« E nehenehe ato’a ’outou e ’ite i te reira ! »
Purera’a noera a te Peresidenira’a Mātāmua
Sābati 5 nō Tītema 2021
E au mau taea’e e au mau tuahine here, ’ua ha’amaita’i-rahi-hia te Noera i roto i tō’u fare tamari’iri’ira’a e te mau peu tumu o te fenua ’āi’a o tō’u nā metua. ’Ua tere mai tō’u metua vahine i te fenua Marite mai te fenua Tuete mai ’e tō’u metua tāne mai te fenua Finilane mai. 1 I roto i te fa’aineinera’a nō te Noera, ’ua fa’anehenehe mātou i tā mātou tumu rā’au noera i te mau fa’anehenehera’a rima, ’e ’ua tūtu tō’u metua vahine ’e ’ua tūtu ’e ’ua tūtu. Iā’u i ’ite, e feti’i ’oia i te māmā ru’au o te tuahine Craig, ’o Lundgren. ’Ua ha’amata tā mātou mau fa’ahanahanara’a i te pō noera nā roto i te hō’ē ’āno’ira’a fa’ahiahia mau nō te mau mā’a monamona tumu tā tō’u metua vahine i fa’aineine—te mau ’īpō ’i’o pua’a ; te raiti tā ūhia ; ’e te mau faraoa huru rau, te mau faraoa monamona, ’e te faraoa pa’apa’a e rave rahi. ’Ua hope te ’ōro’a nō te pō noera nā roto i te taera’a mai o Jultomten—Pāpā noera—tei hōpoi mai i te mau tao’a aroha nā te mau tamari’i ato’a. Nā mua a’e rā ’o Jultomten e haere mai ai, e ha’aputuputu noa tō’u metua vahine i tō’u taea’e, tō’u mau tuahine, ’e iā’u nei nō te fa’aro’o i tō’u metua tāne ’ia tai’o i te ’ā’amu nō noera mai roto mai i te Faufa’a ’Āpī.
E ta’ata marū tō’u metua tāne, e ta’ata tei ’ite i te tahi noa mau ta’o i roto i te reo o tōna metua vahine ’e te reo marite tāna i ha’api’i i tōna pa’arira’a. E ta’ata parau ti’a ’oia e te ’āfaro ’e ’aita ’oia i fāri’i i te ha’apoupoura’a. ’Aita ā ’oia i rave peu a’e nei, ’e ’aita ā ’oia i fa’anehenehe. I te hō’ē pō noera ’ua tai’o ’oia i te Luka 2. ’Ua tai’o ’oia nō ni’a ia Iosepha ’e ’o Maria ’o tei rātere i Betelehema, te melahi i fā mai i te mau tīa’i māmoe, te fānaura’a o Iesu, ’e ’o Maria e feruri ra i te mau mea i tupu i roto i tōna māfatu. ’Aita rā tō’u metua tāne i fa’aea i te ’īrava 19 ; ’ua tāmau ’oia e te ’ā’amu o Maria ’e Iosepha e hōpoi ra i te ’aiū Iesu i te hiero i Ierusalema nō te pūpū i te hō’ē ō ’ia au i te ture a Mose.
’Ua tai’o tō’u metua tāne :
« ’E, i teie nei, tē vai ra te hō’ē ta’ata i Ierusalema, ’o Simeona te i’oa…
« ’E i fa’a’itehia mai ’oia e te Vārua Maita’i ē e’ita ’oia e pohe vave ’ia ’ite rā ’oia i te Mesia ’o te Fatu ra.
« ’E i arata’ihia ’oia e te Vārua i roto i te hiero ; ’e tē hōpoi mai ra [Maria ’e Iosepha] i te tamaiti ra ia Iesu…
« [I muriho, ’ua rave atu ra Simeona iāna] ’ua hi’i ihora, ha’amaita’i atura i te Atua, nā ’ō atura,
« E te Fatu, e tu’u ’oe i tō tāvini i teie nei ma te hau, ’ua au ho’i i tā ’oe parau :
« ’Ua ’ite a’enei ho’i tā’u mata i te ora nā ’oe,
« i ha’apa’ohia e ’oe i mua i te mata o te ta’ata’ ato’a nei ». 2
I taua taime ra, e fa’aea ïa tō’u metua tāne tau taime iti. ’Ei reira ’ua hōro’a ’oia i tōna ’itera’a pāpū. ’I roto noa ihoā i tōna huru paraparaura’a poto, parau mai ra ’oia nā roto i te reo peretāne-finelane « ’Aita paha i ti’a iā’u ’ia rave i terā ’aiū Iesu i roto i tō’u rima, terā rā ’ua ’ite au ē, mai ia Simeona ē, terā ’aiū ’o te Tamaiti ïa a te Atua, tō’u Fa’aora ’e tō’u Ora. E mea mau ’oia, ’e tē ora nei ’oia. I muri iho i teie fa’ahitira’a, ’ua hi’o mai ’oia ia mātou tāta’itahi e tōna mata nīnamu ’ana’ana ’e ’ua parau mai ’oia nā roto i te tā’irira’a upo’o marū, « ’e nehenehe ato’a ’outou e ’ite i te reira ».
’Ua ’ite tō’u metua tāne ’e tō’u metua vahine ē, ’o vai terā ’aiū nō Betelehema ’e e aha tāna e rave ’ia pa’ari mai ’oia. ’Ua taui teie ’itera’a ia rāua. ’Aita rāua i hina’aro noa ’ia ti’aturi mātou te mau tamari’i i tā rāua mau parau, 3 ’ia ’ite ato’a rā nā roto ia mātou iho, ’e ’ia ti’a ia mātou ’ia taui-ato’a-hia. Ma te tūra’ihia e te ’itera’a pāpū o tō’u mau metua, ’ua fa’aoti au e haere nā ni’a i te ’ē’a o te fafaura’a ma te hia’ai ’ia « ’ite ato’a i te reira ».
I te 11ra’a o tō’u matahiti, tē ora ra tō mātou ’utuāfare i Göteborg (Tuete). ʼUa ani te peresideni misiōni i te feiā ’āpī ato’a ’ia tai’o i te Buka a Moromona. ’Aita vau i tāpa’ohia i roto i te anira’a, terā rā, e diakono tō’u tua’ana i taua taime ra, ’e ’ua fāri’i ’oia i te tītaura’a. ’Ua hina’aro noa vau e riro mai tō’u taea’e ’e e rave i te mea tāna i rave, nō reira ’ua ’āmui vau i roto i teie tītaura’a. ’Ua hōro’a mai tō’u mau metua i tō’u mau tuahine ’e iā’u tā mātou iho mau pu’e pāpa’ira’a mo’a, ’e ’ua ha’amata vau i te tai’o i te mau pō ato’a.
Tau ’āva’e i muri mai, ’ua fa’aitoito te peresideni Gōsta Malm, e tauturu i roto i te peresidenira’a misiōni, 4 i te feiā ’āpī e tai’o ra i te Buka a Moromona ’ia ani i te Atua e parau mau ānei te reira. ’Ua fa’aoti au e rave iho ā i te reira. ’I taua pō ra, ’ua tīa’i au ’ia vare’a tō’u tua’ana i te ta’oto. ’Ua pou vau mai ni’a mai i tō’u ro’i, ’ua tūturi au i ni’a i te tahua to’eto’e, ’e ha’amata a’e ra vau i te pure. ʼAita i maoro e au ra ē, te parauhia mai ra iā’u ē, « I parau noa nā vau ia ʼoe e parau mau te reira ». I reira, ’ua tae mai te hō’ē hau fāito ’ore i roto iā’u. ’Ua ’ite au i roto iā’u iho, nā roto i te mana o te Vārua Maita’i ē, e parau mau te Buka a Moromona. 5
Mai tei fafauhia i roto i te Ōmuara’a o te Buka a Moromona, ’ua « ’ite ato’a [vau] nā roto i te [mana o te Vārua Maita’i] ē ’o Iesu Mesia te Fa’aora o te ao nei […] e peropheta ’o Iosepha Semita nāna i teie mau mahana hope’a nei, ’e ’o te ’Ēkālesia a Iesu Mesia i te Feiā Mo’a i te Mau Mahana Hope’a nei te bāsileia o te Fatu ’o tei fa’ati’a-fa’ahou-hia i ni’a i te fenua nei, nō te fa’aineine i te Tae-Piti-Ra’a mai o te Mesia ». 5 Terā ’itera’a, ’āmuihia mai e te mau ’ite i muri iho, ’ua fa’ataui ïa iā’u, mai tō’u mau metua.
Teie ’itera’a—’o Iesu Mesia te Tamaiti a te Atua ’e ’ua fa’asātaurohia ’oia nō te mau hara a tō te ao nei—e hōro’a pae vārua ïa. 7 ’Aita teie hōro’a i tā’amuhia i ni’a i te hō’ē tōro’a autahu’ara’a ’e ’aore rā i ni’a i te hete ; e roa’a rā te reira i te mau ta’ata ato’a ’o tē fa’ata’a ia rātou nō te reira. ’Aita tātou i anihia ’ia hōpoi mai i te mau hōro’a ’auro, te mono’i, ’e te mura i te Fa’aora nō te fāri’i i teie hōro’a nehenehe pae vārua. ’Ua aniha ia tātou ’ia hōro’a ia tātou iho. 8 ’Ua tāparu ’o Amaleki, te peropheta o te Buka a Moromona, i te mau ta’ata i te nā-’ō-ra’a ē, « ’E i teienei… ’ua hina’aro vau ’ia haere mai ’outou i te Mesia, i Tei Mo’a i ’Īserā’ela nei, ’e ’ia fāri’i i tāna fa’aorara’a, ’e te mana nō tāna fa’aorara’a. ’Oia ïa, ’a haere mai iāna, ’e ’a pūpū mai i tō ’outou mau vārua ato’a ’ei ō nāna […] ’e mai te Fatu e ora nei, e fa’aorahia ïa ’outou ». 8
I tō’u pa’arira’a mai, ’ua ’ite au i tō’u mau metua i te tāvinira’a ia vetahi ’ē. ’Ua ’ite au ia rāua i te ha’apa’aora’a i te mau fafaura’a tā rāua i rave e te Atua. ’Ua ’ite au ia rāua i te rave-itoito-ra’a i te hāhaerera’a ’utuāfare ’e te hāhaerera’a ha’api’ira’a, ma te tūtava i te utuutu i te feiā ta rāua e tāvini ra. ’Ua ’ite au ia rāua i te ’āmuira’a i roto i te mau ’ōro’a hiero ’e ’ua fāri’i i te mau pi’ira’a o te ’Ēkālesia. ’E i te mau matahiti ato’a, i te pō noera, ’ua fa’a’ite pāpū tō’u metua tāne mai ia Simeona nō te Fa’aora o Iesu Mesia. I te mau matahiti i muri mai, ’ua fa’atae tō’u metua tāne i tāna anira’a ’ia « ’ite ato’a » i te mau metua ho’ovai ’e te mau mo’otua.
E rave rahi mau matahiti i muri a’e i tō’u ’itera’a i roto i tō’u ’āpīra’a nō ni’a i te Buka a Moromona, ’ua pi’ihia vau ’ei Hitu ’Ahuru hui mana fa’atere rahi ’e ’ua tonohia vau ’ia a’o i te ’āmuira’a rahi. ’Ua ’imi tō’u mau tuahine i te rāve’a ’ia māta’ita’i tō’u metua tāne 92 matahiti i te ’āmuira’a—’e i tā’u ihoa rā a’ora’a. I muri mai i te ’āmuira’a rahi, ’ua haere au i tōna fare. ’Ua ui au, « Pāpā, ’ua māta’ita’i ānei ’oe i te ’āmuira’a ? » ʼUa pāhona mai ʼoia, « Ja [’ē]. » ’Ua ui au, « ’Ua fa’aro’o ānei ’oe iā’u i te paraparaura’a ? » ʼUa pāhona mai ʼoia, « Ja [’ē]. » Ma te mana’o fiu ri’i, ’ua nā ’ō atu vau : « E pāpā, e aha tō ʼoe manaʼo ? » ʼUa parau mai ʼoia, « ’Aita, ʼe mea maitaʼi roa. Fātata roa vau i te fa’ahiahia ».
I muri i te hō’ē tau roa ’ua parau ’oia, « Dale, e ’ohipa tā’u e ti’a e parau ia ’oe. » ’Ite atu ra vau ē, tē ’imi ra vau i te ha’apoupoura’a, ’are’a tō’u metua tāne, ’ua tapitapi ïa nō te tahi ’ohipa faufa’a a’e i te ha’apoupou iā’u. ’Ua parau fa’ahou ’oia, « I na pō ra, ’ua moemoeāhia vau. ’Ua moemoeāhia vau ē ’ua pohe au, ’e ’ua ’ite au i te Fa’aora. ʼUa rave ʼoia iāʼu i roto i tōna poro rima ʼe ʼua parau mai ’oia iā’u ē, ʼua faʼaʼorehia tāʼu mau hara. ʼE e mea au maitaʼi. » Tē reira noa tā tō’u metua tāne i parau pūai mai. Terā rā, e mana’o rahi tei tōna hōho’a mata ; ’ua ’ite ’oia ia Iesu Mesia. ’Ua ’ite ’oia ē, te pēpe i Betelehema, ’o tei « tupu i te pa’ari ’e te rahi, ’e i mua i te Atua ’e te mau ta’ata », 10 ’o tōna ïa ora, ’o te Tamaiti a te Atua o tei tupu i te rahi ’e tei amo i tāna mau hara. ’E ’ua ’ite a’e na tō’u metua tāne i te reira nā mua a’e teie moemoeā. ’Ua riro te moemoeā mai te hō’ē aroha marū—e hōro’a—nō ’ō mai i te hō’ē Metua i te ao ra here i te hō’ē ta’ata pa’ari, ’o tei fa’aru’e mai e piti ’āva’e i muri iho. Nō te mau hōro’a noera ato’a ’o tā’u i fāri’i, ’ua rahi atu tō’u here i te hōro’a o te ’itera’a pāpū ’e te fa’aro’o i fa’ahi’o-maita’i-hia mai e tō’u metua tāne ’e tō’u metua vahine.
I teie noera, ’a ani i tō ’outou Metua i te Ao ra i te hōro’a pae vārua nō te ’itera’a i te orara’a mau o te Fa’aora o te ao nei. E taime nehenehe ’e te tumu te tau noera nō te tuatāpapa i tōna orara’a ’e nō te tūtava ’ia pe’e i tōna huru ’e tāna mau ’ohipa. Mai te mea e nā reira ’outou, e nehenehe ’outou e ’ite ē, ’o Iesu te Mesia, te Tamaiti a te Atua, ’e ’ua amo ’oia i tā ’outou mau hara. E hōro’a maita’i-roa ’e te vai-maoro roa a’e te reira i te mau hōro’a ato’a tā Jultomten i hōpoi mai nō te mea e taui te reira ia ’outou. E ha’api’i ’outou ē, e mea au nā te Fatu ’ia tatā’i i te mea e ’ore e ti’a ia ’outou ’ia tatā’i, ’ia rapa’au i te mau ’ahi’ahi e’ita e ti’a ia ’outou ’ia rapa’au, ’ia fa’a’āfaro i te mau mea tei pararī roa, ’e ’ia tāfaifai maita’i roa i te mau ’ā’au tatarahapa.
Mai tō’u metua tāne i te tāhuti nei, ’ua ’ite au ē, e’ita vau e tāpe’a i terā pēpe Iesu i roto i tō’u rima, terā rā ’ua ’ite au ē, mai ia Simeona i ’ite, ’o te Tamaiti a te Atua terā pēpe, tō’u Fa’aora ’e tō ’outou Fa’aora, tō’u Ora ’e tō ’outou Ora. E mea mau ’oia, ’e tē ora nei ’oia. « E nehenehe ato’a ’outou e ’ite i te reira ! » I te i’oa o Iesu Mesia, ’āmene.