Aumai le Kerisimasi i le Taulaiga
Ou te fiafia i lenei taimi o le tausaga pe a tatou potopoto ai o ni aiga ma ē pele e manatua ai le soifua mai o lo tatou Faaola o Iesu Keriso ma avatu le faafetai mo Lona soifua ma Lana taulaga togiola le i’u. Ou te fiafia i faamanatu le mafaitaulia o lenei vaitau faapitoa i soo se mea ma o loo mafai pea ona lagonaina le faagaeetia ma le tulimataiga o Kerisimasi mai le taimi o o’u tamaitiiti, pe sa i ai i se Egelani malulu po o se Arapi vevela.
Masalo e pei o le toatele o isi, o le vaiaso na te’a sa ou tauivi ai ma moli o le Kerisimasi, sa faigata ai ona iloa le matāuila e tasi sa mafua ai ona pē le laina moli atoa. Ina ua maua mulimuli ane le matāuila ma sui, sa toe ola uma moli, ma sa i ai lena toomaga ma le fiafia lea e sau mai sina manumalo.
O se tasi o mea ou te fiafia e fai a o tulata mai le Kerisimasi o le nofonofo i talaane o le matou laau Kerisimasi, a o tape uma isi moli, ma faanenefu la’u vaai a o ou matamata atu i le laau o lilofia i moli ninii papae. A o see ese le taulaiga o o’u mata, e susulu o moli taitasi e lautetele ma muitiiti a o suluia ai mea teuteu iila mumu. E mata’ina le aafiaga. E tele ina tātā ā matou musika mai tua, o loo folafola mai ai, “Le lalolagi, ia fiafia!”1 ma e “ta’ua Lona igoa o le Silisili ese, o le Faipule, o le Atua malosi, o le Tama o le faavavau, o le Alii o le Filemu.”2
A o fesuisuiai ai le malamalama i o’u mata mai le femeimeiai o le taulaiga i le laau, sa toe faamanatu mai ia te a’u le misiona paia a lo tatou Faaola, lea e matua manino le taulaiga i taimi ia e filemu ai. Na Ia fetalai, “O A’u nei o le malamalama o le lalolagi; o le mulimuli mai ia te au, e le savali o ia i le pouliuli, a e ia te ia le malamalama o le ola.”3 Ou te mafaufau loloto i le po paia na soifua mai ai o Ia, na faatumulia i le lotofaafetai mo le meaalofa a le Tama o le olioli, faamoemoe, ma le alofa na auina mai i le lalolagi i Lona Alo e Toatasi na Fanaua.4
O nei ituaiga o taimi filemu o le manatunatu loloto ma mafaufauga e ono seasea maua e i tatou i le Aso Kerisimasi. E aumaia e Tesema ia pātī ma konaseti, faatasiga ma meaalofa. E matua pisi lava, ma o nisi taimi o faamoemoega tatou te faamamafa i o tatou lava luga latou te aveesea moni lava le olioli o le vaitau nai lo le faalauteleina.
E taua tele la le aoaoga a Peresitene Nelson: “O le olioli tatou te lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga. Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai ia te Ia ma ona o Ia. O Ia o le puna o le olioli uma.5
O le taimi atoatoa lenei mo i tatou e iloilo ai ma le agaga tatalo lo tatou taulaiga. O a ni ou faamoemoega mo lenei vaitau o le Kerismasi? O a ni ou manaoga faamaoni mo oe lava ia ma ē pele ia te oe pe a outou potopoto faatasi mo lenei aso sili ona paia o aso paia?
I le lua ma le afa vaiaso, o le a oo mai ai le Aso Kerisimasi. Iloilo mea ua i ai i lau kalena mo le isi lua ma le afa vaiaso o sosoo ai. Atonu e te lagonaina le lofituina i le tele naua o tautinoga ma mea uma e te le i faia lava. Pe ua tumu tele lau kalena? Pe o tu ma aganuu patino ma faatosinaga ua mafua ai ona e atuatuvale tele ma taofia ai oe mai le mauaina ma le mafaufau i le oliolio i le soifua mai o Keriso? E mafai faapefea ona e faafaigofieina lau kalena i lenei Kerisimasi ma fuafua lelei ai mo le isi?
E tatau ona tatou faaeteete ia le soona pisi tele ma lelavava ai mai le taumafai e faia le tele naua o mea ma misi ai le taulaiga o le vaitau ma lē mafai ai ona tootutuli faalemafaufau i le faatanoa vao, tapuai atu i le Tupu faatoa soifua mai, ma aumaia a tatou lava meaalofa patino ia te Ia.
Tina talavou, ma i tatou uma, o lofituina outou? O fea o i ai lou taulaiga? Masalo o lenei tausaga e te le auina atua ni kata o le Kerisimasi, pe e te tuu ese atu nisi o faamoemoega e uunaia e ala o faasalaauga o ia te oe lava ia. O le tau e le o i ai i le taimi po o le tupe o le a aveesea nisi o ou tomai e taulai atu ai i le Faaola ma lagona ai Lona olioli o le Kerisimasi.
Tama talavou, ma le toatele o i tatou, fea o i ai lou taulaiga? Masalo o lenei tausaga ua faafaigofieina lau Kerisimasi i le tele o meaalofa e fai i le fale ma meaalofa o auaunaga ona o faatosinaga ma le tau o le taumafai e faatau mea uma e taugata tele—ma lē manaomiaina—ma o le a aveesea ai nisi o ou tomai e taulai atu ai i le Faaola ma lagona ai Lona filemu o le Kerisimasi.
O auaunaga i le malumalu i le taimi o le Kerisimasi e mafai ona anoa faapitoa. E faasa’o e le malumalu le tatou taulaiga, faalautele lo tatou olioli ma tuufaatasia aiga iinei ma i le isi itu o le veli. Mafaufau i auaunaga i le malumalu nai lo se isi gaoioiga o le Kerisimasi e mafai ona fesoasoani ia te oe i lou faananau mo le filemu o le Kerisimasi. O na sauniga paia—le filemu ma le mana o le perisitua latou te umia mo ē uma e faapelepele i ai—sa na o le pau le auala na mafai ai ona o le Alo e Toatasi na Fanaua o le Tama, lenei “Tamai mamoe na fasia talu ona faavaeina o le lalolagi,”6 o lē ana le aso soifua lea tatou te faamanatuina nei.
A o tulata mai lenei Kerisimasi, se’i o tatou faia ni mea se tele atu e taua ma faaitiiti mea e lē taua. Ia tatou saili atu e fai galuega a Iesu o Nasareta—sii i luga ē faanoanoa, faamalolo ē lotonutimomoia, asiasi i pagota, fafaga ē fia aai, faalavalava ē lē lavalavā, ma faaleo atu lagona o ē faatauvaa, o ē ua vaai maualalo i ai tagata, o ē ua faagaloina, ma ē ua inosiaina.7
Mo outou o loo i ai ni faafitauli i lenei Kerisimasi, tau ina ia outou maua le meaalofa o le alofa o le Faaola lea e faapitoa mo oe. I lenei taimi, e toatele o loo i ai i se tulaga taufao o le ola ma le oti i ē pele ona o faamai, o le matua, po o se faalavelave matautia foi. E toatele e manatuaina le maliliu o aiga i le taimi o le Kerisimasi, ma o se Kerisimasi tiga lenei mo outou e manatua ai i latou. O nisi o loo faanoanoa i filifiliga o loo faia e ē pele ia i latou i lenei taimi. O isi ua tuuatoatasi, e aunoa ma se aiga, ua oo i ni faigata matuia, po o soo se mafuaaga lava o loo feagai ai ma se Kerisimasi ua ese mai Kerisimasi na latou faamanatuina i le tuanai.
Ia talitonu o loo i ai se meaalofa patino i lenei vaitau mo oe. Saili mo ni taimi filemu ma toafimalie e mafai ona e mafaufau loloto ai, tatalo, ma lagonaina le alofa agalelei o Lē e ana le aso soifua ua mafai ai soo se olioli i soo se olaga. O le folafolaga e faapea o le a i ai se aso, “e leai foi se toe oti, po o se faanoanoa, po o se aue, e leai foi se toe puapuaga.”8 “Latou te le toe fia aai, e le toe fia inu. … Aua o le Tamai Mamoe o loo i luma o le nofoalii na te fafaga ia i tatou ma taitai ia te i tatou i puna o vai ola; e soloieseina foi e le Atua o loimata uma nai o latou mata.”9
Faaalu se taimi e te filemu ai, ia manava, ma maofa. Tepa i luga. Taulai atu i Lana meaalofa sili—o le iloaina po o ai moni lava oe, ma le malamalamaaga o tofotofoga iinei e puupuu lava, ma o le olioli iinei ua na o le amataga o le olioli o le a oo mai. Manatua, “o le olioli o tatou lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga.”
“Ma o lenei, ou te apoapoai atu ia te outou ia outou saili lenei Iesu o le ua tusi i ai le au perofeta ma aposetolo, ina ia i ai ma tumau ia te outou e faavavau le alofa tunoa o le Atua le Tamā, ma le Alii o Iesu Keriso, ma le Agaga Paia, o le ua molimau ia te i laua.”10 Ina ia tatou faapea atu, “Le Alii e, ua fanau mai [i lenei taeao fiafia. … O mai, tatou vivii ia te Ia.”11
I le suafa o Iesu Keriso, amene.