Kauta mai na Siganisucu ki na Vakanamata
Au dau taleitaka na gauna oqo ni yabaki ni da dau soqoni vakamatavuvale kei ira eda lomana me nanumi na sucu ni noda iVakabula ko Jisu Karisito ka vakavinavinakataka Nona bula kei na isoro veivakaduavatataki tawayalani. Au dau taleitaka na veivakananumi tawawili ni gauna vakamareqeti ka tu wavoki kau rawa ni vakila tu ga na malaude kei na nanamaki ni vei Siganisucu mai na noqu gone, se ko ira batabata e Igiladi se katakata e Arapea.
Ena macawa sa oti me vaka taka e levu vei keda, au a saga tiko na cina ni siga ni sucu meu kunea na mata ni cina cava e leqa tiko ka vakavuna me boko kece na cina. Gauna sa mai kune ka veisau taki kina na matani cina oya, e dua na vakacegu levu a yaco mai ni sa waqa taucoko kina na cina.
E dua vei ira na ka taleitaki meu cakava ni roro mai na Siganisucu oya meu dabe tikiva na vunikau ni Siganisucu, ni boko tu na vo ni cina, ka laiva me buwawa mai na noqu rai niu raica tiko na vunikau ka robo tu ena cina vulavula lalai. Ni sa buwawa voli na mataqu, na iserau ni cina yadudua e tete ka malumu ni tatibi mai na iukuuku damudamu tatalivaliva. Na ka e cakava e veivesuki. E vakavuqa ni keitou dau vakatagitaka na sereivakatagi mai muri, ka kaburaka tu, “Meda marau, sa tadu mai!”1 ka na “Vakatokai na yacana ko Veivakurabuitaki, na i Vakavuvuli, na Kalou kaukauwa, na Tama ni gauna tawamudu, na Tui ni Sautu.”2
Niu laiva na mataqu me toso ki loma kei na sau ni vakanamata ki na vunikau, au mai vakananumi tale ki na ilesilesi vakalou ni noda iVakabula, ka lako dei mai ki na vakanamataena veigauna vagagalu vakaoqo. E kaya oKoya, “Oi au na rarama kei vuravura: ko koya sa muri au ena sega ni lako ena butobuto, ena tu ga vei koya na rarama ni bula.”3 Au tugana na bogi tabu ka a sucu kina oKoya, kau vakasinaiti ena lomavinaka baleta na iloloma nei Tamada ni marau, inuinui, kei na loloma ka kau mai ki vuravura ena Luvena e Duabau ga sa Vakatubura.4
Na mataqali gauna vakanomodi ni vakanananu titobu vakaoqo kei na vakasama lesu e rawa ni vakavudua vei keda ena osooso ni vakavakarau ki na Siga ni Siganisucu. Na Tiseba e kauta mai na pati kei na tuvaitutu, na soqoni kei na iloloma. E vakasinaiti na ituvatuva, ka eso na gauna na nanamaki eda tuva vei keda e kauta tani sara ga mai na marau ni gauna ka sega ni vakalevutaka.
Io e bibi dina kina na ivakavuvuli nei Peresitedi Nelson: “Na reki eda vakila e vakatau vakalailai sara ena ituvaki ni noda bula ka sa baleta vakatabakidua na veika e vakanamata kina na noda bula. Ni vakanamata na noda bula ki na ituvatuva ni veivakabulai ni Kalou … vei Jisu Karisito kei na Nona kosipeli, eda na rawa ni vakila na reki veitalia na cava e yaco tiko—se sega ni yaco tiko—ena noda bula. Na reki e lako mai Vua vakakina ena Vukuna. O Koya na ivurevure ni reki kecega.”5
Oqo e sa gauna uasivi meda vakasamataka ka masulaka kina na na vei ka eda vakanamata taka. Na cava mada na nomu inuinuiena gauna ni Siganisucu oqo? Na cava mada na nomu gagadre dinabaleti iko vakai iko kei ira ko lomana ni o soqoni ira vata ena gauna tabu oqo ni veisiga tabu?
Ena rua veimama na macawa mai oqo e sa na yaco mai na Siga ni Siganisucu. Vakasamataka na cava e tu ena nomu ivolanivula me baleta na rua veimama na macawa ka tarava. Ko na rawa ni vakila na vakadromuci mai na sivia ni yalayala kei na veika kece ko se bera ni cakava. E sa sivia beka na ka e vakaleweni ena nomu ituvatuva? Eso beka na ivalavala vakavanua kei na oga e vakavuna vei iko na lomaocaoca tawa sureti ka tarova tiko na nomu ciqoma ka raica lesu na marauni sucu nei Karisito? E rawa ni ko vakarawarawataka vakacava na nomu ivolanivula ena Siganisucu oqo ka tuva vinaka cake ena kena ka tarava?
Meda qaqarauni meda kakua ni rui osooso ka wawale mai na tovolea tiko me cakava e sivia na veika ka calata na vakanamata ni gauna ka sega ni rawa ni da laki tekiduru vakatayaloyalo ena vale ni manumanu, cuva vua na Tui sucuvou, ka kauta mai na iloloma yadua vei Koya.
Kemuni na veitinani gone, kei keda kece, o ni sa vakadrukai beka? O vakanamata tiko ivei? Ena yabaki oqo e rawa ni o sega ni vakau kadi ni Siganisucu, se mo biuta laivi eso na nanamaki ni vavakabi ena initaneti e tiko baleti iko vakataki iko. Na kena isau vakagauna ka vakailavo ena kauta laivi nomu rawata mo vakanamata vua na iVakabula ka vakila na marau ni Nona Siganisucu.
Kemuni na tama vovou, kei keda kece, e vei na nomu vakanamata? Ena yabaki oqo ena rairai rawarawa beka na nomu Siganisucu ka levu na iloloma caka e vale kei na iloloma ni veiqaravi baleta na ogaoga kei na isau ni tovolea mo volia kece e sa rui levu—ka —sega ni gadrevi—ka na kauta tani eso na nomu igu mo vakanamata vua na iVakabula ka vakila na vakacegu ni Nona Siganisucu.
Na veiqaravi ena valetabu ena gauna ni Siganisucu e rawa ni vakaibalebale sara vakalevu. Na valetabu e vakadodonutaka na noda vakanamata, vakalevutaka na noda marau, ka vakaduavatataka na noda matavuvale eke kei na yasa kadua ni ilati. Vakasamataka na veiqaravi e valetabu mai na dua tale na itaviqaravi ni Siganisucu ka na sega beka ni vukei iko ena nomu gagano ki na vakanomodi ni Siganisucu. Na veicakacaka tabu oya—na vakacegu kei na kaukauwa vakabete e tu kina vei ira ka ra lomana—e rawa walega baleti Koya Duadua na Luvena sa Vakatubura ko Tamada, oqo “Na Lami sa vakamatei mai na vakatekivu kei vuravura,”6 na nona sucu ka da marautaka tiko.
Ni sa roro tiko mai na Siganisucu oqo, meda kitaka vakalevu na ka e yaga ka vakalailai sara na ka e sega. Meda segata me kitaka na cakacakai Jisu na kai Nasareci—laveti ira cake na rarawa tu, vakabulai ira na yalokavoro, sikovi ira na vesuki, vakani ira na viakana, vakasulumi ira na luvawale, ka soli domo ni vosa vei ira e sega na domodra, o ira na biliraki, guileca, kei ira na beci.7
Vei kemuni nasotavi leqa ena Siganisucu oqo, mo ni bau kunea na isolisoli ni loloma ni iVakabula ka na nomuni vakatabakidua. E levu, ena gauna oqo, e sa voleka ni ra vakayalia na nodra daulomani ki na tauvimate, itaba qase, se ki na vakacalaka rerevaki. E levu era nanumi ira tiko ka yali yani ena gauna ni Siganisucu, ka na ivakananumi mosimosi vei kemuni oqo. Eso era na tagicaka tiko na nodra digidigi cala ena gauna oqo ko ira ka ra lomana. Eso tale era na galili, sega na matavuvale, sotava tiko na yavavala, se ena dua ga na kena ibalebale era na vakanamata ki na dua na Siganisucu ka na duidui sara mai vei ira ka ra dau marautaka eliu.
Ni Vakabautani dua tiko na iloloma vakatabakidua ena gauna oqo baleti iko Vakasaqara na gauna vagagalu, taudua ko rawa ni vakanananu titobu kina, masu, ka vakila na loloma-yalovinaka i Dua ka a sucu me cakava me rawa namarau cava gase vakacava ga na bula. Na yalayala ni dua na siga, “ena sega tale na ciba, se na rarawa, se na tagi, ka na sega tale na vutugu.”8 “Era na sega tale ni via kana, se viagunu tale. … “Ni na vakani ira na lami sa tiko ena loma ni itikotiko vakaturaga, ka na tuberi ira ki na ivurevure ni waibula: ia ena tavoya kecega na Kalou na wai ni mata mai na matadra.”9
Taura na gauna mo vakanomodi, mo cegu, mo vakanananu. Rai Cake Vakanamata ki na Nona iloloma cecere—na kila ko cei dina sara ko iko, kei na kilamatata ni vakatovolei eke e lekaleka wale ia na marau eke e itekitekivu ga ni marau ka na yaco mai. “Na reki eda vakila e vakatau vakalailai sara ena ituvaki ni noda bula ka sa baleta vakatabakidua na veika e vakanamata kina na noda bula.
“Ia oqo, au sa vakauqeti kemudou mo dou vakasaqarai Jisu oqo, o koya era sa volavola kina na parofita kei ira na iapositolo, me nomudou tiko ga kina na loloma soli wale ni Kalou ko Tamada, kei na Turaga ko Jisu Karisito kei na Yalo Tabu, o koya sa tukuni rau me tikoga kei kemudouka sega ni mudu.”10 Meda qai kaya mada, “Io, Turaga, Ko Ni a mai sucu. Mai vakarokoroko!”11
Ena yacai Jisu Karisito, emeni.