O Lē Agalelei

Saunia e Peresitene Dieter F. Uchtdorf

Fesoasoani Lua i le Au Peresitene Sili

Pe le o se taimi matagofie ea lenei e fiafia ai i lenei afiafi matagofie i le i ai faatasi ma lo tatou perofeta pele, o Peresitene Thomas S. Monson?

O le Kerisimasi o le vaitau sili lea ona ese o vaitau uma—o le taimi tatou te vaai atu ai i isi i ni vaaiga fou, o le taimi tatou te tatala teisi atu ai o tatou loto i le matagofie o loo siomia ai i tatou ma aapa atu i isi i sina agalelei teisi atu ma le agaalofa.

I le avea ma tagata matutua, afai tatou te laki, e mafai ona tatou maua sina vaaiga i lea taimi ma lea taimi, o le lagona o le toe avea tasi lava ma se tamaitiiti.

O le mafaufau o loo faia e se tasi tatou te alolofa i ai se mea faapitoa mo i tatou—ma lo tatou fiafia tele i mea faapitoa o loo tatou fuafuaina e faia mo i latou—e faamafanafanaina ai o tatou loto ma faatumulia i tatou i le alofa ma le fiafia. E faaopoopo atu i nei mea le fepulafi o moli, o teuga matagofie, o vaaiga faalelagi o le faatanoavao paia, ma e leitioa avea le Kerisimasi ma se taimi faapelepele o le tausaga.

Ioe, o loo i ai foi ma musika. E leai se mea na te faamamafaina le uiga loloto ma le agaga malu o le vaitau nai lo viiga o le Kerisimasi. Pe o fati e fiafia, faaoso manatu, pe tatou te manatua ai foi ni mea, o loo i ai se mea e uiga i le Kerisimasi e musuia ai musika mamalu. O nei fatuga matagofie o le Kerisimasi e siitia ai o tatou agaga, ma faamanatu mai ai ia i tatou le mafuaaga mo lo tatou fiafia.

O le asō ua matua faamanuiaina i tatou i le mauaina o le avanoa e faalogologo ai i musika faalelagi ua faatinoina e le Aufaaili i le Lotoa o le Malumalu ma le Aufaipese a le Tapeneko.

O musika e faatinoina e lenei vaega e matua paia lava lea ou te mafaufau ai lava e asiasi mai agelu o le lagi i lea taimi ma lea taimi e faafofoga ma vivii foi.

Carol of the Bells

O lea faatoa maea ona lagiina e le aufaipese se tasi o fatuga sili ona matagofie o le Kerisimasi ua tusiaina, o le “Carol of the Bells,” lea na muai faatinoina i le Iunaite Setete i le 1921.

I le taimi muamua lava, sa lei avea o se pese o le Kerisimasi. Sa faatatau i se pese Iukureini o ni seneturi anamua sa ta’ua o le “Shchedryk,” e masani ona faaliliuina “O Lē Agalelei.”

E masani ona usuina e aiga Iukureini lenei pese i le amataga o le tausaga fou. O uluai upu o loo faamatala ai se manulele e lele i totonu o le fale o se aiga ma muaitau atu le manuia lelei ofoofogia o loo faatalitali ia i latou i le tausaga o lumanai.¹

Ou te fiafia i le lagona o lena tala.

Ou te fiafia i lana savali o le faamoemoe ma le talitonuga.

Pe le o le savali ea lena o le Kerisimasi? E tusa lava pe ua foliga mai ua faigata tele le lalolagi—pe oo ina le lelei ni mea, pe a oo ina taumasuasua o tatou loto i le le fiafia ma le popole, i le lotolotoi o le faanoanoa ma le faavauvau—e mafai ona pepese i le “lalolagi ia fiafia” ma le “finagalo alofa i tagata”² ona o Keriso, na afio mai “e avatu le malamalama ia i latou o loo nonofo i le pouliuli.”³

O Se Taimi o le Agalelei

E maeu le talafeagai, i lena taimi, na muai faaulutalaina ai se tasi o a tatou pese faapelepele o le Kerisimasi “O Lē Agalelei.” I mea uma lava, o le Kerisimasi, o se taimi o le agalelei.

I le musuia ai i lena agaga, o nisi taimi tatou te faaaluina ai ni itula e saili ai mo le meaalofa atoatoa e avatu i a tatou uo ma aiga. Tatou te saili i ni auala e fesoasoani atili ai ma faafiafia atu ai. E uunaia i tatou e faaalu sina taimi teisi ma i latou tatou te alolofa i ai. E oo ina tatou iloa atu i latou o loo faanoanoa, ma i le tele o taimi tatou te faia nisi taumafaiga agalelei sili atu e fesoasoani ai ia i latou. O nei mea uma o lo tatou faataitaiga le a’u’a’u ae faamaoni o le agalelei o lo tatou Faaola, o Lona soifua mai o loo tatou saili e faamamaluina.

Ae tatou te iloa uma e tele foi lava ina faatuatuana’i ma oo ina leiloa le agaga paia moni o le Kerisimasi ona o le soona fai o faatauga, totogiina o aitalafu (ona o meaalofa), ma le soona pisi.

Ou te le manao e uunaia uiga faaGrinch, ae ou te fia tau atu o nisi o o’u manatuaga faapelepele o le Kerisimasi na maua mai i faafesuiaiga o meaalofa, o le fepisia’i solo o tagata, ma le auai i gaoioiga iti ma tetele faafiafiaina lea e o mai faatasi ai tagata i lenei taimi o le tausaga.

Ioe, e tele naua mafuaaga e olioli ai i nei mea. Ae e moni o loo tele naua.

O le mea lea, ou te valaaulia ai i tatou taitoatasi ia saili, sina taimi o lenei vaitau o le Kerisimasi, se taimi i le filemu o o tatou agaga e faamamalu ai ma ofo atu le lotofaafetai faamaoni i “Lē Agalelei.”

Sei o tatou mafaufau i le agalelei, faapelepele, ma le alofa mutimutivale le faatuaoia o lo tatou Tama i le Lagi.

A o tatou faia faatauga mo meaalofa—a o tatou foai atu ma mauaina ia meaalofa—ia tatou faaalu foi se taimi e mafaufau filemu ai i meaalofa matalasi a le Atua ua ia sasaa mai i o tatou luga, o Lana fanau.

O Le Meaalofa o le Lotofaafetai

Ou te manatu o le natura faaletagata o le le manatu mamafa i mea—e oo lava i mea e lemafuatiaina le taua. O se tasi lenei o lesona tatou te aoaoina mai le tala i lepela e toasefulu i aso o Iesu. Sa mafatia i se faama’i matuia ma lamatia lea na vavaeeseina ai i latou mai uo, aiga, ma le olaga lava ia, sa aioi atu nei lepela mafatia mo se faamalologa ma sa maua mai le Alo o le Atua.

E pei ona outou silafia, ina ua mavae lenei vavega mamalu, e toaiva lepela sa o atu lava i latou i o latou ala ma le fiafia i lo latou manuia lelei.

E na o le toatasi na toe foi ane [ia Iesu].

Sa na o le tasi mai le toasefulu na faaalu le taimi e faailoa atu ai le lotofaafetai. E na o le tasi mai le toasefulu, “ua na iloa ua faamaloloina ia, ona toe foi mai lea o ia, ua vivii atu i le Atua ma le leo tele; ua faapa’u fao ia i ona vae, ua faafetai mai ia te ia.”⁴

O sea faailoaga faamaulalo o le lotofaafetai mama e foliga mai ua seasea maua i nei aso e pei ona sa i ai i lenei tala, ae o loo tupu pea. Ma a tupu, e ootia o tatou loto ma musuia i tatou e faitau o tatou lava manuia.

O le tasi faataitaiga sa ou aoaoina talu ai nei e uiga i se tagata na nofo i Aferika. Ona o se faaletonu faaletino, sa le mafai ai lava ona savali lenei alii. Sa faamalosia ai o ia e faaalu le tele o lona taimi i le fale o ona matua. Sa le mafai ona ia galue; sa le mafai ona tafafao ma ana uo; sa le mafai ona ia faia ni mea faigofie ia tatou te le manatu mamafa i ai.

Ona ia faalogo lea i se mea ofoofogia! Sa avatu e Le Ekalesia a Iesu Keriso o le Au Paia o Aso e Gata Ai se uta o nofoa faataavale i se gaoioiga e le mamao mai lona fale!

Sa ia talosaga atu i sana uo e ave o ia i lea gaoioiga, ma o iina sa ia matamata ai i le toatele o alii, o tamaitai, ma tamaiti e le atoatoa le malosi ua tasii atu i totonu o nofoa faataavale fou ma iila.

Oka sona fia manao e nofo i totonu o se tasi o na nofoa! E maeu le suia ai i lona olaga pe a mafai ona ia nofo ai, ma i lona lava malosi, ma minoi!

Sa ia faatalitali i le laina seia oo lava ina oo mai ia te ia.

E toalua ni alii na siiina o ia i luga i le nofoa ma, mo le taimi muamua i lona olaga, sa ia minoi ai!

I le taimi muamua sa ia minoi ma le popole. Ae ina ua ia tau masani i le nofoa faataavale, sa amata ona ia alu saoasaoa.

Sa ia liliu, faataamilo, faaoso saosaoa, ma faaoso pa’u lua. Sa ia talotalo atu ma le naunautai i lima uma e lua a o ia pasia saoasaoa lana uo.

Sa lele o ia!

Sa vaaia i ona foliga le fiafia ma le olioli tele.

Peitai, ina ua mavae sina taimi, sa ia faataavale lemu mai le nofoa i le mea sa i ai ma se foliga faanoanoa ua saunia e sii ese mai o ia i fafo.

“O le a lau mea na e fai?” sa fesili atu ai lana uo.

Sa ataata le alii lea ma faamimigi ona tauau. “Ua oo i le taimi o le isi tagata,” sa ia fai atu ai.

Sa tootuli atu le faifeautalai o galuega alofa a le Ekalesia i ona tafatafa ma faapea atu, “O oe e ana le nofoa faataavale.”

Sa le talitonuina e le alii lea mea. Sa ia manatu o lenei gaoioiga sa mo na o le faaaliga o le lagona o le tietie i se nofoa faataavale.

“E moni a o a’u e ana?” sa ia fesili ai.

“Ioe.”

“Ae e leai sa’u tupe.”

“O oe e ana. O se meaalofa mai tagata e alolofa ia te oe.”

Ina ua iu ina ia iloaina le moni o lea mea o loo tupu, sa tilotilo atu le alii lea i lana uo.

Sa ia tepa atu i le faifeautalai.

Sa ia taumafai e taofi ona loimata, ae sa le mafai. Ma a o ia tagi, sa ia ata i le olioli atoa i le mea ua ia lagonaina.

Sa fetagisi faatasi lana uo ma le faifeautalai ma ia.

“Faafetai lava,” sa ia musumusu atu ai.

Sa ia fusi uma i laua, nofo lelei i lana nofoa, ona “alaga lea ma le fiafia!” sa ia toe faataalise ese atu ai ma le fiafia tele.

“Ua mafai ona ou lele!” sa ia alaga ai a o ia masau solo i tua ma luma i le auala.

Sa malamalama lenei alii i le lotofaafetai.

O Le Alofatunoa o le Atua

Pe na tatou lagonaina ea lea lotofaafetai mama ma le lefaatuaoia? I lenei vaitau o le Kerisimasi, ma le tausaga atoa, ou te tatalo ina ia tatou manatuaina Lē Agalelei—lo tatou Atua, lo tatou Tama, lo tatou Leoleo Mamoe pele ma le Fautua.

Aua o Ia o Le Foai Mai Meaalofa!

O Ia o Lē Agalelei!

A tatou ole atu, o i tatou o Lana fanau mo se areto, Na te le aumai se maa.⁵ Ae, Na te aumai ia i tatou ni meaalofa e matua paia lava ma taua ia e sili atu ma lo tatou tomai e malamalama atoatoa i ai pe mafaufauina. Na te foai mai ia i tatou le:

Filemu.
Olioli.
Manuia tele.
Puipuiga.
Tausiga.
Finagalo Alofa.
Faamoemoe.
Talitonuga Maumaututu.
Alofa.
Faaolataga.
Ola e Faavavau.

Ua tatou faamanatuina i lenei vaitau o le Kerisimasi le meaalofa aupito silisili o meaalofa uma, le meaalofa e tasi ua mafai ai ona maua isi meaalofa uma—o le soifua mai o le pepe o Peteleema. Ona o Ia, “Ua leai se manumalo i le tuugamau, ma ua tofatumoanaina ia Keriso, le tui o le oti. O ia o le malamalama ma le ola o le lalolagi; ioe, o se malamalama e le gata, e le mafai lava ona faapouliuligia; ioe, ma se ola foi e le gata, e le mafai ona toe i ai se oti.”⁶

Ou te sii ae lo’u leo i viiga fiafia i le Atua mo Lona agalelei.

Ua Ia laveaiina i tatou mai le tuuatoatasi, leai o se faamoemoe, ma le le agavaa.

Ua Ia faapupula o tatou mata ma tatala o tatou taliga [i upumoni]. Ua Ia liua le pouliuli i le malamalama, le faanoanoa i le fiafia, ma le tuuatoatasi i le alofa.

Ua Ia faasaolotoina i tatou mai se tuanai o le pologa ma le manatu faapito ma tatala le ala i se taimi nei o le faamoemoega ma se lumanai o le fiafia.

O Ia lava lea o Lē o loo tatou tapuai i ai.

O lo tatou Atua lea.

O Lē Agalelei.

O Ia lea o le alofa i Lana fanau ma le atoatoa tele lea na Ia ofoina mai ai Lona Alo Pele e Toatasi ina ia le fano i latou o e talitonu ae maua le ola e faavavau.⁷

Ona o Iesu Keriso, e le manaomia ai ona tatou lagona e pei o ni tagata ese. O le a tatou tutu faatasi ma e amiotonu pe a toe foi mai o Ia! Ma ona o Lona soifua atoatoa ma le taulaga e faavavau, e i ai se aso o le a tatou tutu ai faatasi ma agelu o le lagi ma maua faatasi ma i latou se meaalofa e faavavau.⁸

Tau ina ia tatou, i lenei vaitau o le Kerisimasi, ona manatuaina lo tatou Tama Faalelagi agalelei ma avatu i ai le faafetai loloto ma le faamaoni i lo tatou Atua Silisiliese, o le ua foaiina mai i Lana fanau apaau e felelei ai. O lau tatalo faamaualalo ma le faamaoni lea ma la’u faamanuiaga faamaoni i lenei taimi o le Kerisimasi ma aso uma, i le suafa o lo tatou Faaola pele, o Iesu Keriso, amene.