Te mau moemoeā o te ’āru’i
Purera’a Noela a te Peresidenira’a Mātāmua nō 2020
Sābati 6 nō Tītema 2020
E vāhi hau mai tā te nātura e nehenehe e hōro’a mai, e topara’a pō i te ’ōmuara’a o te pu’e tau fa’atupura’a rā’au. E ra’i āteatea, ’e te mau feti’a e pura mai ra, te tahi tau ’ahuru, i muri iho, te tahi tau hānere,’e i te hope’a, te tahi tau tauatini. ’Ua ’itehia i te mau tīa’i māmoe i roto i te mau fa’a’apu te tāmarūra’a i te ve’ave’a o te mahana ’e i te rohirohi o te ’ohipa maita’i. Te ’ohipa ta’a ’ē noa, e ’ohipa nehenehe rahi rā, i roto i teie hōho’a nō te vāhi orara’a animala ra, i roto i terā fare vaira’a ’ānimara, i te pae ’āivi, fātata i te ’oire iti, tē vai ra e piti ta’ata i pīha’i iho i te hō’ē ’aiū iti tē tārava ra i roto i te phātene, ’e ’o te tahi mau ’ānimara no tē ’ite ra i te reira ’ohipa māere.
I roto i teie nā ta’ata to’otoru, ’aita ho’i hō’ē a’e hoa ’e ta’ata i roto i te mau ta’ata e rave rahi i Betelehema tē nehenehe e fāri’i ia rātou, nā mua roa, ’o te hō’ē ïa metua vahine pāretenia nehenehe ’e te ’āpī, ’o Maria (penei a’e tei te ’ōmuara’a ’oia ’aore rā, i rōpū i te taure’are’ara’a, mai te mea e ha’apa’o tātou i te mau peu i tāua tau ra), e mea itoito ’e te fa’aro’o rahi fa’ahiahia, mai te mau mea ato’a i pāpa’ihia i roto i te mau pāpa’ira’a mo’a. Te piti, ’o tāna ïa tāne fa’aipoipo ’o Iosepha, e mea pa’ari a’e i tāna vahine ’āpī roa, ’e ’ia au i tei fa’ata’ahia mai, ’o te ta’ata ti’amā roa a’e ïa i ni’a i te fenua nei nō te fa’a’amu i te hō’ē ’aiū e ’ere te tamaiti fānau nāna, ’o tē riro mai rā ’āraua’e, ’ei metua vārua nō Iosepha. Te toru ’e te hope’a ’e te nehenehe roa a’e ho’i : ’o te ’aiū ïa tē pi’ihia ’o Iesu, tē tārava ra, vehihia i te ’ahu, i ni’a i te ’aihere mā roa a’e tā te hō’ē metua tāne pe’ape’a e nehenehe e ’ohi mai.
Te ’ohipa ’ē i roto i teie taime hau ’e te fa’atīani-’ore-hia te parau, ’o te mea ïa ē ’aore roa atu e ’aiū tei fānauhia, ’ua ’ite-a’ena-hia te mau mea e rave rahi nō ni’a iāna ’e ’ua pāpa’ihia nō ni’a iāna, ’e ’ua tīa’i-a’ena-hia te mau mea e rave rahi mea mai roto mai iāna. ’Oia mau ho’i, te ’itera’a ’o vai ’oia, ’e e aha ’oia, ’ua ha’amata ïa te reira i roto i te mau ao o te ra’i hou ’a fānauhia mai ai te hō’ē ta’ata ! ’Ei Fānau tahi nō te Metua1 i roto i te ao vārua, ’ua fa’ata’ahia ’oia ’ia riro ’ei Fa’aora nō tō te ao nei,2 ’ua fa’anaho-a’ena-hia ’ia riro i « te ’ārenio i taparahihia ra mai te mātāmua mai ā o teie nei ao ».3 I muri a’e, hou ato’a rā tōna fānaura’a, e riro ’oia i te Iehova rahi o te Faufa’a Tahito, i te tauturura’a ia Noa ’ia fa’aora i tōna ’utuāfare i te tau o te diluvi,4 ’e i te hi’ora’a ia Iosepha ’ia fa’aora i tōna ’utuāfare i te anotau o’e.5 ’O ’oia ’o Iehova hanahana tei ma’irihia tōna i’oa « ’Ia hau ’ē, e a’o, te Atua pūai, te Metua mure ’ore, te Ari’i nō te hau ».6 ’O ’oia te Alepha ’e te Omega7 i roto i te fa’anahora’a rahi o te aroha, ’e i te pae hope’a, « ’ei fa’a’ite i te parau ’oa’oa i te ’ā’au marū ra ; ’ei fa’aora ho’i i te feiā ’ā’au ’oto, ’ei fa’a’ite i te ora i te tītī : ’e ’ia [matara] roa te feiā tāpe’ahia ra ».8
Nō te rave i te reira, e ta’ata’ahi ’oia i te nene’ira’a vine o te fa’aorara’a, ’oia ana’e ē hope noa atu, ’aita hō’ē hoa tāhuti nō te tauturu iāna, ’e ’aita hō’ē hoa nō te ra’i e ti’a ’ia tauturu. Nō tōna amora’a i te mau hara ato’a ’e te ’oto o te tāhuti nei, e hōpoi mai ’oia i te hōro’a māramarama-’ore-hia nō te fa’aorara’a i te ’utuāfare ta’ata tā’āto’a, mai ia Adamu ē tae noa atu te hope’a o te ao nei. I te hope’a o tōna tere, e riro mai ’oia ’ei « Tīa’i ’e te ’Episekōpo o tō [tātou] vārua »,9 te « Tahu’a rahi i tā tātou nei parau »,10 te vai piha’a mani’i noa « i te piha’ara’a o te mau parauti’a ato’a ».11 ’Aita ā ïa teie nau hōpoi’a ’e nau tītaura’a i te tāhuti nei i ravehia. ’Eiaha i teie pō. ’Eiaha i teie ’āru’i. I teie pō, e ’aiū noa ïa ’oia i roto i te rima o te metua vahine tei here iāna, ma te tīa’ihia e te hō’ē metua tāne marū ’e te pūai.
Ē muri iho, tae mai nei te mau tīa’i māmoe, ’ei fa’ahōho’ara’a nō te mau ’ohipa ha’eha’a roa a’e i ni’a i te fenua nei, te mau ta’ata veve roa a’e ’e tā rātou ’ohipa. I muri iho, ’ua haere mai te mau ari’i, nā Ta’ata pa’ari nō te pae hiti’a o te rā mai, ’ei fa’ahōho’ara’a nō te mau ti’ara’a teitei roa a’e i te tino nei, te ta’ata tao’a rahi roa a’e ’e tā rātou ’ohipa. Hau roa atu ā—’oia mau, hau roa atu ā—’ua haere mai te mau melahi ma te hīmene « ’la ha’amaita’ihia te Atua i ni’a i te ra’i teitei »,12 hō’ē nu’u rahi nō te ra’i i te ’āruera’a i teie ’aiū iti tei tae mai i te fenua nei. ’Oia ïa, e rave rahi tenetere tō te mau melahi tāpa’ora’a i te ’ē’a e tae atu ai i teie phātene. Nā mua atu, ’ua haere mai te hō’ē melahi e fārerei ia Maria nō te fa’a’ite i te fa’aarara’a nehenehe iāna nō te ’ohipa i mā’itihia iāna ’ia rave, ’e ’o vai ’oia i mā’itihia ’ia riro mai.13 ’Ua haere mai te hō’ē melahi e fārerei ia Iosepha nō te hōro’a iāna i te itoito ’ia fa’aipoipo i teie vahine ’āpī tei hapū a’ena ma te ’ite-’ore-hia, e fa’auera’a ho’i tāna i ha’apa’o i reira ra ma te ti’a i ni’a nō te ha’apa’o i te reira.14 I muri a’e i te fānaura’a, ’ua parau mai ra te hō’ē melahi i teie nā ta’ata fa’aipoipo ’āpī ’ia horo ’ē—horo ’ē i te hāmani-’ino-ra’a a Heroda i te feiā hara ’ore (taua mau tamari’iri’i ra tei riro ’ei mātāmua nō te mau maratiri keretetiano o te faufa’a ’āpī), ’e nā taua melahi ra i parau i teie nā ta’ata fa’aipoipo ahea rāua e nehenehe ai e fa’aru’e ia Aiphiti, nō te haere e pārahi i te hō’ē vāhi ātea, i Nazareta, ’eiaha roa i Betelehema, ’aita ato’a i Ierusalema.15 E mea pāpū maita’i ē, ’ua ’ite te mau melahi o te ra’i ra, hau roa atu i te ta’ata tāhuti i ni’a i te fenua nei, i te aura’a o taua fānaura’a ra ’e te misiōni o teie tama, ’oia ho’i, « nō te rave i tō tātou mau paruparu ’e nō te amo i tō tātou mau ’oto… [nō te] paruparu nō tā tātou mau hara, [’e ’ia] tā’irihia ’oia nō tō tātou ’ino, [nō te ha’apāpū ē] te fa’ahapara’a nō tō tātou hau, tei ni’a ïa iāna, ’e nō tōna paruparu e ora ai tātou ».16
Nō’u iho nei, e aura’a tō te tupura’a teie mau mea ato’a i te ’āru’i—e taime ho’i e marū ai te tino ’e e māha ai te rohirohi, ’e i reira ho’i te mau pure e pūpūhia ai, te mau heheura’a e tīa’ihia ’e te mau tino nō te ra’i mai e nehenehe e fātata mai ai. ’E hō’ē taime i roto i te matahiti, ’o te pō te taime e tāpiri ri’i noa te mau tamari’i i tō rātou mata nō te ’oa’oa rahi e piha’aha’a ra i roto ia rātou ē, e po’ipo’i Noela ’ia po’ipo’i a’e. ’Oia mau, noa atu te fifi i tō tātou nei mahana, e ti’a i tō tātou mau moemoeā i te ’āru’i e fa’atītī’aifaro i te mau mea ato’a. Mai tā Elder Parley P. Pratt i pāpa’i :
« ’Ua heheu mai te Atua e rave rahi arata’ira’a faufa’a rahi… nā roto i te moemoeā… [I terā taime] te mau uaua [e] mātaratara ai, e vai mū te tā’āto’ara’a o te ta’ata tāhuti [i roto i te ta’oto, ’e]… e paraparau te mau melo pae vārua… i te Atuara’a… [i] te mau melahi ’e [i] te vārua o te mau ta’ata parauti’a tei maita’i roa ».17
’E nō reira, i te reira pō māere rahi « te mau tīa’ira’a ’e te mau taiāra’a o te mau tau »18 i pāhonohia ai i roto i te mau moemoeā i Betelehema ra.
I taua ’āru’i ra i roto i te ra’i nō Iudea
’Ua ’ōpere te feti’a māere i tōna māramarama,
’Ua fāfāa haere te matapō i roto i tōna ta’oto,
’E ’ua moemoeā ē, ’ua ’ite tōna mata.
I taua ’āru’i ra ’a fa’aro’o ai te mau tīa’i māmoe i te hīmene
A te mau nu’u melahi i te hīmenera’a ’aita i ātea roa,
’Ua hurihuri te ta’ata turi i roto i tōna vare’a ta’oto,
’E ’ua moemoeā ē, e nehenehe tāna e fa’aro’o.
I taua ’āru’i ra i roto i te fare vaira’a pua’atoro
’Ua ta’oto te hō’ē tamari’i ’e te metua vahine [ma te paraparau ’ore],
’Ua huri te hō’ē huma melo i tōna ’āva’e fefe,
’E ’ua moemoeā ē, e [nehenehe tāna e haere].
I taua ’āru’i ra, i ni’a i te hō’ē ’aiū fānau-’āpī-hia
’A ti’a ai ’o Maria here nō te tīpapa,
’Ua ’ata’ata te hō’ē lēpera hā’iri’iri i roto i te ta’oto,
’E ’ua moemoeā ē, e mea mā ’oia.
I taua ’āru’i ra, ’a vai ai i ni’a i te ’ōuma o tōna metua vahine
’Ua vai te ari’i iti i roto i te hau,
’Ua ta’oto te vahine fa’aturi ma te ’oa’oa,
’E ’ua moemoeā ē, e mea vi’ivi’i ’ore ’oia.
I tāua ’āru’i ra, i roto i te phātene tē tarava ra
Tei ha’amo’ahia, tei haere mai nō te fa’aora,
’Ua ha’uti’uti hō’ē ta’ata i roto i te ta’oto o te pohe,
’E ’ua moemoeā ē, ’aita e mēnema.19
Tē vaiiho nei au ia ’outou, ’ei tao’a hōro’a nō Noela, te mau moemoeā i Betelehema ra. ’E tē nā reira nei au i te i’oa o te ’aiū e fa’atupu nei i te reira mau moemoeā ato’a, ’oia ho’i te Fatu Iesu Mesia, ’āmene.