O Le Talalelei o le Filemu
I lenei vaitau o le Kerisimasi, ua faamanatuina ai e le lalolagi Kerisiano atoa le soifua mai o Iesu Keriso, le “Alii o le Filemu.” Ua tatou olioli uma i le faasilasilaga a agelu o lena soifua mai:
“Aua o le aso nei ua fanau ai i le aai o Tavita, lo outou Faaola, o le Alii ia o Keriso. …
“Ona faafuasei lea ona faatasi mai ma le agelu o au mai le lagi e toatele ua vivii i le Atua ua faapea ane,
“O le viiga i le Atua i mea aupitoaluga, ma le manuia i le lalolagi, o le finagalo alofa i tagata.”1
O se faataitaiga lelei o le ala e faamamalu ai e Kerisiano le Faaola, o upu a Charles Dickens na tusia mo lana lava ia fanau:
“La’u fanau pele, ua ou matua naunau lava ia tatau ona outou iloa se mea e uiga i le Talafaasolopito o Iesu Keriso. Aua e tatau i tagata uma ona iloa o Ia. E leai ma se tagata na soifua, sa matua lelei tele, agalelei tele, agamalu tele, ma faanoanoa tele mo tagata uma na faia mea sese.”
O le faatomuaga lena a Dicken. O lana tala faaiu lenei:
“Manatua!—O le FaaKerisiano o le faia o mea lelei i taimi uma—e oo lava ia i latou e faia mea leaga ia i tatou. O le FaaKerisiano o le alofa atu i o tatou tuaoi e pei o i tatou lava ia i tatou, ma ia faia i tagata uma e pei ona tatou mananao ai ia Faia ia i tatou. O le FaaKerisiano le agamalu, alofa mutimutivale, ma le lotofaamagalo, ma ia taofia ma le filemu na uiga auau mama i totonu o o tatou lava loto, ma ia le faafefeteina ai lava, po o a tatou tatalo po o lo tatou alolofa i le Atua, ae ia faaali atu e le aunoa tatou te alolofa ia te Ia e ala i le taumafai faamaulalo e fai le mea sa’o i mea uma. Afai tatou te faia lenei mea, ma manatua le soifuaga ma lesona a lo Tatou Alii o Iesu Keriso, ma taumafai e faatino na mea, atonu tatou te faamoemoe ma le mautinoa o le a faamagaloina i tatou e le Atua i a tatou agasala ma measese, ma mafai ai ona tatou ola ma feoti i le Filemu.”2
E pei ona tusia e Dickens, o le “soifuaga ma lesona a lo Tatou Alii o Iesu Keriso” e taitai atu ai i tatou i le filemu. Na faaigoa e le Aposetolo o Paulo ia aoaoga a lo tatou Faaola o le “talalelei o le filemu.”3
O le upu filemu e tele ona uiga eseese i tusitusiga paia. Ina ua fetalai Iesu, “Ia outou manuia,” sa Ia faamatalaina ma le manino le ituaiga o filemu lea na tautino atu e le Perofeta o Isaia, “O le mea e tupu i le amiotonu o le manuia lea; e tupu mai foi i le amiotonu le filemu ma le saogalemu e faavavau.”4 Sa faataunuuina e le Faaola lena valoaga. Sa Ia faamalamalama atu: “Ua ou fai atu nei mea ia te outou, ina ia outou maua le manuia ia te au.”5
I Ana faatonuga mulimuli, sa ta’u atu ai e le Alii o Iesu Keriso i Ana Aposetolo, “Ou te tuuina atu ia te outou le manuia, o lou manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.”6
E le’i pine ona mavae lena, i Lana asiasiga i e amiotonu i le lalolagi fou, sa ta’ua ai e le Faaola upu nei a Isaia: “Ma o le a aoaoina au fanau uma e le Alii; ma o le a tele lava le filemu o lau fanau.”7
O le mea sa aoao e lo tatou Faaola e uiga i le filemu i le olaga o se tagata nofotoatasi e faatatau foi i le filemu i totonu o se aiga, filemu i se malo, ma le filemu i le lalolagi.
Sa leai se polokalama a le Faaola ma Ana Aposetolo mo le filemu i le lalolagi nai lo le amiotonu o le tagata lava ia. Latou te le’i tetee atu i le pulega a Roma po o le pule saua a ona taitai i le lotoifale. Sa latou aoao atu le amiotonu faaletagata lava ia ma aoao atu e tatau i fanau a le Atua ona alolofa i o latou fili8 ma ia “nofo lelei ma tagata uma lava.”9
O taua ma fetaua’iga o le taunuuga lea o le amioleaga; o le filemu o le fua o le amiotonu. O faamanuiaga o le talalelei e mo tagata uma, ma e faapena foi le alāfua mo le filemu: tausi i poloaiga a le Atua.
Sa aoao mai e Peresitene Howard W. Hunter le mea lenei:
“O le filemu o loo momoo i ai le lalolagi o se taimi e le toe i ai se fevataua’i; peitai e le o iloa e tagata o le filemu o se tulaga faatoa oo mai i le tagata, i tulaga ma tuutuuga ua faatuina e le Atua, ae le o se isi lava ala. …
“… Afai tatou te vaavaai atu i le tagata ma ala o le lalolagi, o le a tatou fevesiai ma fenumiai. Afai tatou te liliu atu i le Atua, o le a tatou maua le filemu mo le agaga e leai se mapusaga. …
“O lea filemu e malutia ai i tatou mai vevesiga o le lalolagi.”10
I faaaliga o nei aso tatou te faitau ai: “Ae ia iloa o ia o lē e faia galuega o le amiotonu o le a maua lona taui, o le filemu lea i le lalolagi lenei ma le ola e faavavau i le lalolagi a sau.”11
O le filemu o le folafolaga lea a lo tatou Faaola, ma o le filemu o le tatou sini lea. O lenei filemu folafolaina o le lagona lea o le tulaga manuia ma le toafilemu e oo mai mai le tausiga o Ana poloaiga. Na saunoa mai Peresitene Spencer W. Kimball:
“O le filemu o le fua o le amiotonu. E le mafai ona faatauina i tupe, ma e le mafai ona faafesuia’ia i ni oloa po o ni auaunaga. E tatau ona galue ia maua.”12 Tatou te lagiina, “E suamalie le filemu e aumai e le talalelei (Sweet is the peace the gospel brings)13 ma i se isi viiga maoae tatou te vivii faatasi ai i lenei tatalo e usuina:
“Ia i ai i le filemu i le lalolagi
Ma ia amata ia te a’u.”14
E le mafai ona i ai le filemu i malo e aunoa ma le ausiaina o le amiotonu lautele i tagata o loo nonofo i na malo. I tausaga faigata o le Taua Lona Lua a le Lalolagi, sa aoao mai ai e Elder John A. Widtsoe le mea lenei:
“E na o le pau le auala e atiae ai se nuu filemu o le atiae lea o ni alii ma ni tamaitai e fiafia [i le filemu] ma faatupuina le filemu. O tagata taitoatasi, e ala i lena mataupu faavae a Keriso ma Lana Ekalesia, ua uuina i ona lava lima le filemu o le lalolagi.
“O lena mea ua nafa ai a’u ma le filemu o le lalolagi, ma faia ai outou taitoatasi ma e nafa ma le filemu o le lalolagi. O le tiutetauave e le mafai ona tuu atua i se isi tagata.”15
Pe tusa ma le tolusefulu tausaga mulimuli ane, sa aoao mai ai foi e se isi pulega aoao, Eldred G. Smith lea lava upumoni e tasi:
“Afai e i ai i tagata taitoatasi le filemu i totonu o lona loto, ona i ai foi lea o le filemu i totonu o le aiga. Afai e i ai le filemu i aiga taitasi, ona i ai foi lea o le filemu i le malo. Afai e i ai le filemu i malo, ona i ai foi lea o le filemu i le lalolagi.
“Aua ne’i tau na ona tatou vivii, “Ia i ai le filemu i le lalolagi ma ia amata ia te a’u,’ ae ia tatou faamaoni i ai. Ia fai ma a’u sini—ma au sini.”16
O se tasi o tala o le Kerisimasi ou te fiafia i ai sa lolomiina i le Deseret News i le silia ma le 30 tausaga talu ai. O loo faamatala ai se teineitiiti 11 tausaga le matua ma le mea sa ia aoaoina e ala i lona tiga i le le mauaina o se meaalofa na manao i ai atoa ma lona filemu i le aoaoina o le uiga o le mea tatou te faamanatuina e ala i meaalofa i le taimi o le Kerisimasi. Ou te faasoa atua faapitoa lava mo tamaiti ma le autalavou o loo tatou faatasi.
Sa faanoanoa lava se teineitiiti 11 tausaga le matua i le le mauaina o le pepe meataalo fou sa leva ona ia manao ai.
I le taumafai ai e faamafanafana atu, sa faapea atu ai lona tina, “Ua e matua mo mea faapena.” Pe ua matua moni ea o ia mo le Kerisimasi? sa tomanatu ai lana afafine. Sa faamalamalama atu e lona tama:
“Si o’u afafine pele. E tele na’ua le tiga, ma le olioi, i le tuputupu a’e. Leai, pele, e te le o matua tele mo le Kerisimasi. O loo tupu se mea e matua sili atu ona taua ia te oe. O loo e tuputupu a’e ma iloa o le tele o mea e i ai ni uiga loloto atu ma taua atu nai lo mea e mafai ona malamalama i ai se tamaitiiti. … Ua e faalogo o faapea mai tatou te foai atu ni meaalofa i le Kerisimasi ona sa aumai e leoleo mamoe ma le au makoi ni meaalofa i le Pepe o Keriso, ae se’i o’u ta’u atu ia te oe le uluai meaalofa moni o le Kerisimasi.”
Ona ia molimauina lea o le alofa sili o lo tatou Tama Faalelagi mo Lona Alo ulumatua, “o le sa faamaoni ia te Ia i le tele o faafitauli ma fouvalega ma o le sa fesoasoani ia te Ia e foafoa le lalolagi lea o loo tatou ola ai.” Sa ia ta’u atu ia te ia le auala na foai mai ai e lo tatou Tama Faalelagi lena Alo, le Alii o Iesu Keriso, e avea ma o tatou Faaola.
Na ia faitau mai le Tusi a Mamona i le auala “o le a afio mai ai [lenei Alo] i lalo mai le lagi i totonu o le fanauga a tagata, ma o le a mau o ia i se fale apitaga omea.” Ma faauta, o le a mafatia o ia i faaosoosoga, ma tiga o le tino, ma le fia ʼai ma le fia inu, ma le lailoa, e sili atu i lo le mea e mafai e le tagata ona onosaia, vagana ai ua oti; aua faauta, e sau le toto mai ona pu afu uma, ona o le a tele naua o lona mafatia mo le amioleaga ma mea inosia a ona tagata. Ma o le a taʼua o ia o Iesu Keriso, o le Alo o le Atua, o le Tamā o le lagi ma le lalolagi” (Mosaea 3:5, 7–8).
Sa tapuni le tusi, ma sa ia faamalamalama atu:
“E ui lava na silafia e lo tatou Tama i le Lagi nei mea sa faapolopolo mo Lona Alo pele, ae i Lona alofa ma le poto e le gata, sa Ia foai mai ai o Ia i le lalolagi. Ma o le vaega lona lua o lenei meaalofa ofoofogia o lena Keriso, le Alo, ma i le silafiaina foi o nei mea uma, sa Ia foai mai ai o Ia lava ma le loto i ai ina ia tatou maua le ola e faavavau.
I ni tausaga mulimuli ane, sa tusia ai e lenei tamaitai o le sa tuputupu a’e mai i lenei teineitiiti upu nei:
“O le po o le Kerisimasi muamua lea ou te manatua sa ou le’i moe ai faatasi ma la’u pepe meataalo o le Kerisimasi i lo’u aluga. Sa ia te a’u se mea sili atu. I totonu o lo’u loto sa i ai se filemu fou ma faagaeetiaina. Sa ou mauaina se meaalofa sa le mafai ona leaga pe leiloa, o se meaalofa o le a ou le matua lava e umia, ae o le meaalofa lea e faatasi ma le fesoasoaniga a le Atua, e tatau ona ou tuputupu a’e ma avea ai. … Ma sa ou tatalo … o le a i ai se aso o le a fai ai sa’u fanau moni, ma ou iloa ai loa le vaega atoa o le Meaalofa o le Alofa.”17
Ou te faaiu atu i le aoaoga a Peresitene Russell M. Nelson i le Faigalotu a le Au Peresitene Sili o le Kerisimasi o le tausaga ua te’a: “O Iesu Keriso le meaalofa a le Atua na alu ifo mai le lagi—le meaalofa a le Tama i Ana fanau uma.”18
“Aua ua faapea lava ona alofa mai o le Atua i le lalolagi, ua ia aumai mai ai lona Atalii e toatasi, ina ia le fano se tasi e faatuatua ia te ia, ae ia maua le ola e faavavau.”19
Ou te tatalo ia avea lena upumoni e faavavau ma se vaega o mea uma tatou te faia i lenei vaitau o le Kerisimasi, i le suafa o Iesu Keriso, amene.