Juon Menin Letok jān Jemed: Bōke ak Kōjekdo̧o̧ne
Juon al eaiboojoj im ennaan em̧m̧an jān Sister Eubank. Ewi jon̄an an em̧m̧an jinoin kar lo̧mo̧o̧r in tiriam̧o eo! Ekwe, Tijem̧ba em̧ōj an itok. Mejatoto em̧ōlo̧ im ewōr jidik sno. N̄an armej, meļeļein bwe Kūrijm̧ōj epaak. Ak n̄an n̄a, ejjab mejatoto in ekkā aō en̄jake ej iien Kūrijm̧ōj.
Ilo aolepen mour e aō, ekanooj to, raan ko rebwiļ im bon̄ōn ko remeņāān n̄an tōpar Kūrijm̧ōj. Kōnke Tijem̧ba ej jōm̧m̧ar ilo Australia. Im ilo West Africa, ijo kōrā eo ippa im n̄a kar jokwe ie ilowaan ļalem iiō ko, aolep iien ej bwiļ.
Kōn menin Tijem̧ba ekkā iien pād lo turin pārijet ko, lōkōr, ak babikiiu. Ilo Kūrijm̧ōj, m̧ōko mōm rebwiin māānko im obrak kōn ainikien ko rekam̧ōnōnō. Ak jetōbin Kūrijm̧ōj ejjeļo̧k oktak jān ijoko jabdewōt. Mejatoto ilo Sydney, Salt Lake, ak Sierra Leone; mejatoto ilo Nuku’alofa, Newfoundland, ak Nigeria, lo̧tak eo an ad Rilo̧mo̧o̧r ej im̧we armej ro n̄an kōm̧m̧ani men ko rem̧m̧an.
Ilo jikin ko jet, armej rej leto-letak menin letok ko, loļo̧k ro jet, im kōm̧m̧ane jerbal in jouj ko n̄an keememej jetōbin Kūrijm̧ōj. Ro m̧ōttad ilo Samoa ewōr juon aer m̧anit bwe ilo raan eo ālkin Kūrijm̧ōj, rej leļo̧k m̧ōn̄ā im men ko jet rem̧m̧an ilo bo̧o̧k ko im liļo̧ki n̄an baam̧le ko rellukkun aikuj, ejjab wōt ilo ward eo aer, ak ro jet ilo jukjukinpād eo aer. Ebar wōr ruo aer āka in jikin kallib in leen wōjke ko, men ko ekkā aer kalle rej liļo̧k n̄an armej ro rej aikuj.
Juon m̧ōttam eo ej jitōn bōro ippam jān Senegal ilo West Africa eaar jiron̄ eō bwe ilo kapijuknen eo an ilo Ivory Coast, kajjojo jotaan eo m̧okta jān Kūrijm̧ōj, ijelo̧kin bōktok menin letok ko, armej jān weto ko rej bōkļo̧k jabdewōt apan̄ n̄an ritōl ro aer. Innām ritōl ro rej joļo̧k aolepān raan eo n̄an jerbal ippān baam̧le ko n̄an ņa mejļan apan̄ ko. Armej jān weto ko Rijikin eo rekōņaan bwe aenōm̧m̧an im jokne ilo kajjojo em̧ ilo weto eo ilo Kūrijm̧ōj, kōnke ren kemeeme lo̧tak eo an Kraist—Eo eaar lo̧tak kōn jibadbad eo n̄an bōktok aenōm̧m̧an n̄an laļ in.
Jinoin iiō in, kōm̧ eaar ioon juon mijenede em̧m̧an ded, Sister Jeanne Ingabiire jān Rwanda, eo ej jerbale mijen eo an ilo Liberia. Eaar kwaļo̧k n̄an eō bwebwenato eo an ekabūrom̧ōjm̧ōj kōn ta eo eaar jelet e ilo Rwanda ilo 1994. Jemen eaar jān bwij eo an Hutu, ro raar lukkuun matōrtōr ro uwaan bwij eo an Tutsi. Ak jinen eaar juon iaan bwij eo an Tutsi. Bwe enkar lo̧mo̧o̧ren mour eo an kōrā eo pāleen im mour eo an leddik ro emān nejin, baba in eperan eaar ņooj baam̧le eo ilo juon jikin ettoļo̧k im ekar bar jepļaak n̄an weto eo make iaan. Kōrā eo pāleen im leddik ro nejin rekar jab bar lo e im ekar pen n̄an aer mour kake. Āliktata raar jepļaak ratimjuon iiō tokālik n̄an pād ilo juon kweilo̧k in kōkm̧anm̧anļo̧k men otemjej kar ejaak jān kien eo, ijo raar jeļā bwe ļeo pālele im jemeer rekar m̧ane ke eaar jepļaak n̄an weto eo an. Aaet, ekabwilōn̄lōn̄, jinen Sister Ingabire im ro nejin raar jeo̧rļo̧k bōd an ro raar m̧an ļeo pālele im jemeer.
Ilo juon iien ke Josep Smith eaar tin illu, kōn an kalbuuj ilo an ejjeļo̧k ruōn ilo Liberty Jail ium̧win elōn̄ allōn̄ ko ilo iien Kūrijm̧ōj ilo 1838, Irooj eaar kwaļo̧k jekjen 121 ilo Katak in Bujen ko. Ilo revelesōn in Irooj eaar jipan̄ Josep n̄an anjo̧ ioon en̄jake ko an illu me rej jino waļo̧k ilo jekjen in n̄an katakin Rikanaan eo bween jouj, meanwōd, ineem̧m̧an, ettā, im iakwe em̧ool āinwōt Kraist ko raorōk n̄an mour āinwōt juon rikaļooraņ.
N̄an n̄a Kūrijm̧ōj ebōktok ememļo̧kjeņ an baam̧le. Ijoke, ejjab aolep ememļo̧kjeņ kein rem̧m̧an. Ke iaar juon ļaddik edik, ij keememej ke iaar bōk juon bo̧o̧k in iakwōj wa jen jema. Kōm eaar juon baam̧le eo ejeram̧ōļ, eaar em̧m̧an ippa menin letok in. Ijoke, juon raan eaar kanooj kallulu kōn juon men eo ejjeļo̧k tokjeņ, iaar kadkad kake wa eo ļo̧k n̄an mar ko. Eaar m̧ōjak aō būrom̧ōj, ejjab wōt kōn aō kar kadkad kake kein ikkure eo ak kōnke iaar kōjekdo̧o̧n iakwe eo an jema. Iaar pukote im bar pukote, ak iaar jab loe. Ke ej iien m̧ōļo̧ im mar ko raar aemerļo̧k, iaar bar pukote, ak ejjeļo̧k toprak. Iaar būrom̧ōj wōt kōn aō kar kowaan jema. Ekabūrom̧ōjm̧ōj wōt.
Kwojeļā, ejjeļo̧k oktak n̄e jet iien jej kōjekdo̧o̧n iakwe eo an Jemedwōj Ilan̄ im menin letok ko An n̄an kōj, eo eļaptata An kar jilkintok Nejin n̄an en̄taan im pinmuur kōn kōj. Ej juon kabūrom̧ōjm̧ōj n̄e jej kōjekdo̧o̧n en̄taan in pinmuur eo An ak bujen ko im kain̄i ko ilo gospel in An!
O bwe jen maron̄ iien otemjej āinwōt ro raar jerbal n̄an kwaļo̧k iakwe n̄an ro jet. Jet iien rem̧ootļo̧k, elōn̄ raar jerbal n̄an jipan̄ ro raar jokwe ilo Florida im ilo Carolinas ro me kar jelet er ļan̄ ko reļļap im n̄an jipan̄ ro rekar jorrāān ilo kijeek ko ilo California ak raar itok n̄an jipan̄ ro jet ro raar bar en̄taan ilo aolepen laļ in.
Ilo Tijem̧ba 25, 1974, capital eo an Australia North Territory eaar jorrāān. Ilo awa ko m̧oktaļo̧k ilo raan in Kūrijm̧ōj eo, Cyclone Tracy eaar kakkure jikin eo ilo Darwin. Elōn̄ raar mej, im enan̄in aolep ro ilo Darwin raar jerata. Ilo pijaan jorrān eo kiiō ilo Florida eaar āinwōt Darwin. Ak jetōbin Kūrijm̧ōj eaar joļo̧k mijak. Kein jipan̄ ko kar litoki jen armej ro ilo aolepen Australia, im elōn̄ ro jet raar joļo̧k jabdewōt im itok n̄an Darwin n̄an bōk jipan̄.
IIō ko ļo̧k, leddik eo nejūm̧ erūttotata ke eaar ruo an iiō, eaar bwilo̧k neen m̧okta jen Kūrijm̧ōj eo im kar pād ilo aujpitōl elōn̄ wiik ko bwe en kamoikne eo ebwilo̧k neen. Ekar juon Kūrijm̧ōj eo epen. Juon baam̧le ilo ward eo am ro me ekar jab lukkuun bwe jāān ippāer raar lotok e ilo raan in Kūrim̧ōj eo. Kajjojo ajri ro nejier reddik raar būki tok menin letok ko aer rem̧m̧an, kar būki ilo jejjetin jibbon̄on eo, im kar liļo̧k n̄an leddik eo nejūm̧ āinwōt menin letok jen er. Kōrā eo ippa, Kay, im n̄a kar im̧we kōn kōmjaļaaļ kōn meanwōr im jouj eo an ajri rein im jineer im jemeer.
En̄in ej lukkuun jetōbin Kūrijm̧ōj—kajjojo rej jipan̄ doon. Ālkin aolep men otemjej, m̧ōttan eo eaorōktata kōn mour eo an Rilo̧mo̧o̧r ej kōn jerbal in karejar eo An n̄an “juon.” En̄in ej juon pedped in katak n̄an mour kake jen membōr ro an Kabun̄ in ilo Africa, im ej ta eo Ej kōņaan jen kōj ijin.
Būreejtōn M. Russell Ballard eaar kwaļo̧k bwe Pinmuur eo ej jerbal eo ej make wōt Rilo̧mo̧o̧r eaar kōm̧m̧ane n̄an “kōj kajjojo.” Naan ko an Būreejtōn Ballard:
“Eļan̄n̄e jej lukkuun meļeļe Pinmuur eo im aorōk eo an kajjojo jetōb indeeo, jej pukot ļo̧k … kajjojo … ro nejin Anij. Jenaaj jipan̄ er jeļā kōn iakwe eo an Kraist n̄an er. Jenaaj kōm̧m̧an bwe jen maron̄ in jipan̄ keppopo n̄an bōk kain̄i in lo̧mo̧o̧r ko an gospel in.
“Ilo m̧ool, eļan̄n̄e Pinmuur eo an Kraist ekar make wōt ilo kōļmenļo̧kjeņ ko an ritōl ro ilo ward im branch, ejjeļo̧k rikāāl ak membōr ro rejaniknik reban kar jako. …
“… Tokjen eo an Pinmuur eo ej bwe ejjeļo̧k jemļo̧kin im indeeo, aaet ej pād n̄an aolep, juon armej ilo juon iien. …
“Ro jeiū im jatū, jamin, jamin, kowaan aorōk eo an juon.”1
Enkar ke em̧m̧an n̄e jenaaj aolep ļoor kapilōk in im jen rikanaan eo ad ejitōn bōro, Būreejtōn Russell M. Nelson—n̄an mour kake kien ko ruo reļļap ilo juon wāween eo ekwojarjar ļo̧k. Im eļan̄n̄e kwojjar jeļā maron̄ eo am̧ n̄an bōk juon oktak eo n̄an kōm̧m̧ane, innām ļōmņak kōn jeban kōnnaan in an RiAfrica: “Eļan̄n̄e kwoj ļōmņak kodik n̄an kōm̧m̧an juon oktak, innām kwoban joļo̧k juon bon̄ ippān ņam̧.”
Jejjab aikuj in etal n̄an Jikin ko Rekwojarjar n̄an kōm̧m̧ane juon oktak ak n̄an epaakeļo̧k ad Rilo̧mo̧o̧r. Kūrijm̧ōj ej juon iien jemaron̄ mije menin leļo̧k eo ad make n̄an Rilo̧mo̧o̧r n̄an wōnm̧aanļo̧k im iakwe im jipan̄ ro jet. Innām eban ettoļo̧k Bethlehem n̄an kōj kajjojo. Ej ad pepe n̄an kōm̧m̧an bwe Kraist en m̧ōttan mour ko ad—n̄an bōk menin letok eo An ej letok n̄an kōj im n̄an leļo̧k būruwōd n̄an E. Ij iakwe E im ij kam̧ool kōn iakwe eo an ejjeļo̧k jem̧ļo̧kin n̄an kōj kajjojo ilo etan Jisōs Kraist, amen.