Outou Faamaoni O Mai [Tatou Vivii ia te Ia]—ma le Fuafuaga!
E pei o le toatele o outou, o lou toalua aulelei, o Craig, ma au [ma te] matua fiafia i musika paia o le Kerisimasi. A ma faia se lisi o [pese] ma te fiafia i ai, e mautinoa e aofia ai le “Outou Faamaoni O Mai.” O ona upu “fiafia” ma “alalaga” e tau mai ia tatou “o mai,” “vaai,” ma “vivii” lo tatou Faaola, o Iesu Keriso—le “Tupu ua fanau mai.”1 Ou te mautinoa, a o aoaoina e agaga i le muai olaga le fuafuaga o le faaolataga, e le gata ina tatou vaai ma vivii ae alalaga foi mo le olioli ina ua Ia ofoina ma le naunautai ma le lotomaualalo o Ia Lava e avea ma Faaola o le lalolagi.2 I le fuaitau sili ona manavaina, sa Ia fetalai ma le agamalu, “O a’u lenei, auina atu a’u.”3
Ua apoapoai i tatou e le Aposetolo o Peteru ia “saunia pea lava outou e tali atu … le faamoemoe o loo ia te [i tatou] .”4 Ao ou tauina atu ni nai manatuaga patino o le Kerisimasi, ou te faamoemoe e mafai ona e iloa le mafuaaga o le aisea ua ou maua ai le faamoemoe i le Faaola, i le “Atua [lo tatou Tama Faavavau, o lē] ua alofa i le lalolagi, ua ia au mai ai lona Atalii e toatasi,”5 ma i le fuafuaga o le fiafia matagofie ma le atoatoa a le Tama.
Manatuaga o le Kerisimasi Numera 1
Ina ua 14 ou tausaga, sa nonofo lo matou aiga i Niusila. Sa talavou lou tama i lona 30 tausaga ina ua valaauina e auauna iina o se peresitene o le misiona.
Na oo mai le taimi o le Kerisimasi, ma sa matou taumafai pea ma ou tei e faamasani i la matou fale fou. Sa faigata mo au—o se talavou laitiiti—le aluese mai le aiga, o uo, ma auaiga. Sa ou faanoanoa, i le misia o vaaiga masani, o leo, ma fiafia o le Kerisimasi—o le musika, o moli, le laau Kerisimasi, o le aisa, aemaise le aiga. Sa ou misia tausoga faapelepele, o loomatutua ma toeaina o aiga o e sa ou iloa o le a vave ona potopoto i le fale o Tamamatua Kjar (pronounced “care”—my father’s father) i Sate Leki mo le pati faaletausaga a le aiga o Kjar mo le Kerisimasi.
O le vaeluapo o le Kerisimasi i le 1966. Sa ou auai atu ma le musua i lou aiga ma faifeautalai mo se afiafi faaleaiga i le fale o le misiona, ma le talitonuga o lenei potopotoga o le a, i le mea sili, o se suitulaga le talafeagai mo le pati faaleaiga a Kjar lea sa ou matuai manao ia i ai. Out e le manatua lelei le taimi na tatagi ai le telefoni, ae o lena telefoni na suia vave ai ou lagona faaletalavou, ma tumu ai au i le alofa mo lou tama pele ma le faanoanoa i lou manatu faapito na i ai.
Na sau le valaau mai le toeaina o le matou aiga o Joe (le uso o lou tama), e tau mai ia i matou o lo matou Tamamatua faapelepele, lē manatu faapito, galue malosi, tausi feagaiga o Kjar na faatoa mafatia i le pepe o le tino ma o loo taoto i le falemai. Na vave oo mai i lou mafaufau lenei taitai o le aiga e fiafia e pue ata, lelei le musika, malie, matou te alolofa faapelepele i ai! Sa iloa lelei le le mautonu o Tama ina ua foi mai le telefoni, ae sa ia toafimalie, tu sa’o, ma faasoa lana molimau faamaoni i le fuafuaga a le Tama ma lona faatuatua i le matafaioi taua a le Faaola e uiga i ai. Na pai mai lana molimau i lou loto tiga.
Ma le faanoanoa, e lei manuia Tamamatua. Sa ia maliu i le aso na sosoo ai. O le Aso Kerisimasi i Niusila ae o le Vaeluapo o le Kerisimasi, le aso sili ona fiafia i ai Tamamatua i le tausaga, i le Aai o Sate Leki. O lona maliu o lou aafiaga muamua o le toesea o se tasi e latalata ma pele ia te au. E ui sa ou faavauvau i lona toesea, sa faamanuiaina ma lagolelei ona o lou malamalama i le fuafuaga matagofie o le fiafia. Sa ou lagona le faamautinoaga ou te toe vaai ia Tamamatua pe a ou ola i le ala na ia soifua ai. Ou te manatu sa ou le malamalama atoatoa, i lena tulaga i lou olaga, le vaega taua na faia e le Faaola ma Lana taulaga togiola i le mafai ai mo au ona toe faatasia ma e pele i se aso. Ae ua lava lou iloa e olioli ai i le fuafuaga. Ua lava lou iloa e vivii ai ia te Ia o le ona le soifua mai ua tatou faamanatuina.
Talu mai lena Kerisimasi ua leva, ua ou aoao atili i lo tatou Faaola, o Iesu Keriso. Sa aoao mai Peresitene Harold B. Lee: “O le Alo o le Atua … e ia te ia le mana e faia ai lalolagi, ma faatonutonu ai. Na afio mai o Ia iinei, o le Alo e Toatasi e faataunuuina se misiona, e avea ma se Tamai Mamoe na fasia talu ona faavaeina le lalolagi, ina ia aumaia le faaolataga i tagata uma. Na Ia tatalaina le faitotoa i le toetutu, e ala i le tuuina atu o Lona soifua ma aoao mai le ala tatou te maua ai le ola faavavau. … O ia lena o Iesu i Lona matagofie uma.”6
Manatuaga o le Kerisimasi Numera 2
O le isi manatuaga faamomoiloto o le Kerisimasi na tupu i le 1984, ua mafua ai ona toe taua le tuputupu ae o lou agaga faafetai mo le Faaola ma le fuafuaga matagofie o le faaolataga. Sa 32 ou tausaga, ua faaipoipo i lau tane pele, ma faamaoni, ma le tina o fanau pele laiti e toafa, e i le va o le tolu ma le sefulu tausaga. E tolu vaiaso a o lei oo i le Kerisimasi, sa matou maua ni talafou mai le fomai sa suia ai o matou olaga, ina ua tau mai e le fomai o au ua maua i le “kanesa” ao ma tau fai autilo ma Craig i le tasi ma tauivi e taofia loimata, ma mafaufau pe faapei le ma lumanai. Peitai, o le isi lagona na sosoo ai, o le suamalie o le “manuia … o loo silisili lava i mea uma e manatu i ai”7 ona o lo ma faatuatua ia Iesu Keriso ma i le fuafuaga o le Tama.
E ui sa avea Craig ma epikopo o la matou uarota i lea taimi, sa ma filifili e na o le ma aiga e tau atu i ai le tala ina ia tausia pea le tulaga masani o mea mo lo ma fanau. I le aluga o na vaiaso e ono ao le i oo i le Kerisimasi, sa ou aveina le taavale toetoe o aso uma i le sinou ma le aisa, mo togafitiga i le falemai—ao feauauai o matou tina ma uso le manatu faapito e fesoasoani i le aiga. O se taimi faigata, ae a ou mafaufau i lena Kerisimasi e le mafai ona faamatala le loloto o lou faafetai mo le taulaga togiola a lo tatou Faaola, o Iesu Keriso, ma le “fuafuaga alofa mutimutivale a le … Foafoa Silisiliese.”8
I le iloaina atonu e sili atu nai lo se isi mea le maaleale o le olaga, na sili atu ona patino le fuafuaga a lo tatou Tama Faalelagi na lo le taimi muamua. Sa ese le Kerisimasi i lena tausaga. I le tele sa ou fiafia ai i mea uma e uiga i le Kerisimasi, na o le pau mea sa foliga e taua ia te au o lau faaipoipoga e faavavau, o lou aiga, ma lou faatuatua ma le molimau i lou Tama Faalelagi, Iesu Keriso, ma le fuafuaga o le faaolataga.
I se tasi aso a o ou malolo i le fale, ao mafaufau i lumanai a o ma fanau laiti e toafa, sa ou autilo i le mekasini o le Friend ma sa taia ou mata i le vaega o se musika. Sa ou nofo i lalo i le piano ma ou tagi ao ou usuina ma lagona le savali o le pese o goto ifo i lou loto vaivai. Sa ou iloa e manaomia e le gata ina aoao atu lenei pese i le faitau selau o tamaiti Peraimeri o la matou uarota, lea sa ou galue ai o se taitai musika o le Peraimeri, ae e sili atu ona taua i fanau faapelepele e toafa sa nonofo i lo matou aiga.
Faapefea na faaali mai, e le Tama le alofa?
Na Ia auina mai le Alo ma le filemu.
Faapefea na faaali mai, e le Tama le ala?
Na Ia auina mai le Alo ia tatou iloa.
Faapefea na Ia ta’u mai le taulaga, maliu?
Na Ia auina mai Iesu e maliu mo tatou.
Le a le upu a le Tama? Ma tusi paia?
Ola pei o lona Alo, alofa i tagata.
Ola pei o lona Alo.9
Na aumai e lenei pese musia sina malamalama i le faapefea ona ou faaali atu i lou Tama Faalelagi lou agaga faafetai mo Lona Alo ma mo Lana fuafuaga. Sa ou lagona e tusa pe ou te le maua le avanoa e vaaia ai le tuputupu i le matutua o la ma fanau, a mafai ona latou iloa, malamalama, ma ola i aoaoga faavae faigofie ae loloto o loo maua i lenei pese paia, e mafai ona latou avea ma soo moni o Iesu Keriso.
Sa i ai se lagona taua sa lagonaina i le matou aiga i lena tausaga, sa matou manuia ai i le filemu ma alofa mo le tasi ma le isi e le mafaagaloina. Sa ou lagona e pei sa tuuina atu i la ma fanau se malamalamaaga taua o mea paia i lena Kerisimasi. Latou te lei faaalia muamua ma e lei faaalia lava le vaaiga o le soifua mai o Iesu ma se migao tele, se maofa ma se alofa sa tulaga ese mo lo latou tausaga laiti. Ao tofotofoina ma tuputupu ae i la matou tulaga faigata, sa sili atu ona manino lo matou iloa o musumusuga faaleagaga a o matou mafaufau loloto ma tuuina atu le agaga faafetai i lo tatou Faaola, o Iesu Keriso, ma mo le fuafuaga matagofie o le faaolataga a lo tatou Tama Faalelagi.
E masani ona ou mafaufau pe faapefea ona soifua tagata e aunoa ma le faamoemoe e oo mai i se malamalama i le fuafuaga o le faaolagata ma le matafaioi tutotonu o le Togiola a le Faaola i lena fuafuaga. Ou te faaopoopo atu ma le agaga faafetai lou molimau i lena mea o lo tatou perofeta pele, o Peresitene Thomas S. Monson, o le sa molimau ma le mamana: “O Ia na aveeseina i tatou mai le oti e le gata, o Iesu Keriso lava lea, ou te molimau atu o Ia o se faiaoga o le upumoni—ae sili atu o Ia nai lo se faiaoga. O Ia o le Matai o le olaga atoatoa—ae sili atu o Ia nai lo se matai. O Ia o le Fomai Sili—ae sili atu o ia nai lo se fomai. O ia na laveaiina ia ‘tagata na leiloloa’ o le Faaola lava lea o le lalolagi, le Alo o le Atua, le Alii o le Filemu, le Paia o Isaraelu—o le Alii toetu—o le na fetalai mai, ‘O A’u le muamua ma le mulimuli; o a’u o le o loo ola, o a’u o le na fasiotia; o a’u o lo outou fautua i le Tama.’[ MF&F 110:4 ].”10
Ao tatou mafaufau i Lana taulaga lemafaatusalia mo i tatou, e moni e mai i upu e lima faanoanoa sa fofogaina e lo tatou Faaola, e faapea: “Pe tou te fia o ese foi?”11 Pe a faigata taimi, e mafai ona tatou faia le filifiliga e liliuese mai ia te Ia ma tauivi ai na o tatou i o tatou faigata, pe e mafai ona tatou faia le filifiliga e liliu atu ia te Ia ma le fuafuaga a le Tama, ma le iloaina o le a tatou mafatia “i soo se ituaiga o puapuaga, vagana ai ua tofatumoanaina i le olioli ia Keriso.”12 O lau tatalo mo i tatou taitoatasi ia talia le valaaulia a le viiga paia o le Kerisimasi e “o mai, tatou vivii [ia te ia]” ma lo tatou Tama Faalelagi mo Lona fuafuaga atoatoa ma matagofie! I le suafa o Iesu Keriso, amene.