O Meaalofa Faalelagi
Tama Itiiti
E leai se tama itiiti sa sili atu ona tulimatai atu i le Kerisimasi nai lo a’u. Na ou fiafia i ai! Ma o o’u matua o matuaofaiva i le liuaina o lo matou fale i se siosiomaga matagofie o le Kerisimasi. Sa i ai teuga, o musika, o molī, o mea suamalie, ma meaalofa. Oka, so’u tulimatai atu i meaalofa. O tausaga uma lava ou te faia ai lava ma le faatuatua se lisi o mea ou te momoo i ai o manaoga silisili o lo’u loto.
Ona sa matou nonofo i se faatoaga, o taeao o Kerisimasi taitasi ae matou te lei tatalaina a matou meaalofa, e fai o matou ofu mafanafana ma o atu i le maati o le taumalulu ma fafaga a matou lafu manu. Sa leai se mea na sili atu nai lo le faamaeaina o a matou galuega ma toe faananati atu i totonu o le fale e fai gaoioiga o lena taeao.
Faatoa amata lena ona ou aoao e uiga i lenei tagata, o Iesu Keriso, o lona aso soifua lea matou te faamanatuina. Ae sa foliga mai o se tonu lelei tele. O Lona aso fanau, ae ua maua uma ai a matou meaalofa.O ai la se tamaitiiti e le fiafia i lena mea! O le Kerisimasi o mea lelei uma.
E faafetai ai, i le aluga o taimi, sa faateleina ai lo’u malamalamaaga e uiga i le Faaola—o Lona soifua mai ma le aso fanau, o Lona soifuaga ma vavega, Lona mana ma taulaga, Lana Togiola ma le Toetu, ae o le mea silisili o Lona mamalu ma Lona alofa lemafaamatalaina. Ioe, o le Kerisimasi o mea lelei uma, ae na mafua ona o Iesu Keriso o Ia o mea lelei uma. Pe sili atu foi, o Iesu Keriso o mea ofoofogia uma!
Auaunaga Faafaifeautalai
E pei o le toatele o tagata talavou, sa ou tulimatai atu e auauna i se misiona i se faamoemoega tele, ae o la’u Kerisimasi muamua lava na ou alu ese ai mai le aiga sa fai si faate’ia ai. I masina a o agai atu i lo’u aso fanau 19, sa na o le pau le mea na ou mafaufau i ai o le alu i la’u misiona. Sa ou laitiiti ifo i lo le toatele o tamaiti o la’u vasega ma uo, ma o le toatele o i latou ua atoa latou 19 ma o ese atu i a latou misiona, ma tuua ai na o au. Sa ou lagona e pei sa ou saunia e avea foi ma se faifeautalai. Sa na o le pau le mea na faalavelave ia te au o lo’u asofanau.
Ina ua mavae se taimi na foliga mai o se taimi umi lava, sa aulia ai loa lo’u 19 ma ou alu atu ai loa i le MTC. I le amataga o Tesema, sa ou i ai i totonu o se vaalele sa lele atu i la’u misiona i Santiago, Chile. Mulimuli ane, ua malaga atu, ma o le mea sa sili atu ona lelei, o le Kerisimasi na lata mai.Sa ou toafimalie lava i le saunia mo le aafiaga sili ona mamalu o lo’u olaga.
Ae ina ua ou laa ese mai le vaalele, sa vave ona ou iloaina sa matua ese lava mea ua i ai nai lo tulaga na i ai i le aiga i Iuta. Ioe, ua lata mai lava le Kerisimasi, ae sa peisea’i o le ogatotonu o le taumafanafana. O fea le kiona? O fea seevae ma ofu talaloa?
Sa vave ona taia a’u i luitau o le galuega. Sa ou mafatia lava mai le le lava o le malolo i malaga i vaalele ma o nisi taimi sa ou tautulemoe ai i taimi o a ma lesona. Sa ese le aganuu, sa ou le malamalama i le gagana—sa mautinoa lava sa le tutusa ma le gagana sa ou aoaoina i le MTC—ma sa tulagaese le meaai. Ma e tusa ai ma meaai, masalo sa ma aia ma la’u soa se meaai le lelei ona sa ma taufai mamai leaga uma. Ma, mai na mea uma,i se tasi o ou po muamua i Chile, sa ma aafia ai i se mafu’ie.
O la’u Kerisimasi muamua lea ese mai le fale, ma sa ou matua ma’i lava. Sa ou taoto i se moega i se atunuu e le masani ai, sa taumafai e malamalama i se gagana sa le mafai ona ou malamalama ai, ola faatasi ma se isi tagata ou te le iloaina. O le uiga atoa lea o le galuega faafaifeautalai, ma aisea na ou faananati ai?
E ui i nei mau luitau uma, ae sa amata ona ou alofa i tagata o Chile ma lo’u loto atoa. Sa lelei tele i latou ma sa faigofie ona alofa i ai—ma o le toatele o i latou sa matua matelaina lava mo le savali o le Faaola. I le lalolagi moni lava, lea sa matua faananau ai lava tagata mo le savali a se Faaola, o laau Kerisimasi ma totini e utu i vavae sa le’i taua tele e pei ona sa i ai i le taimi muamua. Afai sa tuua e Keriso Lona aiga faalelagi ma afio mai i le lalolagi ina ia puapuagatia ma maliu mo i tatou uma, sa mafai foi ona ou tuua ma le mautinoa lo’u aiga ma onosaia ni nai faigata laiti ina ia faasoa atu Lana savali ofoofogia.
O lena Kerisimasi na aoaoina au i le olioli moni o le fesoasoani atu i tagata ia maua le meaalofa aupito silisili a le Tama Faalelagi o meaalofa uma, o Lana fuafuaga sili o le fiafia—ma o le fiafia, sa ou iloa ai, o se tasi o mea e sili ona mananao i ai tagata uma, e le na o le taimi o le Kerisimasi, ae mo le faavavau.
O Se Tamā Talavou ua Oti Lona Toalua ma le Faaipoipoga
I nai tausaga ina ua maea la’u misiona, sa ou fetaiai ma se luitau fou. Sa ou faanoanoa, lelava, ma matua tuuatoatasi lava. I ni masina na muamua atu, sa maliu faafuasei ai lo’u toalua e lei atoa le lua tausaga talu ona ma nonofo, i se faalavelave tau taavale, ma tuua ai na o au ma le ma pepe teine 7 masina le matua.
Sa ou aoga i se iunivesite, faigaluega, ma tauivi e aoao pe faapefea ona avea ma se matua nofotoatasi. Sa latalata mai le Kerisimasi, ma a o tuua e isi tagata ma toefoi atu i o latou aiga e faatasi ai ma aiga ma e pele i taimi o aso malolo, ona o tiute faalegaluega, sa tatau ai ona ou nofo i le a’oga. Sa ou lagona le tuuatoatasi ma le faanoanoa tele. Sa oo mai le Kerisimasi ma toe mou atu, ma faaauau pea ona alu le taimi.
Toeitiiti atoa le tausaga mulimuli ane, a o toe latalata mai foi le Kerisimasi, sa ou manatua o la lava ou te nofotoatasi.Fai mai tusitusiga paia e le lelei ona nofotoatasi na o le tagata (tagati i le Kenese 2:18), ma sa ou ioe i ai ma lo’u lotoatoa. Sa ou manaomia sa’u soa, ma sa manaomia e si o’u afafine pepe se tina.
Sa ou mafaufau, “Atonu ou te le aulelei tele, ae o ai se tamaitai o le a le manao i se pepe teine mo’i ma ola mo le Kerisimasi? E le na o se pepe meataalo—ae o le pepe moi lava?” Ma o le mea e faafetai ai, afai e manao se tasi i le pepe, ia, e alu atu ai ma au i le afifi lea.
Sa ou tulimataia pea se tamaitai talavou i la’u vasega paiolo, ae ua tulata i le faaiuga o le semesa ma sa ou lei mauaina lava le lototele e talanoa ai ia te ia. Masalo sa ‘au mai le Lagi ma a’u ona i se tasi aso, o se avanoa moni lava, sa ma taufai ulufafo faatasi ai mai le potu suesue i le taimi lava e tasi. O lo’u avanoa lava lea. Sa ou amataina se talanoaga, ma mulimuli ane i lena po sa ou valaau atu ai ia Nancy ma talosaga o ia i se tafaoga faamasani. Sa ma o i se tafaoga faamasani se tasi ona sosoo ai lea ma le isi, ma le isi. Peitai, sa ou iloa ua oo mai le Kerisimasi, ma o le a alu Nancy i le fale. O le a se mea e mafai ona ou faia e faatumau ai le mumu o le tamai aloiafi ma mumutele lea faatoa amata ona atiae i lo ma va?
Sa maua sa’u fuafuaga. Faatasi ai ma le fesoasoani a le uso o Nancy ma lana uo tama, sa ou faateia ai lava Nancy i se meaalofa i aso taitasi o aso e 12 a o agai atu i le Kerisimasi.
Sa aoga la’u fuafuaga. Sa maua e Nancy ia meaalofa, ae sa matua le iloaina e ia po o ai na avatu ai. Sa oo ina avea ma se mealilo sa taumafai ai lona aiga atoa e sue ia maua. Sa folafola mai le uso o Nancy ma lana uo tama la te le faailoaina lava lo la aafia ai. Sa avea moni lava ma se pulega faalilolilo—ae o le pulega lea o ni faanaunautaiga mama.
Peitai, i se tasi o po sa maua ai e le aiga se faaiteite. Sa tatagi le logo o le faitotoa, sa faataalise atu le aiga i le faitotoa, ma latou iloa atu ai se taavale o masau ese atu. Sa latou tusi i lalo le laisene o le taavale, ma o le aso na sosoo ai sa latou valaau atu ai i le vaega o laisene o taavale e sue po o ai e anaina le taavale. Sa latou iloaina ai o le taavale a se tasi o le aiga o le uo tama a le uso o Nancy. Ia ua maua nei le ova a le tama. Sa tautino atu e le uso o Nancy ma lana uo tama lo la aafia ai i au fuafuaga. Ma le faalilolilo, sa ou fiafia sa maua a’u, aua sa mafai ona ma faatasi ma Nancy i le aso Kerisimasi, ma mai lena taimi sa ma faaauau pea la ma faauoga.
Ma e pei lava ona sa ou mafaufau ai, sa manao Nancy i se pepe teine mo’i ma ola mo le Kerisimasi. Sa alofa o ia i lo’u afafine e pei o sana pepe na ia fanauina. Ma o le mea e laki ai, sa ave faatasi ai ma au i le afifi lea. Sa ma faaipoipo i le taumafanafana na sosoo ai. O se tasi lea o meaalofa silisili ua ou mauaina.
Sa ou oo i le fuafuaga sili o le fiafia a le Tama Faalelagi. Sa ia te au se aiga e faavavau, ma sa faamauina faatasi i matou e faavavau. O le meaalofa o le faaipoipoga ma le aiga e faavavau o se meaalofa e mafai e tagata faatuatua uma ona faamoemoe i ai, a le o lenei olaga po o le olaga a sau. O le a se isi meaalofa sili atu o i ai?
A o ou mafaufau ai i o’u aso o le tuuatoatasi ma le faanoanoa, sa ou iloa ai sa i ai foi se taimi na tuulafoaiina ai Iesu Keriso ma tuuatoatasi foi, ma e sili atu i lo se isi lava tagata, sa Ia silafia o’u tiga. O Ia, e sili atu nai lo seisi tagata, sa silafia lo’u tiga. Sa oo foi lava i o’u taimi silisili o le tuuatoatasi, ou te lei lagonaina lava Lona tuulafoaiina o au. Sa le gata o Ia o lo’u Faaola; o Ia foi o lo’u uso ma la’u uo mamae.
Tama Talavou
Sa amata ona faatupulaia le ma aiga laitiiti, ma i ni nai tausaga mulimuli ane, sa ma toe fetaiai foi ma se isi popolega sili. A o latalata mai foi le Kerisimasi, sa ma tilotilo atu ma Nancy i le tasi ma le isi ma iloa sa le i i ai ma se ma tupe e faatau ai ni meaalofa o le Kerisimasi mo le ma fanau laiti i lena tausaga.
Faatoa ou faauu mai le kolisi, ma sa ma taumafai pea e ola tutoatasi. E ui sa lelei la’u galuega, ae sa lei pine ae iloagofie sa le gafataulimaina e le ma paketi le taugata tele o le soifuaga. Sa na o le pau le mea na malosi mo i maua o i maua o ni tagata e totogi atoa le sefuluai. E ui sa lei iloa e se isi tagata le mala ua ma oo i ai, ae sa silafia e le Tama Faalelagi ma le Faaola, ma sa amata ona La auina maia ni nai vavega o le Kerisimasi.
I se tasi aso sa tatagi ai le logo o le faitotoa. O se tuaoi o loo uuina se pusa o meataalo. Sa ia fai mai, “Sa tapena le matou fale ma matou tau atu ai i meataalo nei ua le toe mananao ai le ma fanau. Sa matou mafaufau pe mananao ai le lua fanau.” Mata latou te mananao ai!
O le isi aso sa toe tatagi ai le logo o le faitotoa. Ae o le taimi lenei o nisi o tagata o le uarota. Sa tutu iina ma se uila vilivae mo se teineitiiti. Na latou fai mai, “Matou te le manaomia lenei uila vilivae ma sa matou mafaufau i le tou aiga. E te lua manatu e ono faaaoga e le lua afafine? Sa maua matua fiafia lava!
I ni nai vaiaso na muamua atu, sa ulufale ai le ma atalii laitiiti i se tauvaga valiata i se faleoloa i le lotoifale. Sa maua se telefoni i se tasi aso ma se tala fiafia tele ua manumalo o ia i le tauvaga. Sa ia manumalo ai i se vitio lauiloa a tamaiti. Sa matou ofo lava!
O nei vavega laiti uma—semanu e maua e le ma fanau ni nai meaalofa laiti o le Kerisimasi. Sa totogi le ma sefuluai, ma sa tatala ai e le Tama Faalelagi ma le Faaola ia pupuni o le lagi ma sasaa mai a La faamanuiaga—ma sau i lalo o le alaasu.
Sa ou mafaufau i le pepe o Keriso na fanau mai i ni tulaga faatauvaa lava, ae sa maua lava o Ia e isi ma ofo atu foi ni meaalofa taua. I le avea ai ma se tama faalelalolagi, sa ou manao ma le faananau tele ia foai atu i la’u fanau mea uma na ou mafaia.
O lagona foi ia e tasi o lo tatou Tama Faalelagi. Ae e matua atoatoa Lona alofa, ua finagalo o Ia e foai mai ia i tatou mea uma ua ia te Ia. O se meaalofa lemafaamatalaina.
Faaiuga
Uso e ma tuafafine, ua oo pe o le a oo foi i tatou uma i se taimi i lagona o le tuuatoatasi, ma’i, faanoanoa, mativa, po o le mamao mai le aiga. O le mea e faafetai ai, o loo i ai so tatou Tama Faavavau ma se Faaola e malamalama ia i tatou. Afai tatou te o atu ia i Laua, o le a La uu atu o tatou lima ma fesoasoani mai ia i tatou i luitau uma.
Uso e ma tuafafine, mai lea taimi i lea taimi o le a tatou iloa uma ai o loo i ai lava se tasi o loo tuuatoatasi, ma’i, faanoanoa, mativa, pe o mamao foi mai le aiga. E ono taitaia i tatou e lo tatou Tama ma le Faaola e fesoasoani atu i isi, ma o le a avea ma o tatou avanoa e faia ai.
I le avea ai ma se tamaitiiti, sa ou manatu lava o le Kerisimasi e na o le tasi le aso i le tausaga. I le avea ai ma tagata matua, ua ou iloa nei o le Kerisimasi o aso uma lava. Ona o le agalelei o lo tatou Tama alofa ma lo tatou Faaola pele, o Iesu Keriso, ua avea ai i tatou ma e mauaina le tafe faifai pea o meaalofa faalelagi—i aso uma. Ua anoanoai tele meaalofa faalelagi e tolaulau.
O lo’u lotofaafetai mo le Tama ma le Alo e matua tele naua ma loloto tele, e pei o Amona anamua, “e le mafai ona ou fai atu se vaega itiiti o le mea ua ou lagona” (Alema 26:16).
Ioe, o le aso soifua o Iesu Keriso o loo tatou faamanatuina i vaitau taitasi o le Kerisimasi, ae ona o le lelei o le Tama ma le Alo, o loo tatou maua ai pea meaalofa uma. Ou te molimau atu ai i nei mea i le suafa o Iesu Keriso, amene.