Cia Txhua Txhia Tus Npaj Siab Tos Nws
Dhau ib lub lim tiam tas los, tau qhib cov teeb Christmas hauv Tshav Tuam Tsev, raws li kab lig kev cai uas ua tau 53 xyoos lawm, thiab ua rau lwm tus xav tias lub caij Christmas twb pib lawm. Thaum lub caij Christmas peb ua koob tsheej txog Yexus Khetos txoj kev yug los, lub neej, thiab txoj kev kaj, tus uas yog Vajtswv Leej Tub tiag tiag thiab tus Cawm Seej ntawm lub ntiaj teb. Qhov uas cov tim tsev hais thaum Nws yug los ua rau peb muaj kev cia siab: “Thov kom Vajtswv tus uas nyob saum ntuj ceeb tsheej tau koob meej, thiab thov kom cov neeg uas nyob hauv ntiaj teb txhua tus uas ua haum Vajtswv siab tau zoo nyob kaj siab lug!”1 Cov nkauj, cov me nyuam zoo siab, cov khoom plig, cov ntoo Christmas, tej yam uas dai kom zoo nkauj, thiab cov teeb yeej yog tej yam uas muaj feem nrog peb txoj kev ua koob tsheej.
Thaum nej xav txog Christmas, nej nco txog tej yam zoo twg? Rau kuv, txhua xyoo hauv lub caij no ua rau kuv nco txog kev ua koob tsheej txog Christmas thaum kuv yog ib tug me nyuam.
Kuv tseem nco txog tej khoom plig ntau uas kuv tau txais. Kuv nco txog ib lub pob football thiab ib lub pob basketball, khoom ua si thiab khaub ncaws. Tej khoom plig ntawd feem ntau los twb ploj lawm thiab tsis nco txog; cov khaub ncaws twb ntuag tag thiab tsis haum lawm. Tiam sis qhov kuv nco zoo tshaj plaws txog tej lub caij Christmas dhau los—tej yam uas kuv nyiam nco txog tshaj plaws—tsis yog tej yam uas kuv txais tiam sis yog tej yam uas kuv tau pub rau lwm tus.
Cia kuv piav me ntsis. Txhua xyoo, thaum hnub Saturday ua ntej Christmas, cov tub hluas ntxhais hluas hauv peb pawg ntseeg twb koom ua ke hauv lub tsev koom txoos. Peb twb muab cov txiv kab ntxwv, txiv tsawb, thiab khoom qab zib uas ua hauv tsev tso hauv cov pob tawb kom muab rau cov poj ntsuam uas nyob ze. Peb twb mus rau lawv lub tsev, hu tej zaj nkauj Christmas, thiab muab pob tawb rau lawv. Kuv tseem nco txog lawv txoj kev luag ntxhi. Lawv ib txhia yog cov uas hla teb chaws tuaj los yog lawv niam lawv txiv hla teb chaws tuaj uas hais lus sis thaum lawv hais lus Akiv: Muam Swartz, Zbinden, Groll, thiab Kackler. Kuv yeej yuav nco ntsoov qhov sov nyob hauv kuv lub siab.
Thaum Lesa thiab kuv wb muaj me nyuam, wb pib ua kab lig kev cai pub khoom plig Christmas rau ib tsev neeg uas xav tau, ib yam nej feem coob ua. Peb twb kawm txog ib tsev neeg los ntawm ib lub koom haum pab zej zog, thiab kawm tias cov me nyuam muaj hnub nyoog li cas. Peb twb siv sij hawm thiab siv zog kom nrhiav tau tej khoom plig zoo rau lawv. Zoo li wb cov tub nyiam ua li no npaum li lawv nyiam txais lawv tej khoom plig thaum Hnub Christmas! Qhov uas wb tsev neeg ua li no pab kom peb muaj Christmas hauv peb lub siab tiag tiag.
Thaum kuv ua hauj lwm, kuv twb pab ua lag luam muag khoom txhawb nqa kev noj qab nyob zoo nyob thoob plaws lub ntiaj teb. Tej khoom xws li tshuab mus kev, cov tsheb kauj vab uas tsis mus qhov twg, thiab tshuab elliptical feem ntau los pab kom yus lub plawv muaj sia muaj zog. Muaj tseeb tiag, nyob hauv peb lub koom haum peb ua tib zoo kom txhua tus txawj siv tshuab ntsuas lub siab kev dhia kom ntsuas tau qhov uas lawv lub plawv muaj sia muaj zog npaum li cas. Niaj hnub no, peb feem coob coj tshuab ntsuas peb lub plawv rau ntawm peb dab teg thiab ua tej yam kom peb lub plawv muaj sia muaj zog.
Yuav zoo li cas yog muaj ib txoj kev ntsuas yus lub plawv ntawm sab ntsuj plig? Nej lub ntsuas lub plawv yuav qhia dab tsi rau nej? Nej lub plawv ntawm sab ntsuj plig muaj zog npaum li cas? Zoo li lub caij Christmas no yog ib lub sij hawm zoo kawg rau peb txhua tus xav txog peb lub siab seb muaj zog npaum li cas.
Tej zaum nej yuav xav nug nej tus kheej hais tias, “Kuv lub siab puas npaj txais tus Cawm Seej?” Thaum lub caij Christmas peb pheej hu nkauj, “Cia txhua txhia tus npaj siab tos nws.”2 Nej yuav ua li cas kom npaj siab tos tus Khetos, qhov tseem ceeb yog thaum lub caij zoo uas maj heev?
Cov vaj lug kub muaj tej lus uas piav txog tej yam uas pab tau peb ntsuas peb lub siab muaj zog npaum li cas. Tej nqes muaj tej lus xws li “huv,”3 “siab mos siab muag,”4 “txo siab txo ntsws,”5 “lub siab puas tas,”6 thiab “txo hwj chim.”7 Tej lus no, thiab lwm tej lus hauv cov vaj lug kub, ua rau peb paub txog tus Cawm Seej lub siab. Yog tias peb yuav npaj siab tos Nws, peb lub siab yeej yuav tsum huv thiab txo hwj chim ib yam li Nws li.
Zoo li Povlauj sau tseg, peb muaj peev xwm siv zog kom muab Yexus Khetos tej lus thiab tej cwj pwm sau ib tsab ntawv hauv peb lub siab, es “Yexus Khetos yog tus sau tsab ntawv no thiab peb yog cov uas xa. Tsab ntawv no tsis yog nws muab kua mem sau, tiam sis yog nws muab Vajtswv tus uas muaj sia nyob tus Ntsuj Plig sau, thiab tsis yog sau rau ntawm tej txiag zeb, tiam sis yog sau rau hauv neeg lub siab.”8 Yog muaj li no ces yuav tsum muaj ntau tshaj qhov uas peb hais nyob zoo Christmas rau lwm tus. Tus Tswv ceeb toom txog cov neeg uas “lub qhov ncauj hwm kuv, tiam sis lawv lub siab tsis npuab kuv.”9 Hauv lub caij Christmas no thiab tas lub xyoo tom ntej, tej yam peb ua siab dawb siab zoo rau lwm tus yog qhov uas qhia zoo tshaj plaws txog txoj kev hlub tus Cawm Seej uas nyob hauv peb lub siab.
Thaum kuv xav txog kuv lub siab, cov neeg uas twb pab txhim tsa lub Koom Txoos thaum tseem muab txoj moo zoo txum tim rov qab los lawv lub siab uas muaj zog ua rau kuv txais kev tshoov siab thiab muab yam ntxwv rau kuv xyaum. Kuv xav qhia nej txog ib zaj Christmas uas hais txog ib tug Neeg Ntseeg hauv Hnub Nyoog Kawg los ntawm Immingham, Akiv Teb: Mary Wood Littleton.
Mary thiab nws tus txiv, Paul, yeej tsis tau xav tias nkawd yuav ncaim nkawd lub tsev nyob hauv Akiv Teb. Tiam sis nkawd twb hnov txog txoj moo zoo thiab paub tias txoj moo zoo muaj tseeb. Nkawd tau ua kev cai raus dej, thiab ob lub hlis tom qab ntawd, Mary thiab Paul, nrog rau nkawd cov me nyuam, caij nkoj mus rau Amelikas Teb kom koom nrog Haiv Neeg Ntseeg. Lawv tuaj txog New York thaum lub Kaum Ob Hlis Ntuj hnub tim 20, xyoo 1844. Tsib hnub tom qab ntawd, lawv caij laub mus rau Nauvoo, Illinois. Cia li xav tias zoo li cas—huab cua no no thaum lawv taug tej kev nyuaj heev, es lawv ua koob tsheej rau Hnub Christmas nyob hauv Amelikas.
Txawm yog tej yam no hloov tas, Mary tseem cia siab hais tias nws tsev neeg yuav ua koob tsheej txog Christmas ib yam li nyob hauv Akiv Teb, uas muaj paj los rig ua lub kauj, Leej Txiv Christmas, thiab kev hu nkauj. Tiam sis, ntshe Christmas thib ob hauv Amelikas, thaum xyoo 1845, tsis zoo thiab—lawv nyob hauv ib lub laub uas Povlauj tau muab kho ua ib lub tsev dog dig thaum lawv tsev neeg tseem txom nyem nyob hauv Nauvoo. Es Mary tseem muaj kev cia siab hais tias, “Xyoo tom ntej, Christmas yuav txawv.”
Xyoo tom qab ntawd thaum xyoo 1846, uas yog tsev neeg Christmas thib peb hauv Amelikas, Mary thiab cov me nyuam nyob hauv Winter Quarters, npaj taug kev mus ntev mus rau sab hnub poob thaum lub caij nplooj ntoo hlav. Cov neeg phem twb ntiab lawv tawm ntawm Nauvoo, thiab Povlauj tau taug kev nrog cov Neeg Maumoos Pawg Tub Rog—nyob deb li ob peb puas mais. Ib zaug ntxiv, tsis muaj kev hu nkauj thiab tsis muaj Leej Txiv Christmas. Tiam sis, lawv yoo mov thiab thov Vajtswv tiag tiag kom pab Mary tus tub uas muaj yim xyoo, nws yuav luag tuag thiab noj tsis taus txaus. Nws twb tiv dhau lawm, tiam sis Hnub Christmas ntawd muaj 25 tus neeg uas tuag hauv Winter Quarters.
Mus txog lub caij Christmas thib plaub hauv Amelikas, vim lawv nyuam qhuav tuaj txog lub Hav Salt Lake, es Mary thiab nws tsev neeg nyob kaj siab lug lawv thiaj li ua koob tsheej txog Christmas los tau. Txawm li ntawd los, tsis yog kev ua koob tsheej zoo li Mary ua hauv Akiv Teb. Tiam sis, zoo li yog kev ua koob tsheej zoo dua. Lawv ua koob tsheej txog Christmas thaum Hnub Caiv, ib hnub tom qab hnub Christmas ntawm xyoo 1847, es Haiv Neeg Ntseeg tau koom ua ke kom thov Vajtswv, hais lus ua tsaug, thiab hu nkauj qhuas Vajtswv vim lawv tau dim los nyob hauv Xi-oos. Ib zaj uas lawv hu nkauj yog “Los, Los cov Ntseeg,” ib zaj uas tau sau rau ntawm txoj kev pioneer uas cov Neeg Ntseeg nyiam hu nkauj txog lawv txoj kev ntseeg. Tom qab ntawd, “Los, Los cov Ntseeg” yog ib zaj nkauj Christmas uas lawv nyiam hu nkauj, thaum cov pioneer ua koob tsheej txog Christmas.10
Kuv ntseeg tias Mary tej teeb meem ua rau nws lub siab hloov. Zoo li nws pom Christmas meej dua, es muaj Christmas tej kab lig kev cai thiab ib zaj nkauj tshiab hauv nws lub siab. Nws tau muaj ib lub siab uas paub ua kev txi lawm, cia siab rau Yexus Khetos thiab muab siab npuab Nws.
Lub caij Christmas no yog ib lub caij tsim nyog xav txog peb lub siab ntawm sab ntsuj plig muaj zog npaum li cas, yog li ntawd kuv thov kom peb ua ib yam uas tej zaum yuav pab peb ntsuas thiab ntxiv zog rau peb lub siab: Kuv xav kom peb txhua tus xaiv ua ib yam dab tsi ntawm sab nraud uas qhia tias nyob peb lub siab sab haud peb xav li cas txog tus Cawm Seej, Yexus Khetos, kom muab lub txiaj ntsim no rau Nws xyoo no.
Ib yam li Mary Littleton, peb sib sau ua ke kom teev tiam Yexus Khetos vim peb rau siab ntseeg coj raws li Nws. Tam sim no thov kom peb ua tib zoo mloog thaum pawg hu nkauj koom “cov tim tswv pawg hu nkauj” hu ib zaj nkauj uas caw “nej cov ntseeg” los thiab “saib ntsoov nws, cov tim tswv tus Vaj Ntxwv.” Txawm peb nyob qhov twg thoob lub ntiaj teb no los, peb sawv daws muaj peev xwm “los nrog kev kaj siab lug … rau Npelehees”—nyob hauv peb lub siab—los txhos caug pe Nws.11
Kuv ua tim khawv tias Yexus Khetos yog tus Cawm Seej ntawm lub ntiaj teb. Kuv thov kom peb yuav muaj Khetos tus Ntsuj Plig hauv peb lub siab kom tas lub caij no mus txog xyoo tshiab los ntawm Yexus Khetos lub npe, amees.