Ol Presen we Oli Kam long Heven
Yangfala Boe
I no gat wan smol boe i wantem se Krismes i kam kwik, be mi nomo. !Mi lavem Krismes! Mo papa mo mama blong mi oli topman blong tanem hom blong mifala i kam wan naes ples long winta. I gat ol dekoresen, miusik, ol laet, ol swit kaekae, mo yes, ol presen. O, mi stap wet from ol presen ia. Evri yia, mi no mestem blong mekem lis blong wanem hat blong mi i wantem.
From mifala i stap long wan fam, evri Krismes moning, bifo mifala i openem ol presen blong mifala, mifala i putum ol wom klos blong fesem kolkol winta mo go fidim ol animol long fam. I gud tumas blong finisim ol wok, mo hariap i gobak insaed blong stap glad long majik blong moning ia.
Mi jes stat blong lanem abaot man ia, Jisas Kraes, we betdei blong Hem nao yumi stap selebretem. I luk olsem se i wan gudfala samting. Hem i betdei blong Hem, be yumi nao i kasem evri presen. !Wanem pikinini nao i no laekem kaen ia! Krismes i evri samting we i gud.
Tangkyu tumas, wetem taem we i stap go, save blong mi long Sevya i kam antap moa—taem ia we hem i bon mo betdei blong Hem, laef mo ol merikel blong Hem, paoa mo ol sakrifaes blong Hem, Atonmen mo Laef Bakegen long Ded blong Hem, be moa nao, hem i Hamas Hem i Hae mo lav blong Hem we man i no andastanem. Yes, Krismes hem i evri samting we i gud, be hem i nomo from Jisas Kraes i evri samting we i gud. O sapos mi talem i gud moa, !Jisas Kraes i evri samting we i nambawan!
Misinari Seves
Olsem plante yangfala pipol, mi bin lukluk blong go long wan misin nomata mi fraet, be fas Krismes blong mi longwe long hom i mekem mi mi sek smol. Long ol manis we i stap go from namba 19 betdei blong mi, mi stap be tinting blong mi i we mi wantem go tumas long misin. Mi moa yangfala bitim ol fren long klas mo ol nara fren, mo plante long olgeta oli go long misin blong olgeta finis, oli lego mi mi stap. Mi bin filim se, mi tu, mi rere blong stap wan misinari. Wanem i blokem mi nomo i betdei blong mi.
Mi luk se mi wet longtaem tumas, be taem blong mi i kam, mo mi go long MTS. Eli long Disemba, mi stap long wan ples finis we i go long misin blong mi long Santiago, Jile. Yes, saye, mi stap long rod ia finis, mo wanem i gud moa, Krismes hemia nomo. Mi trastem miwan se mi rere from bigfala eksperiens blong laef blong mi.
Be taem mi kamaot long plen, kwiktaem mi faenem se ol samting oli defren evriwan long wanem i stap long hom long Yuta. Yes, Krismes hemia kona, be mi filim se mi stap long medel blong samataem. ?Wehem sno? ?Wehem ol but mo bigfala kot?
Kwiktaem nomo ol jalenj blong wok oli pulumaot mi. Mi filim taed from mi stap long defren ples mo samtaem mi stap slip long taem blong ol apoenmen blong tij. Kalja i defren, lanwis i defren evriwan—i no saon olsem hemia we mi bin lanem long MTS—mo kaekae i spesel tu. Tokbaot kaekae, kompanion blong mi mo mi i mas kakae wan rong samting from mitufala tugeta i bin sik bigwan. Afta, antap long evri samting, long wan long ol fas naet blong mi long Jile, graon i bin seksek.
Hem i fas Krismes longwe long hom, mo mi bin sik tumas. Mi ledaon long bed long wan kantri we mi no save gud, we mi stap traem blong andastanem wan lanwis we mi no save kasem nating, mo mi stap wetem wan nara man we mi no save hem. ?Be misinari wok ia, i wanem kaen wok ia mo from wanem mi stap hariap blong go long misin?
Be yet, nomata evri jalenj ia, mi stat blong lavem ol pipol blong Jile wetem evri hat blong mi. Oli bin naes tumas mo i isi blong lavem olgeta—mo plante long olgeta oli hanggri tumas blong harem mesej abaot Sevya. Long ril strong wol ia, long ples we ol pipol oli wantem tumas blong harem mesej blong wan Sevya, long wan wei, ol Krismes tri mo ol stokin oli no impoten olsem bifo. Sapos Kraes i bin aot long hom blong Hem long heven, i kam long wol blong safa mo ded from yumi evriwan, yes, mi tu, mi save aot long hom blong mi, mo lego sam gud samting blong laef blong save serem gud nius blong Hem.
Krismes ia i tijim mi klin glad blong stap helpem ol pipol blong oli kasem presen ia we i moa hae we Papa long Heven i givim, bigfala plan blong Hem blong stap hapi—mo hapines, mi faenem se i wan long ol samting we evriwan i wantem, mo i no long Krismes taem nomo, be oltaem nomo.
Yang Man Wido mo Mared
Sam yia afta long misin blong mi, mi stap mo stap fesem wan niu jalenj. Mi stap we tingting blong mi i trabol, mi taed, mo mi filim se mi stap miwan. Sam manis bifo hemia, waef blong mi, we mitufala i jes mared i no 2 yia yet, i bin ded long aksiden blong trak, i lego mi wetem wan bebi gel blong seven manis.
Mi wan studen long yunivesiti, mi stap stadi, wok, mo mi traehad blong lanem olsem wanem blong stap wan singgel papa. Krismes i bin stap kolosap, mo taem ol narawan oli stap aot blong gobak long hom blong olgeta blong stap wetem famli mo olgeta we oli lavem long taem blong holidei, from wok, mi mi mas stap long skul. Mi filim se mi stap miwan mo mi no hapi. Krismes i kam mo i go, mo taem i gohed nomo olsem oltaem.
Kolosap wan yia afta, taem Krismes i stap kam kolosap bakegen, mi mi stap singgel yet. Nao, ol skripja oli talem se i no gud blong man i stap hemwan (luk long Jenesis 2:18), mo mi bin agri fulwan. Mi nidim wan kompanion, mo bebi gel blong mi i nidim wan mama.
Mi talem miwan: “Ating mi no wan gud kaj, ?be wanem kaen woman bae i no wantem wan ril bebi gel we i laef long Krismes? I no wan doli—?be wan rilwan? Mo tangkyu tumas, sapos wan i wantem wan bebi, be i mas tekem mi tu.
Ae blong mi i bin stap long wan yangfala woman we nem blong hem, Nancy, long baeoloji klas blong mi, be mifala i stap kam kolosap long en blong semesta, mo mi no faenem strong paoa long tingting blong go toktok long hem. Heven i mas stap long saed blong mi ia, from se, wan dei, janis nomo, mitufala i bin hapen blong aot long tes senta long sem taem. Hemia i janis blong mi. Mi statem storian, mo afta, long naet ia, mi ringim yangfala woman ia, Nancy, mo askem hem blong go long wan deit. Mitufala i go deit, afta wan moa afta, wan narawan. Be, mi save se Krismes i stap kam kolosap, mo Nancy bae i gobak hom. ?Bae mi mekem wanem blong kipim smol laet ia i stap laet mo i stap gro, laet ia we i stap stat blong laet long medel blong mitufala?
Mi mekem wan plan. Wetem help blong sista blong Nancy mo boefren blong hem, bae mi mekem wan sapraes long Nancy, mo bae mi givim hem wan presen long evri dei, blong 12 dei i go kasem Krismes.
Plan blong mi i wok. Nancy i kasem ol presen blong hem, be hem i no save se huia i stap sendem ol presen ia. Hemia i wan sikret we ful famli i traem blong faenemaot. Sista blong Nancy mo boefren blong hem i promes se bae oli no talemaot se oli save. I tru, i bin wan sikret plan—be plan ia i gat gud tingting biaen long hem.
Be, i kam long wan naet we famli i faenemaot. Bel blong doa i ring, famli i hariap i kam long doa, mo oli luk wan trak i spid i go. Oli tekemdaon namba plet, mo long nekis dei, oli ringim ofis blong ol draeving laesens blong faenemaot huia trak blong hem. Oli faenem se i blong wan famli blong boefren blong sista blong hem. Puskat i nomo save haed. Sista blong Nancy mo boefren blong hem oli kam mo oli talemaot se oli save mo pat blong plan blong mi. Long sikret, mi bin hapi se oli bin faenem mi from se Nancy mo mi i bin save spendem Krismes dei tugeta, mo stat long ples ia mitufala i gohed blong stap fren.
Mo jes olsem we mi bin hop, Nancy i bin wantem wan ril bebi gel we i laef blong Krismes. Hem i lavem gel blong mi olsem we mi tingting long hem. Mo laki tu, mi tu, mi gat pat wetem gel. Mitufala i mared long nekis sama. I bin wan long ol bes presen we mi bin kasem.
Mi bin stap gat eksperiens long bigfala plan blong Papa long Heven blong stap hapi. Mi gat wan famli we i no save finis. Mitufala i sil tugeta blong oltaem. Presen ia blong mared we i no save finis mo famli, i wan presen we evri fetfulwan bae i kasem, long laef ia, o long nekis laef. ?I gat wan presen we i moa gud long hemia?
Taem mi stap luklukbak long ol taem blong mi we mi bin stap miwan mo stap harem nogud, mi bin luksave se Jisas Kraes, long wan taem, i bin filim hemwan mo i stap hemwan tu, mo Hem, bitim evri narawan, i bin save soa blong mi. Iven long ol taem we mi harem nogud we mi stap miwan, mi neva filim se Hem i no bin stap. Hem i Sevya blong mi, be tu, Hem i brata blong mi, mo bes fren blong mi.
Yangfala Papa
Smol famli blong mitufala i stat blong gro, mo sam yia afta, mi fesem wan narafala bigfala trabol. Krismes i stap kam kolosap. Nancy mo mi i lukluk mitufala mo luksave se mitufala i no rere long wan smol vatu blong spendem long Krismes presen blong ol yangfala pikinini blong mitufala long yia ia.
Mi jes graduet long yunivesiti, mo mitufala i stap traem yet blong stanap long leg blong mitufala. Nomata mi gat wan gudfala wok, i luk olsem se laef i bin sas tumas mo i no naf long bajet blong mitufala. Wan samting nomo we i gud long mitufala, mitufala i stap pem ful taeting. Nomata i no gat wan i save hadtaem blong mitufala, Papa long Heven mo Sevya i bin save, mo Tufala i stat blong sendem ol smol Krismes merikel.
Wan dei, bel i ring. Hem i wan neiba we i stap holem wan bokis blong ol pleiplei. Hem i talem “Mifala i stap klinap long haos mo mifala i luk ol pleiplei ia we ol pikinini blong mifala oli nomo wantem. Ating bae ol pikinini blong yufala i laekem.” !Yes, bae oli laekem!
Wan nara dei, bel i ring bakegen. Long tetaem ia, i samfala memba blong wod blong mifala. Oli stanap ia wetem wan smol baeskel blong gel. Oli talem: “Mifala i nomo wantem baeskel ia mo mifala i tingting long famli blong yu. ?Yu ting se gel blong yufala i wantem yusum hemia?” !Mifala i bin glad tumas!
Sam wik bifo, boe blong mitufala i mekem wan kala kompetisen long wan lokol stoa. Mifala i stap, fon i ring long wan dei mo gudfala nius i kam se boe i winim kompetisen. Hem i bin winim wan vidio blong wan popula muvi blong ol pikinini. !Mifala i sapraes!
!Evri merikel ia! Ol pikinini blong mifala oli kasem sam smol presen long en. Mifala i bin pem taeting blong mitufala, mo Papa long Heven mo Sevya i bin openem ol windo blong heven, mo i kapsaetem blesing blong Tufala—i kam stret insaed long haos.
Mi tingtingbak se pikinini Kraes i bin bon i kam long situesen we i no gud tumas, be yet, ol narawan oli bin faenem Hem mo givim ol bigfala presen long hem tu. Olsem wan papa long wol ia, mi bin wantem tumas blong givim evri samting long ol pikinini blong mi.
Papa blong yumi long Heven i filim i semmak. Be yet, lav blong Hem i stret evriwan; Hem i wantem givim yumi evri samting we Hem i gat. Hem i wan presen we yumi no save andastanem.
Las Toktok
Ol brata mo sista. Yumi evriwan, long wan taem, i bin, o bambae i filim se hem i stap hemwan, i sik, tingting i trabol, i pua, o i longwe long hom. Tangkyu tumas, yumi gat wan Papa we i stap long Heven mo wan Sevya we Tufala i andastanem yumi. Taem yumi go luk Tufala, bae Tufala i tekem han blong yumi mo helpem yumi tru long evri jalenj.
Mo ol brata mo sista. Long wan taem, bambae yumi save wan we i stap hemwan, we i sik, we tingting blong hem i trabol, we i pua, o i stap longwe long hom. Papa blong yumi long Heven, mo Sevya bae oli save lidim yumi blong helpem ol narawan, mo bambae hem i spesel janis blong yumi blong mekem olsem.
Taem mi pikinini, mi tingting se Krismes i kam wan dei long wan yia. Taem mi kam bigman, mi luksave se Krismes, hem i evri dei. From bigfala open hat blong wan Papa long Heven we i gat lav, mo from wan Sevya, Jisas Kraes, yumi kasem oltaem nomo, ol presen we oli kam long heven—evri dei, ol presen long heven oli plante we plante we i no naf blong talem.
Tangkyu blong mi long Papa mo Pikinini i bigwan tumas, mo i dip mekem se, semmak olsem Amon blong bifo we “mi no save talem nomo smolfala pat ia blong samting we mi mi filim” (Alma 26:16).
Yes. Hem i betdei blong Jisas Kraes we yumi stap selebretem long evri Krismes taem, be from gudfala fasin blong Papa mo Pikinini, bambae yumi stap kasem yet evri presen. Long hemia, mi testifae olsem long nem blong Jisas Kraes, amen.