Kerisimasi—o se Vaitau e Alofa, Auauna, ma Faamagalo atu ai le Tasi i le Isi
Ou te fiafia lava e vaai i le fiafia ma le tulimatai atu o le fanau i le vaitau atoa o le Kerisimasi. Ou te manatua lo’u lava ia tulimatai atu o se teineitiiti o le Peraimeri a o ola ae i Atenitina. I se tasi tausaga, sa fai mai ai lo matou faiaoga o le Peraimeri ia fufulu mama a matou meataalo tuai, faamama pepe meataalo, ma fai faalelei latou ofu ina ia mafai ona matou foai atua i tamaiti ma teineiti laiti sa taofia i le falemai i le aso Kerisimasi.
I lena vaiaso a o ou faamamaina a’u pepe meataalo tuai, sa fesili mai lo’u tina po o le a la’u mea la e fai. Sa ou faamatala atu i ai le mea na talosagaina i matou e a matou faiaoga Peraimeri e fai, ona ia tali mai lea, “E tatau foi ona e foai atua se tasi o au meataalo manaia i tamaiti.”
I lena mea sa ou tali atu ai, “Aisea o le a ou faia ai lena mea?
Ona ia fai mai lea o se tala sa tumau ai ia te au i nei tausaga uma. Sa ia fai mai, “Cris, e matua lelei lava le foai atu o se mea tatou te fiafia moni ai lava, se mea e faigata ona foai atu ona e pele ia i tatou, se mea e mafai ona avea ma se taulaga. O le mea lena na avea ma meaalofa a lo tatou Tama Faalelagi mo i tatou. Na Ia auina mai Lona Alo, o Iesu Keriso—e le o se isi lava atalii. Sa Ia auina mai Lona Alo Pele ma le atoatoa ina ia mafai ona tatou toe foi atu ma toe nonofo faatasi ma Ia.”
I lena tausaga sa ou foai atu ai se tasi o a’u meataalo faapelepele, sa ou malamalama teisi ai i le meaalofa a lo tatou Tama oi le Lagi mo i tatou—Lona Alo Pele, o Iesu Keriso, o le na foai mai ma le agaalofa ma le le manatu faapito Lona soifua mo i tatou.
O tausaga uma, i le avea ai ma se vaega o le faamanatuina o le matou Kerisimasi, sa faitau ai e lo’u tama mai tusitusiga paia le tala matagofie mai le Luka:
“O aso lava ia na oo mai ai le poloaiga a Kaisara Aokuso ia tusia uma ai le lalolagi. …
“Ua o uma atu foi i latou ia tusia, e taitasi i lana lava aai.
“Ua alu ae foi Iosefa mai Kalilaia, mai le aai o Nasareta, i Iutaia, mai le aai o Tavita, ua igoa ia Peteleema; …
“Ia tusia faatasi ma Maria lana ava sa faufautane ia te ia, ua to o ia,
“Sa i ai i laua, ona oo lea i ona po e fanau ai o ia.
“Ua fanau e ia lana tama ulumatua, ua ia aui ia te ia i le ie, ma faataoto ia te ia i le falepovi; aua latou te le ofi i le fale e tali ai malo.
“Sa i le vao o lea nuu leoleo mamoe sa nonofo ai ma leoleo po i lo latou lafu mamoe.
“Faauta foi, ua tu mai ia i latou le agelu a le Alii, ua pupula faataaliolio mai foi ia te i latou le pupula o le Alii: ua matua fefefe ai lava i latou.
“Ona fai mai lea o le agelu ia te i latou, Aua tou te matatau: aua faauta, ou te aumai ia te outou le tala lelei, e olioli tele i le nuu uma.
“Aua o le aso nei ua fanau ai i le aai o Tavita, lo outou Faaola, o le Alii ia o Keriso.
O le faailoga lenei ia te outou, e iloa e outou le tama meamea ua aui i le ie, o loo taoto i le fale povi.
“Ona faafuasei lea ona faatasi mai ma le agelu o au mai le lagi e toatele ua vivii i le Atua ua faapea ane,
“O le viiga i le Atua i mea aupitoaluga, ma le manuia i le lalolagi, o le finagalo alofa i tagata.”1
Uso e ma tuagane, e mafai faapefea i aso nei ona tatou olioli i lenei lava manuia [po o le filemu] e tasi ma le finagalo alofa i tagata?
A o ou mafaufau loloto i lenei fesili mo ni nai vaiaso ua mavae, ma le manatuaina o le Kerisimasi o le vaitau o le foai atu, e tolu ni faatinoga—ni meaalofa se tolu e mafai ona tatou foai atu uma—na oo mai i le mafaufau. Ioe, tatou te foai atua nei meaalofa i le tausaga atoa, ae i le vaitau matagofie o le Kerisimasi, tatou te manatua ai le meaalofa a le Tama, o Lona Alo ma mafaufau pe faapefea ona tatou mulimuli i le La faataitaiga a o tatou faateleina lo tatou gafatia faaletagata lava ia ma le manao e foai atu.
1. O le Kerisimasi o le vaitau e foai atu ai le alofa.
O lo tatou Tama oi le Lagi ma lo tatou Faaola, o Iesu Keriso, o le faataitaiga aupito sili lea o le alofa. Ua aoao mai se mau faapelepele: “Aua ua faapea lava ona alofa mai o le Atua i le lalolagi, ua ia auina mai ai lona Atalii e toatasi, ina ia le fano se tasi e faatuatua ia te ia, ae ia maua le ola e faavavau.”2
Sa aoao i tatou e lo tatou Faaola e ala i le faataitaiga ia alolofa atu i tagata uma. Sa Ia aoao foi i tatou ia alofa atu i le Atua ma ia alofa atu i o tatou tuaoi e pei o i tatou lava ia i tatou.
Sa faamalamalama mai e Elder John A. Widtsoe:
“O le natura atoa ma le taua o le alofa atonu tatou te le malamalama i ai, ae o loo i ai tofotofoga ia e ono iloaina ai.
“O le alofa e faavae i taimi uma i le upumoni. … O pepelo ma le faa’ole’ole, po o se isi lava soliga o tulafono o le amio mama, o faamaoniga ia o le leai o se alofa. E fano lava le alofa i le lotolotoi ai o mea le moni. … O lea, … [o ia] o le e pepelo i le pele ia te ia, pe fai atu soo se amioga e feteenai ma le upumoni, e le alofa moni o ia ia te ia.
“Ma le isi, e le faatausuai pe faatiga pe faamanualia e le alofa le pele ia te ia. … O le amio paaa ua aveesea mai le alofa … e pei foi o le upumoni ua aveesea mai mea le moni. …
“O le alofa o se malosiaga lelei ma ola. E fesoasoani i le pele. Afai o loo i ai se manaoga, e taumafai lava le alofa e faafetaia’ia. Afai o loo i ai se vaivaiga, e suitulaga e le alofa i le malosi. … O le alofa e le lotofesoasoani o se alofa faafoliga pe faataga alofa.
“E pei lava o le lelei o nei tofotofoga, o loo i ai se alofa sili atu. E ositaulaga le alofa moni mo le pele. … O le tofotofoga faaiu lena. Sa foai mai e Keriso o Ia lava, foai mai Lona soifua, mo i tatou, ma folafola mai ai le moni o lona alofa mo ona uso ma tuafafine faaletino.”3
Ua valaaulia e lo tatou Tama oi le Lagi i tatou taitoatasi, o Lana fanau, ia foai atu ma ositaulaga mo lenei alofa. “Ia outou foai atu,” sa fetalai ai le Faaola, “ona foaiina mai ai lea ia te outou.”4 “Ua maua fua e outou, ia outou foaifuaina atu.”5
2. O le Kerisimasi o le vaitau e foai atu ai le auaunaga.
Sa auauna atu lo tatou Alii ma le Faaola patino i tagata, siitia e mafatia, avatu le faamoemoe i e na lotovaivai, ma saili i le na leiloa. Na Ia faapupula i e tauaso, faamalolo i e mamai ma pipili ina ia mafai ona latou toe savavali, ma faatulai mai e na oti.
I le taimi o le Kerisimasi, ou te mafaufau ai i faifeautalai—alii, tamaitai, faifeautalai matutua, ma peresitene o misiona i le lalolagi atoa—o e, i le avea ai ma sui o Iesu Keriso, o loo foai atu ma le lotofuatiaifo o latou taimi ma auaunaga i tagata uma. Ou te mafaufau i uso ma tuagane uma o loo faaaluina le tele o itula e auauna atu ai ma le faatuatua i o latou valaauga. O lenei foi taimi, ou te mafaufau ai i alii ma tamaitai o loo auauna atu i le militeli ina ia faamautinoa lo tatou saogalemu. Faafetai atu mo la outou auaunaga!
Ae e tusa foi pe tatou te le o auauna atu i le Alii po o lo tatou atunuu i ni auaunaga tumau, ae o a tatou avanoa e auauna atu ai e le faatapulaaina. E mafai e upu agalelei ma galuega ona aveesea avega ma faafiafia ni loto! Ua valaaulia e lo tatou Tama oi le Lagi i tatou uma ia tuu atu ni auaunaga. Ma a tatou faia, e “tali [mai] le Tupu [ma] faapea [mai] ia te i [tatou], E moni, ou te fai atu ia te outou, aua na faia e outou i le tasi o e aupito itiiti o o’u uso nei, o a’u lea na outou faia i ai.”6
3. O le Kerisimasi o le vaitau e tuu atu ai le faamagaloga.
O le faamagaloina o isi e aumaia ai le filemu ma le olioli i o tatou olaga. Na aoao mai Peresitene Heber J. Grant: “E leai se mea na te aumaia atili ia i tatou le Agaga o le Atua nai lo le … agalelei, mafaufau mo isi, agaalofa, tali-tiga ma le faamagalo atu. E leai se mea na te aumaia le olioli sili atu ia i tatou nai lo le saunia ma loto e faamagalo atu i agasala a o tatou tuaoi o tetee mai ia i tatou, ma e leai se mea o le a aumaia le ta’usalaina sili atu ia i tatou nai lo le faama’a’aina o o tatou loto ma le lototiga ma le tauimasui i o tatou lagona ia i latou o e o siomiaina i tatou.”7
Ina ia mauaina le faamagaloga mo a tatou agasala, e manaomia ona tatou faamagalo atu i isi.
O le faamagalo atu i isi e faatagaina ai i tatou e faatoilaloina lagona o le ita, lototiga, po o le tauimasui. Ae o ai e fia lagonaina na lagona i le Kerisimasi? E mafai foi e le faamagaloga ona faamaloloina ni manuaga faaleagaga ma aumai le filemu ma le alofa lea e na o le Atua e mafai ona aumaia.
E finagalo lo tatou Tama i le Lagi ia i tatou ia salamo ma faamagalo atu i tagata uma—e aofia ai i tatou lava. E pei ona saunoa Elder Jeffrey R. Holland: “Pe o le a lava le tuai ua e mafaufau i ai, pe o le a foi le tele o avanoa e te manatu ua e misia, pe o le a foi le tele o mea sese e te lagona sa e faia, po o ni taleni e te manatu e te le o mauaina, po o le a foi le mamao ese mai le aiga ma le Atua e te lagona ua oo i ai lau malaga, ou te molimau atu e te lei malaga lava i se mamao e le mafai ona aapa atu i ai le alofa faalelagi. E le mafai ona e magoto ia maualalo ifo nai lo le malamalama le gata o le Togiola a Keriso e aapa atu ai ia te oe.”8
Uso e ma tuagane, i lenei vaitau o le Kerisimasi, ia tatou foai atu uma ni meaalofa aupito silisili. Ia tatou ositaulagaina ni meataalo faapelepele faatasi ma ni loto faafetai—ae le o ni meataalo ua leaga ma tuai. Ma ia tatou foai atu le meaalofa o le alofa, le meaalofa o auaunaga ia i latou o siomiaina i tatou, atoa ai ma le meaalofa o le lotofaamagalo. Aua a tatou salamo, e faamagaloina i tatou e le Paia e Toatasi o Isaraelu. Ou te molimau atu o loo soifua o Ia. O Ia o le Tupu o tupu, le Alii o le Filemu, lo tatou Faaola, lo tatou Togiola, ma la tatou Uo. I le suafa, o Iesu Keriso, amene.