’A fāri’i mai iāna
Purera’a Noera a te Peresidenira’a Mātāmua nō 2022
Sābati 4 nō Tītema 2022
’Īriti i tō tātou ’ā’au nō te fāri’i
E fa’a’ī te hau ’e te māhanahana o te hō’ē pehe fa’auruhia i tō tātou vaerua.
’Ia ’oa’oa i te Noera !
’Ua tupu te reira i te ’āva’e Tītema 1943, ’e ’ua topa te ao nei i roto te Piti o te Tama’i Rahi. ’Ua pe’ape’a rātou nō tō rātou feti’i i te ātea ’e ’ua pe’ape’a ato’a te feiā i te fare nō te iti ho’i o te moni ’e te mā’a. Ma te tīa’i-māite-ra’a i te mau rāve’a a te ’utuāfare, ’ua māere roa tō’u metua tāne, ’o Harold Hillam, e tamaiti e iva matahiti i taua taime ra, i te fāri’ira’a i te hō’ē tao’a hōro’a temeio nō te Noera—te hō’ē pere’o’o auahi. E ’ere i te hō’ē noa pere’o’o auahi tahito ; e tere teie pere’o’o auahi ’oia ana’e nā ni’a i te ’ē’a turu. ’Aita e tītauhia e tūra’i. E au ra ē, e’ita roa atu e nehenehe e parau ē e mea mau teie ō fa’ahiahia mau. ’Auē ïa tō Harold poihere rahi i taua pere’o’o auahi ra.
Tau matahiti i muri mai, ’a fātata mai ai te Noera, ’ua matara mai te ao nei mai roto mai te tama’i rahi. Teie rā, ’aita te pae fa’anava’ira’a faufa’a i St. Anthony na’ina’i, nō Idaho, i maita’i mai ’e nō te ’utuāfare o tō’u metua tāne, ’ua ’ino roa atu ā ïa. ’Ua ro’ohia te metua tāne o Harold i te hō’ē ma’i rahi ’e ’ua fātata roa i te pohe. ’Aita ïa e mau tao’a hōro’a nā te ta’ata i taua Noera ra, ’oia ato’a nā Harold ’e tōna teina, o Arnold.
Tau mahana nā mua a’e i te Noera, ’ua haere mai te metua tāne o Harold e hi’o iāna ’e ’ua ui marū mai iāna, « Harold, e fāri’i ānei ’oe e hōro’a i tā ’oe pere’o’o auahi nā Arnold, ’ia ti’a ’iāna ’ia fāri’i i te hō’ē tao’a hōro’a nō te Noera i teie matahiti ? »
’Ua fa’aro’o maita’i ānei ’oia i tōna metua tāne ? Tāna pere’o’o auahi here ? ’O te anira’a teie i te mau anira’a ato’a.
I te po’ipo’i Noera, ’e ’ua tuō Arnold ma te ’oa’oa ’a fāri’i ai ’oia i te hō’ē pere’o’o auahi mai tā Harold.
’Ua ’ite ’oi’oi ra Arnold ē, ’aita Harold e ha’uti fa’ahou ra e tāna pere’o’o auahi. I te pae hope’a, ’ua ’ite a’e ra Arnold ē, e ’ere tāna tao’a faufa’a rahi mai te pere’o’o auahi a Harold—e pere’o’o auahi rā te reira a Harold ! I tō Arnold ta’ara’a i te aura’a o te ō, ’ua riro mai teie pere’o’o auahi ’ei tao’a faufa’a rahi mau.
Nō’u nei, e tao’a hōro’a mau teie ’ā’amu ’utuāfare—’e ’eiaha noa nō te mea e fa’aha’amana’ora’a te reira i tō’u metua tāne here ’e tōna taea’e here. Hau atu rā i te faufa’a, e fa’aha’amana’o te reira iā’u i te tusia—te tusia ’e te aroha o te Tamaiti here a te Atua—’o ’oia ’o tā tātou e fa’ahanahana nei te fānaura’a.
’O Iesu Mesia ’e ’o ’oia tā tātou tao’a mātāmua ’e te mure ’ore nō Noera. Tē fa’a’ite pāpū nei au nō teie parau mau : ’Ua fānauhia ’oia, ’ua ora ’oia ’e ’ua pohe ’oia nō tātou, ’e tē ora nei ’oia—i teienei !
’Auē ïa tātou i te ha’amaita’ihia ’ia riro ’ei mau ta’ata fāri’i i teie tao’a ’oa’oa. I roto i te mau parau o te hīmene Noera herehia : « ’Ua tae mai te Mesia, ’oa’oa tātou ! ’A fāri’i mai iāna » 1
’Ua ha’api’i mai Elder Neal A. Maxwell ē : « Nā roto i te mau mea ato’a tā te Atua i hōro’a nā tātou, e ti’a ia tātou ’ia riro ’ei mau ta’ata maita’i a’e nō te fāri’i, ’aita rā tātou mai te reira. Tātou ’o tē mana’o nei ē, e mea nava’i tātou ’e te ti’amā, pinepine tātou i te ’ite i te teimaha, te fifi roa, nō te fāri’i …
« [Teie rā], te mau ō a te Atua, ta’a ’ē atu i te mau tao’a hōro’a nō te tau, e mea mure ’ore ïa ’e te tāhuti ’ore, o te fa’atupu i te hō’ē Noera tāmau ’o tē ’ore roa e hope ! »2
Nō reira, nāhea ïa tātou ’ia fāri’i tano i teie hōro’a fa’ahiahia mau ? Nāhea tātou i te mā’iti i te ō a te Fa’aora i te mau mahana ato’a, tōna aroha ’e tāna tara’ehara ?
E vaiiho na tātou i te mau māramarama o te fare toa ’e tae noa atu i te mau monamona, ’e ’ia ’apo mai i te mau ti’ara’a ha’eha’a ’e te mau mātu’u tīa’a o te mau ta’ata fāri’i mātāmua o te ’aiū Fa’aora.
Fāri’i i tōna mo’ara’a
’A fātata mai ai te fānaura’a o te Fa’aora, ’ua haere Maria ’e o Iosepha nā roto i te mau ’ārepurepura’a o Betelehema, ’ua ’ī rā te mau fare tīpaera’a. ’Aita tā te ta’ata e vāhi nō rāua ? ’Aita ānei e ta’ata nō te hōro’a i te fa’afa’aeara’a nō rāua ? ’Ua ’ite Maria i te ō tāna e amo ra, ’aita rā tā te ta’ata e vāhi nō te fāri’i i te reira, nō te fāri’i iāna.
E’ita tātou e nehenehe e ’ite maita’i i te mana’o o Maria ’e o Iosepha i taua taime ra, ’ua feruri noa rā vau, ia rāua i te haere-noa-ra’a i mua ma te pūai ’e ti’aturi pāpū. Ma te tāpe’a i te anira’a a te melahi ē « ’eiaha e mata’u »3 ’e i te fa’aineinera’a i teienei nō te fānaura’a o Iesu, ’ua ti’a roa ia rāua ’ia vaiiho i te tītaura’a ato’a nō te hō’ē fare au maita’i ’e nō te haere atu e pārahi i roto i te hō’ē phātene hau ’e te marū. Terā rā, te vāhi tei fa’arirohia ’ei mea au ’ore, ’aita ïa i vai noa. ’Ua fātata te Fatu i te fa’a’ī i taua ’erera’a ra i te mo’ara’a.
Mai tā te Luka 2:7 tuiro’o e parau ra « fānau ihora ’oia i tāna tamaiti matahiapo, vehī ihora i te ’ahu, tu’u atura i roto i te phātena, nō te mea ’aore atura rāua i ō i roto i te fare tīpaera’a ».
’Ua haere mai tō tātou Fa’aora—taua ō hanahana nō te ora, te tīa’ira’a ’e te fafaura’a, i te fenua nei.
E ti’a ānei ia tātou ’ia fa’aineine i te vāhi i roto i tō tātou ’ā’au nō te fāri’i i te Mesia ’e nō te fa’ati’a i tōna mo’ara’a ’ia fa’a’ī i tō tātou mau vāhi ’ere ? Mai ia Maria ’e Iosepha, e nehenehe tā tātou e ti’aturi iāna noa atu i roto i te mau tupura’a i te tahi taime, e mea teimaha. Te arata’ira’a—e tae noa atu te mau semeio—’o te tomo mai i roto i tō tātou orara’a e ’ere paha nā roto i te ’ārepurepura’a, ’aita ato’a i ni’a i te mau tahua ’e te tahua tū’aro, i roto rā i te mau vāhi māniania ’ore i reira tātou e ora ai ’e e rave ai i te ’ohipa—i reira tātou e haere ai e ’imi i te tauturu. I te mau vāhi ato’a i reira e tupu mai ai tō tātou mau hina’aro ha’eha’a, e nehenehe tātou ’e e fāri’i i te mau pāhonora’a i tā tātou mau pure muhumuhu.
Fāri’i i tāna anira’a ’ia ’ohipa
E ’ere ānei i te mea fa’ahiahia i te mea ē, te tahi o te mau ta’ata fāri’i mātāmua i te ’Arenio a te Atua, e mau tīa’i māmoe ?
’Ua tāpo’i te pō i te fenua ’a putuputu ai te mau tīa’i māmoe māere i raro a’e i te hō’ē hihi ’ana’ana o te māramarama, ’a tere ai te ra’i ’e te fenua i roto i te ’ōro’a hanahana nō te fānaura’a o te Fa’aora.
« ’Ua parau mai ra rā te melahi ia rātou, ’eiaha e mata’u inaha ho’i e parau maita’i tā’u e hōpoi mai ia ’outou nei, ’o te riro ïa ’ei ’oa’oara’a nō te ta’ata ato’a …
« I na’uanei ho’i i fānau ai te Ora nō ’outou i te ’oire o Davida, ’oia ho’i te Mesia ra o te Fatu ».4
Mea au nā tātou ē, ’aita teie mau tīa’i māmoe itoito i fa’atāere i tā rātou fāri’ira’a, ’ua rū atu rā rātou nō te haere e fārerei i tō rātou Ari’i. ’Ua ha’api’i mai tātou nā roto mai ia rātou ē te fāri’ira’a e parau ïa nō te ’ohipa. Tē parau mai nei te Luka ia tātou ē « haere ’oi’oi atu ra rātou ’e ’ite atu ra ia Maria rāua ’o Iosepha, ’e i taua tamaiti iti ra i te vai-noa-ra’a i roto i te phātene ».5
E mea pinepine tō tātou mau mana’o ha’iha’i nō ni’a i te Fatu i te ’ore e fāri’ihia nō te mea ’aita te reira e tū’ati maita’i ra i tā tātou tārena, tā tātou mau fa’anahora’a, ’aore rā tō tātou taime. Tē fa’aha’amana’o mai nei te ’ā’amu nō Noera ia tātou, ’ia riro mai taua mau tīa’i māmoe itoito ra tei ’ore i fa’atāere nō te rave i te mea i tītauhia nō te fāri’i i tō rātou Ari’i.
I teienei, ’ua ’ite ānei ’outou ē ’ua fa’aō mai Luka i roto i te ’ā’amu o te Noera i te hō’ē fa’aitoitora’a ’oa’oa ē, te fāri’ira’a iāna ’o te fa’a’itera’a ïa iāna, ma te fa’ata’a ē, « e ’ite atura rātou i te reira [ia Iesu], ’ua fa’a’ite hua atura rātou i tei parauhia mai ia rātou i taua tamaiti ra ».6 ’Ua fāri’i teie mau tīa’i māmo’e i teie poro’i nā te ra’i mai, ’ua haere atu ma te fa’atāere ’ore ’e ’ua riro ’oi’oi mai ’e i muri iho ’ei mau ’āfa’i ve’a nō te ra’i, i te porora’a i tō rātou « ’oa’oa i te ao nei » ’e te anira’a i te tā’āto’ara’a ’ia « fāri’i i [tō rātou] Ari’i ! » 7
Fāri’i ma te fa’aro’o rahi
I teienei e fāriu nā tātou i ni’a i te mau feiā pa’ari. Tē ti’a nei rātou i rotopū i te feiā ’imi rahi ia Iesu Mesia. ’Ua hōro’a itoito rātou i tō rātou orara’a nō te ha’apa’o i te fa’a’itera’a nō te ra’i, ’e ’ia tae mai te reira, ’ua vaiiho rātou i muri te au maita’i o tō rātou fare, te ’ohipa, te ’utuāfare ’e te mau hoa nō te pe’e i te fēti’a ’e nō te ’ite mai i tō rātou Ari’i.
Ta’a ’ē atu i te mau tīa’i māmoe, nō rātou e tere tāmau ïa ’o te rave i te taime rahi. ’Ua tītauhia ia rātou ’ia mā’imi, ’ia ani, ’ia tīa’i ’e ’ia haere, ’e i muri iho ’ia rave fa’ahou, e tae roa ’ua ’ite atu rātou i te tamari’i ’āpī ’e ia Maria, tōna metua vahine. ’Ua pūpū atu rātou i te mau ō tei riro ’ei mea faufa’a rahi mau ’e ’ua tīpapa ihora i raro ’e ’ua tāhopu atura iāna.8
’Ua feruri pinepine vau : I roto i tā tātou fāri’ira’a i te Mesia, tē ’imi itoito rā ānei tātou iāna ’e i muri iho tē vaiiho rā ānei tātou iāna ’ia arata’i i tō tātou tere i te mau vāhi ’e i te mau ta’ata ’ite-’ore-hia e tātou ? Nāhea tātou ’ia fa’a’ite i tō tātou māuruuru nā roto i mau ō ’e te ha’amorira’a ’o tā tātou e pūpū nei ?
E ao tō tei fāri’i
Terā ïa—te ’ā’amu rahi nō Noera.
E au mau hoa here, e ao tō tei fāri’i. Mai te ō herehia nō te pere’o’o auahi a tō’u metua tāne ’e te mau tao’a aroha o te taime ’e te tao’a rahi tei ravehia ’e te mau ’utuāfare ’ati a’e te ao nei, e mea ha’iha’i roa te reira mau ō ’ia fa’aauhia i te fāri’ira’a i te ō mau nō te Noera—teie tā Iesu Mesia.
« Nō te mea e aha ihora ïa te ta’ata e faufa’ahia ai ’ia tu’uhia atu te hō’ē hōro’a iāna ra, ’e ’ia ’ore ’oia ’ia fāri’i mai i taua hōro’a ra ? »9
’A feruri na i teie pāpa’ira’a nā roto i te māramarama o teie parau mau mure ’ore : « I aroha mai te Atua i tō te ao, ’e ’ua tae roa i te hōro’a mai i tāna Tamaiti fānau tahi, ’ia ’ore ’ia pohe te fa’aro’o iāna ra, ’ia roa’a rā te ora mure ’ore ».10
Mea au nā’u te fafaura’a ē, ’o ’oia o tē fāri’i mau i te hōro’a a te Mesia tei hōro’ahia i taua pō mo’a ra, e roa’a ïa te ora mure ’ore !
Nō te reira tē ’ite nei tātou ē, maoti tā tātou mau tauto’ora’a i te mau mahana ato’a nō te fāri’i hope roa i te Mesia, e riro mai tātou mai tā tō tātou peropheta, te peresideni Russell M. Nelson, i ani mai : « hō’ē nūna’a ’aravihi, ineine ’e te ti’amā nō te fāri’i i te Fatu ’ia ho’i mai ’oia, hō’ē nūna’a tei mā’iti a’ena ia Iesu Mesia ».11
’Auē ïa hanahana ’ia feruri i taua mahana ra, i reira ’a parau ’āmui ai tātou ē, « ’ua tae mai te Mesia ; ’oa’oa tātou ! ’A fāri’i mai [tātou tāta’itahi] iāna ! »12 I te i’oa o Iesu Mesia, ’āmene.