Te vārua Noera
Purera’a noera a te Peresidenira’a Mātāmua
Sābati 5 nō Tītema 2021
E au mau taea’e here, e au mau tuahine here, ’oa’oa iti rahi tō’u ’ia ti’a atu i mua ia ’outou i roto i teie purera’a noera nā te ao ato’a nei. ’Ua putapū roa tō tātou ’ā’au i te mau hīmene ’e te mau parau nehenehe. ’Ua hōro’a mai te reira i te vārua Noera mau, te ’oa’oa e tupu mai nā roto i te ha’amorira’a ’e te herera’a i te Fatu Iesu Mesia. ’Ua natihia tātou nā tō tātou here ’e tō tātou auraro iāna.
E tupu taua mana’o ha’amori ra i te rahi i te mau taime ato’a e tai’o vau i te mau pāpa’ira’a mo’a ’o tē tauturu iā’u ’ia ’ite ē, ’o vai ’oia i mūta’a iho ra ’e i teienei. Nā roto i te reira tai’ora’a ’e te reira purera’a, i ’ite ai au ē, ’o Iesu ’o Iehova, ’oia tei rahu i te mau mea ato’a ra i raro a’e i te arata’ira’a a tō tātou Metua i te ao ra. Tē fa’ata’a nei Paulo i te reira mai teie te huru :
« ’O te Atua, ’о tei parau ri’iri’i mai i muta’a iho, ’e e rave rahi te huru о te paraura’a mai i te feiā tupuna i te mau peropheta,
« ’О tei parau mai ïa ia tātou i teie nei ’anotau hope’a i te Tamaiti, ’o tei ha’apa’ohia e ana ’ei Fatu nō te mau mea ato’a nei, ’e ’ua hāmani ho’i ’oia i nā ao ato’a nei iāna ;
« ’O te ’ana’ana ho’i ’oia o tōna hanahana, ’e ’о te hōho’a mau ïa nōna iho, ’e te maura’a ho’i i te mau mea ato’a nei i tāna ra parau mana, oti a’era tā tātou hara i te tāmāhia e ana iāna iho ra, pārahi ihora i raro i te rima ’atau o te Mana i te vāhi teitei га ;
« E maita’i hau ’ē ho’i tōna i tō te mau melahi, mai te i’oa i noa’a iāna i hau ’ē i te maita’i i tō rātou ra.
« ’О vai ho’i tō taua mau melahi ra tā te Atua i parau noa atu mai tahito mai ā ē, ’О tā’u Tamaiti ’oe, i na’uanei ’oe i fānauhia ai e au ? E tāna ho’i i nā ’ō ra ē, ’ei Metua vau nōna, ’e ’ei Tamaiti ’oia nā’u ?
« ’E iāna ho’i i fa’aho’i fa’ahou mai i te matahiapo i te ao nei, nā ’ō a’era ’oia, ’ia ha’amori te mau melahi ato’a a te Atua iāna ». 1
I te fānaura’a o Iesu i Betelehema, ’ua hīmene te mau melahi ’e ’ua fā mai te hō’ē feti’a ’āpī nō te tūrama i te ra’i, ’e nō te fa’atura i te tomora’a mai o te tamaiti a te Atua i te ao tāhuti nei.
’Ua fa’atere mana ’oia i ni’a ia tātou, noa atu rā i te reira, ’ua fa’atupu te mau ’ohipa tei hā’ati i tōna fānaura’a i te tāhuti nei, i te mau mana’o ē, tei pīha’i iho ’oia ia tātou. ’Ua mā’iti ’oia e pou mai i raro nei nā ni’a mai i tōna terōno i te rima ’atau o te Metua nō te rave i te tāhuti i ni’a iāna. ’Ua nā reira ’oia nō tōna here i te tamaiti ’e i te tamāhine tāta’itahi a tōna Metua e fānau mai i roto i te ao nei. ’Ua nā reira ’oia nō tōna here ia ’outou—’e iā’u nei.
’Ua nehenehe ho’i iāna ’ia fānauhia mai i roto i te tahi noa atu huru fāito. Terā rā, ’ua fānauhia mai Iesu ma te ha’eha’a i roto i te hō’ē ’oire iti ha’iha’i roa. ’Ua fāri’i te mau tīa’i māmoe iāna. I muri a’e, ’ua arata’ihia te tahi mau ta’ata pa’ari nā roto i te fa’aurura’a nō te ha’amori iāna. ’Ua fa’aue te feiā fa’atere poritita ’ia taparahi-pohe-hia ’oia. ’Ua tītauhia ’ia hōpoi atu iāna i te hō’ē fenua ’ē atu nō te pāruru i tōna ora. I te paraura’a te hō’ē melahi i tōna nā metua tahuti nei ē, e nehenehe tāna e ho’i i tōna fenua, ’ua hōpoi rāua iāna i Nazareta. ’Ua ora ’oia i reira fātata e 30 matahiti, ’ua pa’ari ’e ’ua rave i te ’ohipa tāmuta fare, hou ’a ha’amata ai tāna tau tāvinira’a i te ta’ata.
E riro paha ’outou i te uiui, mai iā’u ē, nō te aha i tītauhia ai ’ia tonohia te tamaiti hapa ’ore a te Atua i roto i te hō’ē misiōni mai te reira. ’A ha’amana’o na i tāna parau nō ni’a i tōna fāri’ira’a ma te ha’eha’a i tōna pi’ira’a :
« I pou mai nei ho’i au mai te ra’i mai, ’eiaha nō te rave i tō’u iho hina’aro, nō tē rave rā i te hina’aro o tei tono mai iā’u.
« Teie ho’i tō te Metua tei tono mai iā’u nei hina’aro, ’ia ’ore roa vau ’ia ’ere i te hō’ē i tāna i hōro’a mai ra, ’ia fa’ati’a-pā’āto’a-hia e au ’ia tae i te mahana hope’a ra.
« ’O teie ho’i tō tei tono mai iā’u nei hina’aro, ’o te ’ite i te Tamaiti ’e te fa’aro’o iāna ra, ’ei ora mure ’ore tōna ’e ’ia fa’ati’a fa’ahou vau iāna i ni’a ’ia tae i te mahana hope’a ra ». 2
’Ua fa’a’ite Iesu i tōna here ’e tōna ha’eha’a. Noa atu tōna pārahira’a mana ’e te hanahana i pīha’i iho i tōna Metua, ’ua mā’iti Iesu ’ei mau pipi nāna i te fenua nei, i te mau ta’ata mātauhia, mai te feiā rava’ai, hō’ē ta’ata tītau tute ’e hō’ē ta’ata ’ōrurehau.
’Ua ha’api’i ’oia ’e ’ua ’āpiti i te mau lepera, te feiā ma’i, te piri’o’i, tei vahavahahia. ’Ua here ’oia ’e ’ua fāri’i i te feiā ha’eha’a roa a’e i rotopū ia rātou, noa atu ē, i pou mai ’oia mai te vāhi teitei roa. ’Ua tāvini ’oia ia rātou, ’ua here ia rātou, ’e ’ua fa’ateitei ia rātou.
’Ua rahi atu tōna here ’e te fa’a’oroma’i fa’ahiahia i te hope’a o tāna ’ohipa i te fenua nei. ’Ua fa’aruru ’oia i te pāto’ira’a ’e i te riri ’ū’ana tāna i ’ite ē, e tuha’a te reira nō te ’ohipa i fa’ata’ahia nāna ’e tāna i fāri’i. ’O te mamaera’a ïa nō te hara ’e te ’ino o te mau ta’ata ato’a e haere mai i te tāhuti nei.
Tē ha’amana’o ra ’outou i te mau parau a Iakoba ’a ha’api’i ai ’oia i te parau o te tāra’ehara a Iesu Mesia :
« E te rahi o te ra’a o tō tātou Atua e ! ’Ua ’ite ho’i ’oia i te mau mea ato’a, ’e ’aore roa te hō’ē mea tei ’ore i ’itea iāna.
« E tae mai ’oia i te ao nei ’ia ora te ta’ata ato’a iāna ’ia ha’apa’o rātou i tōna ra reo ; inaha ho’i, ’ua fa’a’oroma’i ’oia i te māuiui o te ta’ata ato’a, ’oia ïa, te māuiui o te mau ta’ata ato’a, te mau tāne ato’a, ’e te mau vahine ato’a, ’e te mau tamari’i ato’a ho’i, i roto i te feti’i o Adamu ra.
« ’Ua fa’a’oroma’i ’oia i te reira, ’ia tae te ti’a-fa’ahou-ra’a i ni’a i te ta’ata ato’a, ’ia ti’a rātou ato’a i mua i tōna ra aro i te mahana rahi o te ha’avāra’a ra ». 3
Te ’aiū i roto i te phatene i Betelehema ’o te tamaiti ïa a te Atua, tei tonohia mai e te Metua ’ia riro ’ei Fa’aora nō tātou. ’Ua riro ’oia ’ei Tamaiti Fānau Tahi nā te Metua i te tino nei. ’O ’oia tō tātou hi’ora’a.
Nō te fāri’i i te vārua o te Noera, e ti’a ia tātou ’ia tāmata i te here mai tāna i here ra. Teie tāna parau ia ’outou ’e iā’u, « ’ia aroha ’outou ia ’outou iho, mai iā’u e aroha atu ia ’outou na ». 4
E nehenehe ’outou e ’ite mai iā’u, i te vārua o Noera i roto i teie mau parau. ’Ua ’ite au i te māramarama ’e te mana’o maita’i e tae mai nā roto i te fa’aurura’a a te Vārua Maita’i i te mau taime ato’a e ha’amana’o vau ’e e feruri au i te hi’ora’a o te Fa’aora o te ao nei.
Nō’u nei, penei a’e te ha’amana’ora’a au roa a’e o te ti’ara’a ïa te Fatu ma te ineine nō te tauturu ia tātou noa atu te ’ohipa e tupu mai. Mai tā Moromona i ha’api’i mai :
« Inaha ho’i, ’ua ’itea i te Atua i te mau mea ato’a, ’e e ti’a ’oia i te vai-māite-ra’a, inaha, i tono mai ai ’oia i tāna mau melahi e tauturu i te tamari’i a te ta’ata nei, ’e e fa’a’ite māramarama mai i te taera’a mai o te Mesia ra, ’e nā roto i te Mesia e roa’a mai ai te mau mea maitata’i ato’a ra.
’E ’ua fa’a’ite ato’a mai ra te Atua i te mau peropheta nā roto i tōna iho ra vaha ē, e tae mai te Mesia.
« ’oia i te mau mea maitata’i i te tamari’i a te ta’ata nei; ’e te mau mea maitata’i ato’a, nō ’ō mai ïa i te Mesia ra ; ’āhiri ’aita i nā reira, ’ua ma’iri te ta’ata, ’e ’aita e ti’a ’ia tae mai te hō’ē mea maita’i ia rātou.
« Nō reira, nō te ’ohipa a te mau melahi, ’e nō te mau parau ato’a nā roto mai i te vaha o te Atua ra, i fa’atupu ai te ta’ata i te fa’aro’o i te Mesia ; e nā roto i te fa’aro’o i tāmau ai rātou i te mau mea maitata’i ato’a ra; i nā reira ïa e tae noa atu i te taera’a mai o te Mesia ra.
« ’E i muri a’e i tōna ra taera’a mai, ’ua ora te ta’ata nā roto i te fa’aro’o i tōna ra i’oa; ’e nā roto i te fa’aro’o i riro ai rātou ’ei mau tamaiti [’e ’ei mau tamāhine] nā te Atua. ’E tē ora ra te Mesia, i parau mai ’oia i tō tātou mau metua tupuna, i te na ’ōra’a mai ē, nō te mau mea ato’a tā ’outou e ani i te Metua i roto i tō’u ra i’oa, e mea maita’i tā ’outou e ani ra, i te fa’aro’ora’a ’e nā roto i te fa’aro’o e roa’a te mea i anihia ra, inaha, e nā reirahia ïa i ni’a ia ’outou ». 5
I teie pu’e tau, e rave rahi o ’outou e pure nei ’ia roa’a te pūai nō te fa’a’oroma’i i te mau tāmatara’a e tāmata nei ia ’outou i ni’a i tō ’outou fāito hope’a. Tē fa’a’ite pāpū atu nei au ē, ’ua fa’aro’o mai te Fa’aora ’e te Metua i tā ’outou mau tītaura’a i te anira’a i te tāmarūra’a nō ’outou ’e nō te feiā tā ’outou e here nei ’e e tāvini nei.
E tae mai te mau pāhonora’a mai tei tae mai i te peropheta Iosepha Semita. E ’ite ’outou i te pure a Iosepha nō te fāri’i i te tauturu mai tō ’outou iho. ’E e ʼite ʼoutou i te here o te Fatu ia Iosepha ’e ia ’outou i roto i tāna pāhonora’a māhanahana i te pi’ira’a a Iosepha. ’Ua pure o Iosepha :
« E te Atua, tei hea rā ’oe ? ’E tei hea rā te ti’ahapa ’o tē tāpo’i nei i tō ’oe na vāhi tāpunira’a ?
E aha te maoro o te tāpe’ara’a o tō ’oe na rima, ’e tō mata, ’oia tō ’oe mata ateate na, ’ia hi’o mai mai te mau ra’i mure ’ore mai i te mau hape i ni’a i tā ’oe mau ta’ata ’e tā ’oe mau tāvini ato’a, ’e tō ’oe tari’a ho’i ’ia putapū i tō rātou mau ti’aorora’a atu ra ? » 6
’E ’ua pāhono mai te Fatu mai tāna e nā reira mai ia ’outou ’e iā’u nei :
« ’Ia hau mai na tō ’oe ’ā’au ; e vai poto noa mai tō ’oe ’enemi ’e tō ’oe mau ’ati ho’i ;
« ’E i reira, mai te mea e fa’a’oroma’i māite ’oe i te reira, e fa’ateitei mai te Atua ia ’oe i te vāhi teitei roa ra ; e upo’oti’a ïa ’oe i ni’a i tō ’oe mau ’enemi ato’a ra.
« Tē ti’a mau nei tō ’oe mau hoa i pīha’i iho ia ’oe nā, ’e e fāri’i fa’ahou ā rātou ia ’oe ma te ’ā’au māhanahana ’e te rima aroha ». 7
’Ua ’ite au iho ē, e mea pāpū te parau fafau nō ’outou, nō’u, ’e nō te feiā tā tātou e here nei. ’Ua ’ite te Fatu i tō tātou mau māuiui. Nō reira ’ua mā’iti ’oia nō tōna here ia tātou. ’Ua ’ite ’oia nāhea ’ia tauturu ia tātou ’ia ’ite i te hau i roto i te ’ati, noa atu ē, tē haere noa ra te tāmatamatara’a. E tono mai ’oia i te mau hoa ’ei mau melahi nō te ti’a i pīha’i iho ia ’outou « ma te ’ā’au māhanahana ’e te rima aroha ». E tauihia tō tātou iho ’ā’au ’ei mea maita’i a’e ’a fa’a’oroma’i ai tātou i tō tātou iho mau tāmatara’a ma te fa’aro’o iāna. 8 ’E nā roto i te reira tauira’a, e riro mai tātou iho ’ei mau hoa tā te Fatu e nehenehe e tono ’ei mau melahi ia vetahi ’ē ra.
’Ei ’ite nōna, tē fa’a’ite pāpū nei au ē, te ’aiū i fānauhia i Betelehema ’o Iesu Mesia ïa, te tamaiti here a te Atua. Tē fafau atu nei au ē, mai te mea e ani ’outou i te Metua i te ao ra ma te fa’aro’o ’e nā roto i te i’oa o Iesu Mesia, e hōpoi mai te Vārua i te mau mana’o hau i roto ia ’outou ’e i tei herehia e ’outou.
Tē fa’a’ite atu nei au i tō’u here ia ’outou, ’e tō’u hina’aro ’ia fāri’i ’outou i te hō’ē pu’e tau noera ’oa’oa—i teie matahiti ’e i te mau taime ato’a. Nā roto i te i’oa mo’a o Iesu Mesia, ’āmene.