A iVavakoso Agilosi ni Gauna Oqo
Ni bula vinaka, kemuni na taciqu kei na ganequ. Au vakila na veivakalougatataki ena madigi meu vosa vei kemuni ena yakavi bogi nikua ni da solevutaka na gauna lagilagi duadua ena itukutuku ni kawa tamata—na tadu mai ni Luve ni Kalou ki vuravura. Na sucu nei Karisito, nona bula, kei na Veisorovaki era Nona iloloma kece na Tamada Vakalomalagi vei keda.
Ni da solevutaka na sucu ni noda iVakabula ena gauna rekitaki oqo ni yabaki, na loloma drodro vakayauyau ka tawa vakaiyalaya ni Kalou e vaka me curuma vakalevu na noda bula, ka vukei keda meda vagolea na yaloda vei ira noda vuvale, itokani, kei ira ka tiko volekati keda, ka vukei keda meda kauwaitaki ira vakalevu cake o ira era vakila ni ra tu duadua, galili, se o ira era gadreva na veivakacegui kei na vakacegu.
Au sa dau vakadinadinataka, na, kena tukuni na veika a yaco ena sucu i Jisu, na kosipeli i Luke e vakaraitaka e vica na ivakaraitaki ni veivakacegui kei na vakacegu ka soli ki vei ira era sotava na vei ituvaki vakaoqo. Na ivakaraitaki vakaoqo e rawa ni laurai ena nona talai ira mai na Nona agilosi na Tamada Vakalomalagi mera kacivaka kina na sucu ni Luvena ena nodra sikovi iratou na ivakatawa ni sipi ka a tawase tani tu ena bogi mai vei ira na tamata, kei na nodra veisiko vakakina na ivakatawa ni sipi vei Meri kei Josefa, ka rau a qarava tiko e dua na gone sucuvou, vakayawa sara mai na nodrau itikotiko mai Kaleli.
Na sala balavu e rau muria mai ko Josefa kei Meri mai Nasareci ki Peceliema me rejisita ena vuku ni ivakacavacava e a sega ni ka vaka cala-ka, baleta ena vica na senituri, sa parofisaitaki mai vei ira na parofita makawa ni na mai sucu na iVakabula kei vuravura e Peceliema, na Koro i Tevita.1 Eda raica kina ni Tamada Vakalomalagi a kila vinaka tu, ka vakaitavi ena veika matailalai me baleta na sucu ni Luvena e Dua Bau ga ka Vakatubura. “Ia ni rau sa tiko mai kea, sa yaco na nona siga me vakasucu kina.”2
Niu vakananuma na nodratou ituvaki raraba na ivakatawa ni sipi kei rau na veiwatini gone, o Meri kei Josefa, au vakataroga se e kauta yani vakacava ki na nodratou dui bula yadua na veivakacegui, vakacegu kei na reki na nodra rairai na ivavakoso agilosi ki vei iratou na ivakatawa ni sipi ena buca kei na nodratou yaco yani na ivakatawa ni sipi vei Meri kei Josefa.
Vei iratou na ivakatawa ni sipi, o ira na agilosi era kauta mai na veivakacegui ni Kalou ka gadrevi, ni kilai iratou ka raica na kedratou yaga me ratou digitaki me imatai ni ivakadinadina ni sucu ni Lami ni Kalou. Vei Meri kei Josefa o iratou na ivakatawa ni sipi eratou kauta mai na veivakacegui ka gadrevi vakalevu sara, o ya ni o ira na tani era kila na caka mana vakalou ka rau sa vakaitavi tiko kina.3
Sa dina sara, era maliwai keda tiko eso na ivakatawa ni sipi ni gauna oqo—tagane kei na yalewa era cakacaka ena lomaloma ni bogi kei na mataka lailai caca ena nodra cakacakataka na veika mera bula kina. Eso vei ira na i vakatawa ni sipi ena gauna oqo e rawa ni oka kina o ira na tamata yadra, kei na tamata veiqaravi ena valenibula se vanua ni leqa tubukoso, na vei sitoa ni yaya-gadrevi ka dola tu ena bogi taucoko, o ira na cakacaka ena italotalo beniseni, kei ira na timi ni itukutuku kaburaki. Ena so na gauna o ira na yadra bogi era rawa ni vakila ni ra tawasei tu mai na veimaliwai vakatamata vata kei ira ka dau cakacaka ena gauna tudei ni cakacaka ena siga. Me kena ikuri, era tiko o ira na Josefa kei na Meri ni gauna oqo, ka ra sa toki mai na nodra vanua dina ka ra tovolea me vakamatautaki ira kina i vakarau ni bula vou ena nodra solevutaka na veisiga bibi me vaka na Kirisimasi, siganisucu, vakamau, kei na mate.
Ni da volekata yani na Siganisucu, au vakataroga se rawa ni da vakataki ira na ivavakoso agilosi ena noda sikovi ira na ivakatawa ni sipi ni gauna oqo me da vakarautaka vei ira na itukutuku vinaka kei Karisito, na vakacegu kei na veivakacegui. Ka vakataroga, se rawa ni da vakataki ira na ivakatawa ni sipi ena noda ciqoma na kaci me veisiko ka veiqaravi vei ira na Josefa kei na Meri ni gauna oqo e yasa ni noda veivale se itikotiko me vakarautaka na veivakadeitaki, ni Kalou e lomani ira ka wanonovi ira ka karoni ira.
Keitou sa sotava vakavuvale na logaloga vinaka kei na vakacegu e rawa ni ra kauta mai o ira na ivavakoso agilosi ena gauna nikua. Au via raica vakatitobu ena bogi nikua e dua vei ira na gauna oqori. Ena 2003, keitou tokitaki mai na neitou vale ki na vanua ko Uta. Ena vulaibatabata o ya, keitou sotava kina edua na cagilaba ni ucacevata levu ka sa qai sotavi tale e Uta ni oti e vica na yabaki. Keitou se bera ni bau raica vakadua e dua na ka vaka o ya ena neitou bula, ni keitou a susugi ena maliwa ni veivuniniu kei na baravi veinuku. Na neitou itikotiko a tiko ena dua na kona ena dua na delana e Bountiful ka a dua tiko na kena gaunisala balavu. Ni tekivu lutu na waicevata, o na watiqu yaloqaqa sa tekivu me vakasavasavataka na gaunisala ni motoka kei na sala e yasa ni vale baleta niu a sisi ka ramusu kina na noqu i labe ni ika ena vica na siga ki liu niu a taubale tiko ena na sala ni motoka meu sikova edua ka tiko tikivi keitou. Na vakacala-ka oqo e a tini ena dua na veisele kei na vakisitaki ni ligaqu me vica vata na vula. Ni tekivu me vakasavasavataka na ucacevata mai na vanua o ya o watiqu, ena matai ni gauna ena nona bula, a lecava ni dodonu me dau veisautaki na vanua e qara kina na iuvuuvu ni misini, ni vakasavasavataki oti e dua na yasa ni gaunisala. Ni toso ki yasa ni gaunisala kadua na nona sasamaki e dau uvuca lesu tale mai na waicevata na misini kina vanua sa samaki oti. E vaka tiko o ya na nona sasamaki ka sega ni dua na ka e rawa. Sa saku ca dina! Ena vuku ni nona tiko vakadede ena batabata, e a takava kina na daligana ruarua na mate ka yaco me didivara tu me rua na vula. Ena gauna vata o ya, na luvei keirau tagane yabaki tinikaono, a mavoa tu na dakuna ena nona a vakatasisi voli ka mani davo tu kina me rawa ni mamada mai na nona mavoa. Sa mai vaka tu o ya, dua e davo tu, dua e didivara, dua e vakisi tu na ligana ka keitou tauvi liliwa kece tu. Au sega ni vakataratututaka na keitou ituvaki, ni na lasa vei ira era tiko volekati keitou. Ena dua gona na mataka lailai-caca, batabata ena 5:00 na kaloko, au a yadra cake ki na domo ni misini ni uvu waicevata e taudaku ni noqu katubaleka. Au rai yani ki tuba au raici Brother Blaine Williams, ka tiko ena tai kadua ni gaunisala mai vei keitou. Sa voleka ni yabaki vitusagavulu, ka biuta tu yani nona loma ni vale katakata vinaka ka veivakacegui, ka lako lo mai me vakasavasavataka na neitou gaunisala ena nona kila ni keitou sega ni rawa ni cakava vakai-keitou. Ena sala galugalu rawarawa vata o ya, e a gole mai kina o Brother Daniel Almeida kina neitou vale me kauti au ena motoka ki Salt Lake meu lai cakacaka, ni sega ni rawa vei au meu draiva ena vuku ni ka bibi ka ologa tu na ligaqu. Erau a vakayacora tiko ena yalololoma kei na yalogalugalu ena veimataka kece sara me yacova ni keitou sa bula mai na baca ka rawa ni keitou qaravi keitou tale vaka-i-keitou. Ena gauna ni Siganisucu batabata o ya ena 2003, erau a talai yani vei keitou o rau na baraca agilosi oqo me vaka na nodra a talai na agilosi dauveiqaravi vei ira na ivakatawa ni sipi yalo lokumi mai liu. O irau na baraca oqo erau muria na ivakaraitaki ni iVakabula ena nodrau nanuma taumada na veika keitou gadreva ni bera nodrau nanumi rau vaka-i-rau.
Kemuni na taciqu kei na ganequ lomani, na nona bula na iVakabula e ivakaraitaki uasivi duadua ni loloma ka cakavinaka vei ira na tamata. E dau guilecavi Koya ka nanumi ira na tani. Na Nona sega ni dau nanumi Koya ga e vakaraitaki ena Nona bula e veisiga ka sega ni yalani ki na dua ga na gauna ni vakacagicagi se draki ni bula. Ni da vagolea na yaloda vei ira na tani me vakataka na iVakabula, au yalataka ni na rawa ni da vakila vakavinaka cake na ibalebale dina ni Siganisucu. Ni da vakayacora vakakina, au rawa ni vakadeitaka vei iko ni da na kunea na madigi sega ni vakaiyalayala meda soli keda yani ena yalovinaka ka sega ni kilai me vukei ira na tani era gadrevi keda. Oqo ena vukei keda meda na kila vakavinaka cake na iVakabula ka kunea vakataki keda na vakacegu e vuravura kei na loloma vei ira na tamata, ka na vakatautaki kina na loloma, vakacegu kei na i gu vakavoui ena dua na kena ivakarau e levu cake, eda rawa ni vakila ka wasea vei ira na tani. Ni da muria na mawe ni yavana na noda iVakabula, meda qai vakatudaliga ki na irorogo ni nona ivava ka dodoliga yani vua na Matai meda taura na ligana dei. Ni da vakasaqara na iVakabula ena veika kece eda cakava, ena sega walega ni dua na siga se gauna na Siganisucu, ia ena dua na ituvaki ni yalo kei na vakasama kei na reki kei na loloma ka dau vakilai ena vei Siganisucu ka na dau voleka tu ga. Au vakadinadinataka ni o Jisu Karisito, na gonelailai ka sucu e Peceliema, sa iVakabula ka Dauveivueti dina ni vuravura.
Siganisucu Marautaki vei kemuni kece sara. Au cavuta na veika kecega oqo ena yaca i Jisu Karisito, emeni.