Pō mo’a, te ’ana’na mau o te here
E hina’aro vau e fa’ati’a atu e piti ’ā’amu nō ni’a iā’u, ’o tei vai maoro i roto i tō’u ferurira’a e rave rahi matahiti, ‘e i teie nei ā, te ha’api’i noa nei ā iā’u.
Te ’ā’amu mātāmua, ’ua tupu ïa i te onora’a o tō’u matahiti. Tō mātou arata’i pupu hīmene nō te pāroita Hunter 5, ’o te tuahine Beverly Whitley. Tē mana’o nei au i teie nei ē, ’aita paha tōna e 40 matahiti, e mau tamari’i taure’are’a rā tāna, ’e te pa’ari te ferurira’a, i tō mātou hi’ora’a, i te Paraimere a te tamari’i pa’ari. Mea ’ārearea roa ōna ’e ’ua fa’ariro ’oia ia mātou mai te mau tamari’i pa’ari ri’i, ’e ’ua au roa mātou i te reira. ’Ua fa’ahiahia roa mātou iāna ’e ’ua hina’aro ’ia au ’oia ia mātou. ’Ua parau ’oia ia mātou ’ia hīmene pūai mātou, e fa’aro’o mai tō mātou mau metua i tera piha i piha’i iho mai. ’Eiaha e tuō—e hīmene rā ! ’E ’ua hīmene mātou ma tō mātou ’ā’au ato’a. ’Ua ha’api’i ato’a ’oia ia mātou te ho’ē hīmene i roto i te buka hīmene a te feiā pa’ari, ma te parau ē, ’ua ’ite ’oia ’ua nava’i tō mātou pa’ari nō te tāmau ’ā’au i te mau ta’o fifi. ’E i muri iho, ’ua tātara ’oia i te aura’a o te mau ta’o ato’a ’ia ’ite pāpū mātou. ’Ua ha’api’i ’oia ē, e poro’i ta’a ’ē tō te hīmene tāta’itahi nō mātou, ’e mai te mea e feruri mātou i te reira mau ta’o, e ’ite mātou i te poro’i tei fa’ata’a-’ē-hia nō tō mātou iho orara’a.
I taua noera ra, ’ua tāmata vau i te fa’a’ohipa i te mea tā te tuahine Whitley i ha’api’i ’ia mātou, ’e ’ua ’apo mai au i te mau ’īrava ato’a o te himene « Pō Mo’a ». I teie nei, tē tātarahapa nei au i mua i te feiā huri parau nō te ta’a ’ē te tātarara’a. I te ono o tō’u matahiti, ’ua feruri maita’i au i te mau ta’o o te ’īrava toru, ’aita rā vau i ta’a maita’i i te fa’atomara’a. Maori i te hīmenera’a « Hi’o te Fatu, ’ana’ana » mai roto mai ia Iesu te ’ana’ana e ’ōteo mai te here mau, ’ua hāro’aro’a vau ē ’ua here te Fatu i te ’ana’ana mau – mea au nāna te mau mea ato’a i hāmanihia i te ’ana’ana mau. Ma te feruri mai tā te tuahine Whitley, ’ua tāmata vau i te hāro’aro’a nāhea vau « ’ia here i te ’ana’ana mau » mai tā Iesu i rave.
Te piti o te ’ā’amu, ’ua tupu ïa i te 9ra’a o tō’u matahiti. Mai te rahira’a o te mau tamari’i, ’ua ha’api’i au i te ha’uti i te piana. e ere au i te mea ’aravihi roa ’e nō te tura’i iā’u, ’ua ani mai tō’u ’episekōpo e nehenehe ānei au e ha’uti i te hō’ē hīmene noera i te purera’a ’ōro’a, hou te noera. ’Ua fa’aoti au e ha’uti « Pō mo’a ». ’Ua fa’aineine tō’u ’orometua piana iā’u. ’Ua fa’aro’o tō’u nā metua iā’u i te ha’utira’a e 100 taime i ni’a i tā mātou piana ’ere’ere i te tahua raro o tō mātou fare. Tē nā ō ra te hō’ē reo e ti’a paha iā’u e tāmau ’ā’au i te pehe ma te fa’a’ohipa ’ore i te mau nota, nō tō’u hitahita e ha’uti i mua i te mau ta’ata o tā’u pāroita, e’ita e mau ’ā’au iā’u te mau nota. Nō reira, ’ua ’ōpua vau i te hō’ē fa’aotira’a. E rave au i te mau nota ma te ’ore e tu’u i ni’a i te piana, e tu’u ra vau i ni’a i tō’u turi ’āvae. ’Ia hi’o vau i tō’u rima ’e e ’ite ïa vau i te mau nota, ’e e mana’ohia ē ’ua tāmau ’ā’au vau i te mau nota. Au maita’i te reira fa’aotira’a nō te hō’ē roara’a e 20 tetoni. ’Ua tu’u vau i te mau nota i ni’a i tō’u piritoti tirita noera ’e ’ua ha’amata vau i te ha’uti, nō te mānina o te ’ahu piritoti, i te ropura’a o te ’īrava mātāmua, ’ua he’e te mau nota ’e mo’e roa atura i raro a’e i te piana. ’Ua fifi roa a’e ra vau. ’Aita e rāve’a nō te ’ohi mai i te ’api nota, ’e ’aita ho’i i mau ’ā’au iā’u. ’Ua ’ī’iti au i tō’u niho, ’e ’ua tāmata vau mai tā’u e nehenehe. E fifi rahi mau te reira.
’Ua ha’uti hape au i te mau nota ’e e nehenehe au e ’ite i te au ’ore o te mau ta’ata. ’Ua fifi roa ’ino vau i te piti o te ’īrava. ’Ua fa’aea vau i te ha’uti i te ’īrava toru ’e horo atura nā te aroā, ma te ha’ama ’e te fa’a’oroma’i i te ta’i. ’Ua ’ōmuhumuhu mai tō’u nā metua « e aha tei tupu ? ’Ua ’ite maita’i ho’i ’oe i tera hīmene » ’Aita vau e nehenehe fa’ahou e fa’aea i roto i te fare purera’a. ’Aita vau e hina’aro e hi’o ’e e paraparau i te hō’ē noa a’e ta’ata ; ’ua ha’amā roa vau. I te otira’a te purera’a, haere mai nei tō’u ’orometua pa’ari a’e nō te Ha’api’ira’a Sābati, te tuahine Alma Heaton. ’Ua tāmata vau i te ’ape iāna, ’ua tāpe’a mai rā ’oia i tō’u rima. ’Aita ’oia i parau mai, mea au roa tā’u ha’uti ’e ’ua ’ite ho’i te tā’āto’ara’a ē e parau ha’avare, ’ua parau ra ’oia i te hō’ē mea o tā’u e ha’amana’o noa i te toe’a o tō’u orara’a. ’Ua parau ’oia, « e Sharon, noa atu e aha te ’ohipa tei tupu. ’Ua ’ite te tā’āto’ara’a i tā ’oe tūtavara’a ’e ’ua here mātou ia ’oe, te ha’uti-maita’i-ra’a ’oe ’aore rā ’aita ».
’O tera te parau mau ti’a. ’Aita rā te reira i fa’aputa roa iā’u mai tā’u i mana’o. Te parau mau ’oia ho’i, ’ua fa’aitoito mau vau ’e ’ua here rātou iā’u, noa atu ’aita vau i ha’uti maita’i i te piana. ’Ua ’ata na’ina’i noa vau ’e ’ua tauahi mai ’oia iā’u mai te hō’ē vahine pa’ari ’e i reira ihoa ’ua maita’i roa vau.
’Aita ’o Beverly Whitley ’e ’o Alma Heaton i rave i te ‘ohipa fa’ahiahia. ’Aita rāua i pāpa’i i roto i tā rāua buka ’ā’amu i te reira pō. ’Aita ho’ē noa a’e o tō rāua feti’i i ’ite i teie nā ’ā’amu. ’Ua ha’api’i noa raua i te mau tamari’iri’i nāhea ’ia hīmene ’e ’ia hāro’aro’a i te ’Evanelia. E’ita ānei i te mea maere ? Nō’u ’oia. ‘Ia ani mai ’outou iā’u mai teihea te hō’ē ta’ata tei roto iāna « te ’ana’ana mau o te here », mai ia Beverly Whitley. Mai ia Alma Heaton. ’Ua ’ite rāua tāta’itahi i te « ’ana’ana mau » o te hō’ē tamari’iri’i i te fa’aitoitora’a nōna iho, noa atu e ’erei te mea ’āfaro maita’i roa.
Mai te reira mau te huru o tō tātou Metua i te Ao ra. ’Ua ’ite ōna ia tātou, tāna mau tamari’iri’i, i te fa’aitoitora’a. E’ita paha tā tātou mau tauto’ora’a e manuia, ’ua ’ite rā ’oia i tō tātou fa’a-itoito-ra’a – te tahi taime, ma te ’au’au niho ’e nā roto i te fifi – ’e ’ua here ’oia ia tātou nō te reira. Nō tā tātou mau pehe hapehape, te tano ’ore ’e te au ’ore, ’ua tono mai ’oia i tāna Tamaiti nehenehe Fānau Tahi, ’oia te ’ana’ana mau o te here. E tatā’i Iesu Mesia i te mau nota hape ato’a, ’e e fa’aora ’oia i te mau ta’ira’a hape ato’a mai te mea e fāriu tātou iāna ma te ani i tāna tauturu. Nā roto i te fānaura’a, te Tāra’ehara ’e te pohera’a o Iesu Mesia, e nehenehe tātou pā’āto’a e « ta’oto i roto i te hau o te ra’i ».1
Auē tō’u oaoa i teie tau Noera nō te ’ārue i te mau hīmene poro’i ta’a ’ē nō roto mai i te Fa’aora o te ao nei, i te feiā e maui nei te ’ā’au. Tē euhe nei au i te mea tā te tuahine Whitley i fafau i te Paraimere. ’Ia feruri ’outou i te mau ta’o o tā ’outou e hīmene i teie tau noera, e ’ite mai ’outou i te poro’i hanahana i fa’ata’ahia nō ’outou, ’o te fa’aitoito ’e ’o te tāmarū ia ’outou. Teie te tahi e tano nō’u i teie tau noera. Tē pe’ape’a nei au nō te mau ta’ata ato’a ’aita i roa’ahia i tā mātou tauturu nā te ao nei ’e te huru e ha’afifi nei te mau fenua ia mātou i te fa’atae atu i te tauturu i te mau taeae ’e te mau tuahine e ’oto nei. ’E i teie po’ipo’i iho nei i te Sōtaiete Tauturu, ’ua ha’apa’o maita’i au i te hīmene o tā mātou i hīmene :
Ha’amaita’i mai i te mau tamari’i
Arata’i ’oe ia mātou i te ao ra.2
Tē fa’a’ite pāpū nei au ē, ’ua here te Tamaiti a te Atua i te ’ana’ana mau ; ’ua here ’oia i te ’ana’ana mau. I te i’oa o Iesu Mesia, ’āmene.