Lub Txiaj Ntsim Los ntawm Leej Txiv: Txais Los Tsis Txais
Cov nkauj zoo mloog thiab tus Muam Eubank tej lus yeej zoo kawg. Vajtswv txoj kev tshav ntuj yeej zoo kawg nkaus! Nim no, twb txog lub Kaum Ob Hlis Ntuj lawm. Huab cua no no thiab twb tau los daus me ntsis lawm. Ua rau neeg coob xav tias tsis ntev yuav txog lub caij Christmas. Tiam sis, rau kuv mas lub caij Christmas tsis zoo li no.
Txhua xyoo uas kuv nyob hauv lub ntiaj teb no, yeej yog lub caij sov sov ua ntej Christmas. Yog vim nyob hauv Audaliyas lub Kaum Ob Hlis Ntuj yog lub caij sov. Thaum nyob hauv Afikas Sab Hnub Poob, uas kuv thiab kuv tus poj niam wb nyob tau tsib xyoos lawm, yeej sov txhua lub sij hawm.
Yog li ntawd, lub Kaum Ob Hlis Ntuj yeej yog lub sij hawm rau peb nyob ntawm ntug hiav txwv thiab ci nqaij. Thaum lub caij Christmas, peb lub tsev tsw txiv mango thiab hnov tau neeg luag nrov. Tiam sis lub hwj huam ntawm Christmas yeej zoo ib yam nyob txhua qhov chaw. Txawm nyob hauv Sydney, Salt Lake, los sis Sierra Leone; txawm nyob hauv Nuku’alofa, Newfoundland, los sis Nigeria, peb tus Cawm Seej txoj kev yug los tshoov tib neeg lub siab kom lawv xav ua zoo.
Feem coob, tib neeg muab khoom plig, mus xyuas lwm tus, thiab ua tej yam zoo kom ua koob tsheej txog Christmas. Peb cov phooj ywg nyob hauv Samoa muaj kab lig kev cai thaum hnub tom qab Christmas, es lawv tso zaub mov thiab lwm yam qhaub noom hauv phij xab thiab muab rau tej tsev neeg uas xav tau ntau tshaj plaws, tsis yog nyob hauv lawv pawg ntseeg xwb, tiam sis rau lwm tus hauv lawv zej zos thiab. Lawv kuj muaj ib lub vaj zaub loj li ob acre, es cov zaub feem ntau los lawv muab rau tib neeg uas txom nyem.
Ib tug phooj ywg los ntawm Senegal nyob hauv Afikas Sab Hnub Poob qhia kuv tias nyob hauv nws lub zos hauv Ivory Coast, txhua Hmo Ua Ntej Christmas, cov neeg zej zos tsis nqa khoom plig, tiam sis lawv hais lawv tej kev tsis sib haum rau cov thawj coj. Cov thawj coj siv tas ib hnub ntawd sib tham nrog tej tsev neeg kom kho tej kev tsis sib haum ntawd. Cov neeg zej zog yuav tsum muaj kev thaj yeeb thiab kev sib haum nyob hauv txhua lub tsev thaum hnub Christmas vim lawv ua koob tsheej txog Khetos txoj kev yug los—tus uas yug los kom coj kev thaj yeeb rau lub ntiaj teb.
Xyoo no, peb tau ntsib ib tug ntxhais txib hluas, tus Muam Jeanne Ingabire los ntawm Rwanda, uas ua ntxhais txib nyob hauv Liberia. Nws qhia ib zaj rau kuv txog qhov uas kev tua ib pawg neeg hauv Rwanda thaum xyoo 1994 tau ua li cas rau nws. Nws txiv yog los ntawm xeem neeg Hutu, uas ntxub cov los ntawm xeem neeg Tutsi. Tiam sis nws niam yog ib tug uas los ntawm xeem neeg Tutsi ntawd. Xwv kom cawm nws tus poj niam thiab nkawd plaub tug ntxhais txoj sia, tus txiv tsev ua siab loj no kom nws tsev neeg nkaum nyob deb heev thiab rov qab mus rau nws lub zos nws ib leeg. Nws tus poj niam thiab cov ntxhais tsis tau pom nws dua ntxiv thiab lawv txom nyem heev. Cuaj xyoos tom qab ntawd lawv twb rov qab los koom kev sib ntsib kom rov qab sib haum uas tseem fwv tau npaj, es lawv kawm tias lawv txiv twb raug tua tuag thaum nws rov qab los rau nws lub zos. Tiam sis, xav tsis thoob uas tus Muam Ingabire niam thiab cov viv ncaus zam txim rau cov uas tau muab lawv txiv tua tuag.
Lub sij hawm uas Yauxej Xamiv tsim nyog npau taws vim nws twb raug kaw hauv lub Tsev Kaw Liberty tau ntau lub hlis dhau lub caij Christmas ntawm xyoo 1838, tus Tswv tau muab tshooj 121 ntawm phau Lus Qhuab Qhia thiab Kev Khi Lus tshwm sim. Nyob hauv kev tshwm sim no tus Tswv pab Yauxej kov yeej tej kev ntxhov siab uas Yauxej hais txog thaum pib tshooj no thiab tus Tswv qhia tus Yaj Saub tias kev ua siab zoo, ua siab ntev, ua siab mos siab muag, thiab kev hlub tiag tiag yog Khetos cov thwj tim tej cwj pwm uas yuav tsum muaj.
Christmas ua rau kuv nco txog tej yam uas muaj nqis rau kuv tsev neeg. Tiam sis, tsis yog txhua yam kuv nco txog yog tej yam zoo. Thaum kuv yog ib tug me nyuam tub, kuv nco qab tias kuv txiv tau pub ib lub tsheb ua si uas yog xim ntsuab rau kuv. Peb yog ib tsev neeg pluag pluag, thiab kuv nyiam qhov khoom plig ntawd. Tiam sis, muaj ib hnub thaum kuv npau taws txog ib yam tsis tseem ceeb, kuv muab lub tsheb ua si ntawd txawb mus rau hauv tsob ntoo uas nyob rau ntawm peb txoj laj kab. Tam sim ntawd kuv khuv xim qhov uas kuv tau muab khoom ua si uas kuv nyiam pov tseg tiam sis kuv kuj khuv xim vim tias kuv xav tias yog ib lub cim txog kuv txiv txoj kev hlub. Kuv nrhiav nyob ub nyob no, tiam sis kuv nrhiav tsis tau. Thaum txog lub caij no no thiab tsob ntoo cov nplooj zeeg tas, kuv twb rov qab nrhiav, tiam sis nrhiav tsis tau. Kuv tseem mob siab vim kuv twb ua rau kuv txiv tu siab heev. Tseem mob kuv lub siab.
Nej paub tias, zaj no yog piv txwv txog qhov uas tej lub sij hawm peb muab peb Leej Txiv Saum Ntuj Ceeb Tsheej txoj kev hlub thiab tej lub txiaj ntsim pov tseg, qhov tseem ceeb tshaj plaws yog qhov uas Nws txib Nws Leej Tub los raug txom nyem thiab theej peb lub txhoj. Yeej yuav khuv xim yog tias peb xyeej Nws txoj kev txi theej txhoj los sis tej kev khi lus thiab cov kab ke ntawm Nws txoj moo zoo!
Auj kheev lam peb yuav ua zoo dua li cov uas ua hauj lwm kom qhia tias lawv hlub lwm tus. Tsis ntev tas los, neeg coob twb pab cov neeg hauv Florida thiab Carolinas uas raug cua daj cua dub loj heev thiab pab cov uas raug txom nyem los ntawm cov hluav taws hauv California los sis tau pab lwm tus uas raug tej yam zoo li ntawd nyob thoob plaws lub ntiaj teb.
Thaum lub Kaum Ob Hlis Ntuj 25, 1974, lub tuam nroog ntawm Audaliyas Thaj Chaw Qaum Teb raug puas tsuaj. Sawv ntxov thaum Hnub Christmas, Cua Daj Cua Dub Tracy twb raug lub nroog Darwin. Ntau tus neeg tuag lawm, thiab Darwin cov pej xeem feem coob tsis muaj tsev lawm. Saib daim duab txog kev puas tsuaj hauv Florida es yeej zoo li lub nroog Darwin. Tiam sis lub hwj huam ntawm Christmas twb kov yeej lawv txoj kev poob siab. Neeg nyob thoob plaws Audaliyas twb xa nyiaj los, thiab neeg coob twb tso txhua yam tseg thiab mus rau Darwin kom pab rov qab ua lawv lub tsev.
Ntau xyoo tas los, thaum wb tus ntxhais hlob muaj ob xyoos xwb, nws txhais ceg dam ua ntej hnub Christmas thiab yuav tsum siv ob peb lim tiam nyob hauv lub tsev kho mob vim yuav tsum muab nws txhais ceg nce siab. Yog ib lub caij Christmas nyuaj heev. Ib tsev neeg hauv peb pawg ntseeg uas tsis muaj nyiaj pes tsawg twb tuaj xyuas nws thaum Hnub Christmas. Tus me nyuam yaus nyias twb nqa ib khoom plig uas nyias nyiam heev, uas lawv nyuam qhuav txais thaum sawv ntxov xwb, es muab rau wb tus ntxhais ua khoom plig rau nws. Kuv tus poj niam, Kay, thiab kuv wb los kua muag vim cov me nyuam thiab lawv niam lawv txiv muaj siab dawb siab zoo npaum li no.
Nov yog lub hwj huam ntawm Christmas tiag tiag—ib leeg pab ib leeg. Vim hais tias, ib qho tseem ceeb ntawm tus Cawm Seej lub neej yog Nws txoj kev mus txhawb pab “ib tug neeg.” Nov yog ib lub ntsiab cai uas cov mej zeej hauv Nws lub Koom Txoos nyob hauv Afikas ua, thiab Nws xav kom peb yuav tsum ua ib yam li ntawd.
Thawj Tswj Hwm M. Russell Ballard tau hais tias txoj Kev Theej Txhoj yog qhov zoo tshaj plaws uas tus Cawm Seej tau ua rau peb txhua tus. Thawj Tswj Hwm Ballard hais tias:
“Yog peb twb to taub txoj Kev Theej Txhoj thiab qhov uas txhua tus neeg muaj nqi npaum li cas, ces peb yuav nrhiav Vajtswv … txhua … tus me nyuam. Peb yuav pab lawv paub txog Khetos txoj kev hlub lawv. Peb yuav ua txhua yam peb ua tau kom lawv npaj txais cov kab ke cawm seej ntawm txoj moo zoo.
“Yog tias Khetos txoj Kev Theej Txhoj yog qhov uas txhua tus thawj coj hauv pawg ntseeg thiab ceg ntseeg xav txog, ces yeej yuav tsis tso ib tug mej zeej tshiab tseg. …
“… Qhov txawv ntawm txoj Kev Theej Txhoj yog qhov uas nws nyob mus ib txhis, tiam sis muab rau ib tug neeg ib tug dhau ib tug. …
“Cov kwv tij thiab cov muam, nco ntsoov tias ib tug neeg xwb muaj nqis npaum li cas.”1
Yeej yuav zoo yog tias peb txhua tus tau ua raws li cov lus ntuas no thiab cov lus ntuas ntawm peb tus yaj saub uas peb hlub, Thawj Tswj Hwm Russell M. Nelson—kom ua raws li ob lo lus txib tseem ceeb raws li ib txoj kev siab dua thiab dawb huv ntxiv. Thiab yog tias nej xav tias nej tsis txawj pab lwm tus thaum nej ua li ntawd, cia li xav txog paj lug no los ntawm Afikas: “Yog tias yus xav tias yus me dhau yus ua tsis tau dab tsi, ces yus ib txwm tsis tau nyob ib hmo nrog ib tug yoov tshaj cum.”
Peb tsis tas mus rau Thaj Teb Dawb Huv kom ua tej yam zoo los sis nyob ze peb tus Cawm Seej. Christmas yog ib lub sij hawm rau peb tsom ntsoov rau lub txiaj ntsim uas peb pub rau tus Cawm Seej thaum peb hlub thiab pab lwm tus. Yog li ntawd yeej tsis deb kom peb mus rau Npelehees. Peb yuav tsum xaiv kom muaj Khetos hauv peb lub neej—kom txais tej txiaj ntsim uas Nws pub rau peb thiab pub lub txiaj ntsim uas yog peb lub siab rau Nws. Kuv hlub Nws thiab kuv ua tim khawv txog Nws txoj kev hlub rau peb txhua tus los ntawm Yexus Khetos lub npe, amees.