“E Mafai Foi Ona e Iloa”
Faigalotu o le Kerisimasi a le Au Peresitene Sili
Aso Sa, 5 Tesema, 2021
O’u uso e ma tuafafine pele, o le Kerisimasi i lo’u aiga a o tamaitiiti, sa matuai tosinaina lava e agaifanua a atunuu o o’u matua. Sa malaga mai lo’u tina i le Iunaite Setete mai Suetena ma lo’u tama mai Finelani. 1 I tapenaga mo le Kerisimasi, sa matou teuteuina ai le matou laau Kerisimasi i mea teuteu e gaosi i o matou lima, ma e tao ma tao e lo’u tina le mau meaai. Mo mea uma ou te iloa, sa aiga o ia i le Tinamatua o Sister Craig Lundgren. Sa amata a matou faamanatuga o le Vaeluaga Po o le Kerisimasi i se su’ifefiloi matagofie o mea’ai faaagaifanua mananaia sa saunia e lo’u tina—o polovivili; puligi alaisa; ma le mau falaoa, keke, ma kuki. E taualuga fiafiaga o le Vaeluaga Po o le Kerisimasi i le taunuu mai o Jultomten—Santa Claus—na te aumaia meaalofa mo tamaiti uma lava. A o lei taunuu mai Jultomten e masani ona faapotopoto e lo’u tina lo’u uso, tuafafine, ma a’u e faalogologo a o faitau mai e lo’u tama le tala o le Kerisimasi mai le Feagaiga Fou.
O lo’u tama o se tagata filemu, o se tagata e le tele ni tala i lana gagana ma le faaPeretania sa ia aoaoina ina ua matua. Sa matuai faamaoni o ia i taimi uma, ma e le nene’e o ia i ni faaviivii. E le’i faalialiavale lava o ia, ma na te le faaaogaina se vaogagana maotua. I le Po o le Kerisimasi na te faitau mai le Luka 2. Na te faitau e uiga ia Iosefa ma Maria o malaga atu i Peteleema, o le faaali atu o le agelu i leoleo mamoe, le soifua mai o Iesu, ma le manatunatu o Maria i lona loto i mea na tutupu. Ae sa le’i taofi ai lo’u tama i le fuaiupu 19; sa ia faaauau le tala ia Maria ma Iosefa o aumaia le pepe o Iesu i le malumalu i Ierusalema e faia se taulaga e tusa ai ma Tulafono a Mose.
Na faitau mai e lo’u tama:
“Faauta foi, sa i ai i Ierusalema le tagata e igoa ia Simeona …
“Ua iloa e ia i le Agaga Paia, e le oo ia te ia le oti seia muai iloa atu le Keriso, o le Alii.
“O le Agaga ua alu ai o ia i le malumalu: ua aumai le tama o Iesu e [Maria ma Iosefa], …
“Ona sapaia lea o [ia e Simeona] i ona lima, ua faafetai atu i le Atua, ua faapea atu,
“Le Alii e, e te tuuina atu nei lau auauna ia alu ma le manuia, pei o lau afioga:
“Aua ua iloa e ou mata le faaolataga mai ia te oe,
“Ua e saunia i luma o nuu uma lava.” 2
O le taimi lena, e taofi ai lava e lo’u tama. Ona ia tuu mai lea o lana molimau. E faapena foi i taimi uma ona ia tautino malosi mai ai lea i le faaPeretania, “Atonu o le a le mafai lava ona ou siina lena pepe o Iesu i o’u lima, ae ou te iloa, e faapei foi ona iloa e Simeona, o lena pepe o le Alo o le Atua, o lo’u Faaola ma le Togiola. E moni lava o Ia, ma o loo soifua o Ia.” I le maea ai o lenei tautinoga, sa tilotilo mai ia i matou taitoatasi ma ona mata lanumoana e le gole se mea ma fai mai ma se luelue manino o lona ulu, “Ma e mafai foi ona e iloa.”
Sa iloa e lo’u tama ma lo’u tina pe o ai lena pepe i Peteleema ma le mea o le a tuputupu a’e o Ia e faataunuu. O lenei malamalama na suia ai i la’ua. Sa la mananao e le gata ina talitonu i matou le fanau ia la’ua upu 3 ae ia matou iloa ai foi e i matou lava ina ia mafai ai foi ona suia i matou. O le uuna’ia ai i molimau a o’u matua, sa ou oso ai i luga o le ala o feagaiga ma se manao ia ou “iloaina foi.”
Ina ua 11 o’u tausaga, sa nonofo lo matou aiga i Göteborg, Suetena. Sa valaaulia talavou uma e le peresitene o le msiiona e faitau le Tusi a Mamona. Sa mautinoa lava le le faitaulia ai o a’u i le valaaulia, ae o lo’u uso o se tiakono i le taimi lea, ma sa ia taliaina le lu’i. Sa ou manao i taimi uma ia pei o lo’u uso ma faia mea sa ia faia, o lea na ou auai ai i i totonu. Na tofu i matou ma nai o’u tei ma seti o tusitusiga paia mai o’u matua ma sa amata ona ou faitauina i afiafi taitasi.
I ni nai masina mulimuli ane, sa fautuaina le autalavou e Peresitene Gösta Malm, o se fesoasoani i le au peresitene o le misiona, 4 e faapea o e sa faitauina le Tusi a Mamona ia ole atu i le Atua e uiga i lona moni. Na tonu ia te a’u o le a ou faia lena lava mea. O le po lena, sa ou faatalitali sei moe lo’u uso. Sa ou oso ese mai le moega, tootuli i le fola malulu, ma amata ona ou tatalo. E le’i leva ae ou lagona e pei o ta’u mai ia te a’u, “Ua leva lava ona ou ta’u atu ia te oe e moni.” Faatasi ai la ma lena mea, sa oo mai i o’u luga se filemu e lē mafaamatalatalaina. Sa ou iloa e a’u lava ia e ala i le mana o le Agaga Paia e moni le Tusi a Mamona. 5
Pei lava ona sa folafola mai i le Faatomuaga i le Tusi a Mamona, sa [oo] foi ina ou iloa e ala i le [mana o le Agaga Paia] o Iesu Keriso o le Faaola o le lalolagi, o Iosefa Samita o Lana … perofeta i aso nei e gata ai, ma O Le Ekalesia a Iesu Keriso o le Au Paia o Aso e Gata Ai o le malo o le Alii ua toefaatuina i luga o le lalolagi, e saunia ai mo le afio mai faalua o le Mesia.” 6 O lena iloa, tuufaatasi ma molimau na mulimuli mai, na suia ai a’u e faapei ona faia i o’u matua.
O lenei iloa—faapea o Iesu Keriso o le Alo o le Atua, ma sa faasatauroina o Ia mo agasala a le lalolagi—o se meaalofa faaleagaga. 7 O lea meaalofa e le o noatia i se tofi faapitoa o le perisitua po o se itupa; ae, o loo avanoa mo i latou uma o e agavaa mo le mauaina. E le o poloaiina i tatou e aumai i le Faaola ni meaalofa o auro, pululipano, ma le pulumuro, ia agavaa ai mo lenei meaalofa faaleagaga matagofie. Ua poloaiina i tatou e tuina atu i tatou lava. 8 Na augani mai le perofeta o le Tusi a Mamona o, Amaleki, i tagata ma faapea mai, “Ma o lenei … Ou te manao ia outou o mai ia Keriso, o lē o le Paia e Toatasi o Isaraelu, ma taumamafa i lana olataga, ma le mana o lana togiola. Ioe, o mai ia te ia, ma tuu atu o outou agaga atoa e fai ma taulaga ia te ia … ; ma e faapei ona soifua o Ia, o le a faasaoina outou.” 9
A o faasolo ina ou matua, sa ou vaai i o’u matua o alolofa ma auauna atu i isi. Sa ou vaai ia i la’ua o tausia feagaiga na la osia ma le Atua. Sa ou vaai ia i la’ua o faatinoina ma le filiga a la faiaoga asiasi ma faiaoga faaleaiga, ma taumafai malosi e auauna atu ia i latou sa la tautuaina. Sa ou vaai ia i la’ua o faatinoina sauniga i le malumalu ma taliaina valaauga o le Ekalesia. Ma i tausaga taitasi, i Po o le Kerisimasi, sa molimau atu ai lo’u tama faatasi ma Simeona e uiga i le Faaola o Iesu Keriso. I le tele o tausaga, sa tuuina atu ai e lo’u tama lana valaaulia ia “e iloa foi” i fanau faaletulafono ma fanau a fanau.
I le fiasefulu o tausaga talu mai o’u aafiaga o se tamaitiiti i le Tusi a Mamona, sa lagolagoina a’u o se Fitugafulu Pulega Aoao ma sa tofia e lauga i le konafesi aoao. Sa faamautinoa e o’u tuafafine ua mafai e lo’u tama ua 92 tausaga le matua ona maimoa i le konafesi—aemaise o la’u lauga. Ina ua mae’a le konafesi aoao, sa ou alu i lona fale. Sa ou fesili atu, “Tama, na e matamata i le konafesi?” Sa ia tali mai, “Ja” [Ioe]. Sa ou fesili, “Na e faalogo i la’u lauga?” Sa ia tali mai, “Ja” [Ioe]. Faatasi ai ma sina faalefomu, sa ou fai atu, “E a la, Tama, o le a sou manatu?” Sa ia fai mai, “Oi, o la na lelei. Toeitiiti lava a ou mitamita ai.”
I le mavae ai o se taimi umi na ia fai mai, “Dale, e i ai se mea ou te fia ta’u atu ia te oe.” Ona ou iloa ai lea e ui sa ou saili atu mo se faamalo, ae sa i ai se mea sa nopia’i ai le mafaufau o lo’u tama sa sili atu ona taua nai lo le tuuina mai o se faamalo ia te a’u. Na ia fai mai, “O anapo sa fai ai sa’u miti. Sa ou miti ua ou oti, ma sa ou vaai i le Faaola. Na Ia aveina a’u i Ona aao ma fetalai mai ua faamagaloina a’u agasala. Ma o se lagona ina a manaia tele.” Na pau lava lena o le tala leotele a lo’u tama. Ae o le vaaiga i ona foliga na loloto mea na ta’u mai i ona foliga; na ia iloa Iesu Keriso. Sa ia iloa o le pepe i Peteleema, o le sa “tupu le poto ma le tino o Iesu, ua alofagia o ia e le Atua atoa ma tagata,” 10 o lona faaolataga, o le Alo o le Atua ua tupu ma togiolaina mo ana agasala. Ma ua leva foi ona iloa e lo’u tama a o le’i faia lenei miti. O le miti ua na o se alofa mutimutivale—se meaalofa—mai se Tama Faalelagi alofa i se toeaina, na maliu i le lua masina mulimuli ane. Mai meaalofa uma o le Kerisimasi na ou maua, e sili ona ou faapelepele i le meaalofa o le molimau ma le faatuatua na faaalia e lo’u tama ma lo’u tina.
O le Kerisimasi lenei, fesili atu i lou Tama Faalelagi mo le meaalofa faaleagaga o le iloaina o le moni o loo soifua le Faaola o le lalolagi. O le vaitau o le Kerisimasi o se taimi masani ma le matagofie e suesue ai i Lona soifuaga ma tauivi e faataitai i Lana amio ma uiga faaleatua. A o e faia e mafai ona e iloa o Iesu o le Keriso, le Alo o le Atua, ma na Ia togiolaina au agasala. O lenei malamalama e sili atu ona lelei ma umi atu ona tumau nai lo soo se meaalofa e mafai e Jultomten ona aumaia ia te oe, aua e mafai ona suia ai oe. O le a e aoao ai e fiafia le Faaola e toefuatai mai mea e le mafai ona e toefuataia, faamalolo manu‘a e le mafai ona e faamaloloina, faaleleia mea ua nutimomoia, tauia soo se mea le talafeagai ua e oo i ai, ma tumau ai le fonofonoina o loto ua nutimomoia.
E faapei foi o lo’u tama faalelalolagi, ou te iloa o le a le mafai ona ou sapaia lena pepe tamameamea o Iesu i o’u lima, ae faapei lava ona iloa e Simeona, o lena pepe o le Alo o le Atua, o lo’u Faaola ma lou Faaola, o lo’u Togiola ma lou Togiola. E moni lava o Ia, ma o loo soifua o Ia. E mafai foi ona e iloa. I le suafa o Iesu Keriso, amene.