Na iLoloma Uasivi Duadua
Ena dua na yabaki, ni se vo toka e tolu na siga ni bera e dua na Siganisucu niu se gone, na watiqu, o Rob, a raici rau e rua na ganena qase ni rau cereka lo tiko e rua na nodratou iloloma ni Siganisucu. Oti, ni rau sa irova rawa e loma, erau a ologa tale na ganena na nodratou iloloma. E rau a tukuna vei Rob na ganena, “Kevaka o na sega ni tukuna vei Na, keirau na vakaraitaka vei iko na kena icakacaka.”
A mani soli koya yani emuri ki na veitemaki oya, vakabibi ni a sa toka e ruku ni vunikau ni Kirisimasi e dua na ioloolo vaka na basiketepolo ka toka kina na yacana.
Ia, a vaka me mamada sara na iloloma oya ni kauta lo yani okoya ki na nona rumu ni moce. A dolava sara vakamalua o koya ka raica ni lala tu, vakavo ga e dua na ivola volai. Na ivola volai a kaya, “Au sa kila na ka o cakava tiko. Kua ni vakacacana nomu Siganisucu. Loloma, Na.” A vulica okoya nona lesoni, ka sa itinitini oya ni dua na vaqitoqito levu ni irovi-lo-ni-loloma-ni-Siganisucu.
Okata mada na veivakanananu, na veika totoka, na vei rorogo vaka-agilosi, kei na vei iboi tawaguilecavi e dau lako mai ni o vakasamataka na Siganisucu. Ia era vakamareqeti cake sara na veivakanananu ni kena sa rui vakalou na Siganisucu ka da tugana tu mai e yaloda e vuqa vei keda ni da se gone—na marautaki ni sucu ni noda iVakabula. Na veika vakilai vakalou oqori e sega sara ni biuti keda.
Eda vakilai ira e veigauna eda vakananuma kina na valenimanumanu lailai oya e Peceliema ka a vasokumuni kece kina e vuqa sara na parofisai, mai na vei senijiuri, ena ruku ni dua na bogi ni kalokalo—ni a tadu mai kina ki vuravura na noda iVakabula ka Dauveivueti vaka Tui ni Tui ka Turaga ni Turaga.
Eda dau rogoca wasoma ni Siganisucu e sa baleti ira na lalai, ia eda sa sega beka ni gonelalai kece ena yaloda? Ena dua na siga erau a ogaoga tiko ena volivoli ni Siganisucu e dua na tina kei na luvena yalewa yabaki ciwa. Ni rau vakusakusa yani ena dua na tabana ni sitoa ni vatutalei, a raica sara na luvena yalewa e dua na drotini vakaitamera e lili tu e vanua ni vakaraitaki ivoli. A vakatakila tu na drotini, ena matanivola damudamu lelevu, “Na iLoloma Ka Sega Sara Ni Mudu Ena Soli Ka.”
A wilika na luvena yalewa na ivakatakilakila, vakasamataka vakalailai, ka matadredredre sara. A tukuna yani vei tinana ena yalo doudou, “I Na, au kila na iloloma cava e sega sara ni mudu ena soli ka.”
“Io, na cava?” a taroga o tinana ni rau toso vakatotolo maliwai ira na lewe vuqa.
A kacivaka ena yalo galala na luvena yalewa, “Sa i Jisu!”
A sauma cala mai o tinana, “Sega, Daulomani. Na daimani
E vakananumi keda o Aisea, “Ia ena tuberi iratou e dua na gone lailai.”1
Ni’u vakayagataka e dua na gacagaca ni vakasaqaqara ena initanete, au kunea e udolu vakaudolu na veika e vakatakilai ena malanivosa “Na iloloma ka sega sara ni mudu ena soli ka.” Ia veitalia ke da tovolea, e sega sara ni dua na iloloma vakayago eda solia ena cava tawamudu.
Ena kena veibasai, me’u wasea mada e dua noqu vakanananu mareqeti ni Siganisucu me baleta e rua na tamata au vakabauta, e rau a sega sara ni mudu ena soli ka. Sai rau na noqu itubutubu, o Aldo kei Eleanor Harmon.
E a dua na vulaibatabata tauvi ucacevata ena neitou tauni lailai ena yabaki oya, ia a sega ni tarovi ta me kauta neitou matavuvale me vaqara na vunikau ni Kirisimasi vinaka duadua. Ni yaco ga mai vale na vunikau ka vakadaberi sara ena kena itutu, a tokari sara ena yalololoma ena cina tataremoremo,kei na iukuuku eso. Sa mai vakadeitaki kina ni sa vakarau tu na neitou vuvale rokovi me tekivu na Siganisucu.
A yaco mai ena meli na ivola‑vakamacala eso ni yaya ni vakatatalo, ka keitou vakawilika ena mamarau vakaveitacini ka diva tu na vei iyau talei ni Siganisucu. Na iboi ni madrai‑cago kei na keke vaka‑vuanikau a curuma na neitou vale, ka mai toso malua yani o Tiseba ena ivolanivula ni Kirisimasi. Keitou a biuta na iloloma eso e matanikatuba ena veivale voleka ka tovolea me qarava na veimatavuvale era gadreva tu na veilaveti ni Siganisucu.
Ena veibogi, ni’u sa lai davo, e dau vakayagataka sara vakalevu na gauna o tinaqu me sogobutu tiko ena nona rumu ni moce. Au dau rogoca rawa ga na rorogo ni nona misini ni culacula. Ia a sa dau cula okoya e vuqa sara na neitou isulu ka’u sega ni kauwai sara kina vakalevu.
Ia ni sa roro voleka mai na Siganisucu, e a kolaiciba ena oca o Tinaqu. E a davo sara ena tauvimate okoya ena siga ni se bera na Siganisucu. Ni tukuna na vuniwai vei tamaqu ni na davo tiko okoya me dua na macawa ke lailai, au a lomaleqa—ka lomabibi sara talega. E na rawa vakaevei me toso ga na Siganisucu ni sega o Na? E na rawa vakaevei me vakilai sara mada ga me vaka na Siganisucu? Ka qai kuria, o cei me na vakasaqara na vakayakavi ni Siganisucu?
Ni qaravi tinaqu tiko ena yalololoma o tamaqu, a qai kidava okoya ni sa na nona itavi me vakasaqara na vakayakavi ni Siganisucu. Au a baci mai lomaleqa tale! E dina ni dua na turaga yalomatua ka maqosa sara, ia na vakasaqa e dua na ka e sega ni kenadau kina okoya.
Ena bogi ni Kirisimasi Ivi au a tekiduru ka masulaka tiko me na vakabulai ena cakamana na tinaqu ka me na dua tale na mataka ni Siganisucu talei me vaka ga e liu—me vakasoqoni vata na neitou matavuvale wavokita na vunikau ni Kirisimasi. Ia a kuitaki keitou na lomabibi ena mataka ni Siganisucu ni keitou raica ni se davo bibi koto ga o tinai keitou. Ni keitou cereka na neitou iloloma, au a kurabui ni raica ni noqu iloloma digitaki a dua na isoqoni ni matakau isulu culaliga ka a cula tiko mai o tinaqu me baleti au ena vuqa na bogilevu ni Tiseba. Au a sega ni rawa ni qai wawa tale meu cici yani vua ka mokoti koya. Ena non solibula vei au o Koya.
Na Tamaqu lomani a tovolea na veisala kece e rawa me cakava me Siganisucu vakilai vinaka ena yabaki oya, na kena vinaka duadua ni yali kina o Na. A qai rawata vinaka okoya. Ni oti na vakayakavi, a mocelutu yani o tamaqu lomani ena idabedabe ka toka tikiva na irara ni’u qito voli kei iratou na taciqu kei na noqu matakau kei na nona isulu vovou. A bula vinaka tale na tinaqu lomani ni oti e dua na cegu dede, ka mai totoka tale tu yani na veika kece. Ena noqu bula, erau a dua na iloloma ka sega sara ni mudu ena soli ka na noqu itubutubu.
Meda vakasamataka mada vakalailai na malanivosa oya. Ena sega beka ni okati me dua na iloloma uasivi sara e dua na iloloma ka sega sara ni mudu ena soli ka? iMatai, e dua na iloloma uasivi sara ena vakatakila e dua na ka me baleti koya e solia na iloloma. iKarua, ena vakavotuya e dua na ka me baleta na veigagadre nei koya e ciqoma tiko na iloloma. Ka iotioti, na iloloma, kevaka me sa iloloma uasivi dina sara, ena taura tu na kena talei sega walega ni vagauna ia ka tawamudu.
E sega beka ni sotava na tolu na veika oqo, na noda iVakabula lomani, na iVakabula dina sara kei vuravura? E vakatakila beka e dua na ka me baleta na Dausoli iloloma na iloloma ni sucu,kaulotu, kei na veisorovaki i Jisu Karisito? E dina sara. “Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura.”2 Na Tamada Vakalomalagi, a solibulataka na Luvena mai na loloma savasava ena vukuda, na Luvena.
E vakaraitaka beka na iloloma i Jisu Karisito ni a sa kila deivaki na Tamada Vakalomalagi na ka saraga eda gadreva? Se baci dua tale, na kena io levu! Eda sa lutu tu ena ituvaki ni bula, ka da sa gadreva vakaca sara e dua na iVakabula ka Dauveivueti. Me vaka a vakatavulica o Nifai, o Jisu Karisito “sa sega ni kitaka … e dua na ka, ka vakavo kevaka me na vinaka kina ko vuravura; ni sa lomani ira na kai vuravura.”3
Ia na iotioti ni ka e vinakati me baleta na iloloma uasivi sara? E dodonu me taura dei tu na kena talei ka tawamudu. E vakatavulici keda vakamatata sara na iVola i Momani ni sa tawa‑vakaiyalayala ka tawamudu na Veisorovaki i Jisu Karisito.4
O nanuma tiko na drotini ena tabana ni sitoa ni vatutalei? Na goneyalewa oya a kila vakataki koya na cava na iloloma dina. Ena vuravura butobuto oqo, eda rai sivita yani na vatutalei ki na Rarama kei Vuravura. E a vakavulica na iVakabula vakataki Koya:
“Ia mo ni dulaka cake na nomuni rarama me cilavi vuravura. Raica sai Au ga na rarama mo ni dulaka cake.”5
“Koi Au na rarama sa cilava na butobuto.”6
Au vakadinadinataka ni o Jisu Karisito e sa iloloma uasivi sara—na iloloma ka sega sara ni mudu ena soli ka. Me da taura dei kece na dina oya ena yaloda ena Siganisucu oqo ka tawamudu. E bula tiko. Ena yaca tabu i Jisu Karisito, emeni.