O Le Agaga o le Kerisimasi
Faigalotu o le Kerisimasi a le Au Peresitene Sili
Aso Sa 5 Tesema, 2021
O’u uso e ma tuafafine pele, ou te faafetai i lo tatou mafuta ai i lenei faigalotu o le Kerisimasi i le lalolagi atoa. Ua ootia o tatou loto i musika ma upu faagaeetia loto. Ua latou aumaia le agaga moni o le Kerisimasi, le olioli e maua mai i tapuaiga ma le alofa i le Alii o Iesu Keriso. Ua noatia faatasi i tatou i lo tatou alolofa ma le tuuto mo Ia.
O lena lagona o le tapuai e tupu pea i taimi taitasi ou te faitau ai tusitusiga paia ia e fesoasoani ia te au e iloa ai o Ia i le tuanai ma Ia i le taimi nei. Mai lena faitauga ma tatalo, ua ou iloa ai o Iesu o Ieova, o le, i lalo o le taitaiga a lo tatou Tama Faalelagi, o le Foafoa o mea uma lava. Sa faamatalaina e Paulo i le ala lenei:
“O le Atua, o le na fetalai mai anamua i o tatou tamā e le au perofeta, na auaua’i mai i togafiti eseese,
“Ua fetalai mai o ia ia i tatou i nei ona aso e gata ai e lona Alo, o le ua tofia e ia e fai mea uma lava mona tofi, na ia faia foi e ia mea uma;
“O ia o le pupula o lona mamalu ma ua matua tusa lava ma ia, o loo faatumauina e ia mea uma lava i lana afioga mana, na ia faamamaina e ia lava a tatou agasala, ona nofo ai lea o ia i le itu taumatau o lē Silisiliese o i lugā;
“Ua faapea ona silisili ese o ia i agelu, pei ona sili o lona suafa ua maua i lo latou.
“Aua anafea ea na fetalai atu ai o ia i se tasi o le au agelu, O lo’u Atalii oe, ua ou fanaua oe i le aso nei? I le ma lea, e fai a’u mona Tamā, e fai foi o ia mo’u Atalii?
“Ua faapea mai foi o ia i lona toe au mai o lana ulumatua i le lalolagi, Ma ia ifo agelu uma lava a le Atua ia te ia.” 1
I le soifua mai o Iesu i Peteleema na pepese ai agelu ma, e pei ona sa valoia, sa vaaia se fetu fou o faamalamalamaina le lagi, e faamamalu ai le ulufale mai o le Alo o le Atua i le olaga faitino.
E silisiliese o Ia ia i tatou, ae o mea na tutupu o loo siomia ai Lona soifua mai faaletino e to mai ai ia te i tatou se lagona o Lona latalata mai ia i tatou. Sa Ia filifili e afio mai i lalo mai Lona nofoalii i le aao taumatau o le Tamā e ave i Ona luga le olaga faaletino. Sa Ia faia ona o le alofa mo atalii ma afafine agaga uma a Lona Tama o e o le a fananau mai i le lalolagi. Sa Ia faia ona o le alofa mo oe—ma a’u.
Sa mafai lava ona Ia soifua mai i soo se tulaga i le lalolagi. Ae sa soifua mai Iesu i tulaga maualalo i se tama’i nuu. Sa faafeiloaia o Ia e leoleo mamoe. Sa taitaia mulimuli ane ni nai Au Makoi e ala i musumusuga e ifo atu ia te Ia. Na poloaiina e le taitai o le malo ia fasiotia o Ia. Sa tatau ona aveina o Ia i se nuu mamao e faasao ai Lona soifua. Ina ua ta’u atu e se agelu i ona matua faaletino ua mafai ona Ia toe foi mai i Lona atunuu, sa la aveina o Ia i Nasareta. Na toeitiiti atoa le 30 tausaga o nofo ai o Ia iina, sa tuputupu a’e ma galue o se kamuta, a o lei amataina Lana auaunaga lautele.
Atonu e te taumanatunatu, e pei o a’u, pe aisea na tatau ai ona auina mai le Alo Pele o le Atua i sea ituaiga misiona. Manatua Lona faamatalaina o Lona taliaina ma le lotomaualalo o Lona valaauga:
“Aua ou te lei alu ifo mai le lagi e fai lo’u lava loto, a o le finagalo o le ua auina mai a’u.
“O lenei foi le finagalo o le Tama o le ua auina mai a’u, ia le māumau lava se tasi ua ia foaiina mai ia te a’u, a ia ou toe faatuina o ia i le aso gataaga.
“O lenei foi le finagalo o le ua auina mai a’u, ia maua le ola e faavavau e i latou uma o e vaai i le Atalii, ma faatuatua ia te ia, ou te toe faatuina foi i latou i le aso gataaga.” 2
Na faaalia e Iesu Lona alofa ma le lotomaualalo. E ui i Lona tulaga o le mana ma le mamalu faatasi ma Lona Tama, ae sa filifili e Iesu ni alii masani e avea ma Ona soo i le lalolagi, e aofia ai le au faifaiva, o se ao lafoga, ma se selote.
Sa ia talai atu ma fegalegaleai ma tagata lepela, o e mama’i, vae mumutu, ma i latou o e na inosia. Sa ia alofa ma taliaina e aupito maualalo ia i latou, e ui i Lona afio mai mai luga e auauna atu ia i latou ma siitia i latou i luga. Na Ia auauna atu ia i latou, alofa ia i latou, ma siitia i latou i luga.
O lena agalelei agaalofa ofoofogia ma le taofiofi na faateleina e oo i le faaiuga o lana misiona faalelalolagi. Sa fetaiai o Ia ma le tetee ma le inosia na Ia silafia o se vaega o le misiona lea na valaauina i ai o Ia ma na Ia taliaina. O lena misiona o le mafatia mo agasala ma vaivaiga o tagata uma o e na fananau mai i le olaga faaletino.
Tou te manatua upu a Iakopo a o ia aoao atu lona nuu e uiga i le Togiola a Iesu Keriso:
“E, le silisiliese naʼuā o le paia o lo tatou Atua! Ona ua silafia e ia mea uma, ma ua leai se mea ua lē silafia e ia.
“Ma e afio mai o ia i le lalolagi ina ia mafai ona faaolaina e ia tagata uma, pe afai latou te faalogologo atu i lona siufofoga; aua faauta, e mafatia o ia i tiga o tagata uma, ioe, tiga o tagata ola uma, o tane, o fafine, ma tamaiti, o e ua i ai i le aiga o Atamu.
“Ma e mafatia o ia i lenei mea ina ia mafai ona oo mai le toetu i tagata uma, ina ia mafai e tagata uma ona tutu i ona luma i lena aso tele o le faamasinoga tele.” 3
O le pepe sa i le fale povi i Peteleema o le Alo o le Atua, na auina mai e le Tama e avea ma o tatou Faaola. O Ia o le Alo Pele e Toatasi o le Tama i le tino. O Ia o lo tatou Faaa’oa’o.
Ina ia maua le agaga o le Kerisimasi, e tatau ona tatou taumafai e alolofa atu e faapei ona Ia alofa mai. O Ana upu ia te oe ma a’u ia “Alofa atu le tasi i le isi, e pei ona ou alofa atu ia te outou.” 4
E mafai ona e lagonaina le agaga o le Kerisimasi e pei ona ou maua, i na upu. Na ou lagonaina le malamalama ma le manatu o le a lelei mea uma lea e oo mai mai le faatosinaga a le Agaga Paia i soo se taimi ou te manatua ai ma mafaufau loloto i le faataitaiga a le Faaola o le lalolagi.
Mo a’u, atonu o le manatuaga e sili ona suamalie e faapea e tu saunia le Alii e fesoasoani ia i tatou po o le a lava le mea e oo mai ia i tatou. E pei ona sa aoao mai Mamona:
“Ona ua silafia e le Atua mea uma, ona ua mai le faavavau-tumau i le faavavau-tumau, faauta, sa ia auina mai agelu e auauna mai i le fanauga a tagata, e faaali mai e uiga i le afio mai o Keriso; ma o Keriso o le a ala mai ai mea lelei uma.
“Ma sa tautino mai foi e le Atua i perofeta, i lona lava fofoga, o le a afio mai Keriso.
“Faauta foi, e tele auala sa i ai na ia faaali mai ai mea i le fanauga a tagata, o ni mea sa lelei; ma o mea uma ua lelei ua mai ia Keriso; a na le o lea po ua pauu tagata, ma ua leai se mea lelei e mafai ona oo mai ia te i latou.
“O le mea lea, e ala i le auauna mai o agelu, ma afioga uma na tulei mai i le fofoga o le Atua, sa amata ona faaaoga ai e tagata le faatuatua ia Keriso; ma sa faapea, e ala i le faatuatua, ona latou taofi mau i mea lelei uma; ma sa faapea ona i ai seia oo mai i le afio mai o Keriso.
“Ma ina ua uma ona afio mai o ia, sa faaolaina foi tagata i le faatuatua i lona suafa; ma e ala i le faatuatua, na avea ai i latou ma atalii [ma afafine] o le Atua. Ma e pei ona mautinoa o loo soifua Keriso, sa ia fetalai mai upu nei i o tatou tamā, ua fetalai mai: Soo se mea, ua lelei, tou te ole atu ai i le Tama i lou igoa i le faatuatua, i le talitonu o le a outou maua, faauta, o le a faia lava ia te outou.” 5
I lenei vaitau, e toatele outou e tatalo mo le malosi e onosaia ai tofotofoga ia e tofotofoina ai oe i mea e ono foliga mai ia te oe o le mea lea e gata ai lou mafai. Ou te molimau atu e faafofogaina e le Faaola ma le Tama au talosaga e te ole atu ai mo se mapusaga ma mo mea e lelei mo oe ma mo i latou e te alofa ma auauna i ai.
O le a oo mai tali e faapei ona faia i le Perofeta o Iosefa Samita. O le a e iloaina le tatalo a Iosefa mo se fesoasoani e faapei foi o au lava tatalo. Ma o le a e lagonaina le alofa o le Alii mo Iosefa ma mo oe i Lana tali faamafanafana i le tagi atu a Iosefa. Sa tatalo Iosefa:
Le Atua e, o fea o i ai oe? Ma o fea o i ai le faapaologa ua ufi ai lou afioaga lafi?
“O le a le umi e taofi ai lou aao, ma silasila mai ai mai le lagi faavavau lou fofoga, ioe, lou fofoga manino, i sese ua faia i lou nuu ma au auauna, ma oo atu ai i ou fofoga-faafofoga a latou tagi?” 6
Ma na tali le Alii e faapei ona Ia faia ia te oe ma a’u:
“Ia filemu lou agaga; o lou tiga ma ou puapuaga o le a na o sina minute laitiiti;
“Ma ona oo lea, afai e te talitalia lelei, o le a faaeaina oe e le Atua i lugā; o le a e manumalo i ou fili uma.
“O loo tutu au uo i ou tafatafa, ma o le a latou toe faafeiloaʼi ia te oe ma loto mafana ma lima faauo.” 7
Ou te iloa mo a’u lava ia, e mautinoa lava folafolaga mo oe, mo a’u, ma mo i latou tatou te alolofa i ai. Sa lagona e le Alii o tatou tiga. Sa Ia filifilia ona o le alofa mo i tatou. Na te silafia le ala e fesoasoani mai ai ia tatou lagona le filemu i faigata, e oo lava pe a faaauau pea le tofotofoga. O le a Ia auina mai au uo o ni agelu e tutu i ou tafatafa, “ma loto mafana ma lima faauo.” O le a suia o tatou lava loto mo le lelei sili atu, a o tatou onosa’ia tofotofoga faaletagata e ala i le faatuatua ia te ia. 8 Ma faatasi ai ma lena suiga, o le a avea i tatou lava ma uo e mafai e le Alii ona auina atu o ni agelu i isi.
I le avea ai ma Ana molimau, ou te molimau atu o le pepe na soifua mai i Peteleema, o Iesu Keriso, le Alo pele o le Atua. Ou te folafola atu a e ole atu i le Tama Faalelagi i le faatuatua ma i le suafa o Iesu Keriso, o le a aumai e le Agaga ni lagona o le filemu ia te oe ma e pele ia te oe.
Ou te momoli atu o’u alofaaga mo outou faatasi ai ma o’u moomooga ia outou maua se vaitau fiafia o le Kerisimasi—i lenei tausaga ma aso uma. I le suafa paia o Iesu Keriso, amene.