Ko Ha Kau ʻĀngelo Fakaonopooni
Mālō e lelei ki he efiafí ni, siʻoku kāinga ʻofeina. ʻOku ou ongoʻi tāpuekina ʻi he faingamālie ke u lea atu ai kiate kimoutolu ʻi he efiafi ní ʻi heʻetau fakamanatua ʻa e meʻa nāunauʻia taha kuo hoko ʻi he hisitōlia ʻo e tangatá—ʻa e hāʻele mai ʻa e ʻAlo ʻo e ʻOtuá ki māmaní. Ko e ʻaloʻi, moʻui, mo e Fakalelei ʻa Kalaisí ko e meʻaʻofa ia ʻetau Tamai Hēvaní maʻatautolu hono kotoa.
ʻI heʻetau fakamanatua hono ʻaloʻi ʻo e Fakamoʻuí ʻi he taimi fakafiefia ko ʻeni ʻo e taʻú, ʻoku fakafonu ʻe he ʻofa taʻetūkua mo taʻefakangangata ʻa e ʻOtuá ʻa hotau laumālié, ʻokú ne tokoniʻi ke tau fakatafoki hotau lotó ki hotau fāmilí, kaungāmeʻá, mo e kaungāʻapí, pea tokoniʻi ke tau ongoʻingofua ange ʻa kinautolu ʻoku nau ongoʻi liʻekina, tuenoa, pe fie maʻu ha fakafiemālie mo ha nongá.
Kuó u faʻa mālieʻia maʻu pē ʻi hono fakamatalaʻi ʻo e ngaahi meʻa ne hoko ʻi hono ʻaloʻi ʻo Sīsuú, ʻoku vahevahe ʻe he Kosipeli ʻa Luké ha ngaahi sīpinga ʻo e fakafiemālie mo e nonga ne foaki maʻanautolu ne nau ʻi he ngaahi tūkunga ko ʻení. ʻOku lava ke tau mātā ha ngaahi sīpinga pehení ʻi he taimi ne ʻomi ai ʻe heʻetau Tamai Hēvani ʻofá ʻa ʻEne kau ʻāngeló ke nau ʻaʻahi ki he kau tauhisipi ne nau nofo toko taha lolotonga e poʻulí ke talaki hono ʻaloʻi ʻo Hono ʻAló, pea ʻi he taimi ne ʻaʻahi ai ʻa e kau tauhisipí kia Mele mo Siosefá, ʻa ia naʻá na tokangaʻi ha kiʻi pēpē valevale ʻo mamaʻo mei hona ʻapi ʻi Kālelí.
Ne hokonoa pē ʻa e fononga lōloa ʻa Siosefa mo Mele mei Nāsaleti ki Pētelihema ke lesisita ki he tukuhaú, he naʻe kikiteʻi ʻe he kau palōfita he kuonga muʻá ʻi ha laui senituli ʻe ʻaloʻi ʻa e Fakamoʻui ʻo e māmaní ʻi Pētelihema, ko e Kolo ʻo Tēvitá.1 ʻOku tau vakai ne ʻafioʻi lelei ʻe heʻetau Tamai Hēvaní pea naʻá Ne kau ʻi he ngaahi fakaikiiki kotoa pē ne fekauʻaki mo hono ʻaloʻi ʻa Hono ʻAlo Pē Taha Naʻe Fakatupú. “Pea naʻe lolotonga ʻena ʻi aí, pea pehē, kuo kakato hono ngaahi ʻaho ke fāʻele ai iá.”2
ʻI heʻeku fakakaukau ki he ongomātuʻa kei talavou ko Mele mo Siosefá, ʻoku ou fifili pe naʻe founga fēfē ʻa e hoko ʻa e hā mai ʻa e kau ʻāngeló ki he kau tauhisipi ʻi he ngoué pea mo e aʻu atu ʻa e kau tauhisipí kia Mele mo Siosefá ke na maʻu ai ha fiemālie, nonga, mo e fiefia ʻi heʻena moʻuí.
Mahalo ne ʻomi ʻe he kau ʻāngeló ki he kau tauhisipí ʻa e fakafiemālie ne nau fuʻu fie maʻú, ne ʻafioʻi kinautolu ʻe he ʻOtuá pea naʻá Ne ʻafioʻi honau mahuʻingá ʻi heʻenau hoko ko e kau fuofua fakamoʻoni ki he Lami ʻa e ʻOtuá ne toki ʻaloʻí. Mahalo ne ʻomi ʻe he kau tauhisipí kia Mele mo Siosefá ʻa e fakafiemālie ne na fuʻu fie maʻú, ne ʻiloʻ ʻe he niʻihi kehé ʻa e mana fakalangi ne na kau ki aí.2
Ko e moʻoni, ʻoku ʻi hotau haʻohaʻongá ha kau tauhisipi fakaonopooni—ko e kakai tangata mo e kakai fefine ʻoku nau ngāue ʻi he valenga poó pea mo e hengihengí ke maʻu ha moʻui. ʻOku lava ke kau ʻi he kau tauhisipi fakaonopooni ko ʻení ʻa e kau tangata leʻó, kau ngāue ʻi he falemahakí mo e tafaʻaki fakavavevavé, kau ngāue ʻi he falekoloá mo e pausa ʻoku ava pō-kakató, pea mo e ngaahi timi faiongoongó. Ko e taimi ʻe niʻihi ʻe lava ke ongoʻi ʻe kinautolu ʻoku nau ngāue poʻulí ʻoku fakamāvahevaheʻi kinautolu mei heʻenau feohi fakasōsiale mo kinautolu ʻoku ngāue ʻi he ngaahi houa ngāue angamahení. ʻIkai ko ia pē, ʻoku ʻi ai foki ha kau Siosefa mo e kau Mele ʻo onopooni kuo nau hiki mei honau fonua tupuʻangá pea ʻoku nau feinga ke feangai mo ha moʻui foʻou ʻi heʻenau fakamanatua e ngaahi ʻaho mahuʻinga hangē ko e Kilisimasí, ʻaho fāʻeleʻí, ʻaho malí, mo e maté.
ʻI heʻetau fakaofi atu ki he Kilisimasí, ʻoku ou fifili pe ʻe lava nai ke tau hangē ko e kau ʻāngeló ʻo ʻaʻahi ki he kau tauhisipi fakaonopōní ke ʻoange ʻa e ongoongolelei ʻo Kalaisí, ʻa e nonga mo e fiemālie. Pea ʻoku ou fifili pe ʻe lava nai ke tau hangē ko e kau tauhisipí ʻo tali ʻa e ui ke ʻaʻahi mo ngāue fakaetauhi ki he kau Siosefa mo e kau Mele ʻi hotau ngaahi kaungāʻapí mo e tukui koló ke ʻoange ʻa e fakapapau ʻoku ʻofa ʻa e ʻOtuá ʻiate kinautolu pea ʻokú Ne ʻafioʻi mo tokangaekina kinautolu.
Kuó u aʻusia fakataha mo hoku fāmilí ʻi ha ngaahi polokalama kehekehe ʻa e ongoʻi nonga, melino ʻoku lava ke ʻomi ʻe he ʻāngelo ki he kau tauhisipí. ʻOku ou fie lea ʻi he pooni ʻo kau ki he taha ʻo e ngaahi meʻa ko iá. ʻI he 2003, ne mau hiki atu mei homau ʻapí ki homau feituʻu tupuʻangá ko ʻIutā. ʻI he faʻahitaʻu momoko ko iá, ne tō ai ʻa e afā sinou lahi taha kuo aʻusia ʻe ʻIutā ʻi ha ngaahi taʻu lahi. Kuo teʻeki ke mau mātā ha meʻa pehē, he naʻa mau tupu hake ʻi he ʻātakai ʻo e ʻulu pāmé mo e matātahi ʻoneʻoneá. Ne tuʻu homau ʻapí ʻi ha tuliki ʻo ha tafungofunga ʻi Bountiful naʻe ʻi ai ha saitiuoka lōloa. ʻI he taimi naʻe kamata ai ke sinoú, ne loto-toʻa hoku uaifí ke ne ngāue ʻaki ha meʻa-puhi-sinou ke puhi ʻaki ʻa e sinou ʻi he ʻaluʻanga meʻalelé mo e saitiuoká, he ne u hekea ʻi he ʻaisí pea fasi ai hoku fasiʻanimá ʻi ha ngaahi ʻaho kimuʻa lolotonga ʻeku lue ʻi ha ʻaluʻanga meʻalele ke ʻaʻahi ki ha taha homau kaungāʻapí. Ne iku ʻa e fakatuʻutāmaki ko iá ke tafa pea simaʻi hoku nimá ʻi ha ngaahi māhina. ʻI he kamata ʻe hoku uaifí ke ne puhi ʻa e sinoú, ne ʻikai ke ne siʻi ʻiloʻi kuo pau ke ne fulihi ʻa e meʻa ʻoku puhi mai ai ʻa e sinoú ki tuʻá ke hanga ki he tafaʻaki ʻe tahá hili hono fakamaʻa e tafaʻaki ʻe taha ʻo e ʻaluʻanga meʻalelé. Ko e taimi leva naʻá ne ʻalu ai ke fakamaʻa ʻa e tafaʻaki ʻe tahá, ko e feituʻu ia ne fakahanga ki ai hono puhi e sinoú. Naʻá ne fefokifokiʻaki ai ka naʻe ʻikai pē ke ola lelei. Ko ha ngāue fakahela! Koeʻuhí ko e fuʻu fuoloa ʻene nofo ʻi he momokó, ne uesia ai hono ongo telingá pea naʻe meimei malu kotoa ʻene fanongó ʻi ha māhina ʻe ua. ʻI he taimi tatau ne lavea e tuʻa hoku foha taʻu hongofulu-mā-onó lolotonga haʻane fakapaheke pea naʻe pau ai ke ne tokoto maʻu kae lava ke sai hono laveá. Pea ko ʻemau ʻātungá ia, ko e taha naʻe toka mohenga, taha naʻe malu ʻene fanongó, taha naʻe simaʻi hono nimá, pea ne mau mokosia kotoa. Pau pē ne mau ʻasi fakaoli ki homau kaungāʻapí. ʻI ha hengihengi momoko ʻe taha ʻi he 5:00 hengihengi nai, ne u ʻā hake ki he ongo ʻo ha meʻa-puhi-sinou ʻi hoku tuʻafalé. Ne u fakasiosio ki tuʻa he matapā sioʻatá pea ne u sio ki hoku kaungāʻapi ko Misa Blain Williams mei he kauhala ʻe tahá. Naʻá ne taʻu fitungofulu tupu, naʻá ne liʻaki hono ʻapi māfana mo fiemālié ka ne haʻu fakalongolongo ke fakamaʻa homau tauʻanga meʻalelé mo e saitiuoká, ʻi heʻene ʻiloʻi ne ʻikai ke mau lava ʻo fai iá. Pea ʻi he founga tatau pē naʻá ne haʻu fakalongolongo ʻakí, ne toe haʻu pehē pē foki mo ha tangata ʻe taha ko Misa Daniel Almeida ki homau ʻapí ke ʻave au ki Sōleki ki he ngaué, he naʻe ʻikai ke u lava ʻo fakaʻuli ʻaki hoku nima ne simaʻi mamafá. Naʻá na tokoni angaʻofa mo fakalongolongo kiate au ʻi he pongipongi kotoa ʻo aʻu ki he sai hoku fāmilí pea lava ke mau toe ngāue ʻiate kimautolu pē. Lolotonga e faʻahitaʻu Kilisimasi momoko ko ia ʻo e 2003, ne ʻomi e ongo ʻāngelo ko ʻení kiate kimautolu, ʻo hanē ko hono fekau;i atu e kau ʻāngelo tauhí ki he kau tauhisipi ʻi he kuonga muʻá. Naʻe muimui ʻa e ongo tautehina ko ʻení ko ʻení ki he tā sīpinga hotau Fakamoʻuí pea naʻá na tomuʻa fakakaukau ki heʻemau ngaahi fiemaʻú ʻi haʻanauá.
ʻE kāinga ʻOfeina,ʻOku hāsino ʻi he moʻui ʻa e Fakamoʻuí e ʻofa mo e failelei ki he kakaí. ʻOkú ne faʻa fakangaloki maʻu pē Ia koeʻuhi ko e niʻihi kehé. Naʻe hā ʻene ngāue taʻesiokitá ʻi he meʻa kotoa ʻokú ne fakahoko ʻi Heʻene moʻuí pea naʻe ʻikai fakangatangata ia ki ha faʻahi taʻu pe ʻaho mālōlō. Siʻi kāinga, ʻi heʻetau fakatafoki hotau lotó ʻo hangē ko ia ne fai ʻe he Fakamoʻuí, ʻoku ou palōmesi te tau toe aʻusia lelei ange ʻa e ʻuhinga ʻo e Kilisimasí. ʻOku ou palōmesi atu te tau maʻu ha ngaahi faingamālie taʻe-fakangatangata ke tau foaki fakalongolongo mo angaʻofa ai ki he kakai ʻoku nau fie maʻu ʻetau tokoní. ʻE tokoni ʻeni ke tau ʻiloʻi lelei ange ai ʻa e Fakamoʻuí pea te tau maʻu ai ʻa e melino ʻi māmaní mo e ʻofa ki he kakaí, ʻa ia te ne fakapapauʻi lahi mai ʻa e ʻofa, nonga, mo e ivi foʻou te tau lava ʻo ongoʻi pea vahevahe ki he niʻihi kehé. ʻI heʻetau muimui ki he tā sīpinga ʻa e Fakamoʻuí, fakatauange te tau fakafanongo ki he ongo ʻo Hono toʻukupu kelekekelé pea ala atu ki he toʻukupu ʻo e Tangata Tufungá. ʻI heʻetau fekumi ki he Fakamoʻuí ʻi he meʻa ʻoku tau faí, ʻe ʻikai ngata pē ʻi he hoko ʻa e Kilisimasí ko ha foʻi ʻaho pe faʻahitaʻú, ka ʻe hoko ia ko ha tūkunga ʻo e lotó mo e fakakaukaú, pea te ke maʻu maʻu pē ʻa e fiefia mo e ʻofa ʻoku ongoʻi ʻi he Kilisimasí. ʻOku ou ʻiloʻi ko Hono ʻAlo ʻOfaʻangá, ʻa Sīsū Kalaisi, ʻa e tamasiʻi ne ʻaloʻi ʻi Pētelihemá, ʻoku moʻoni ko e Fakamoʻui ia mo e Huhuʻi o e māmaní.
Talamonū atu ke mou maʻu ha Kilisimasi Fiefia. ʻOku ou fai ʻeni ʻi he huafa ʻo e Sīsū Kalaisí, ʻēmeni.