Yaco mo Tamata O a Nakiti mo Vaka
Dua na Bogi kei Peresitedi Russell M. Nelson
Lotu ni iTabagone Qase Cake e Vuravura Raraba • 10 ni Janueri, 2016 • Brigham Young University–Hawaii
Kemuni na taciqu kei na ganequ, sa ka taleitaki dina vei keirau na tiko vata kei kemuni ena siga ni Vakacecegu oqo. Keirau lomani kemuni! Ka keirau vakabauti kemuni! Niu cauraka eso na vakasama, au masuta mo ni vakayagataka na nomuni galala mo ni sureta na Yalo Tabu me vakavulici kemuni.1
Taumada, Vakanuinui Marautaki ni Yabaki Vou! Sa dua tale na yabaki vou. O sa cakava beka eso na inakinaki ni Yabaki Vou? Ka o sa voroka oti tale beka e veimama? O vinakata beka me yabaki vinaka duadua ni nomu bula oqo? Na yabaki o taumuria—vakavinaka cake kina mai na veigauna sa oti—na inakinaki ka vakaibalebale vakalevu duadua vei iko? Au vinakata meu vosa vei kemuni ena dua na ka au vakabauta ni rawa ni veivuke. Me da raica mada kevaka e rawa ni o ni kila se cava oya:
Vakasamataka mada na marama ka, a vosota tu ena loma ni 12 na yabaki, e dua na tauvimate sega ni valuti rawa. A dolele yani me tara na bele ni nona isulu na iVakabula. Oya duadua ga na madigi me bula kina.2
Vakasamataka na tamata ena tobu mai Peceseita, ka a tauvi koya tu ena 38 na yabaki e dua na mate ka se bera vakadua ni sobuta rawa i liu na wai ni veivakabulai oya.3
Vakasamataki ira na nona tisaipeli na iVakabula, ni caroba wavokita na nodra waqa ni qoli lailai na ua lelevu vakadomobula, era qolouvaka yani vua na iVakabula: “Ko sa wele beka ga ni da sa mate?”4
Na cava era tautauvata kina na tamata oqo?
Era gagadre vakalevu! Gadreva vakalevu me vakabulai ira na iVakabula, me vukei ira, savai ira, tuberi ira, taqomaki ira, ka vakabulai ira! Era gadreva vakalevu me vukei ira o Jisu Karisito me ra cakava na veika era a sega vakadua ni cakava rawa vakataki ira. Era dui gadreva vakalevu me tu ena nodra bula na igu kei na mana e tu vua na iVakabula. O kila beka na mataqali vakanananu oya? Vakabauti au, au kila.
O sa gadreva vakalevu beka mo vakaotia e dua na itavilesi ni sa roro totolo mai na siga me solilesu kina—se o sa pasitaka oti. E rairai o gadreva vakalevu tiko me dua e rawa ni ciqomi iko vakavinaka,me lomani iko dina. E rairai o gadreva vakalevu tiko ena gauna oqo mo curu rawa ena dua na univesiti se mo kunea e dua na cakacaka, se dua na vanua mo tiko kina, gadreva vakalevu me so na itokani vou ka mo kunea nomu itokani tawamudu.
Ia, oqo na itukutuku vinaka: Na gagadre vakalevu e rawa ni dauveivakauqeti cecere.
E matata ni a sotava na Parofita o Josefa Simici na gagadre vakalevu kaukauwa ena Valeniveivesu mai Liberty. A vakatakekere vua na Turaga, “Oi kemuni na Kalou ko ni sa tiko evei?”5 Ena vuku ni gagadre vakalevu vakayalo kaukauwa vakaoya, a ciqoma kina na parofita eso na ivakatakila cecere ni itabagauna oqo.
Ni da gadreva vakalevu me da tuberi mai lomalagi, eda na cakacaka vakaukauwa cake mai na veigauna kecega me rawa ni da rogoci mai lomalagi. Ni da gadreva vakalevu me da bulabula vinaka vakayago, eda na kana ka vakaukauwa yago me veiraurau. Kua na iulubale! Ni da gadreva vakalevu me levu noda ilavo, eda na muria sara vakavinaka na nona lawa vakailavo na Turaga—sai koya dina, na ikatini!
Vakasamataka mada na rai nei Peresitedi George Q. Cannon me baleta na ikatini ena gauna se cauravou dravudravua kina. Ni vakacaucautaka nona bisopi na levu ni ikatini e solia tiko na cauravou dravudravua o George, a sauma vaqo o George: “Isa bisopi, au sega ni sauma tiko na ikatini ni ka au rawata. Au sauma tiko na ikatini ni ka au vinakata meu rawata.” Ena yabaki sara ga e tarava a rawata o George na levu saraga ni ilavo a sauma na kena ikatini ena yabaki i liu!6
Ni da gadreva vakalevu me da vaka na tamata eda a sucu me vaka, ena veisau na noda rai. Eda na yadracake mai na guiguileca vakayalo ka tura tu vakamaqosa na vunica, ka vakasauri eda sa raica na veika baleti keda, o ira na tani, kei na noda bula eda se bera vakadua ni bau raica. Sa tekivu me voleka sara ni rairai vakalialia na veika “lasa” kei na “veivakamarautaki” vakavuravura, se rerevaki vakayalo sara mada ga. Sa tekivu me da raica na nona ilawaki kei na nona dai na vunica ena kedra inaki dina—na veitemaki me da guilecava kina na keda ivakatakilakila kei na noda icavacava dina.
Sa tekivu me duatani noda vakayagataka noda gauna. Sa sega soti ni veiuqeti vakalevu na Facebook me vaka na noda tiko e valetabu. Eda sa vakila vakataki keda na dina matata a vakavuvulitaka e dua na peresitedi ni valetabu: “Ni da curuma na valetabu, eda biuta tu mai na vuravura ni matavulo.”7 Eda malele vakalevu cake ena dina tawamudu ena vakavulica vei keda na Turaga ena Nona vale tabu mai na veitukutuku butakatakata ena tabana vakaitukutuku ni bula veimaliwai, ka vakavuqa ni dau vovodea ka dragali ki na vakasama.
E dua na goneyalewa vuku vuli tiko e BYU e tukuna vei au na revurevu ca ni yalodei kei na marau a vakila kei na levu ni gauna a vakayagataka ena tabana vakaitukutuku ni veimaliwai. A vakalailaitaka na nona gauna ena Facebook kei na Twitter ka kaya: “Au vakila ni vinaka cake noqu raitayaloyalo ka makare noqu vakasama meu raica vakatitobu na veiulutaga ka veivosaki vakatitobu kei ira eso tale. Au sa rawa ni vakila ena gauna oqo ni kaukauwa cake na Yalotabu ena noqu bula, sai koya na ka vinaka duadua au rawa ni kerea.”
Ni da gadreva vakalevu me da tu ena keda ituvaki dina, eda na vakayagataka vakadodonu na tekinolaji. Kevaka o sega ni kila na kena icakacaka oqori, lako ki na LDS.org ka vulica.
Ni da gadreva vakalevu meda tisaipeli dina i Jisu Karisito eda a sucu mai me vaka, ena vakasauri noda kunea na yaloqaqa kei na yalodina me da biuta laivi na veika kece ena noda bula e sega ni vakalou ka tawasavasava! Ena veisau na noda lomasoli me da muria na nodra ivakasala na noda iliuliu. Eda na taroga na ivakasala ka taleitaka me da muria—vakamatailalai! Sa na seyavu yani na qaciqacia kei na dokadoka ka vakaisosomitaki ena yalomalumalumu. Sa na vakatikitikitaki na qaciqacia kei na dokadoka ena yalomalumalumu. Sa yaco na ivolanikalou me noda “ivurevure taumada” ni isaunitaro kei na vakacegu eda qai kila ni da dau vakasaqara tiko vakavuqa ena initaneti.
O na tuvakarau beka mo vakatovotovotaka mada ena 30 na siga?
E veisiga mo tekiduru ka vakavinavinakataka na Tamada Vakalomalagi me baleta na ivolanikalou. Tukuna Vua na taro o vinakata vakalevu duadua me saumi ena siga ko ya. Kerea me tiko kei iko na Yalo Tabu ni o wiliwili. Qai cega nomu ivolanikalou—dua ga na vanua e rawa—ka wiliwili me yacova ni o sa kunea nomu isaunitaro. 8Tovolea ena 30 na siga qai raica na ka ena yaco.
Ni da gadreva vakalevu me da tubucake ki na tamata e vinakata na Kalou me da vaka, eda na qai vakila beka ni bikai keda tu e dua na icolacola sega ni gadrevi. Na icolacola oqori e rawa ni mosi vakayalo ka dau salamuria tikoga na digidigi cala kei na ivalavala ca sega ni veivutunitaki. Na ka dina oya ni ivalavala ca sega ni veivutunitaki e vaka na makeneta me levu cake na ivalavala ca! Ni da gadreva me da veivutuni, ena gauna, me vakataka na tamana na Tui o Lamonai, eda sa via biuta kina na noda ivalavala ca taucoko9 (okati kina na noda ka taleitaki duadua), sa na lutu tani yani na lokuyara, dro na madua, ka da sa tuvakarau, nanamaki sara mada ga, me da lako—io, eda na via cici—vua na noda bisopi me baleta na veivuke eda gadreva me da veivutuni dina.
Ia, e vica wale na ka vakadeitaki ni bula oqo, e dua vei ira oqo: Sa vakadeitaki 100 na pasede ni kevaka eda sa veivutuni dina, ena vakasavasavataki keda ka vakabulai keda na iVakabula, ka taucoko vakadua!
E vakavuvulitaka o Elder D. Todd Christofferson: “Na Kaukauwa ni Nona Veisorovaki [na iVakabula] e rawa ni bokoca na revurevu ni ivalavala ca e tu vei keda. Ni da veivutuni, na Nona veisorovaki ena loloma e veivakadonui ka vakasavasavataki keda (raica 3 Nifai 27:16–20). E vaka ga eda a sega ni vakamalumalumutaki, e vaka ga eda a sega ni soli keda ki na veitemaki.”10
Kemuni na taciqu kei na ganequ, au yalataka vei kemuni ni dina oya! Se ivalavala ca levu sega ni veivutunitaki se malumalumu veivakaleqai ka vakatarabetaki keda tiko, eda na gadreva yadua na veivuke ni iVakabula me rawa ni da yaco me vaka na tamata eda a sucu mai me vaka. Ena sega ni rawa kevaka e sega Nona kaukauwa kei na mana.
Eda vakavinavinaka, ni sa sauma oti na iVakabula na isau ni veisolisoli kece sara ni Yalotabu eda na gadreva.11 Sa na vakatau vei keda me da kila ena masumasu se na isolisoli cava eda gadreva. Eda na gadreva beka na isolisoli ni bula vakaivakarau kei na yalomamarau. E rairai eda gadreva beka na isolisoli ni vosota vakadede, se na isolisoli me salavata kei na lawa ni tawamudu na noda gagadre ni veiyacovi, se na isolisoli me da vakabulai ena vuku ni nona ivalavala ca e dua tale kei na isolisoli me da vosota na tamata oya. De rairai eda na qai kila beka ni da na sega ni rawa ni bula tiko ena dua tale na miniti ke sega na isolisoli me sega ni yavalati rawa noda vakabauta na Turaga o Jisu Karisito. Ni da sa gadreva vakalevu e dua na isolisoli ni Yalotabu, oqori na gauna eda na qai masuta kina ena igu taucoko ni yaloda na isolisoli oya.12 Ka itukutuku cecere, ni veisolisoli vakayalo yadua ena kauti keda vakavoleka cake ki na keda ituvaki dina.
Kemuni na taciqu kei na ganequ, au dau lomana, na ka dina oya ni dua na siga o iko kei au e daru na veiraici mata kei na iVakabula vakataki Koya ena dua na veitarotarogi. Ni sa vakavotukana vei kedaru na dina oqo, e daru na tuvakarau me daru cakava na veika kecega e gadrevi me daru vakarau kina!
Ia, meu tinia mada ena dua na taro: Vakacava kevaka o na kila ni sa lesu oti ena vuravura oqo na iVakabula—ni sa sota oti o Koya kei ira eso na dau yalodina ni muri Koya ena vica na vakasoqoni lelevu vakasakiti13— na vakasoqoni e sega tu ni bau kila kina e dua na ka ko vuravura, okati kina na CNN kei na blogosphere. Kevaka o qai kila ni a sa tu oti e vuravura na iVakabula, na cava o na gadreva vakalevu mo cakava nikua, kei na cava o sa na tuvakarau tu mo cakava ni mataka?
Au masuta me na so na nomu gauna ni gagadre vakalevu mosimosi ka na biligi kemuni yani ena sala mo ni yaco kina me tagane ka yalewa a nakiti mo ni vaka. O iko dina na ka taleitaki! Kakua ni vakadonuya mo lailai sobu. Ena yaca tabu i Jisu Karisito, emeni.
© 2015 mai na Intellectual Reserve, Inc. Dodonu kece e taqomaki. Vakadonui me vakavalagi: 11/15. Vakadonui me vakadewa: 11/15. iVakadewa ni “Becoming the Person You Were Meant to Be.” Fijian. PD60000934 858