O Le Malamalama ma le Ola o le Lalolagi
O le tala sili ona masani ma faamemelo i ai o le tala i le soifua mai o le Faaola i le mataupu e lua o le Luka i le Feagaiga Fou. E faatumulia lava au i le lotofaafetai i taimi taitasi ou te faitau ai e uiga ia Iosefa ma Maria o loo malaga i Peteleema, le faatanoavao faatauvaa, le soifua mai faatauvaa o le Alii o Iesu Keriso, le au leoleo mamoe, ma agelu o loo folafolaina “tala lelei e olioli tele ai … i nuu uma” (Luka 2:10).
O le toefuataiga o le talalelei i aso e gata ai ua maua ai se tala faaopoopo taua o le soifua mai o le Faaola i le Tusi a Mamona. O la’u savali ua faamamafa ai lenei faamatalaga faaopoopo e uiga i le uluai Kerisimasi. A o tatou iloiloina faatasi le tala, ou te valaaulia oe ina ia vaai faalemafaufau oe lava ia i nei mea na tutupu ma ia le tau na ona faalogologo i upu.
Ou te tatalo i le Agaga Paia ia fesoasoani atu ia te oe ia faatatau nei mau ia te oe ma lou aiga (tagai 1 Nifae 19:23) ma faatumulia tou loto i le agaga moni o le Kerisimasi.
Samuelu le Sa Lamana
E amata le tatou tala i le laueleele o Saraemila i nai tausaga a o lumanai ai le soifua mai o le Faaola. Sa oo mai Samuelu le sa Lamana i tagata e talai mai le salamo ma le valoaga ia Keriso. Faamolemole ia taumafai e mafaufau e tai 10 tou tausaga le matutua ma o se tasi o le motu o tagata o loo faalogologo i se perofeta a le Atua o muai tau atu mea o le a tutupu i le lumanai.
Sa tautino e Samuelu: “Faauta, ou te tuu atu ia te outou se faailoga; ona toe lima ni tausaga, ma faauta, ona afio mai ai lea le Alo o le Atua e togiola i latou uma o e e faatuatua i lona suafa.
“Ma faauta, o le mea lenei ou te tuu atu ia te outou mo se faailoga i le taimi o lona afio mai; aua faauta, o le a i ai malamalama tetele i le lagi, e oo ina leai se pogisa i le po ae lei afio mai o ia, e oo ina foliga mai i le tagata e peiseai o le ao.
“O lea, o le a i ai se ao e tasi ma se po ma se ao, e peiseai ua tasi le ao ma ua leai se po; ma o lenei mea o le a avea ma se faailoga ia te outou. …
“Ma faauta, o le a i ai se fetu fou e oso mai … ; ma o lea foi o le a avea mo se faailoga ia te outou (Helamana 14:2–5).
O Le Soifua Mai o le Faaola
A o gasolo le taimi, “sa amata ona faataunuu atoatoa tele ai valoaga a perofeta; ona sa amata ona faia o faailoga tetele atu ma vavega tetele atu i totonu o le nuu” (3 Nifae 1:4).
Mafaufau i tausaga e lima ua pasi atu ma pe ā nei ma le 15 tausaga lou matua. E mafai ona e manatuaina lelei valoaga a Samuelu a o e mafaufau i tulaga o le taimi nei o loo e soifua ai.
“Peitai sa i ai ni isi o e sa amata ona fai mai ua mavae le taimi mo le faataunuuina o upu, ia sa tautala i ai Samuelu, le sa Lamana.
“Ma sa amata ona latou olioli i o latou uso, fai mai: Faauta ua tea atu le taimi, ma ua le faataunuuina upu a Samuelu; o lea, ua le aoga lo outou olioli ma lo outou faatuatua i lenei mea.
“Ma sa oo ina latou faia ai se faanunununu tele i le laueleele atoa; ma o tagata o e sa talitonu sa amata ona faanoanoa tele, nei i ai se ala atonu e le taunuu ai ia mea sa tautalagia.
“Ae faauta, sa latou vaavaai ma le mausali pea mo lena ao ma lena po ma lena ao lea e tatau ona avea e pei o se aso e tasi e peiseai ua leai se po, ina ia latou iloa ua le [iuvale] lo latou faatuatua.
“O lenei sa oo ina sa i ai se aso sa tuupoina e e sa le talitonu e fasioti ai i latou uma o e na talitonu i ia uputuu, vagana ai ua taunuu le faailoga lea na tuu mai e Samuelu le perofeta” (3 Nifae 1:5–9).
Mata e mafai ona tatou amata malamalama i mea semanu e oo i ai le faatalitali i le faailoga o Lona afio mai ma feagai foi ma le taimi faatapulaa e oti ai? Faamata tatou te tutu mausali ma le le mafaagaeetia i le faatuatua, pe o le a tatou femoumouai ma solomuli i tua?
O le mea moni, na iu lava ina oo le faailoga o le soifua mai o Keriso lea na muai tau mai e Samuelu. I se siosiomaga o sauaga faalelotu ma le talavou o tausaga pe a ma le 15, na e maofa ai i se tasi afiafi a o goto ifo le la ae sa leai se pogisa.
“Ma sa amata ona ofo o tagata ona sa leai se pogisa ina ua sau le po, …
“Ma sa amata ona latou iloa, ua lata ona afio mai le Alo o le Atua; ioe, … o tagata uma …. sa matua ofo tele sa latou pauu i le eleele. …
“Ma sa oo ina sa leai se pogisa i lena po atoa, ae sa malamalama e pei o le aoauli. Ma sa oo ina toe oso mai le la i le taeao, … ma sa latou iloa o le aso lea o le a fanau mai ai le Alii, ona o le faailoga lea na tuuina mai.
“Ma ua faataunuuina, ioe, mea uma lava, o mea auiliili taitasi, e tusa ma upu a perofeta.
“Ma sa oo ina oso mai se fetu fou e tusa ma le upu” (3 Nifae 1:15, 17, 19–21).
O le aso sa soifua mai ai Iesu o se aso o le laveaiga mo e talitonu i le Lalolagi Fou. O le malamalama o le faailoga lea o le soifua mai o le Faaola na laveaiina moni ai lava o latou ola.
O Le Maliu ma le Toetu o le Faaola
Ia mafaufau la e faapea ua silia ma le 30 tausaga ua mavae ma ua e tulata atu i lou 50 tausaga. O loo e manatuaina pea ma le manino ia aoaoga a Samuelu ma ou aafiaga a o e talavou ina ua oo mai le faailoga o le soifua mai o le Alii.
O se tasi o faailoga o le maliu o Keriso na muai tau mai e Samuelu o le tolu aso o le pouliuli tele (tagai Helamana 14:27; 3 Nifae 8:3).
“Ma sa oo ina i ai se pouliuli mafiafia i luga o le laueleele atoa, sa oo ina mafai ona pai o tagata sa i ai o e sa lei pauu i le ausa o le pouliuli;
“Ma sa le mafai ona i ai o se malamalama, ona o le pouliuli, po o ni moli gao, po o ni sulu; pe na mafai foi ona tutu o se afi … , ina ia le mafai lava ona i ai o se malamalama;
“Ma sa leai se malamalama sa vaaia, po o se afi, po o sina emoemo, po o le la, po o le masina, po o fetu, ona o le tetele naua o le pouliuli lea sa i ai i luga o le laueleele.
“Ma sa oo ina i ai pea lenei pouliuli mo le va o aso e tolu ma sa leai se malamalama na vaaia” (3 Nifae 8:20–23).
Faamata e faape’i se aafiaga na oo i ai na aso e tolu o le pogisa lemafaamatalaina, ona oo lea i se taimi mulimuli ane, ua faapotopoto le motu o tagata e 2,500 i le malumalu i le laueleele o Nuumau? Mata e mafai ona e vaai faalemafaufau i le mamalu o lea taimi a o afio ifo le Faaola mai le lagi ma tautino atu, “Faauta, o A’u o Iesu Keriso. … o A’u o le malamalama ma le ola o le lalolagi”? (3 Nifae 11:10–11; faaopoopo le faamamafa).
I lea faapotopotoga faapitoa i le malumalu, o uluai upu e lua sa faaaogaina e le Faaola e faamatala ai o Ia lava, “o le malamalama.” Sa valoia e Samuelu o se faailoga o le malamalama. O le faailoga o le malamalama sa tuuina atu i le soifua mai o le Faaola. Mo i latou i le motu o tagata na faapotopoto, sa tafiesea ai le pouliuli matuia ma le fefe e le malamalama moni, o Iesu Keriso lava lea.
O le tala o le uluai Kerisimasi i le Tusi a Mamona ua fesoasoani ia i tatou ia aoao ma malamalama atili atoatoa e faapea o Iesu Keriso o le “malamalama ua susulu i le pouliuli” (tagai MF&F 10:57–61). I vaitau uma o o tatou olaga, i tulaga uma tatou te ono fetaiai, ma i luitau taitasi tatou te ono feagai ai, o Iesu Keriso o le malamalama lea e aveesea le fefe, maua ai le faamautinoaga ma le taitaiga, ma fotu mai ai le filemu ma le olioli tumau.
O le tele o a tatou tumasani lemafaagaloina ma le tumau pea o le Kerisimasi ua aofia ai ituaiga eseese o [malamalama] o moli—moli i luga o laau, moli i totonu ma luga o fale, moligao i luga o a tatou laulau. Tau ina ia faamanatu mai e moli matagofie o vaitau uma o aso malolo ia i tatou o Ia o le puna o le malamalama uma.
Ua sulugia ou ala
I le sulu e faavavau.
O tausaga o faamoemoe;
Taulau ia te oe.
(“Peteleema e, le Aai,” Viiga, nu. 122).
Ou te molimau atu o Iesu na soifua mai i Peteleema, na faataunuuina ma le manumalo Lana misiona ma le galuega i la le tino, ma i le avea ai ma o tatou Alii toetu, o loo soifua o Ia i le aso. Ou te molimau atu ai i le suafa paia o Iesu Keriso, amene.