Kunea na Noqu iNaki

Nancy J. Maynes

Dua na Bogi vata kei Elder Richard J. Maynes

Lotu ni Tabagone Qasecake e Vuravura Raraba • 1 ni Me, 2016 • Valecavu e Salt Lake

Au marautaka vakalevu niu tiko vata kei na watiqu eke ena bogi nikua, kau vakavinavinakataka na madigi meu vosa vei kemuni.

Ni tukuna taumada vei au na watiqu ni na vosa tiko o koya ena Vakalesuimai ni kosipeli, ka vakauasivi na Matai ni Raivotu nei Josefa Simici, keirau a veitalanoataka na kena sa mai vaqaqacotaka na noqu bula na ulutaga oqo kei na kena rawa ni vakayarayarataki kemuni vakamatata na veika au a sotakaya ena vaqaqacotaki ni nomuni vakabauta.

O au e dua ka saumaki ki na Lotu, kau via wasea vata kei kemuni na ka vakasakiti duadua au a sota kaya—na italanoa ni noqu saumaki.

Au a tubucake ena dua na matavuvale veilomani sara, ka rau vakasakiti na noqu itubutubu. Keitou sega ni dau lako wasoma ki lotu, ia ni keitou lewena na Lotu Presbyterian, keitou na dau laki lotu ga ena Siganisucu kei na Siganimate, ka na kauti au o tinaqu ena so na gauna ki na Matawilivola ni Sigatabu. O ya na vanua au a rawata taumada kina na noqu ivakadinadina me baleta na iVakabula. Au dau taleitaka ni rogoca na italanoa kei Jisu. Au kila ni sa dua na ka matalia o Koya.

Niu se goneyalewa lailai au a vakila na gagadre meu cavuta na noqu masu ena noqu idavodavo ena bogi. Au kila ni a rogoci au tu na Tamada Vakalomalagi.

Niu yabaki 20 vakacaca au sa veigadivi ka lako curuma voli e vuqa sara na veilecayaki, rarawa, kei na yalolailai ka dau vakavurea ena so na gauna na veigadivi. De so vei kemuni sa na rairai vakila beka na veika vakaoya, ia sa tiko e dua na duidui. Sa vakainaki ka vaqaqacotaki kemuni na kosipeli. Sa solia vei kemuni na inuinui. Ena gauna o ya ena noqu bula, au kila ni a yali tiko e dua na ka. Au a vakila voli ni a sega ni vakainaki se muataki donu tu na noqu bula. Au sa tekivu lakova na veimatalotu duidui ena vakanuinui meu kunea e so na isaunitaro. Au a vaqara voli e dua na ka ena vakaibalebale kina na noqu bula, ia au sega saraga ni kila na vanua meu kunea kina.

Dua na siga ka sa dredre saraga, au a navuca meu sa na masu mada. Au tekiduru sobu ena yasa ni noqu loga—na ka au a sega ni dau cakava—ka talaucaka na lomaqu kivua na Tamada Vakalomalagi, kere veivuke voli Vua ke rawa Vua me solia vei au e so na veidusimaki ki na noqu bula. Au a lomavinaka vakalailai, ka mani tomana tale na noqu itaviqaravi ni veisiga.

A saumi na noqu masu ena vica na siga emuri. A yaco me mai tiki ni noqu bula e dua ka lesu mai na kaulotu. Na yacana o Richard John Maynes. Keirau a veigadivi, ka vakayacora o koya na veika era dau cakava na daukaulotu vinaka lesu mai. A tarogi au keu bau kila tu e dua na ka me baleta na Lotu ka keu sa wilika mada na iVola i Momani.

A mani solia vei au o koya e dua na ilavelave ni iVola i Momani meu wilika. Au sa tekivu wilika, ka dua na ka e dreta totolo na noqu vakasama o ya na tabana ni ulutaga, ka kaya, “Na iVola i Momani: E Dua Tale na iVakadinadina kei Jisu Karisito.” Au sega ni kila tu ni sa baleti Jisu na iVola i Momani.

Au sa tekivu taura talega na lesoni ni daukaulotu, ka sa cilava na noqu bula e dua na rarama. Ni rau vakatavulici au na daukaulotu ena veisiko ni Kalou na Tamada kei na Luvena, o Jisu Karisito kivua na cauravou o Josefa, ka rau rua na tamata duidui, sa vaka me ka dina sara ki na ka au a dau vakila ka vakabauta tu mai, ia a sega ni vakatavulici vakakina ena noqu lotu. Na Matai ni Raivotu sa dua na tiki bibi ni noqu saumaki. Au a vakila e dua na isema vata kei Josefa Simici baleta ni a tiko vua na taro vataga a tiko vei au: Meu kunea evei na dina? A sauma na nona masu yalododonu na Tamada Vakalomalagi, ka sa sauma o Koya na noqu masu. Au tomana na tauri taucoko ni lesoni ka kila deivaki ena vu ni yaloqu ni sa dina na veika a vakatavulici.

A papitaisotaki au ena vulaikatakata o ya na daukaulotu lesu mai o Richard John Maynes. Keirau tomana voli na veigadivi, ka oti e dua na yabaki keirau a vakamau ena Valetabu e Manti Utah.

Ia, sa ivakatekivu ka dina saraga o ya ni noqu saumaki. Me vakataka e vuqa vei keda, sa dua na ivakarau na saumaki. Sa gadrevi me vakabulabulataki ka vaqaqacotaki na noda ivakadinadina ena veisiga ena wiliki ni ivolanikalou, masumasu, lako i lotu, curumi ni valetabu, kei na muri ni noda parofita.

Sa dodonu me tiki bibi ni noda bula na ivolanikalou. Niu se yalewa gone, sega ni lewe ni Lotu, au a kerei meu digitaka e dua na ivolanikalou meu cavuqaqataka. Au digitaka na iVola ni Vakaibalebale 3:5–6:

“Mo vakararavi vei Jiova ena vu ni yalomu; ka mo kakua ni vakararavi ki na nomu yalomatua.

“Mo vakarogotaka vua na nomu sala kecega, ia ena vakadodonutaka na nomui lakolako ko koya.”

Au sega ni rawa ni tukuna vei kemuni na levu ni gauna au vakasamataka kina na ivolanikalou o ya niu gadreva e so na veivuke mai lagi. Kevaka meda na vakabauta ga ka nuitaka na Turaga, ni kilai ni da sega ni kila vakamatata tu na veika kece e yaco ki na noda bula, ka nanuma meda vakavinavinakataki Koya ena veivakalougatataki e vuqa sa tiko vei keda, ena vakaraitaka vei keda na sala o Koya. Ena rairai sega ni yaco beka ena noda gauna, ia au kila ni sa tiko e dua na ituvatuva vua na Tamada Vakalomalagi me baleti keda yadua.

Dua tale na noqu ivolanikalou vakasakiti sa kune ena Vunau kei na Veiyalayalati 123:12: “Raica era sa lewe vuqa sara na veimata tamata, na ilawalawa, kei na veimata lotu e vuravura, era sa vakamatabokotaki ena nodra ivadi qaseqase na tamata, io era sa lovaki ira ka vakaisini ira, ia era sa sega ni kila rawa na ka dina, ni ra sa sega ni kila na vanua mera vakasaqara kina.”

E sa ka bibi sara vei keda vaka lewe ni Lotu meda sudra yani ka wasea na kosipeli kivei ira na tani. Sa vuqa sara na tamata me vakataki au era vakasaqara voli na dina ia era sa sega ni kila na vanua mera kunea kina.

Na rua na vakatulewa bibi duadua au sa cakava ena noqu bula oya meu na papitaiso ka vakamau vata kei na watiqu ena valetabu. Au sa vakavinavinakataka na kosipeli ki na noqu bula. Eda kila taucoko ni sega ni rawarawa na bula ena so na gauna. Eda gadreva ga me da nanuma na vosa nei Elder Jeffrey R. Holland. Kaya o koya:

“Sa tiko oqori na Vakavuvuli ni Lomalagi kei Vuravura me vakalougatataki iko. …

“Vakanuinui Vua. Vakanuinui vakabibi Vua. Vakanuinui tawamudu Vua.”¹

Au kila ni bula tiko na Tamada Vakalomalagi. E lomani keda o Koya. E rogoca na noda masu o Koya. Au kila ni sa noda iVakabula o Jisu Karisito. A mate o Koya me baleti keda yadua ka solia vei keda na isolisoli levu ni veivutuni, ka sa vakatarai keda meda veisautaka na noda bula meda na vinaka cake ena veisiga. Au kila ni tiko na parofita bula, o Peresitedi Thomas S. Monson, kau kila ni a raica na Tamada kei na Luvena na Parofita o Josefa Simici ka solia vei keda na iVola i Momani: E Dua Tale na iVakadinadina kei Jisu Karisito.

Sa noqu masu ni ko ni na tomana voli me vaqaqacotaki ka vakabulabulataki na nomuni ivakadinadina ena veisiga ena vakayacori ni veika eda sa vakatavulici meda cakava mai vua na iVakabula kei ira na noda parofita. Sa noqu masu ni ko ni na tomana voli ni nuitaka na Turaga ka kila ni sa kilai kemuni o Koya ka na vakadodonutaka na nomuni ilakolako o Koya.

Au tukuna na veika oqo ena yaca i Jisu Karisito, emeni.