Hmo Muaj Hmoov Zoo, Kev Hlub txoj Kev Kaj Dawb Huv
Kuv xav qhia rau nej txog kuv ob zaj uas kuv nco ntsoov ntau xyoo thiab txawm yog niaj hnub no tseem qhia kuv tej yam uas kuv xav tau.
Zaj thib ib yog thaum kuv muaj 6 xyoo. Peb tus coj nkauj hauv Pawg Ntseeg Hunter 5th yog Niam Laus Beverly Whitley. Kuv paub lawm hais tias tej zaum nws tseem tsis tau muaj 40 xyoo, tiam sis nws muaj cov tub hluas ntxhais hluas thiab peb cov nyob hauv lub Koom Haum Me Nyuam Yaus xav tias nws laus thiab txawj ntse heev. Nws lom zem heev thiab hais rau peb zoo li peb laus lawm, thiab peb nyiam heev. Peb qhuas nws thiab xav kom nws zoo siab. Nws tau qhia peb tias peb yuav tsum hu nkauj nrov nrov kom peb niam peb txiv nyob lwm chav hnov tau peb. Hais kom tsis txhob qw—tiam sis hu nkauj nrov! Thiab peb twb hu nkauj kawg siab kawg ntsws. Nws kuj qhia peb ib zaj los ntawm phau nkauj qhuas Vajtswv, vim nws hais tias peb twb yog cov kws hu nkauj muaj txuj ci txaus cim ntsoov tej lus nyuaj heev. Ces nws piav txog tag nrho cov lus kom peb yuav to taub. Nws qhia peb tias txhua zaj nkauj muaj ib zaj tshwj xeeb rau peb thiab, yog peb yuav xav txog tej lus ntawd, peb yuav paub tias zaj nkauj ntawd muaj lub ntsiab li cas hauv peb lub neej.
Lub caij Christmas ntawd, kuv twb sim ua raws li Niam Laus Whitley tau qhia peb, thiab kuv tau kawm tag nrho peb nqe rau zaj “Hmo Muaj Hmoov Zoo.” Nim no, kuv xav hais thov txim ua ntej rau cov txhais lus vim qhov no nyuaj txhais. Thaum kuv muaj 6 xyoo, kuv twb xav ntau txog tej lus hauv nqe peb, tiam sis kuv tsis tshua to taub tej cim ntawv. Kuv tsis tau xav tias tej lus no “Son of God, love’s pure light” hais tias Yexus yeej yog txoj kev kaj uas los ntawm kev hlub dawb huv, es kuv xav tias tej lus no hais tias Vajtswv Leej Tub nyiam txoj kev kaj uas dawb huv. Kuv xav ua li Niam Laus Whitley hais, kuv thiaj li sim xav seb kuv yuav ua li cas kom “nyiam txoj kev kaj uas dawb huv” li Yexus ua.
Zaj ob yog thaum kuv muaj 9 xyoos. Ib yam li cov me nyuam coob, kuv kawm ntaus piano. Kuv tsis tshua txawj, thiab tej zaum kuv tus npisov xav yaum kuv ua ntxiv es nws txawm thov kuv ntaus ib zaj Christmas hauv kev sib ntsib txais lub cim nco txog thaum Hmo Ua Ntej Christmas. Kuv txiav txim siab ntaus zaj “Hmo Muaj Hmoov Zoo.” Kuv tus kws qhia ntaus piano tau pab kuv npaj. Kuv niam kuv txiv tau mloog kuv ntaus zaj ntawd 100 zaus tawm rau peb lub piano xim dub nyob hauv theem nyob hauv qab npoo av. Muaj leej twg hais tias tej zaum kuv yuav tsum cim ntsoov zaj ntawd thiab tsis txhob saib cov ntawv, tiam sis kuv txhawj heev vim kuv yuav ntaus tab meeg sawv daws hauv kuv pawg ntseeg kuv thiaj cim tsis tau ntsoov. Tiam sis, kuv twb tawm ib lub tswv yim. Kuv yuav siv cov ntawv, tiam sis kuv yuav tsis tso rau saum lub piano es kuv yuav tso rau ntawm kuv ncej puab. Kuv thiaj li saib tau kuv ob txhais tes thiab pom cov ntawv, es yuav zoo li kuv twb cim ntsoov cov nkauj lawm. Lub tswv yim no los yeej zoo rau ib me pliag xwb. Kuv twb tso kuv cov ntawv rau saum kuv daim tiab thiab pib ntaus nkauj, tiam sis daim tiab cov ntaub nplua nplua ces thaum kuv ntaus nqe thib ib ib nrab lawm, cov ntawv twb nplua nplua poob mus hauv qab lub piano. Kuv ua tsis taus dab tsi. Tsis muaj ib txoj kev rov qab nqa cov ntawv, thiab kuv xav tsis tawm. Kuv twb siv zog ua zoo npaum li kuv ua tau. Kuv yeej ua tsis zoo hlo li.
Kuv twb ntaus piano ua yuam kev, thiab kuv pom tib neeg nkaum txhua zaus. Kuv twb ntaus mus txog thaum kuv ntaus nqe ob tag lawm. Kuv muaj tswv yim tsis ntaus nqe peb ces kuv ntsej muag liab tag thaum kuv khiav mus thiab sim ua kom tsis txhob los kua muag. Kuv niam kuv txiv ntxhi lus hais tias “Ua cas? Koj twb paub zaj nkauj ntawd zoo lawm nev.” Kuv yeej tos tsis tau txog lub sij hawm tawm lub tsev koom txoos. Kuv tsis tau xav pom los sis sib tham nrog leej twg; kuv txaj muag kawg li. Tom qab kev sib ntsib tas lawm, kuv tus xib hwb laus rau Hnub Caiv Kev Kawm Vaj Lug Kub, Niam Laus Alma Heaton, los rau kuv. Kuv twb sim khiav mus, tiam sis nws tuav kuv tes. Nws tsis tau hais rau kuv tias kuv ntaus piano zoo, txhua tus yuav paub tias nws dag, tiam sis nws hais ib yam uas kuv yeej yuav nco ntsoov kom tas kuv lub neej. Nws hais tias, “Sharon, koj ntaus li cas los tsis ua li cas. Txhua tus paub tias koj tau siv sij hawm ntev heev, thiab koj txawj los tsis txawj ntaus piano los peb yeej hlub koj.”
Hais tseeb tiag. Tiam sis tsis tau ua rau kuv mob li kuv xav. Qhov uas kuv twb siv zog ntaus los yeej muaj tseeb, thiab lawv hlub kuv txawm kuv tsis txawj ntaus piano los yog. Kuv twb luag me ntsis thiab nws puag kuv li ib tug poj laug, thiab ua ciav txhua yam zoo lawm.
Beverly Whitley thiab Alma Heaton tsis tau ua ib yam uas tseem ceeb heev. Nkawd tsis tau sau ntawv hauv nkawd phau ceev xwm txheej txog ob zaj no. Tsis muaj leej twg hauv nkawd tsev neeg uas paub ob zaj no. Nkawd tsuas qhia cov me nyuam yaus kom lawv paub hu nkauj thiab to taub txoj moo zoo. Qhov no yeej tsis tshwj xeeb yom? Tiam sis tsis yog li ntawd. Yog tias nej nug kuv seb ib tug uas “nyiam txoj kev kaj dawb huv” yog leej twg, ces kuv xav tias yog Beverly Whitley. Kuv xav tias yog Alma Heaton. Nkawd ob leeg paub “txoj kev kaj dawb huv” uas los ntam ib tug me nyuam uas siv zog ua zoo npaum li nws ua tau thiab hlub nws, txawm yog tus me nyuam tsis tau ua zoo tag nrho.
Peb Leej Txiv Saum Ntuj Ceeb Tsheej zoo li no. Nws saib peb, Nws cov me nyuam yaus, siv zog ua. Tsis yog peb ua tau txhua lub sij hawm, tiam sis Nws paub tias peb siv zog npaum li cas—tej lub sij hawm zoo li peb txaj muag ntaus piano kom tag—thiab Nws hlub peb. Txawm peb ntaus nkauj tsis zoo kom tsis muaj leej twg paub yog dab tsi, Nws txib Nws Tib Leeg Tub zoo los, tus uas yog txoj kev kaj dawb huv los ntawm txoj kev hlub. Yexus Khetos yuav kho txhua yam peb ua tsis zoo thiab txhiv txhua yam ua yuam kev yog peb tig mus cuag Nws thiab thov kom Nws pab. Los ntawm Yexus Khetos txoj kev yug los, Nws txoj Kev Theej Txhoj, thiab txoj kev tuag, peb txhua tus yeej muaj tau txoj kev kaj siab lug.1
Kuv yeej zoo siab vim lub caij Christmas no peb hu tej zaj nkauj uas hais txog tus Cawm Seej ntawm lub ntiaj teb txoj moo zoo rau cov uas muaj lub siab mob. Kuv cog lus rau nej ib yam li Niam Laus Whitley cog lus rau lub Koom Haum Me Nyuam Yaus. Yog nej xav txog tej lus uas nej hu nkauj hauv lub caij no, nej yuav kawm txog ib zaj uas los saum ntuj los uas yuav txhawb nqa thiab nplij nej lub siab. Nov yog ib zaj uas tau pab kuv hauv lub caij Christmas no. Kuv twb txhawj txog tag nrho cov neeg uas peb pab tsis taus thiab xav txog qhov uas tej lub teb chaws ua nyuaj rau peb pab cov nus thiab cov viv ncaus uas raug txom nyem. Ces tag kis no kuv twb tsom ntsoov rau zaj nkauj uas peb hu nkauj nyob hauv Koom Haum Niam Tsev:
Pab tag nrho cov me nyuam uas koj yeej tsom kwm,
Peb thiaj tsim nyog rov mus nrog koj nyob saum ntuj.”2
Kuv ua tim khawv tias Vajtswv Leej Tub nyiam txoj kev kaj dawb huv; Nws yeej yog txoj kev hlub txoj kev kaj uas dawb paug. Los ntawm Yexus Khetos lub npe, amees.