2:3

Regalonan Selestial

Pa Èlder Kevin R. Duncan

Di e Setentanan

Mucha Hòmber

Ningun mucha no tabata anhelá Pasku mas ku ami. Mi tabata gust’é! I mi mayornan tabata kampion den kombertí nos kas den un pais chikitu ameno i maravioso di wenter. Tabatin adornonan, e músika, e lusnan, e pasabokanan, i naturalmente e regalonan. Esta un anhelo mi tabatin pa e regalonan. Tur aña fielmente mi tabata traha mi lista die deseonan di mas grandi di mi kurason.

Pasó nos tabata biba na un rancho, kada Pasku mainta promé nos habri nos regalonan, nos tabata bisti paña diki pa prepará pa e wer friu di wenter i tabata sòru pa nos animalnan. No tabatin nada mas mihó ku finalisá nos trabou i bai lihé bèk paden pa tuma parti na e magia di e mainta.

Djis mi tabata kuminsá siña tokante di e hòmber aki, JesuCristu, ken su nasementu nos tabata selebrando. Pero tabata parse un situashon agradabel. Tabata Su kumpleaño, pero ta nos tabata haña tur e regalonan. Kua mucha no tabata gusta esaki! Pasku tur kos tabata bon.

Afortunadamente, segun tempu a pasa, mi komprendementu di e Salbador a oumentá---Su nasementu i kumpleaño, Su bida, i milagernan, Su poder i sakrifisionan, Su Ekspiashon i Resurekshon, pero mas tantu Su mahestat i Su amor inkomprensibel. Si, Pasku tur kos tabata bon, pero esei tabata simplemente Pasó JesuCristu tabata tur kos bon. Òf mihó bisá, JesuCristu tabata tur kos maravioso!

Servisio Mishonal

Meskos ku hopi hende hóben, ku gran antisipashon mi a mira padilanti pa sirbi un mishon, pero mi promé Pasku for di kas tabata un tiki manera un shòk. Den e lunanan promé ku mi a kumpli 19 aña, praktikamente tur kos ku mi por a pensa riba dje tabata pa bai mi mishon. Mi tabata mas yòn ku hopi di mi kompañeronan di klas i amigunan, i hopi di nan a bai nan mishon kaba lagando mi atras. Mi a sinti manera ku mi tambe tabata kla pa ta un mishonero. E úniko kos ku tabata den mi kaminda tabata mi kumpleaño.

Despues di loke a parse un eternidat, mi tempu porfin a yega i mi a drenta MTC. Na kuminsamentu di desèmber, mi a tabata den un avion bulando pa mi mishon na Santiago, Chile. Porfin mi tabata riba mi kaminda, i loke tabata mas mihó ainda, un djis tabata Pasku. Mi a konfia ku mi tabata kla pa e eksperensia di mas glorioso di mi bida.

Pero ora mi a sali for di e avion, mi a deskubrí pronto ku kosnan tabata masha diferente ku nan tabata na kas na Utah. Si, Pasku tabata serka, pero tabata sinti mei mei di verano. Unda e sneu tabata? Unda e larsnan i e yasnan tabata?

Pronto mi tabata enbolbí den e desafionan di e obra. Mi tabatin molèster di jetlag i tin biahe a mi a haña mi mes ta drumi durante di nos sitanan pa siña. E kultura tabata diferente, e lenguahe tabata un misterio---en bèrdat e no tabata zona manera niun kos ku mi a siña den MTC—i e kuminda tabata úniko. I papiando di e kuminda, mi kompañero i ami lo mester a kome algu robes, Pasó nos tur dos a bira masha malu mes. Despues, riba tur sobra kos, durante un di mi prome anochinan na Chile, nos a eksperensia un temblor.

Tabata mi promé Pasku leu for di kas, i mi tabata ekstremadamente malu. Mi tabata drumi riba kama na un pais straño, purbando pa komprondé e lenga ku difísilmente mi por a desifrá, bibando ku un otro persona ku apénas mi tabata konosé. Esaki ta tur lokual obra mishonal tabata enserá, i di kon mi tabatin asina tantu purá?

Tòg apesar di tur e desafionan aki, mi a kuminsá stima e hendenan di Chile ku henter mi kurason. Nan tabata asina maravioso i asina fásil pa stima—i hopi di nan tabatin hamber pa e mensahe di e Salbador. Den e mundu kruel i real, kaminda hende tabata desesperá pa e mensahe di un Salbador, di algun manera palunan di Pasku i meanan yená no tabata asina importante mas manera ántes. Si Cristu a bai laga Su kas selestial i bini na mundu pa sufri i muri pa nos tur, ami por sierto por a laga mi kas i pasa sin algun komodidat pa kompartí Su mensahe maravioso.

E Pasku ei a siña mi e goso puru di yuda hende optené e regalo di mas grandi di Tata Selestial, Su glorioso plan di felisidat---i felisidat, mi a deskubrí, tabata e kos ku tur hende ke mas tantu, no solamente den temporada di Pasku, pero pa semper.

Viudo Yòn i Matrimonio

Algun aña despues di mi mishon, mi a haña mi mes ta enfrentá un desafio nobo. Mi tabata depresivo, kansá, i solitario. Hopi luna mas promé, mi esposa di ménos ku dos aña a muri inesperadamente den un aksidente di outo, lagando ami i nos yu muhé di shete luna so.

Mi tabata un studiante na universidat, studiando, trahando, i luchando pa siña kon pa ta un mayor soltero. Pasku tabata aserkando, i miéntras otronan tabata bai pa regresá pa nan kas pa ta ku famia i sernan kerí durante dianan di vakashon, ami pa motibu di obligashonnan di trabou, mester a keda skol. Mi a sinti mi so i masha tristu. Pasku a bin i bai, i tempu a sigui pasa.

Kasi un aña despues, ora Pasku tabata aserkando atrobe, ainda mi tabata soltero. Awor e skrituranan ta bisa ku no ta bon pa hende ta so(wak Génesis 2:18), i mi tabata kompletamente di akuerdo. Mi tabatin mester di un kompaño, i mi beibi tabatin mester di un mama.

Mi a pensa, “Kisas mi no ta un kasá ideal, pero kua muhé lo no ke un beibi mucha muhé real i bibu pa Pasku? No un pòpchi—pero di bèrdat?” I afortunadamente, si un hende ke un beibi, awèl, ami lo ta parti dje pakete.

Mi tabatin bista riba un dama hóben yamá Nancy den mi klas di biologia, pero tabata kasi na fin di e semèster i ainda mi no tabatin masha kurashi pa papia ku n’e. Shelu mester tabata na mi banda, Pasó un dia, pa kasualidat, nos tabata saliendo na mes momentu for di e sentro di tèst. Esaki tabata mi chèns. Mi a kuminsá un kombersashon. I despues mas lat e anochi ei, mi a yama Nancy, i a pidi un sita ku n’e. Nos bai un sita, i despues un otro, i unu mas. Sinembargo, mi tabata sa ku Pasku tabata aserkando, i Nancy lo bai kas. Kiko lo mi por hasi pa tene e chispa chikitu aki bibu i kresiente ku a kuminsá desaroyá entre nos?

Mi a bini ku un plan. Ku yudansa di Nancy su ruman muhé i su namorado, lo mi sorpresá Nancy den sekreto ku un regalo riba kada un di e 12 dianan promé ku Pasku.

Mi plan a funshoná. Nancy tabata haña regalo, pero e no tabatin idea di unda nan tabata bini. El a bira un misterio ku henter su famia ke a solushoná. Nancy su ruman i namorado a primintí ku nan lo no reda nan partisipashon. Tabata en bèrdat un kombinashon sekreto---un ku motibunan bon so.

Sinembargo, un anochi e famia a deskubrí un indikashon. E bèl di porta a rin, e famia a kore lihé pa e porta, i nan a haña bista di un outo ku a kore duru bai. Nan a nota e number di plachi, i e siguiente dia nan a yama e agensia di lisensia pa kore outo pa haña sa di ken e outo ta. Nan a deskubrí ku ta un miembro di famia di e namorado di e ruman muhé. Tur kos a sali na kla. Nancy su ruman i e namorado a bini dilanti i a atmití nan parti den e plan. Den sekreto mi tabata kontentu ku mi a wòrdu deskubrí Pasó Nancy i ami por a pasa dia di Pasku huntu, i for di ei nos a sigui ku nos namoramentu.

I djis manera mi a spera, Nancy tabata ke un beibi mucha muhé real i bibu pa Pasku. El a stima mi yu manera ku e tabata di dje mes. I afortunadamente, ami tabata parti di e pakete. Nos a kasa e verano siguiente. Tabata un dje mihó regalonan ku mi a yega di risibí.

Mi tabata eksperensiá Tata Selestial su Gran plan di felisidat. Mi tabatin un famia eterno, nos a wòrdu seyá na otro pa semper. E regalo di matrimonio i famia eterno ta un regalo ku tur esnan fiel lo risibí, sea den e mundu aki òf den esun siguiente. Kua regalo mas grandi por tin?

Ora mi a reflehá bèk riba mi dianan di soledat i tristesa, mi a realisá ku JesuCristu un tempu tambe a sintié bandoná i so tambe. E, mas ku niun otro, tabata konosé mi doló. Hasta durante mi tempu di mas soledat, nunka mi no a sinti mi bandoná p’e. E no tabata solamente mi Salbador; E tabata mi ruman i mi mihó amigu.

Tata Yòn

Nos famia chikitu a kuminsá krese, i algun aña despues mi a wòrdu konfrontá atrobe ku un ansiedat grandi. Ora Pasku tabata aserkando, Nancy i ami a wak otro i a realisá ku nos no tabatin sèn sufisiente pa kumpra regalo di Pasku e aña ei pa nos yunan chikitu.

Mi a gradua resientemente di universidat, i nos tabata purba ainda pa ta stabil finansieramente. Ounke mi tabatin bon trabou, pronto a bira opvio ku e kosto haltu di bida tabata mas tantu ku nos presupuesto. E úniko kos na nos fabor tabata ku nos tabata pagadónan diesmo kompletu. Ounke niun otro hende no tabata sa di nos obligashon, Tata Selestial i e Salbador si tabata sa, i Nan a kuminsá manda milagernan chikitu di Pasku.

Un dia e bèl di porta a rin. Tabata un bisiña teniendo un kaha ku ko’i hunga. El a bisa, “Nos tabata limpiando nos kas i nos a kontra ku e kosnan di hunga aki ku nos yunan no ke mas. Nos a pensa si boso yunan lo gusta nan.” Sigur ku nan ke!

Un otro dia e bèl a rin atrobe. E biaha aki tabata algun miembro di nos bario. Nan tabata pará ku un baiskel pa un mucha muhé chikitu. Nan a bisa, “Nos no tin mester di e baiskel aki mas i nos a pensa riba bo famia. Bo ta pensa ku bo yu muhé por uza esaki?” Nos tabata masha kontentu!

Algun siman promé nos yu hòmber a partisipá na un kòntèst di klùr di un tienda lokal. Nos a haña yamada di telefòn ku e notisia eksitante ku el a gana e kòntèst. El a gana un video popular pa mucha. Nos tabata babuká!

Tur e milagernan chikitu aki---nos yunan lo tin algun regalo di Pasku tòg. Nos a paga nos diesmo, i Tata Selestial i e Salbador a habri e bentananan di shelu i a basha Nan bendishonnan---dirèkt den e chimenea.

Mi a reflehá ku e yuchi Cristu a nase den sirkunstansianan masha humilde, sinembargo otronan a hañ’e i a ofresé e tambe regalonan presioso. Komo un tata na mundu, ku desesperashon mi ke a duna mi yunan tur loke mi tabata por.

Nos Tata Selestial ta sinti meskos. Sinembargo Su amor ta perfekto; E ta deseá pa duna nos tur loke E tin. Ta un regalo inkomprensibel.

Konklushon

Rumannan, nos tur na dado momentu a òf lo sinti solitario, malu, depresivo,pober, òf leu for di kas. Afortunadamente, nos tin un Tata Eterno i un Salbador ku ta komprondé nos. Ora nos bai na Nan, Nan lo tene nos man i lo yuda nos durante tur desafio.

Komo un mucha, mi a pensa ku Pasku ta bini solamente un biaha pa aña. Komo adulto, mi ta realisá awor ku Pasku ta tur dia. Pa motibu di e benevolensia di un Tata Selestial amoroso i un Salbador stimá, JesuCristu, nos ta resipientenan di un fluho kontinuo di regalonan selestial---tur dia. Regalonan Selestial demasiado hopi pa menshoná.

Mi gratitut pa e Tata i e Yu ta asina inmenso i asina profundo ku, meskos ku Ammon di antaño, “Mi no por bisa e parti di mas chikitu ku mi [ta] sinti” (Alma 26:16).

Si, ta kumpleaño di JesuCristu nos ta selebrá kada temporada di Pasku, pero pa motibu di e bondat di e Tata i e Yu, ainda ta nos ta haña tur e regalonan. Di esaki mi ta testifiká den e nòmber di JesuCristu, amèn.