O Le Meaalofa Atoatoa
I se tasi tausaga, pe toe tolu aso oo i se Kerisimasi a o laitiiti o ia, sa maua atu ai e lo’u toalua o Rob, ona tuafafine matutua e toalua i le la potumoe o tatalaina faanana ni meaalofa se lua o a latou meaalofa o le Kerisimasi. Ona toe afifi lea e ona tuafafine a la meaalofa ina ua uma ona la tilotilo i totonu. Sa fai atu tuafafine o Rob ia te ia, “Afai e te le ta’ua ia Tina, o le a ma faasino atua ia oe le auala e fai ai.”
Sa mulimuli ane lolo atu o ia i le faaosoosoga, aemaise lava ona sa i ai se afifi e pei o le telē o se polo paseketi sa i lalo o le laau Kerisimasi ma lona igoa sa i ai i luga.
Peitai, sa ese lava le māmā o le meaalofa ina ua ia aveina faanana i luga i lona potumoe. Sa ia tatalaina ma le faaeteete ma maua ai e leai se mea, vagana ai se tusi. Sa faitauina le tusi, “Ou te iloa le mea o loo e faia. Aua le faaleagaina lou Kerisimasi. Alofa atu, o Tina.” Sa ia aoaoina lana lesona, ma o le mutaaga foi lena o le fiafia tele e matamata nana i meaalofa o le Kerisimasi.
Mafaufau i ou manatuaga, o vaaiga matagofie, o leo pei ni agelu, ma manogi lemafaagaloina e oo mai i le mafaufau pe a e mafaufau i le Kerisimasi. E sili atu foi le mālū o manatuaga o loo tauave e le toatele o i tatou i o tatou loto mai taimi o laiti e uiga i le paia o le Kerisimasi—o le faamanatuga o le soifua mai o lo tatou Faaola. O na lagona paia e le tuua lava i tatou.
Tatou te lagonaina i taimi uma tatou te mafaufau ai i lena faatanoa vao laitiiti i Peteleema lea sa o mai faatasi uma ai le tele o valoaga, i le tele o seneturi i lalo o se lagi i se po na fepulafi i fetu—ina ua auina mai lo tatou Faaola ma le Togiola i le lalolagi o le Tupu o Tupu ma le Alii o Alii.
E tele ina tatou faalogo o le Kerisimasi e mo fanau, ae pe le o i tatou uma ea o fanau i le loto? I se tasi aso sa pisi ai se tina ma lana tama teine iva tausaga le matua i faatauga o le Kerisimasi. A o la faananati atu i se vaega o maataua i se faleoloa tele, sa matau ai e le teineitiiti se lau’ie tele o tautau i luga o se fata teuoloa. I ni mata’itusi mumu lapopoa, sa folafola mai e le lau’ie, “O Le Meaalofa E Lē Muta Le Foai Atu.”
Sa faitauina e le afafine le faailoilo, ma mafaufau ai mo sina taimi, ona ataata lea. Sa ia ta’u atu ma le mitamita i lona tina, “Tina, ou te iloa le meaalofa e le muta le foai atu.”
“Oi, o le a?” sa fesili atu ai lona tina a o la faataalise atu i totonu o le motu o tagata.
Sa faasilasila atu e le afafine ma le mamā, “O Iesu!”
Sa tali mai lona tina ma le sese, “Leai, Pele. O taimane.”
Ua faamanatu mai e Isaia ia i tatou, “Ma o le a taitaiina i latou e le tamaitiiti.”1
O le faaaogaina o se tasi o sailiga i luga o le initoneti, sa ou maua ai le faitau afe ma afe o mea o loo faasalalau atu i le fasifuaitau “O le meaalofa e le muta le foai atu.” Ae pe tatou te taumafai i le mea e mafai ai, e leai lava se meaalofa faaletino tatou te foai atu o le a tumau e faavavau.
I se faatusatusaga, se’i o’u faasoa atua se tasi o o’u manatuaga mafana o le Kerisimasi o ni tagata se toalua o ē, ou te talitonu, sa le muta lava le foai atu. O i laua o o’u matua, Aldo ma Eleanor Harmon.
O se taumalulu kiona i le matou tama’i aai i lena tausaga, ae sa le i taofia e lena mea lo’u tama mai le aveina o le matou aiga e saili mo se laau Kerisimasi sili ona manaia. O le taimi lava na i ai le laau i le fale ma mautu i lona tulaga, sa tuu loa i ai ma le fiafia moli emoemo, o mea teuteu, ma mea ilaila i luga o lala. Sa saunia aloaia loa le matou fale faatauvaa mo le amataina o le Kerisimasi.
Sa taunuu atu le lisi o meataalo i le meli, ma sa matou susuea ma le fiafia ma o’u tei itulau ma moomoo mo ni oa o le Kerisimasi. Sa faatumulia lo matou fale i le manogi o le falaoafiu ma le keke suamalie, ma sa mou ese lemu atu Tesema i luga o le kalena. Sa matou tuua ni mea maofa i faitotoa o tuaoi ma taumafai e auauna atu i aiga o loo manaomia sina fiafia o le Kerisimasi.
O po taitasi, pe a ou alu e moe, sa faaalu ai e tina se taimi paganoa tele i lona potumoe. Na o le pau le mea ou te lagonaina o le leo o lana laau suisui. Sa ia su’iina le tele naua o o matou ofu sa ou le manatu tele i ai.
Ae a o tulata mai le Kerisimasi, sa matua lelava lava Tina. Sa ma’i o ia i le aso a o lumanai le Kerisimasi. Ina ua ta’u atu e le fomai i lo’u tama e tatau ona malolo o ia mo se vaiaso atoa, sa ou popole—ae sa ou le fiafia foi. E faapefea ona faaauau le Kerisimasi e aunoa ma Tina? E faapefea foi ona lagona e pei o se Kerisimasi? Ma le isi, o ai o le a kukaina le to’ana’i o le Kerisimasi?
A o tausia ma le alofa e lo’u tama lo’u tina, sa ia iloa ai o le galuega o le kukaina o le to’ana’i o le Kerisimasi ua pa’u i ona luga. Sa ou toe popole foi. E ui o ia o se alii atamai ma talenia, ae o le kuka sa le o se mea na lelei ai o ia.
Sa oo mai le Afiafi na sosoo ma le Kerisimasi ma sa ou tootuli ma tatalo ina ia faamaloloina faavavega lo’u tina ma o lena taeao o le Kerisimasi o le a avea ma taeao e pei ona masani ai—e potopoto ai lo matou aiga faataamilomilo i le laau Kerisimasi. Sa lofituina i matou i le le fiafia i le taeao o le Kerisimasi a o matou iloa o loo ma’i pea lo matou tina pele ma taoto i le moega. A o tatala a matou meaalofa, sa faateia a’u i le iloaina o la’u meaalofa o se suifefiloi o ofu pepe meataalo na su’ilima e lo’u tina mo a’u i le tele o na po o Tesema na ala umi ai. Sa le mafai ona faatali lo’u tamoe atu ia te ia ma fusi mau ia te ia. Le auala na ia ositaulaga ai mo a’u.
Sa taumafai e tama pele auala uma na mafai ai e fai le Aso Kerisimasi e pei ona masani ai i lena tausaga, e aunoa ma Tina. Ma sa faamanuiaina o ia. Ina ua maea le to’ana’i, sa moe ai lava si o’u tama pele i luga o le nofoa i talaane o le magālafu a o matou taaalo ma o’u tei ma la’u pepe meataalo ma ona ofu fou. Sa toe malosi mai si ou tina pele i le mavae ai o le tele o le malologa, ma sa lelei mea uma. I lo’u olaga, o o’u matua o se meaalofa ia te a’u sa le muta le foai mai.
Se’i o tatou mafaufau i lena fasi fuaitau mo sina taimi. Pe le mafai ea ona mafaufau i se meaalofa e le muta le foai atu o se meaalofa atoatoa? Muamua, o se meaalofa atoatoa o le a faaalia ai se mea e uiga i le tagata foai o le meaalofa. Lua, o le a atagia mai ai se mea e uiga i manaoga o le tagata e mauaina le meaalofa. Ma le mea mulimuli, o le meaalofa, afai e moni o se meaalofa atoatoa, o le a tumau lona taua e le na o le taimi e alu ae e faavavau.
Pe le i ausia ea e lo tatou Faaola pele, le Faaola o le lalolagi nei mea manaomia e tolu? Pe le i faaalia ea e le meaalofa o le soifua mai, auaunaga, ma le taulaga togiola a Iesu Keriso se mea e uiga i le Tagata Foai o le meaalofa? Ioe. “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi.”2 Sa taulagaina e lo tatou Tama i le Lagi Lona Alo ona o le alofa mama mo i tatou o Lana fanau.
Pe o faaalia i le meaalofa o Iesu Keriso na silafia tonu e lo tatou Tama Faalelagi mea sa tatou manaomiaina? O se ioe manino foi! Ua tatou pa’u’u ona o le natura, ma e tatou te matua manaomia se Faaola ma se Togiola. E pei ona aoao mai Nifae, “e lē faia [e Iesu Keriso] se mea vagana ai ua mo le manuia o le lalolagi; ona ua alofa o ia i le lalolagi.”3
Ma le mea mulimuli e manaomia mo le meaalofa atoatoa? E tatau ona tumau lona taua e faavavau. Ua manino lava le aoaoina o i tatou e le Tusi a Mamona e faapea o le Togiola a Iesu Keriso e le i’u ma e faavavau.4
Manatua le lau’ie o le faleoloa o maataua? O se mea fua lava le iloaina e lena teineitiiti po o le a le meaalofa moni. I lenei lalolagi pogisa, tatou te vaavaai ai i talaatu o maataua i le Malamalama o le Lalolagi. Sa aoao mai le Faaola lava Ia:
“O lea, ia tuu i luga lo outou malamalama ina ia susulu atu i le lalolagi. Faauta o au o le malamalama lea e tatau ona outou tuu i luga.”5
“O au o le malamalama e susulu i le pouliuli.”6
Ou te molimau atu o Iesu Keriso o le meaalofa atoatoa—le meaalofa e le muta le foai atu. Tau ina ia tatou taofimau lena upumoni i o tatou loto i lenei Kerisimasi ma le faavavau. O loo soifua o Ia. I le suafa paia o Iesu Keriso, amene.