Aua le Matata’u
Uso e ma tuafafine pele, ua tatou potopoto i le po nei ona o lo tatou taufai fiafia i le Kerisimasi ma le vaitau o le Kerisimasi. O i ai ea se isi mea e sili atu ona matagofie i lo musika ma viiviiga o le Kerisimasi, o faatasiga a aiga ma uo, o laumata fiafia, ma le olioli naunautai o le fanau? O lenei vaitau o loo i ai se tomai paia e aumai faatasi ai i tatou o ni aiga, uo, ma nuu. Tatou te tulimatai atu i faafesuiaiga o meaalofa ma le fiafia i taumafataga o aso malolo fiafia. E mafai ona mafaufau le toatele o i tatou i nai mea e tatau ona tatou faia pe afai o le a faaatoatoa la tatou Kerisimasi.
I le A Christmas Carol, na tusia e le tusitala Peretania o Charles Dickens, na aofa’i ai e le tei o Scrooge le ofoofogia o lenei taimi paia o le tausaga ina ua ia fai mai, “Ou te mautinoa lava ou te mafaufau lava i taimi uma e oo mai ai le Kerisimasi … o se taimi lelei: o se taimi agalelei, lotofaamagalo, lotoalofa, ma fiafia: e na o le pau lea o le taimi ou te iloa, i le kalena umi o le tausaga, e foliga mai ai e lotogatasi uma alii ma tamaitai e tatala saoloto o latou loto na tapunia, ma mafaufau i [isi] tagata … e peisea’i o i latou moni lava o uso-a-malaga i le folauga e tasi o le olaga, ae le o se isi malaga e ese ai. Ma o lea … e ui lava e le i maua ai sa’u auro po o se siliva i la’u taga, ae ou te talitonu ua ia faia se lelei mo au, ma o le a faia lava se lelei mo au; ma ou te faapea atu, ia faamanuiaina e le Atua!” (A Christmas Carol [1858], 5–6).
I le avea ai ma se matua, ma o lea ua avea ma matua matutua, ua faamanatu mai pea le ofoofogia o le Kerisimasi a o ou matamata atu i la’u fanau, ma o le taimi nei o a latou fanau, o faamanatuina le soifua mai o le Faaola ma olioli i le mafutaga a le tasi ma le isi a o potopoto faatasi lo matou aiga. Ou te mautinoa ua outou matamata foi, e pei o au, i le olioli manino ma le ta’umamaina faaletalavou lea e tulimatai atu ai le fanau e olioli i lenei aso malolo faapitoa. O le vaaia o lo latou olioli e faamanatu mai ai ia i tatou taitoatasi Kerisimasi fiafia ua tuanai. Sa toe mataua foi e Dickens e faapea, “E lelei le toe avea ma tamaiti i nisi taimi, ma e le sili atu lava i lo le Kerisimasi, le taimi sa avea ai Lē silisili ese na Faavaeina lea aso, o se tamaitiiti lava ia.” (A Christmas Carol).
Sa ou ola ae e latalata i Los Angeles, lea sa siomia ai lo matou fale i togā moli, faatasi ma laau na matua lolo’u i le taufuifui i moli i lena taimi o le tausaga. E tasi le afiafi o Kerisimasi taitasi e valaaulia ai e ou matua aiga, uo, ma tuaoi e usu ni pese Kerisimasi ma fiafia i sina taumafataga mama. O se tumasani matagofie tele mo i matou uma, ma sa foliga mai e faitau itula ia pesepesega. O matou o le fanau, sa pepese i le umi matou te iloa ua tatau ai ona lava, ona matou sosola atu ai lea i le togā moli e taaalo ai.
Sa faapena foi ona ma tausi a’e ma lo’u toalua o Kathy le ma aiga i Kalefonia i Saute, e latalata lava i le matafaga. O le Kerisimasi iina sa faailogaina i laau pama e falala solo i le savili. O tausaga uma e tulimatai atu ai lava le ma fanau e o i lalo i le uafu e matamata ai i le solo faaletausaga a vaa i le Kerisimasi. E faitau selau vaa matagofie, e feemoemoai i moli o lanu uma, e faataaliolio i le uafu a o matou matamata atu ma le maofa.
O lea la ua matou nonofo nei i le Aai o Sate Leki, ua ma faia ai ma Kathy se tumasani o le ave o le ma fanau ma fanau a fanau i se faatinoga i le lotoifale o le tala (A Christmas Carol). O tausaga uma, pe a matou matamata ia Ebenezer Scrooge a o oo i lona suiga faavavega mai se tagata nofotoatasi lē alofa i se tuaoi fiafia na faatumulia i le olioli o le Kerisimasi, matou te lagonaina lava le uunaiga e suia auala ia avea ai matou taitoatasi e pei o Scrooge. Matou te lagonaina le uunaiga ia faia sina lelei teisi i o matou lava olaga e mulimuli ai i le faataitaiga a le Faaola o le alofamama i tagata uma.
O le agaga o le suiga o le vaitau o le Kerisimasi e mauaa i le mana togiola a Iesu Keriso e suia ai o tatou olaga mo le lelei atu. O le tala faapelepele o le soifua mai o le Alo o le Atua i le silia ma le lua afe tausaga talu ai i Peteleema o loo tusia i le tusi o Luka:
“O aso lava ia na oo mai ai le poloaiga a Kaisara Aokuso ia tusia uma ia le lalolagi. …
“Ua o uma atu foi i latou ia tusia, e taitasi i lana lava aai.
“Ua alu ae foi Iosefa mai Kalilaia, mai le aai o Nasareta, i Iutaia i le aai o Tavita, ua igoa ia Peteleema; …
“Ia tusia faatasi ma Maria lana ava sa faufautane ia te ia, ua to o ia.
“Sa i ai i laua, ona oo lea i ona po e fanau ai o ia.
“Ua fanau e ia lana tama ulumatua ua ia aui ia te ia i le ie, ma faataoto ia te ia i le fale povi, aua latou te le ofi i le fale e tali ai malo.
“Sa i le vao o lea nuu leoleo mamoe, sa nonofo ai ma leoleo po i lo latou lafu mamoe.
“Faauta foi, ua tu mai ia i latou le agelu a le Alii, ua pupula faataaliolio mai foi ia te i latou le pupula o le Alii, ua matua fefefe ai lava i latou.
“Ona fai mai lea o le agelu ia te i latou, Aua tou te matatau; aua faauta ou te aumai ia te outou le tala lelei e olioli tele i le nuu uma.
“Aua o le asō ua fanau ai i le aai a Tavita, lo outou Faaola, le Alii ia o Keriso.
“O le faailoga lenei ia te outou e iloa e outou le tama meamea ua aui i le ie, o loo taoto i le fale povi.
“Ona faafuasei lea ona faatasi mai ma le agelu o ‘au mai le lagi e toatele ua vivii i le Atua ua faapea ane,
“O le viiga i le Atua i mea aupitoaluga; ma le manuia i le lalolagi, o le finagalo alofa i tagata.” (Luka 2:1, 3–14).
Masalo sa muai vaaia e le agelu le muai fefefe o leoleo mamoe ina ua ia faaali atu ia i latou, ma tau atu ia i latou e “aua [le] matatau.” O le mamalu ofoofogia o le Atua, lea e susulu mai le avefeau faalelagi sa lei faamoemoeina, sa oo ai le lagona o le mata’u i o latou loto. Ae o le tala fou sa afio mai le agelu e faasoa mai, ia leai se mea e fefe ai. O le faafeagai lena—sa ia afio mai e faasilasila mai se vavega, ia aumai le tala lelei silisili, e tau atu ia i latou o le togiolaina o tagata ua amataina moni lava. E leai se isi avefeau muamua pe talu mai lea taimi na aumaia se faamanuiaga sili atu ona fiafia i lo lea. O le Alo e Toatasi na Fanaua o le Tama sa amataina Lana malaga faaletino: “Aua o le aso nei ua fanau ai i le aai a Tavita, lo outou Faaola, o le Alii ia o Keriso.” O tala moni nei o tala lelei e olioli tele ai.
Tatou te tofu fetaiai uma ma ni taimi i o tatou olaga e foliga mai ai ua le maua le olioli tele lea na folafola mai e le agelu. E noatia uma i tatou i vaivaiga ma faigata o le olaga—ma’i, toilalo, lē fiafia, ma i le faaiuga, o le oti. E ui e toatele tagata e faamanuiaina e ola i le saogalemu faaletino, ae o isi i nei aso e leai. E toatele e feagai ma faigata sili e faafetaia’ia manaoga o le olaga ma le taui faaletino ma faalelagona na te mafai ona aumaia.
Ae, e ui i faigata o le olaga, o le savali a le Alii ia i tatou taitoatasi e tutusa lava i le asō e pei ona sa i ai i leoleo mamoe sa leoleo po i le lua afe tausaga talu ai: “Aua [le] matatau.” Masalo o upu a le agelu ia aua le matatau ua sili atu ona fitoitonu ia i tatou i aso nei nai lo le taimi na faatoafilemuina ai le uluai matatau o leoleo mamoe mo lo latou lava saogalemu lea na aumai e le uluai po o le Kerisimasi. Pe o le uiga foi o lana fetalaiga mo i tatou ia malamalama ona o le Faaola, o le a le manumalo ai lava le fefe? o le faamalosia o lena fefe sili e lē tāitāi faamaoniaina? e faamanatu mai ia i tatou e leai se faafitauli faalelalolagi e tumau, e leai se tasi o i tatou e le togiolaina?
O le meaalofa aupito sili e foaiina mai i le Kerisimasi o le a avea pea ma meaalofa lea na foai mai e lo tatou Faaola Lava Ia: O lona filemu atoatoa. “Ou te tuuina atu ia te outou le [filemu]; o lo’u [filemu] ou te avatu ai ia te outou; ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” (Ioane 14:27). E oo lava i se lalolagi e foliga mai e le maua se filemu, o le meaalofa a le Faaola o le filemu e mafai ona ola i o tatou loto e tusa lava po o a o tatou tulaga. “O le [filemu] foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu” (Filipi 4:7). Afai tatou te taliina le valaaulia a le Faaola e mulimuli ia te Ia, o le fefe faaumiumi e tafiesea e faavavau. Ua malupuipuia lo tatou lumanai. O “tala lelei [nei] e olioli tele ai i nuu uma.” “Aua e te fefe,” sa faamanatu mai e le perofeta o Isaia ia i tatou, “aua ou te ia te oe; aua le fetepatepai, aua o au o lou Atua, ou te faamalosia oe; e moni ou te fesoasoani ia te oe, e moni ou te taofia oe i lo’u lima taumatau e i ai le amiotonu” (Isaia 41:10).
Ona o le soifua mai o le Faaola i le lua afe tausaga talu ai i Peteleema, o loo i ai se faamoemoe—ma le anoanoai o isi mea. O loo i ai le togiola, toomaga, manumalo, ma le manuia. “E toilalo le measese, e manumalo le mea sao” (“I Heard the Bells on Christmas Day,” Hymns, no 214). E leitioa faafuasei ona oo mai au o agelu o le lagi e fai ma faamamafa faalelagi i le faasilasilaga a le agelu e uiga i le soifua mai o le Faaola, ma vivii, “O le viiga i le Atua i mea aupitoaluga; ma le manuia i le lalolagi; o le finagalo alofa i tagata.” E leai se isi savali e sili atu ona mautinoa i lo lenei. E leai se isi savali e sili atu ona faatumulia i le finagalo alofa i tagata i lo lenei.
Ia avea lenei vaitau ma se tasi o vaitau o le filemu ma le olioli mo outou ma e pele ia te outou, aua ua fanau mai mo i tatou i lena aso i le aai o Tavita se Faaola, o le Alii ia o Keriso. I le suafa o Iesu Keriso, amene.