Bon̄ Em̧m̧an, Meram in Iakwe Em̧ool
Ikōņaan kwaļo̧k ruo bwebwenato ko me rekar waļo̧k n̄an n̄a me eto aer pād ilo kōļmenļo̧kjeņ e aō ium̧win elōn̄ iiō ko im n̄an kiiō rej katakin eō katak ko me ij aikuji.
Kein kajuon ekar waļo̧k ke ej 6 aō kar iiō. Ritōl al eo am ilo Hunter 5th Ward kar Sister Beverly Whitley. Ij kile kiiō ke bolen ekar jab 40 an iiō ilo tōre eo, ak ekar wōr nejin jodikdik ro im reitokier relukkun rūtto im mālōtlōt ilo junior Būraimari eo. Ekar kalimomo im ekar kōm̧m̧an n̄an kōm āinwōt jet rūm̧m̧an ded ro, im ekar em̧m̧an ippam. Kōm kar iakwe e im kōņaan kabun̄ buruōn. Ekkā an ba n̄an kōm bwe kōm en buuļ al bwe ro jinem im jemam ren ron̄ ainikiem jān ruum eo juon. Ejjab bwe kōm en lamōj—ak bwe kōm en lukkuun al! Im kōm kar al kōn aolepān buruōm. Ekar barāinwōt katakin kōm juon al jān bok in al eo an rūtto, im ba ke ejeļā ke kōm jet rial ro me ebwe am rūtto n̄an maron̄ keememej naan ko reppen. Innām ekar kōmeļeļeik ta meļeļein aolepān naan ko bwe kōm en meļeļe. Ekar katakin kōm bwe ilo kajjojo al ko ewōr juon ennaan eaorōk n̄an kōm im, eļan̄n̄e kōm naaj ļōmņak kōn naan ko, kōm naaj meļeļe ennaan eo me eļaptata n̄an mour ko am make.
Kūrijm̧ōj eo, ikar kajeon̄ mour kōn ta eo Sister Whitley ekar katakin kōm, im aō ekkatak aolep eoon ko ilo al eo “Bon̄ Em̧m̧an” Kiiō, ij joļo̧k aō bōd kadede n̄an rukook ro kōnke menin enaaj jaad kapokpok. Āinwōt juon eo me 6 an iiō, ikar lukkuun ļōmņak kōn naan ko ilo eoon jilu, ak ikar jab lukkuun meļeļe kōn kakōļļe. Ijjeļo̧kin aō al “Nejin Anij, meram in iakwe em̧ool ”meļeļein bwe Jisōs ej bōk jikin meram eo ej romaak jān iakwe em̧ool, ikar meļeļe kake n̄an ba ke Nejin Anij ej kaorōk meram in iakwe em̧ool—Ej kaorōk men otemjej ko rej waļo̧k jān meram kwojarjar. Ļōmņak āinwōt Sister Whitley, ikar kajeon̄ pukōt kilen wāween aō “kaorōk meram in iakwe em̧ool ” wāween an Jisōs kōm̧m̧ane.
Bwebwenato eo kein karuo ekar waļo̧k ke ej 9 aō iiō. Āinwōt elōn̄ ajri, ikar ekkatak kōjan̄jan̄ piano. Ikar jab lukkuun kapeel, im, bolen n̄an lōn̄aj eō, bisop eo aō ekar kajjitōkin eō eļan̄n̄e imaron̄ kōjan̄ juon al in Kūrijm̧ōj ilo kweilo̧k in kwojkwoj eo ilo raan eo m̧okta jān Kūrijm̧ōj. Ikar kāālet n̄an kōjan̄ “Bon̄ Em̧m̧an.” Rūkaki in kōjan̄jan̄ piano eo aō ekar jipan̄ kōpooj eō. Ro jinō im jema rekar ron̄jake aō kōjan̄ e al eo emaron̄ 100 kōttan kōn piano eo nejim ekar pād ilo m̧weo imōm ilaļ. Juon armej ekar ba bwe bōlen imaron̄ kakilōklōke al eo im jab kōjerbal al eo, ak ikar lukkuun mijak in kōjan̄e im̧aan aolep armej in ward eo aō bwe ikar jab maron̄ keememej e. Ijjeļo̧kin, ikar ļōmņake juon pepe. Inaaj bōke pepa in no̧o̧t ko ippa, ak ijjeļo̧kin iban likūti ioon piano eo, inej likūti ioon neeō. Inaaj kar reilaļļo̧k wōt n̄an pe ko peiū im lo no̧o̧t ko, ak enaaj āinwōt n̄e ikilōke ņoot ko. Pepe eo ekar em̧m̧an ium̧win wōt 20 jeken. Ikar likūt pepa in no̧o̧t eo ioon likko in Kūrijm̧ōj rabōlbōl eo aō im ikar jino kōjan̄jan̄, bōtaab ed eo an likko eo aō ekar lukkun ijjōr im lukoļpen wōt eoon juon, pepa in no̧o̧t eo ekar midij laļļo̧k im lukkuun jakoļo̧k ņa ium̧win piano eo. Ikar jitak. Ekar ejjeļo̧k bar juon wāween n̄an bar kōjan̄ al eo, im ekar ejjeļo̧k juon men ikar keememeje ilo kōļmenļo̧kjeņ eo aō. Ikar ōļōļi n̄iiū im kajjieon̄ jon̄an eo imaron̄e. Ekar lukkuun nana.bōjrak
Ikar kōjan̄ noot ko rebōd, im imaron̄ kar lo an armej ro jook ilo jarlepju eo. Ikar kōm̧m̧ane juon bōd eļap ilo eoon ruo. Ikar kōjekdoon eoon jilu im kakōtkōt laļļo̧k ilo jikin to eo ilo an būrōrō turin meja im kajeon̄ bwe in jab jan̄. Ro jinō im jema rekar unoojdikdik tok im ba, “Eita? Ekar lukkuun em̧m̧an am̧ jeļā al eo.” Ikar kijorjor bwe en mōj jar. Ikar jab kōņaan lo ak kōnono ippān jabdewōt; ikar lukkuun jook im āliklik. Ke ej jem̧ļo̧k kweilo̧k eo, rūkaki eo aō ilo jabōt jikuuļ, Sister Alma Heaton, ekar itok ippa. Ikar kajeon̄ ko jān e, ak ekar jibwe tok peiū. “Ijjelo̧kin ba n̄an eō ewi jon̄an an kar em̧m̧an, eo me aolep rekar jeļā bwe ekar juon riab, ekar ba juon men eo ij jāmin meļo̧kļo̧ke ilo aolepān aō mour. Ekar ba, “Sharon, ejjab aorōk wāween eo ekar waļo̧k. Aolep rekar loe jon̄an kijejeto eo am̧, im kōmij iakwe eok jekdoon n̄e komaron̄ kōjan̄jan̄ piano ak jaab.”
Ekar m̧ool eo ejim̧we. Bōtaab ekar jab lukkuun nana ilo aō kar kōtmene. M̧ool eo ej bwe ikar lukkuun kate eō, im rekar iakwe eō jekdoon n̄e ekar jab lukkuun em̧m̧an aō kōjan̄jan̄ piano. Ikar ettōn̄ dikdik im ekar atbokwaj eō im ejjab to ekar em̧m̧an aolep men.
Kiiō, Beverly Whitley im Alma Heaton rekar jab kōm̧m̧ani jet men ko rekabwilōn̄lōn̄. Rekar jab je ilo jōōnōļ ko aer. Ejjeļo̧k juon ilo baam̧le ko aer rejeļā kōn bwebwenato kein. Rekar ilo m̧ool katakin ajri jidik ro wāween al im wāween n̄an meļeļe gospel eo. Ta eo enkar ļapļo̧k an aorōk? Ijjeļo̧kin ekar jab. Eļan̄n̄e kwoj kajjitōkin eō ta eo ej āinwōt n̄e juon armej ej “kaorōk meram kwojarjar,” ej āinwōt Beverly Whitley. Ej āinwōt Alma Heaton. Kajjojo iaer rekar kile “meram kwojarjar” an juon ajri jidikdik eo ej kajeon̄ jon̄an eo emaron̄e im iakwe e kōn wāween in, jekdoon n̄e ekar jab em̧m̧an an kōm̧m̧ane.
Jemedwōj Ilan̄ ej āinwōt in. Ej kalimjōk kōj, ajri jidik ro Nejin, im rej kajeon̄. Kijejeto ko ad rejjab aolep iien jejjet, ak Ejeļā wāween ad kajeon̄ kōm̧m̧ane—jet iien jej ōļōļe n̄iid im likūt kōj ilo juon jorrāān—im E ej iakwe kōj kōn menin. Kōn aolepān pok, bōd tōnbūļāāt, jab jeļā no̧o̧t, E ekar jilkintok Nejin Emake Wōt, eo ej Jisōs Kraist enaaj kōkm̧anm̧an aolep no̧o̧t ko rebōd im kōkm̧anm̧an aolep tōņ ko eļan̄n̄e jej oktak n̄an E im kajjitōk jipan̄ eo An. Kōn ļotak, Pinmuur, im Jerkakpeje eo an Jisōs Kraist enaaj ņa aeņōm̧m̧an laļ.”1
Eļap aō m̧ōņōņō kōn Kūrijm̧ōj in n̄an al al ko me ewōr juon enaan eaorōk jān Rilo̧mo̧o̧r an laļ n̄an ro erup buruōer. Ij kallim̧uri eok ejjab menin wōt me Sister Whitley ekar kallim̧uri Būraimari ro. Eļan̄n̄e kwōj ļōmņak kōn naan ko kwoj al kaki ilo season in, kwonaaj lo juon enaan ekwojarjar ejejjet eļaptata n̄an kwe me enaaj lōn̄aj im kaeņōm̧m̧an eok. En̄in ej juon men eo me ejejjet n̄an eō ilo Kūrijm̧ōj season in. Eto aō baj inepata kōn aolep armej ro me kein jipan̄ kein ad reban maron̄ tōpar er im wāween an laļ ko jet iien kapen e n̄an kōj bwe jen tōpar ro jeiū im jatūd ro me rej en̄taan. Innām jibbon̄ in ilo Doulul eo an Kōrā ro, ikar lukkuun ron̄jake al eo kōm̧ ar al kake:
Kōjeraam̧m̧an aolep ajri ro rejitōn bōro ilo Am̧ kōjparok,
Im likūt kōm̧ ilan̄ n̄an mour Ippem ijeņ.2
Ij kam̧ool bwe Nejin Anij ej kaorōk meram kwojarjar; E ej meram in iakwe em̧ool. Ilo etan Jisōs Kraist, amen.