Meaalofa e Iloagatā
Faigalotu o le Kerisimasi a le Au Peresitene Sili 2021
Aso Sa, 5 Tesema, 2021
Faatomuaga
A o ou laitiiti, o le faatumutumuga o le Kerisimasi o le taunuu mai o Tinamatua ma Tamamatua Lundgren. O tausaga taitasi la te faia ai se malaga umi i se la taavale tuai e asiasi mai ai. Matou te alolofa ia i la’ua, ma sa matou fiafia i panikeke faaSuetena a Tinamatua—e fai i le kulimi fou oona na te faatau maia mai se faifaatoaga i le taulaga e nofo ai. E tu o ia i le ogaumu mo le tele o itula, e fai panikeke seia oo ina matou lē mafafai ona toe ‘aai. Ua lua nei tupulaga faaopoopo o fanau ua tutupu a’e o ‘aai lava i na panikeke faaSuetena. Ma o taimi uma lava matou te faia ai, matou te manatua ai lava Tinamatua Lundgren ma lana meaalofa o le alofa.
O meaalofa aupito sili o meaalofa ia o ō tatou taimi ma taleni. Ou te talitonu o na meaalofa o ni meaalofa paia.
Meaalofa
O se vaitau lenei o le faatalitali atu mo ni meaalofa fou. Ae o le po nei, se’i o tatou tutu ma mafaufau i au meaalofa ua uma ona avatu ia te oe—ae o ai foi na avatua ma pe aisea.
Ua tuuina mai e le Atua ia i tatou taitoatasi ni meaalofa. Atonu e te le manatu e i ai ni au meaalofa, ae ua ia te oe meaalofa faaleagaga mai le Atua ina ia mafai ai ona e faamanuiaina isi ma faalatalata atu ai ia te Ia. 1
O a ni meaalofa ua tuuina atu e le Atua ia te oe?
I lo’u faamaoni, ou te le’i vaai moni ia te a’u lava ia o se tagata ua faamanuiaina i ni meaalofa. E le o a’u o se tagata pese, pe siva, po o se tagata taalo, po o se tusiata, po o se fai matematika, po o se … po o se … Ua na’o a’u lava o se tagata masani.
E i ai taimi ou te tilotilo ai i meaalofa maoae a isi ma lagonaina le faatauvaa. Ae o loo ou aoao e leai se uiga ma e faataumaoi tele na ituaiga o faatusatusaga. O le mea e sili ona taua, ua oo ina ou vaai i le mana paia o “meaalofa e iloagatā” a le Atua ma olioli ai i nei meaalofa o se faamaoniga o Lona alofa ma le talitonuga maumaututu.
Sa aoao mai e Elder Marvin J. Ashton e faapea o meaalofa faaleagaga e aofia ai “meaalofa e iloagatā,” e aofia ai “le meaalofa o le ole atu; o le meaalofa o le faalogologo; o le meaalofa o le faalogo ma faaaoga le leo itiiti ma le filemu; o le meaalofa o le mafai ona tagi; o le meaalofa o le aloese mai finauga; o le meaalofa o le lotogatasi; … o le meaalofa o le sailia o le mea ua amiotonu; o le meaalofa o le lē faamasino atu; o le meaalofa o le vaai atu i le Atua mo le taitaiga; o le meaalofa o le avea ma se soo; o le meaalofa o le alofa i isi; o le meaalofa o le mafai ona mafaufau loloto; o le meaalofa o le faia o tatalo.” 2
Pe o fesoasoani lenei lisi ia te oe e te iloa ai au meaalofa i se malamalama fou? E fesoasoani ia te a’u.
O nei meaalofa e lē tapisa e tele foi ina siitia ai fanau a le Atua e pei o isi meaalofa tatou te aloaia ma patipatia i le tele o taimi 3 —o meaalofa e lē tapisa e fesoasoani ia i tatou e faataunuu ai o tatou faamoemoega e sili ona taua i le olaga. Ae, paga lea, o nisi taimi tatou te taofiofia ai ma le mafai ai ona talisapaia pe faasoa atu a tatou meaalofa, ona o le fefefe faapea e le o fe’ilafi, atoatoa, pe mananaia e pei o le mea tatou te mananao ai.
A le mafai ona tatou talisapaia nei meaalofa iloagatā, tatou te misia le avanoa e si’i a’e ai Ana fanau—ma tatou misia se avanoa e lagonaina ai le alofa o le Atua. 4
Tātā le Pese o Au Meaalofa
Se’i ou faaali atu ia te oe se isi meaalofa—o se meaalofa mai ia Tamamatua Lundgren. Sa manao lava Tamamatua e ta le vaiolini. Peitai, o le vaiolini lea e le faaaogaina ma pefua ai lava i luga o lana fata, ona faapena foi lea i la’u fata, mo le tele o tausaga—sa le’i faaleoa musika o nei manoa.
Faatusatusa la i le vaiolini a le afafine o la’u tama e ono-tausaga le matua, o Scarlett. E i ai lana meaalofa e faasoa mai mo i tatou i le po nei.
[O Scarlett o loo taina le vaiolini]
Faafetai lava, Scarlett. Oka se matagofie. Ou te alofa ia te oe.
O a tatou meaalofa mai le Tama Faalelagi e tatau ona faasoa atu. O le vaiolini a Scarlett e lē taugata, ma e mafai ona matou iloa ni faaletonu o le laau po o metotia, ae ona na te tuu atoa i ai lona loto ua avatu ai ia te ia se meaalofa ma ua aumaia ai le olioli (ia te a’u lava ia).
Aua nei tuua meaalofa a le Atua ia te oe, e oo lava i Ana meaalofa e iloagatā, e lē faaaogaina pe lē talisapaiaina. Aveese mai le fata ia meaalofa ua Ia tuuina atu ia te oe. Afai na e teuina ona o lou masalosalo ia te oe lava ia, lulu ese le pefu ma taumafai. Ofo atu i le Atua ma Ana fanau. O meaalofa ua tatou tofu maua mai lo tatou Tama Faalelagi e tatau ona faaaogaina ma faasoa atu. O a tatou meaalofa uma mai le Atua, po o le a lava le lē atoatoa, e aumaia ai le olioli ma, a oo ina ofoina atu ia te Ia, o se viiga lava o le faaneetaga.
Ave lau meaalofa o le faalogo ma le alofa, ma asiasi atu i se uo ua tuuatoatasi. Pe o ia te oe le meaalofa o le aloese mai finauga ma le lotogatasi? E lei i ai se taimi na sili ona manaomia ai na meaalofa. Avatu i lou aiga, uo, ma tuaoi. Fai atu i sē o tauivi faaleagaga e te alofa i ai, ma valaaulia tou te talisua faatasi. Aoao atu se lesona musuia. Tusi sina tusi agalelei. Faaaoga au meaalofa e aapa atu ai ma fausia Siona ma tagata o loo vagaia oe. E manaomia e le Atua ituaiga uma. Ua Ia tuuina maia meaalofa uma mo le siitiaina o Ana fanau. Aua ne’i e tuua le musika na e i lou loto e lē usuina, le opo e lē tuuina atua, ma le faamagaloga e lē ofoina atua.
Mauaina o Lana Mealofa
I le vaitaimi o le Kerisimasi i le 1832, sa feagai ai le Au Paia o loo tauivi ma fefinauai faalemalō ma faaupufai. Sa faatoa mae’a lava ona valoia e le Perofeta o Iosefa se taua faalemalo. 5 Ia e faalemanuia lena mea.
Ae i le aso 27 o Tesema, sa maua ai e Iosefa se isi faaaliga—o se “savali o le filemu” mai le Alii. 6 I nei taimi faigata, sa faamanatu atu ai e le Alii ia Iosefa ia meaalofa na Ia tuuina mai i Lana Au Paia—o le mea sili ona taua, o le meaalofa o le Faaola o Iesu Keriso ma le faamoemoe o le ola e faavavau faatasi ma se Tama i le Lagi alofa.
O le auala e olioli ai i lena vaitau o le Kerisimasi o le vaai lea ma maua meaalofa a le Atua: muamua ma le aupito sili o le “meaalofa le mafaatusalia” 7 o se Faaola. E moni foi lena mea i lenei vaitau o le Kerisimasi.
I le faaaliga na maua e Iosefa, sa fesili mai ai le Alii ia te ia i le fesili lenei:
“Aua se a le aoga i se tagata afai ua foai atu ia te ia se mea alofa a e na te le talia le mea alofa? Faauta, e lē olioli o ia i le mea ua tuu atu ia te ia, pe olioli foi ia te ia o lē na tuuina mai le meaalofa.” 8
Faaiuga
Ou te faamoemoe e mafai ona tatou tofu vaai ma talia meaalofa ua foai mai e le Atua ia i tatou—aemaise ai, ou te faamoemoe e mafai ona tatou tofu olioli i le Atua, o lē ua foaiina maia nei meaalofa.
Ou te faafetai lava mo le meaalofa e lē mafaatusalia o Lona Alo—o se Alo na afio mai i le lalolagi o se pepe, na ‘aui e se tina talavou ma faataoto i se faatanoavao. O se pepe o le a aoao i lea fuaiupu ma lea fuaiupu ma tuputupu a’e i lea alofa tunoa ma lea alofa tunoa seia oo ina Ia ofoina mai Lona soifua e fai ma taulaga mo a‘u agasala. Mo au agasala. Mo agasala a i latou uma na soifua ma o le a soifua i le lalolagi.
Tatou te lagiina upu o se viiga e fiafia i ai:
“Le lalolagi, ia fiafia, le Tupu ia talia!” 9
Ua tuuina mai le meaalofa o Iesu Keriso, ma i le a le tau! O le fesili o le, pe o le a tatou talia o Ia? Pe o le a tatou faaulufale mai o Ia ma tuu atu ia manumalo o Ia? E faapefea?
Ou te molimau atu o le taliaina o lo tatou Tupu ma Ana meaalofa o le a tatou maua ai le olioli—olioli i le lalolagi ma olioli i totonu o le lalolagi.
“Faafetai i le Atua i Lana meaalofa foai fua e lē mafaamatalaina” 10 o Lona Alo i le suafa paia o Iesu Keriso, amene.