Kōm̧m̧an Bwe Aolep Bōro Ren Kōpooj Juon Ruum̧ N̄an E
Juon wiik emootļo̧k, tōm̧a in Kūrijm̧ōj ko ilo Tempel Square eo raar kabbōli, wōnm̧aanļo̧k wōt in iminene eo kōn 53 iiō ko im, n̄an elōn̄, kōkaļļeik ijjino eo an tōre in Kūrijm̧ōj. Ilo Kūrijm̧ōj jej keemem e ļotak, mour, im meram eo an Jisōs Kraist, Eo Lukkuun Nejin Anij im Rilo̧mo̧o̧r eo an laļ. Jej lo kōjatdikdik ilo kōjjeļā eo me ej itok kōn ļotak eo An: “Aiboojoj n̄an Anij ilo uteijtata, im aenōm̧m̧an ioon laļ, ippān armej raņ.”1 Al ko, ajri ro reitok limo, menin leļo̧k ko n̄an liļo̧k im būki, wōjke in Kūrijm̧ōj ko, kainōknōk ko, im tōm̧a ko rej aolep m̧ōttan kam̧m̧oolol eo elan̄lōn̄.
N̄e kwoj ļōmņak kōn Kūrijm̧ōj, ta ememļo̧kjeņ ko raorōk rej jiktok ilo kōļmenļo̧kjeņ? N̄an n̄a, iien in an iiō ej iien otemjej bōktok ememļo̧kjeņ ko an kam̧m̧oolol ko an Kūrijm̧ōj jān iien ko iaar ajri.
Ij maron̄ keememej wōt elōn̄ iaan menin letok ko iaar būki. Ij keememej juon bo̧o̧ļ in būtbo̧o̧ļ im juon bo̧o̧ļ in pāājkōtbo̧o̧ļ, to̧ļe im nuknuk ko. Elōn̄ wōt iaan menin letok ko rej kiiō jako im meļo̧kļo̧ki, nuknuk ko rem̧oor im epotaktak. Bōtaab ta eo ij keememej eļap tata kōn Kūrijm̧ōj ko etto—ememļo̧kjeņ ko aō raorōk tata im em̧m̧an tata—rejjab kōn ta eo iaar bōke bōtaab ta eo iaar leļo̧k.
In kōmeļeļeik. Kajjojo iiō, ilo Jādede eo m̧okta jān Kūrijm̧ōj, jodikdik ro an ward eo am raar koba ippān doon ilo m̧ōn jar eo am. Kōm kar kanni iieb ko kōn oran ko, pinana ko, im kukiij ko kōmatti m̧ōko im keek ko n̄an būkilo̧k n̄an kōrā ro emej pāleer me raar jokwe epaaktok. Kōm kar etal n̄an im̧ōko im̧wier, kar al al in Kūrijm̧ōj ko, im leļo̧k iiep in Kūrijm̧ōj ko. Ij keememej wōt ettōn̄ in kam̧m̧oolol ko aer. Jet iaer raar epepen ko an rilikin ro kein kajuon ak karuo kar kwaļo̧k kam̧m̧oolol ko aer ilo wāween aer kōnono kajin In̄lij: Sister Swartz, Zbinden, Groll, im Kackler. Ijjamin naaj meļo̧kļo̧k en̄jake eo emeeņeņ eaar deļo̧n̄e būruwō.
Ke Lesa im n̄an kar erom ro jinen im jemen, kōm kar jino juon iminene an leļo̧k menin leļo̧k ko an Kūrijm̧ōj n̄an juon baam̧le ilo aikuj jon̄an wōt am̧ maron̄ kōm̧m̧ane. Emakijkij am kar bōk etan juon baam̧le jān community charity eo, ippānļo̧k iiō ko an ajri ro. Kōm kar joļo̧k eļap iien im kijejeto n̄an pukōt menin leļo̧k ko rejejjet n̄an er. Ļaddik ro nejim raar āinwōt lem̧ōņōņō kōn menin jon̄an wōt aer bōk menin leļo̧k ko aer make ilo raan in Kūrijm̧ōj! Iminene in an baam̧le an jerbal in jipan̄ eaar jipan̄ n̄an katōk jetōb eo em̧ool an Kūrijm̧ōj ilo būruwōd.
Ilo mour in jerbal eo aō, iaar bōk kuņaer ilo ejake, kōm̧m̧ane im wia kake an fitness equipment peļakin laļ in. Equipment ko āinwōt treadmill ko, stationary bike ko, im elliptical mijiin ko kar kōm̧m̧ane n̄an kōkajoorļo̧k menono eo. Ilo m̧ool, ilo kom̧bani eo am kōm kar kanooj in buuļ jerbal n̄an lale bwe ro rej kōjerbla equipment eo ren maron̄ jejjet aer jon̄e jekjek eo im jon̄an ko an m̧akūtkūt eo an menono eo aer kōn monitor in lale iiūm̧ in menono eo. Rainin, elōn̄ iaad rej kōņak technology eo ilo peid me ej lale menono eo ad im kōketak m̧akūtkūt ko n̄an kōkajoorļo̧k menono eo ad.
Ta eo eļan̄n̄e eaar wōr juon wāween n̄an jon̄e jekjek eo an menono eo am̧ jān kōļmenļo̧kjeņ ilo jetōb—juon kein lale menono ilo jetōb, eļan̄n̄e komaron̄ ba? Ta eo kein lale menono eo ilo jetōb am̧ enaaj kar kwaļo̧k? Ewi jon̄an an ājmour ilo jetōb menono eo am̧? Tōre in Kūrijm̧ōj ej āinwōt juon iien em̧m̧an n̄an kōj n̄an kanooj etale jekjek eo an būruwōd make.
N̄an waanjon̄ak, komaron̄ kajjitōk ippam̧ make, “Būruwō ej ke pojak n̄an bōk Rilo̧mo̧o̧r eo?” Ilo Kūrijm̧ōj emakijkij ad al, “Kōm̧m̧an bwe aolep bōro ren kōpooj juon ruum̧ n̄an e.”2 Ekōjkan am̧ maron̄ kōpooj juon ruum̧ ilo būruwōm̧ n̄an Kraist, eļap tata ilo tōre in iien in epoub aaet aiboojoj?
Jeje ko rekwojarjar rebooļ kōn kōmeļeļe ko me remaron̄ jipan̄ kōj etale jekjek eo an būruwōd. Jet eoon ko ekoba naan ko āinwōt “erreo,”3 “ineem̧m̧an,”4 “ettā,”5 “rup,”6 im “ettā.”7 Naan kein, im ebar lōn̄ ilo aolepān jeje ko rekwojarjar, rej letok n̄an kōj juon ļōmņak ealikkar kōn būruwōn Rilo̧mo̧o̧r eo. N̄ān maron̄ bōk E n̄an būruwōd, em̧ool būruwōd ej aikuj in erreo im ettā āinwōt Būruwōn.
N̄an ba ilo tukadu in naan ko an Paul, jemaron̄ kajieon̄ n̄an bōk naan ko im m̧wil ko an Jisōs Kraist kar je āinwōt juon “lōta … ilo būruem, im em̧ōj an armej otemjej jeļā: … lōta an Kraist … jab jeje kōn inik, a kōn Jetōb an Anij e mour, jab ilo tebōļ dekā, a ilo būruemi tebōļ kanniōk ko.”8 Menin ej aikujui eļapļo̧k jān baj iak-iakwe ko rem̧m̧an Kūrijm̧ōj me remaron̄ ba ilo aer jab m̧ool. Jisōs eaar kakkōl ņae ro me re, “[ruwaaktok] n̄an Ippa kōn tieer, ak burueer rej ettoļo̧k jān Eō.”9 Ilo iien Kūrijm̧ōj in im ilo aolepān iiō eo, m̧akūtkūt ko ad rejouj im jerbal ko rem̧m̧an ren kwaļo̧k ilo em̧m̧an tata bwe ad iakwe n̄an Rilo̧mo̧o̧r ekar jeje ilo būruwōd.
Ilo aō ļōmņak kōn jekjek eo an būruwō make, ij lo im̧we im waanjon̄ak ko reļļap n̄an ļoori ilo būruwōn im wūjlepļo̧k ko an ro me raar jipan̄ ejake Kabun̄ eo an Jisōs Kraist ilo raan ko im̧aan tata an Jepļaaktok eo. Ikōņaan kwaļo̧k juon bwebwenato in Kūrijm̧ōj kōn juon rioktak in Armej ro Rekwojarjar ilo Raan-ko Āliktata m̧okta jān Immingham, England: Mary Woot Littleton.
Mary im ļeo pāleen, Paul, raar jab ļōmnak renaaj kar em̧m̧akūt jān kapijuknen eo aer ilo England. Bōtaab raar ron̄ kōn ennaan eo an gospel eo kar kōjepļaaktok im kar bōk juon naan in kam̧ool kōn m̧ool eo an. Raar peptaij, im ruo allōn̄ ko tokālik, Mary im Paul, ippānļo̧k ajri ro nejier, raar jerakļo̧k n̄an Amedka n̄an koba ippān Armej ro Rekwojarjar. Raar tōkāākļo̧k ilo New York ilo Tijem̧ba 20, 1844 eo. Ļalem raan ko tokālik, raar em̧m̧akutļo̧k n̄an Nauvoo, Illinois kōn wa kidia ko. Baj ļōmņak—ilo̧k ilo iien m̧ōļo ioon iaļ ko rekkur balōklōk, reppen, raar kememe raan in Kūrijm̧ōj eo aer im̧aan tata ilo Amedka.
Kōjekdo̧o̧n aolep oktak kein, Mary eaar dāpij wōt kōjatdikdik eo ilo būruwōn bwe baam̧le eo an renaaj juon raan kememe Kūrijm̧ōj āinwōt aer kar kōm̧m̧an ilo England, kōn wreath ko, Father Christmas, im itok itak im al. Ejerata, Kūrijm̧ōj eo aer kein karuo ilo Amedka, ilo 1845 eo, eaar jab em̧m̧anļo̧k—raar joļo̧k ilo aer pād ilo bo̧o̧k wekōn eo me Paul eaar ukōt n̄an juon em̧ ilo an baam̧le eo kakkōt n̄an kōpooj er make ilo Nauvoo. Juon alen, kōn juon kōjatdikdik ekar kobark būruwōn, Mary eaar ba, “Iiō in tok, Kūrijm̧ōj enaaj oktak.”
Iiō eo tok juon ilo 1846 eo, Kūrijm̧ōj eo kein kajilu an baam̧le eo ilo Amedka, Mary im ajri ro nejini raar lo er make ilo Winter Quarters, m̧aanjappopo n̄an ta eo enaaj kar juon iaļ aitok iturilik ilo jibriin̄ eo. Rinana ro raar kadiwōjļo̧k er jān Nauvoo, im Paul eaar etetal laļļo̧k iturilik ippān Mormon Battalion eo—jet buki m̧aiļ ettoļo̧k. Juon alen, eaar ejjelo̧k al im ejjeļo̧k Father Christmas. Ijello̧kin, eaar wōr jitlo̧k im m̧ool in jar ilo etan ļaddik eo nejin Mary ralitōk an iiō, eo eaar epaak an mej kōn juon jabwe ōōn eļap. Eaar mour, bōtaab ro jet 25 ilo Winter Quarters raar mej ilo lukkuun Raan in Kūrijm̧ōj eo.
Eaar jab m̧ae iien Kūrijm̧ōj eo an kein kemen ilo Amedka, ilo an kar baj itaakļo̧k ilo Salt Lake Valley, bwe Mary im baam̧le eo an raar kememe Kūrijm̧ōj ippān doon ilo lukkuun aenōm̧m̧an. Jekdo̧o̧n iien eo, eaar jab kain kemem eo liin eaar jeļā kake ilo England. Aaet, ilo jet wāween ko, em̧ool eaar em̧m̧anļo̧k. Ilo juon Kūrijm̧ōj in raan in Jabōt, raan eo ālkin Kūrijm̧ōj eo ilo 1847 eo, Armej ro Rekwojarjar raar koba n̄an jar, kwaļo̧k naan in kam̧m̧oolol ko, im al ko al in nebar n̄an Anij kōn bōktok eo aer n̄an Zaion. Juon iaan al kein eaar juon jekjek in al em̧m̧an kōn; “Itok, Itok, Ro Rekwojarjar” juon al kar je ioon iaļ eo an bainier ro me eaar erom juon anthem an tōmak n̄an bainier in Armej ro Rekwojarjar m̧okata. Wōnm̧aanļo̧k wōt, “Itok, Itok, Ro Rekwojarjar” ekar pād wōt juon al em̧m̧an tata, em̧ool juon al in Kūrijm̧ōj carol, ilo kememe ko an bainier ro ilo Kūrijm̧ōj.10
Ij tōmak idajon̄jon̄ ko an Mary ium̧win iiō ko raar kōm̧m̧ane juon men naaj ukōt būruwōn. Linn eaar āinwōt ļapļo̧k an alikkar an lale Kūrijm̧ōj, kōn iminene ko rekāāl an Kūrijm̧ōj im juon al kāāl ilo būruwōn. Liin eaar m̧ool ilo ejake juon būruwōn kaarmejete, kar kaioļapļap ilo kōjatdikdik eo an ilo im iakwe n̄an Jisōs Kraist.
Tōre in iien Kūrijm̧ōj ej āinwōt juon iien ejejjet n̄an kōļmenļo̧kjeņ kōn ewi jon̄an ājmour in būruwōd ilo jetōb, im kōn menin ij kiil kōn juon elmako eļam waan me emaron̄ jipan̄ kōj lale im kōkajoorļo̧k bōro ko ad ilo jetōb: Ij kūr kajjojo iaad n̄an kāālet n̄an kōm̧m̧ane juon men me ej kwaļo̧k, ilo juon wāween ej waļo̧kjituliken̄jake ko ad itulowakōn ad Rilo̧mo̧o̧r, Jisōs Kraist, āinwōt menin leļo̧k eo jej leļo̧k n̄an E iiō in.
Āinwōt Mary Littleton, jej kuktok joteen in āinwōt rikaļoor ro retiljek an Jisōs Kraist n̄an kabun̄ jar n̄an E. Jān kiiō kanooj kepaak ad keron̄jake ilo an kumi in al eo koba ippān “kuwaer eo an enjeļ ro” ilo al aiboojoj im ej kwaļo̧k kūr eo “ko aolep ro retijlek” n̄an “itok im lo e, eļotak Kiin̄ eo an enjeļ ro.” Jekdo̧o̧n ia eo jej mour ie ipeļaakin laļ in, jemaron̄ kajjojo “itok, … lan̄lōn̄ im anjo̧ … n̄an Bethlehem”—jekdo̧o̧n eļan̄n̄e ilo būruwōd wōt—n̄an iakwe im kauteij E.11
Ij lewaj aō kam̧ool kōn Jisōs Kraist, Rilo̧mo̧o̧r eo an laļ in. Kōm̧m̧an bwe jān bōk Jetōb eo an Kraist kar je ilo būruwōd ilo aolepān tōre in iien kakkije eo im n̄an iiō eo ekāāl ej aō jar ilo etan Jisōs Kraist, amen.