Pasku—un Temporada di Stima, Sirbi, i Pordoná Otro
Mi ta gusta wak e eksitashon i antisipashon di muchanan durante e temporada di Pasku! Mi ta korda mi mesun antisipashon ora mi tabata un mucha di Primaria kresiendo na Argentina. Un aña, nos maestronan di Primaria a puntra nos pa limpia nos koi hunganan bieu, laba nos pòpchi nan su kabei, i drecha nan shimisnan pa asina nos por regalá nan na e muchanan chikitu ku mester pasa e dia di Pasku na hospital.
Durante e siman miéntras mi tabata limpiando mi pòpchinan bieu, mi mama a puntra mi kiko mi tabata hasiendo ku nan. Mi a splika kiko nos maestronan di Primaria a pidi nos pa hasi, i el a kontesta, “Bo tambe mester duna un di bo koi hunganan drechi na e muchanan.”
Mi kontesta tabata, “Dikon mi lo tin hasi esei?”
E ora el a bisa algo ku a keda ku mi tur e añanan aki. E la bisa, “Cris, e ta hopi bon pa duna algo ku nos ta gusta hopi, algo ku ta difisil pa duna pasobra nos ta gust’e asina hopi, algo ku lo ta un sakrifisio. Esaki ta loke nos Tata Selestial Su regalo tabata pa nos. E la manda Su Yu, JesuCristo—no djis kualke yu. El a manda Su Yu Stima i perfekto pa asina nos por bai bèk pa biba kun’E atrobe.”
E aña ei, ora mi a duna un di mi koi hunganan faborito, mi a komprende un tiki mihó nos Tata Selestial su regalo pa nos—Su Yu Stima, JesuCristo, kende a duna Su bida pa nos boluntariamente i sin pensa riba su mes.
Kada aña, manera parti di nos selebrashon di Pasku, mi tata lo lesa for di e skrituranan e bunita kuenta di Lukas:
“Den e tempu ei emperador Augustus a duna òrdu pa tene un senso den henter su imperio. …
“Tur hende a bai skibi nòmber, kada ken den su mes suidat.
“… José … a sali for di Nazarèt na Galilea pa bai skibi nòmber na Betlehèm, e suidat di David na Hudea; …
“El a bai huntu ku Maria, ku kende e tabata komprometé pa kasa; Maria tabata na estado.
“Miéntras nan tabata aya, e ora a yega pa Maria duna lus.
“Maria a haña su promé yu, un yu hòmber. El a lor’é den paña i a pon’é den un pesebre, pasobra no tabatin lugá pa nan den e posada.
“Den bisindario di Bethlehèm tabatin algun wardadó di karné ku tabata pasa anochi den kunuku pa wak nan karnénan.
“Un angel di Señor a paresé na nan i splendor di gloria di Señor a rondoná nan. Nan a spanta mashá!
“E angel a bisa nan: ‘No spanta, pasobra mi a bin duna boso un bon notisia. E notisia aki lo hasi henter pueblo hopi kontentu.
“Awe boso salbador, e Mesias, Señor, a nase den e suidat di David.
“Esaki ta e señal pa boso sa, ku mi ta papia bèrdat: boso lo topa un yu lorá den paña, drumí den un pesebre.’
“Diripiente un ehérsito grandi di angel for di shelu a paresé banda di e angel. Nan tabata alabá Dios bisando:
“‘Gloria na Dios den altura i pas na mundu pa e hendenan ku ta agradá Dios.’”1
Rumannan, kon nos por disfruta awe di e mes pas i bon bolundat pa e hendenan?
Miéntras mi tabata meditando riba e pregunta aki pa e ultimo simannan, teniendo den mi mente ku Pasku ta e temporada pa regala, tres akshon—realmente tres regalu nos por duna—a bini na mente. Nos, por supuesto, ta regala e regalunan aki durante e aña, pero na e maravioso temporada di Pasku, nos ta korda e Tata Su regalu di Su Yu i konsidera kon nos por sigui Nan ehempel mientras nos ta aumenta den nos abilidat i deseo individual pa regala.
1. Pasku ta e temporada pa regala amor.
Nos Tata na Shelu i nos Salbador, Jesu Cristo, ta e ehempel mayor di amor. Un skritura kerí ta siña, “Pasobra Dios a stima mundu asina tantu ku El a duna su úniko Yu, pa tur esnan ku pone konfiansa den djE no bai pèrdi, ma haña bida eterno.”2
Nos Salbador a siña nos pa ehempel pa stima tur hende. E tambe a siña nos pa stima Dios i pa stima nos prohimo manera nos mes.
Elder John A. Widtsoe a splika:
“E naturalesa kompletu i esenshal di amor por ta nos no ta komprende, pero tin testnan pa kuanan e por wòrdu rekonose.
“Amor semper ta fundá den berdat. … Mentiranan i engaño, òf kualke otro violashon di un lei moral, ta evidensia di e ousensia di amor. Amor ta muri mei mei di falsidat. … Asina, … [esun] ken ta falsifika na su ser kerí, òf ofres’é kualke aktu kontrario na berdat, no realmente ta stim’é.
“Mas, amor no ta ofende òf herida òf hasi daño na e ser kerí. … Krueldat ta mes ousente for di amor … ku berdat ta di falsidat. …
“Amor ta un forsa positibo aktibo. E ta yuda e ser kerí. Si tin nesesidat, amor ta trata pa prove’le. Si tin debilidat, amor ta suplant’e ku fortalesa. … Amor ku no ta yuda ta un amor falso i transitorio.
“Bon ku e testnan aki ta, tin un mas miho. Berdadero amor ta sakrifika pa e ser kerí. … Esei ta e test ultimo. Cristo a duna di Sumes, e la duna Su bida, pa nos, i dor di esei a deklara e realidat di su amor pa su rumannan mortal.”3
Nos Tata na Shelu ta inbita nos tur, Su yunan, pa duna di i sakrifika pa e amor aki. “Duna,” Señor a bisa, “i Dios lo duna boso.”4 “Pòrnada boso a risibí, pues duna pòrnada tambe.”5
2. Pasku ta e temporada pa regala sirbishi.
Nos Señor i Salbador a ministra personalmente na e hendenan, lanta esnan oprimí, dunando speransa na esnan deskurasha, i buskando esnan perdí. E la duna bista na esnan siegu, sana e hende enfermo i esnan lam pa asina nan por a kana, i a lanta e hende morto.
Durante e temporada di Pasku, mi ta pensa riba e misioneronan—eldernan, hermanan, misioneronan mayor, i presidentnan di mision rònt mundu—kende, manera representatibonan di Jesu Cristo, ta duna libermente di nan tempo i sirbishi na tur ser humano. Mi ta pensa riba tur e rumannan kende ta gasta hopi ora sirbiendo fielmente den nan yamamentu. Tambe na e temporada aki, mi ta pensa riba tur e hòmbernan i muhénan sirbiendo den e militair pa sigura nos siguridat. Danki pa boso sirbishi!
Pero asta si nos no ta sirbiendo Señor òf nos pais den sirbishi di tempu kompletu, nos oportunidatnan pa sirbi ta sin limit. Palabranan i aktunan bondadoso por lanta karganan i enkurasha kurasonnan! Nos Tata na Shelu ta inbita nos tur pa duna sirbishi. I ora nos ta hasi’e, “[e] Rei lo bisa nan: ‘Mi ta sigurá boso: tur kos ku boso a hasi pa un di e rumannan di ménos importansia aki di Mi, boso a hasié pa Mi.’”6
3. Pasku ta e temporada pa regala pordon.
Pordona otro ta trese pas i goso den nos bida. Presidente Heber J. Grant a siña: “No tin nada ku lo trese nos mas di e Spiritu di Dios ku pa … ta bondadoso, kariñoso, karitativo, sufriendo largu, i pordonado. No tin nada ku lo trese mas goso na nos ku sea disponibel i dispuesto pa pordona e foutnan di nos prohimo kontra nos, i no tin nada ku lo trese mas kondenashon na nos ku pa tin un kurason duru i pa ta margá i vengativo den nos sentimentunan kontra esnan pa kende nos ta rondoná.”7
Pa por risibi pordon pa nos pikanan, nos mester pordona otro.
Pordona otronan ta permiti nos pa vense sentimentunan di rabia, amargura, òf vengansa. I ken kier sinti e sentimentunan ei pa Pasku? Pordon por tambe sana heridanan spiritual i trese e pas i amor ku solemente Dios por duna.
Nos Tata na Shelu kier pa nos arepenti i pordona tur hende—inkluso nos mes. Elder Jeffrey R. Holland a bisa: “Kon laat bo por pensa e ta, kuanto chènsnan bo ta pensa bo a perde, kuanto erornan bo ta sinti bo a hasi òf talentunan bo ta pensa ku bo no tin, òf kon leuw di kas i famia i Dios bo ta sinti bo a biaha, mi ta testifika ku bo no a biaha mas leuw ku e alkanse di amor dibino. E no ta posibel pa bo senk mas abao ku e lus infinito di Cristo su Ekspiashon ta lumbra.” 8
Rumannan, na e temporada di Pasku, laga nos tur duna e miho regalunan. Laga nos sakrifika ku kurasonnan agradisi nos koi hunganan faborito—no esunnan ku nos a gasta. I laga nos duna e regalu di amor, e regalu di sirbishi na esnan rònt di nos, i e berdadero regalu di pordon. Pasobra ora nos ta arepenti, Esun Santu di Israel ta pordona nos. Mi ta testifika ku E ta biba. E ta e Rei di reinan, e Prins di Pas, nos Salbador, nos Redentor, i nos Amigu. Den e nomber di Jesu Cristo, amen.