara ga ena gauna vata oya na yaloqu yabaki tinivakacaca, ka vakasinaiti au ena yalololoma ena vukuna na tamaqu lomani kei na rarawa ena noqu a nanumi au tu ga ena dua na gauna lekaleka sa oti.
A qiri mai na tamaqu lailai o Joe, ka tukuna mai ni mai sotava na Tukaqu lomani, sega ni dau nanumi koya ga, dau cakacaka vakaukauwa, dau rokova nona veiyalayalati o Grandpa Kjar e dua na stroke ka sa sega ni kilaiyalona toka kina e valenibula. E babasika mai noqu vakasama na peteriaki dauveitaba, dauvakatagi, lasalasa keimami dau lomana vakalevu! E laurai ni tarai Tamaqu vakalevu ena nona lesu mai ena talevoni, ia a tauri koya vakavinaka, vakariqa na tabana, ka wasea na nona ivakadinadina bula me baleta na ituvatuva nei Tamada kei na nona vakabauta na nona itavi bibi na iVakabula ena ituvatuva oqori. E tara na yaloqu vutugu na nona ivakadinadina.
Ka ni rarawa, ni a sega ni bula mai kina o Tutu. A takali yani vakatotolo ena siga ga e tarava. Sa Siganisucu e Niu Siladi ia se yakavi ni bera na Siganisucu, nona gauna taleitaki e veiyabaki o Tutu, mai Salt Lake City. Nona takali se qai matai ni gauna meu vakila kina na nona takali e dua e voleka sara kau dau lomana. E dina niu lolositaka nona yali, au a vakalougatataki ka vakacegui ena noqu kila na ituvatuva lagilagi ni marau. Au vakila deivaki niu na raici Tutu tale kevaka au bula me vaka na ivakarau ni bula a bula kina o koya. Au sega ni vakabauta niu sa kila ena gauna oya ni noqu bula, na itavi bibi e vakayacora na iVakabula kei na Nona isoro ni veivakaduavatataki me rawa kina vei au meu na duavata tale kei ira na noqu daulomani ena dua na siga. Ia sa rauta na ka au kila toka meu marautaka kina na ituvatuva. Sa rauta na ka au kila toka meu vakarokorokotaki Koya kina eda marautaka na Nona sucu.
Me tekivu mai na Siganisucu oya ena gauna balavu sa oti yani, au sa vulica e levu cake na ka me baleta na noda iVakabula, o Jisu Karisito. E vakavuvulitaka o Peresitedi Harold B. Lee: “Na Luve ni Kalou … a lako mai ki ke me vaka ni Luvena e Duabau Ga me vakataucokotaka e dua na itavi, me vaka na Lami sa vakamatei mai na ivakatekivu kei vuravura, me kauta mai na veivakabulai ki na kawatamata kecega. Ena Nona solia na Nona bula sa dolava kina na katuba … ka vakavuvulitaka na sala me da rawata kina na bula tawamudu. … Oqori ko Jisu ena ituvuka cecere duadua ni Nona lagilagi.”6
Vakanananu Naba 2 ni Siganisucu
E dua tale na vakanananu ni Siganisucu vakaibalebale a yaco ena 1984, ka vakavuna na kena tubu vakalevu cake tale na noqu vakavinavinaka ena vukuna na iVakabula kei na ituvatuva lagilagi ni veivakabulai. Au sa yabaki 32 kina, ka keirau sa veiwatini tiko kina kei na watiqu yalodina daulomani, ka tinadra e va na gonelalai vakamareqeti, yabaki tolu ki na tini. Ni vo e ono na macawa me Siganisucu, keitou ciqoma na itukutuku mai vua na vuniwai ka kurelaka na neitou bula ena nona tukuna na vuniwai ni sa kune vei au na “kenisa.” Keirau veiwadravi tu kei Craig ena sega ni vakabauta, ka keirau dui tovolea ruarua me keirau tarova na wainimata, ka vakataroga se na cava ena kauta mai na veisiga ni mataka. Na yalo e yaco tarava mai, sai koya na “vakacegu kamica … sa uasivia na ka kecega e kilai rawa”7 ena vuku ni neirau vakabauti Jisu Karisito kei na nona ituvatuva na Tamana.
E dina ni a veiqaravi tiko vakabisopi ni neitou tabanalevu ena gauna oya o Craig, keirau nanuma me tukuni ga na itukutuku ena loma ni neitou matavuvale me taladrodro tikoga kina na veika kece vei ira na luvei keirau. Ena loma ni ono na macawa oya ni bera na Siganisucu, au dau draiva voleka ni veisiga kece ena loma ni ucacevata meu laki qaravi e valenibula—ni ra veivukevuke tiko na tina kei na taciqu sega ni daunanumi ira ga ena veiqaravi e vale. Sa dua dina na gauna dredre, ia au raica lesu na Siganisucu oya ka sega na vosa e rauta meu vakamacalataka kina na titobu ni noqu vakavinavinaka me baleta na nona isoro ni veivakaduavatataki na iVakabula, o Jisu Karisito, kei na “ituvatuva loloma ni … Dauveibuli cecere.”8
Kau qai kila kina vakavinaka cake mai na veigauna kece sa oti yani na malumalumu ni bula, sa yaco me voleka vakalevu cake vei au na nona ituvatuva ni marau na Tamada Vakalomalagi. E duatani ena yabaki oya na Siganisucu. Ena levu ni noqu dau taleitaka na veika kece e baleta na Siganisucu, na veika ga e vaka me bibi vei au na noqu vakawati tawamudu, noqu matavuvale, kei na noqu vakabauta kei na ivakadinadina me baleta na Tamada Vakalomalagi, Jisu Karisito, kei na ituvatuva.
Ena dua na siga niu vakacegu tiko e vale, ka vakananuma na nodra veisiga ni mataka na luvequ lalai e va, au vakacega tiko na mekesini na Friend ena gauna e toboka na mataqu e dua na ivakatagi. Au dabe ena piano ka tuturu na wainimataqu niu lagata ka vakila ni curubasikata na yaloqu malumu na qaqanisere. Au kila niu gadreva meu vakavulica na sere oqo sega walega vei ira na duanadrau na gone ena Lalai ni neitou tabanalevu, kau veiqaravi tiko kina vakailiuliu ni sere ena Lalai, ia vakauasivi cake vei iratou na va na gone ena neitou itikotiko.
Me tukuna vakacava ki vuravura na Tamada na loloma kei na kauwai?
E tala mai na Luvena, e dua na gone sucuvou, ena vakacegu kei na savasava.
Me vakaraitaka vakacava ki vuravura na Tamada, na salatu me da muria?
E tala mai na Luvena me lakova kei na tamata e vuravura, me da kila.
Me tukuna vakacava ki vuravura na Tamada na solibula, na mate?
E tala mai na Luvena me mate ena vukuda ka tucake tale ena icegu ni bula.
Na cava e kerea vei keda na Tamada? Na cava e tukuna na ivolanikalou?
Vakabauta, vakanuinui, bula me vaka na Luvena, vukei ira tale eso ena nodra ilakolako.
Na cava e kerea? Bula me vaka na Luvena. 9
Na sere vakauqeti oqo e solia vei au e dua na irairai ni ivakarau meu vakaraitaka kina vei Tamaqu Vakalomalagi na noqu vakavinavinaka ena vuku ni Luvena kei na Nona ituvatuva. Au vakila ni kevaka mada ga ena sega ni vakatarai vei au na galala meu raica na nodra bula me ra yalomatua na luvei keirau, kevaka e rawa ni yaco me ra kila, ka bulataka na ivunau rawarawa ka bibi e tu ena sere oqo, era na yaco me ra tisaipeli dina i Jisu Karisito.
A vakarurugi voli na neitou itikotiko ena dua na yalo digitaki ena yabaki oya, ka vakalougatataki keitou ena vakacegu kei na veilomani vakataki keitou au na sega vakadua ni guilecava. E vaka vei au ni a soli vei ira na luvei keirau e dua na yalo me ra kila na veika e bibi ena Siganisucu oya. E se bera vakadua ka se bera vakadua tale mai na gauna oya me ra qoroya ena vakarokoroko na ivakatakarakara ni sucu, kei na loloma ka ulabaleta na nodra yabaki ni bula gone. Ni tarai keitou sara vakaukauwa na veika keitou sotava tu, e vaka me matata na neitou kidava na veivakauqeti vakayalo ni keitou vakananuma vakatitobu ka vakavinavinakataka na isolisoli ni neitou iVakabula, o Jisu Karisito, kei na nona ituvatuva lagilagi ni veivakabulai na Tamada Vakalomalagi.
Au dau vakataroga wasoma se rawa vakacava ni ra bula na tamata ni sega na inuinui e kauta mai na kena kilai na ituvatuva ni veivakabulai kei na itavi bibi ni nona Veisorovaki na iVakabula ena ituvatuva ko ya. Au tomana na noqu ivakadinadina ena vakavinavinaka ki na nona na noda parofita lomani, o Peresitedi Thomas S. Monson, ka a vakadinadinataka ena qaqa: “Ena vukui Koya ka a sereki keda mai na mate tawayalani, io ko Jisu Karisito, au vakadinadinataka ni o Koya na qasenivuli ni dina—ia e levu cake o Koya mai na qasenivuli. O Koya na ivakaraitaki ni bula e vinaka sara—ia e levu cake o Koya mai na ivakaraitaki. O Koya na Vuniwai Levu—ia e levu cake o Koya mai na vuniwai. O Koya a vueta na ‘mataivalu lakosese’ ni kawatamata sai koya na iVakabula kei vuravura, na Luve ni Kalou, na Ravouvou ni Sautu, na Yalosavasava ni Isireli—io na Turaga sa vakaturi cake—ka a tukuna, ‘Koi Au na ivakatekivu kei na ivakataotioti; sai Au sa bula, sai Au sa vakamatei, sai Au na nomudou dautataro vei Tamada.’ [V&V 110:4].”10
Ni da vakasamataka na Nona solibula tawa tukuni rawa ena vukuda, sa dina sara e lima na malanivosa vakamosiyalo duadua a bau cavuta na iVakabula e vaqo: “Dou sa via lako tani talega koi kemudou?”11 Ni sa yaco mai na gauna dredre, sa rawa ni da digitaka me da vuki tani mai Vua ka sotava duadua ga na noda vakararawataki, se eda rawa ni digitaka me da vuki Vua kei na ituvatuva nei Tamada, ka kunea ni da na sega ni sotava “e dua na veivakararawataki, ena seyavu kecega ena rekitaki Karisito.”12 Na noqu masu vei keda kece me da ciqoma na veisureti ni sere tabu ni Siganisucu me “da mai vakarokoroko vua” kei na Tamada Vakalomalagi me baleta na nona ituvatuva uasivi sara ka lagilagi! Ena yaca i Jisu Karisito, emeni.