E parau maita’i ’o tē riro ’ei ’oa’oara’a
Purera’a Noera a te Peresidenira’a Mātāmua nō 2022
Sābati 4 nō Tītema 2022
’Oa’oa i te Noera ! Māuruuru ia ’outou ato’a nō tā ’outou mau parau poro’i, te pehe ’e te tāvinira’a tei ha’api’i i « te parau maita’i o tē riro ’ei ’oa’oara’a » i teie pu’e tau Noera.
E rave rahi hanere mirioni ’o tē fa’ahanahana nei i te fānaura’a o Iesu Mesia i teie pu’e tau Noera. E ti’a i te ao ato’a ’ia nā reira. ’Ua riro tōna orara’a ’ei orara’a nehenehe roa a’e i te hō’ē orara’a i orahia a’e nei.
I.
’Ia au ato’a i te parau a tō te ao nei, ’ua fa’atupu te orara’a tāhuti o Iesu nō Nāzareta i te hō’ē ’ohipa rahi i ni’a i teie ao ’e tōna ’ā’amu hau atu i te hō’ē orara’a i orahia a’e nei. ’Ua riro ’oia ’ei tumu parau mātāmua nā te mau peropheta ’e te mau rohipehe i te roara’a e rave rahi tauatini matahiti. ’Ua ha’apa’ohia te anoihi ’e te pehe rahi roa a’e o te ao tōo’a o te rā i te fa’ahanahanara’a o te fānaura’a, o te orara’a, ’e o te misiōni a Iesu Mesia. I te roara’a o tō rātou orara’a, ’ua tuatāpapa te mau philosopho ’e te feia tuatāpapa i te fa’aro’o i tāna mau ha’api’ira’a. ’Ua riro tāna mau ha’api’ira’a ’ei fa’aurura’a i te mau pāpa’ira’a e rave rahi nō ni’a i te aroha, te fa’a’itera’a i te here mau o te Mesia.
’Aita hō’ē ta’ata i fāri’i i te ha’apoupoura’a rahi i tōna orara’a ’e i tāna mau ha’api’ira’a hau atu i te Fatu Iesu Mesia. ’Oia mau, tei roto i te reira te mau kātetara rarahi ati a’e Europa ’e te fenua Marite, e rave rahi o te reira, ’ua hau i te ’āfa tenetere nō te patu ia ratou. ’Aita i maoro a’e nei, ’ua hau i te 171 hiero a te ’Ēkālesia a Iesu Mesia i te Feiā Mo’a i te mau Mahana Hope’a nei tei ha’amo’ahia ’e tē fa’a’ohipahia nei, ’e e 129 hiero ’ē atu tē tātā’ihia nei, tē fa’anahohia nei ’aore rā tei fa’aarahia e te peresideni Russell M. Nelson i roto i tā tātou ’āmuira’a rahi nō ’Ātopa ra. Tē vai nei teie mau fare o te Fatu i ni’a i te mau fenua ato’a ’e i roto e 74 nūna’a o te ao nei. I reira, tē hōro’a nei tātou i tō tātou orara’a nō te pe’e ia Iesu Mesia.
E rave rahi mirioni ta’ata tei hōro’a i tō rātou orara’a ’e hau roa atu i te faufa’a, e rave rahi mirioni tei fa’ahōho’a i to rātou orara’a i ni’a i te hōho’a o te Fatu te Atua o ’Īserā’ela, Iehova, Iesu Mesia, tō tātou Fa’aora. ’Aita te peresideni Gordon B. Hinckley i fa’ananea te parau ’a ha’api’i ai ’oia ē, « ’Ua riro tōna hi’ora’a fa’aau ’ore ’ei mana rahi a’e nō te maita’i ’e te hau i roto i te ao ato’a nei ».1
II.
E nehenehe tātou e ’ite i te ’ōpuara’a ’e te tāpa’o faufa’a i roto i te fa’aarara’a hanahana o te fānaura’a o te Tamaiti Fānau Tahi a te Atua. Tē ’ite nei tātou i roto i te mau ’ā’amu o te faufa’a ’āpī ē, i roto i te mau tuha’a fenua hiti’a o te rā, ’ua hōro’ahia te mau fa’aarara’a o te fānaura’a o te tamaiti Iesu i nā pupu ta’a ’ē e toru, ’e tō rātou mau huru ta’a ’ē maita’i. Te mau pupu tei fāri’i i te fa’aarara’a nō te ra’i mai, e mau pupu ïa tei ha’eha’a roa, tei mo’a roa, ’e tei ’ī roa i te pa’ari.
’Ua hōro’ahia te fa’aarara’a mātāmua i te mau tīa’i mamoe i roto i te mau ’āfa’a nō Betelehema. ’Ua fa’a’ite mai te hō’ē melahi ’e te hō’ē pupu hīmene nō te ra’i « e parau maita’i […] ’o te riro ïa ’ei ’oa’oara’a nō te ta’ata ato’a […] ’oia ho’i te Mesia ra ’o te Fatu ».2 Penei a’e ’ua mā’itihia te mau tīa’i mamoe nō te fāri’i i te reira mau parau ’āpī maita’i nō te mea e ’ā’au marū ’e te ha’eha’a tō rātou. Nō reira, e fāri’i ta’a ’ē maita’i rātou i te parau poro’i o te ra’i, tā rātou i ha’apāpū nā roto i te haerera’a e hi’o i te fānau ’āpī. I muri iho, te parau ra te mau pāpa’ira’a ē, « ’ua fa’a’itehua atura rātou i tei parauhia mai ia rātou i taua tamaiti ra ».3 ’Ua riro tā rātou ’ohipa tīa’i mamoe ’e te mau ’ārenio tā rātou e fa’ā’amu ra, ’ei mau hi’ora’a tā te Fa’aora i fa’a’ohipa i roto i tāna ha’api’ira’a. ’Oia ato’a, i tō Iesu haerera’a mai ia Ioane Bāpetizo ra i te ’ōmuara’a o tāna tāvinira’a, ’ua parau te reira peropheta, « ’A hi’o na i te ’Ārenio a te Atua, ’o tei hopoi ’ē atu i te hara o te ao ».4
Te piti o te fa’aarara’a o te fānaura’a o te Mesia ’ua tupu ïa i roto i te hiero o Ierusalema, i ni’a e piti nā rave ’ohipa mo’a, maoti te maita’i o tō rāua orara’a, i ti’a ai ia rāua ’ia fāri’i i te fa’a’itera’a a te Vārua Maita’i. I tō Maria ’e Iosepha hopoira’a mai i te tamaiti Iesu i te hiero, nō te tūsia i fa’ata’ahia nō te fānau mātāmua, ’ua fa’a’ite pāpū ’o Simeona ’e ’o Ana ē, ’o ’oia te Mesia. Tē fa’a’ite ra te mau pāpa’ira’a ē, ’ua rave a’era Simeona i te ’aiū i roto i tōna nā rima ’e ’ua ha’amaita’i a’era i te Atua i fa’ati’a iāna ’ia ’ite « i te ora nō ’oe », e « ti’arama ’ei ha’amāramarama i te ’Ētene, ’e ’ei hanahana nō tō ’oe ra ta’ata nō ’Īserā’ela ». I te ’itera’a atu Ana, « te peropheta vahine », « e ’oia i tomo mai i roto i reira ra, ha’amaita’i ato’a atura i te Fatu, ’e ’ua parau ihora iāna i te feiā ato’a i ha’apapa i te ora i Ierusalema ra ».5
’Ua fāri’i ato’a mai te toru o te pupu i te parau nō taua fānaura’a fa’ahiahia ra. Tē fa’a’ite ra te Bībīlia ē, ’o tā Iosepha Semita i ha’apāpū ri’i mai, « e Magoi tei haere mai i Ierusalema mai te hiti’a o te rā mai, ’e ’ua ui mai ra, Tei hea te Ari’i fānau ’āpī o te ’Āti-luda nei ’ite a’enei ho’i mātou i tōna feti’a i te hiti’a о te rā, i haere mai ho’i mātou e tāhopu iāna ».6
’Ia au i tā rātou tuatāpapara’a, e’ita tātou e fē’a’a ē, nā te Fatu rātou i arata’i nō tāna mau ’ōpuara’a mo’a. Tē ha’api’i nei te Bibilia ē, « te mau mea a te Atua, ’aore roa te hō’ē i ’ite, maori rā ’o te Vārua о te Atua i roto iāna ra ».7 Teie mau ta’ata pa’ari, nō te tahi atu fenua rātou ’e nō te tahi atu hīro’a tumu, nō reira, hō’ē ’itera’a nō rātou, ’ua riro ïa ’ei fa’aha’amana’ora’a ē, ’ua fānauhia te hō’ē Mesia nō te mau nūna’a ato’a. Ta’a ’ē atu i te reira, e riro ē, tē vai ra te tahi atu ’ōpuara’a. Te faufa’a o te ’auro ’e te mau ō tā te mau magoi i pūpū, ’ua tauturu paha te reira ia Maria ’e ia Iosepha ’ia tere ’oi’oi i Etiopia ’e ’ia fa’aea i reira nō te fa’aora i te ’aiū Iesu i te taime ’a ha’afifihia ai tōna ora nā roto i te fa’auera’a ’ino a te ari’i Heroda.8
E ’ere anei i te mea fa’ahiahia i te mea ē, te temeio o te fānaura’a o te Mesia ’e te aura’a o te reira ’ohipa, ’ua heheu-noa-hia i te feiā ha’eha’a, te feiā tei mo’a roa, ’e i te feiā pa’ari ? Mai tā James E. Talmage i ha’api’i i roto i te buka Iesu te MesiaOia ïa, ’ua fa’aineine te Atua i tōna mau ’ite nō te pāhono i te mau i te mau huru ato’a o te ta’ata—te fa’a’itera’a a te mau melahi nō teia veve ’e tei ha’eha’a, te fa’a’itera’a a te mau ta’ata pa’ari nō te arii ’ā’au teitei ’e nō te mau tahu’a te’ote’o nō Iudea ».9
E nehenehe te ha’amana’ora’a ia Simeona ’e ’o Ana, e tūra’i ia tātou ’ia riro mai ia rāua te huru, ’e ’ia ’āmui i tō tātou ’itera’a nō te fānaura’a mo’a ’e tōna ’ōpuara’a nō teie pu’e tau Noera.
III.
Nō tātou, e, ’ere i te ’ohipa ’āpī te fa’ahanahanara’a i te fānaura’a o te Mesia. ’Aita e tau tō teie parau poro’i, ’e e mea mātarohia. ’Ua ha’api’ihia te reira ia Adamu. ’Ua ha’api’ihia i te mau tamari’i nō ’Īserā’ela. ’Ua fafauhia mai i te hua’ai o te metua Lehi. ’Ua ha’api’i tāmau noa te mau peropheta i te mau parau mau niu o te mau ha’api’ira’a ’e te tāra’ehara o Iesu Mesia. I te mau taime ato’a, ’ua fa’a’ite rātou i tāna misiōni ’e ’ua ha’api’i i tāna fa’auera’a ’ia here ’e ’ia tāvini te mau tamari’i a te Atua i te Atua ’e i te tahi ’e te tahi. ’Ua fa’ahiti-tāmau-noa-hia teie mau fa’ahitira’a parau ’e ’ua riro te reira ’ei parau poro’i faufa’a roa a’e o te tau a muri atu. Nō te feiā e pe’e nei i te Mesia, ’eiaha roa teie mau fa’ahitira’a parau ’ia tauihia. E fa’a’āpīhia rā te reira i roto i tō tātou orara’a tāta’itahi.
E fa’aara Noera i roto ia tātou i te hina’aro ’ia fa’a’ā’ano i tō tātou tā’amura’a nō te here ’e te autaea’era’a. Teie fa’aarara’a nō te ra’i mai, « ’ei hau tō teie nei ao ’e ’ia ’iteauhia mai te ta’ata nei »,10 ’aita ïa i tā’ōti-noa-hia nō te mau ta’ata tā tātou i here. E fa’atae ato’a i te reira i te mau hoa e ’itehia mai, i te mau ta’ata ’ē ’ē, e tae noa atu i te mau ’enemi. Noera, e taime ato’a nō te fa’a’ore i te hapa, e taime nō te fa’aora i te mau pēpē tahito ’e nō te fa’atupu fa’ahou i te mau autā’atira’a tei fifi.
Noera e taime ïa nō te fa’a’ore i te te’ote’o ’e te fa’atupu pe’ape’a, nō te arai i te parau fa’a’ino, nō te fa’a’ite i te fa’a’oroma’i ’e nō te fa’aiti i te mau ta’a-’ē-ra’a i rotopū i te ta’ata. Tē vai ra te ani-manihini-ra’a ia tātou ’ia fa’a’ite i te auhoara’a mau i te mau ta’ata ato’a, te mau ta’ata nō tā tātou ha’apa’ora’a fa’aro’o ’e ’arore rā e ’ere nō tā tātou ha’apa’ora’a fa’aro’o, ma te ha’apa’o i te fa’auera’a tā te Atua i ani i te peropheta Mose ’ia hōro’a atu i te mau tamari’i ’Īserā’ela :
« ’E ’ia purutia mai te ta’ata ’ē i o ’outou, i tō ’outou na fenua, ’eiaha ’outou e hāmani ’ino iāna.
’Ia riro rā te ta’ata ’ē e parahi iō ’outou na mai te ta’ata tupu ato’a ia ’outou, e aroha ho’i ’outou iāna mai te aroha ia ’outou ihora ».11
Noera e taime ïa nō te ha’amana’o ē, e mau tamari’i tātou pā’āto’a nā te hō’ē Metua i te ao ra tei hōro’a i tāna Tamaiti hō’ē roa ’ia fa’aorahia te mau ta’ata ato’a i te pohe ’e tei hōro’a mai i te mau ha’amaita’ira’a o te fa’aorara’a ’e te fa’ateiteira’a i te mau ta’ata ato’a mai te reira ato’a te huru.
’Ei pipi nā te Mesia, e ti’a ia tātou ’ia riro ’ei ta’ata au maīte ’e te aumihi hau atu i te mau nūna’a ato’a o te ao nei. E ti’a ia tātou ’ia ha’api’i i tā tātou mau tamari’i ’ia fa’a’ite i te ’ā’au maita’i ’e te aumihi i ni’a i te mau ta’ata ato’a. ’Oia mau, e ti’a ia tātou ’ia ha’apae i te mau autā’atira’a ’e te mau ’ohipara’a e nehenehe e ha’afifi i tō tātou huru, ’aore rā ’o tē ha’aparuparu i tō tātou fa’aro’o ’e tā tātou ha’amorira’a. ’Eiaha rā te reira e tāpe’a ia tātou ’ia ’āmui atu i te mau tauto’ora’a ’e te mau ta’ata nō te tahi atu ha’apa’ora’a, ’ia ti’aturi rātou, ’aore rā ’aita.
E rave rahi matahiti i ma’iri, ’ua fa’ahiti te peresideni Thomas S. Monson i teie mau parau :
« ʼUa ʼimi te mau tīaʼi māmoe i tahito ra ia Iesu te tamaiti. Tē ʼimi nei rā tātou ia Iesu te Mesia, tō tātou Taeaʼe paʼari aʼe, tō tātou Arai i te Metua, tō tātou Tāraʼehara, te Fatu nō tō tātou ora ; ʼoia tei te Metua i te mātāmuaraʼa ; ʼoia tei rave i niʼa iho iāna te mau hara o te ao nei ʼe tei pohe nā roto i tōna iho hinaʼaro ’ia ora tātou ē a muri noa atu. Teie te Iesu tā tātou e ’imi nei ».12
E ’aravihi ta’a ’ē tō te feiā mo’a i te mau mahana hope’a nei nō te fa’ahanahana i te parau poro’i fa’aora o Iesu Mesia i te roara’a o te matahiti. Tē mau nei tātou i te hōro’a o te Vārua Maita’i ’e tāna ’ohipa, ’o te fa’a’ite pāpū ïa i te Metua ’e i te Tamaiti.13 E mau tamari’i tātou nā te hō’ē Metua i te ao ra tei fa’a’ite ē, « ’ot eie ho’i tā’u ’ohipa ’e tō’u hanahana, ’ia fa’atupu i te tāhuti ’ore ’e te ora mure ’ore o te ta’ata nei ».14 ’E te mau peropheta a te Fa’aora, ’o Iesu Mesia, te Fatu ïa nō ’Īserā’ela, ’ua parau mai rātou i tōna ’evanelia :
« ’Ua haere mai ’oia i te ao nei, ’oia ’o Iesu, ’ia fa’asātaurohia nō te ao nei, ’e ’ia hopoi i te mau hara nō te ao nei, ’e ’ia ha’amo’a i te ao nei, ’e ’ia tāmā atu i te reira i te parau ti’a ’ore ato’a ra ;
« ’Ia ora nā roto iāna ’o rātou ato’a tā te Metua i tu’u atu i roto i tōna ra mana ’e ’o tei hāmanihia ho’i e ana ;
« ’O tē fa’ahanahana nei i te Metua, ’e ’o tē fa’aora nei i te mau ’ohipa ato’a a tōna rima ».15
Nō reira, i roto i tāna ’Ēkālesia i fa’aho’i-fa’ahou-hia mai, tē parau nei tātou ē, « nā roto i te Tāra’ehara a te Mesia e ti’a ai i te mau ta’ata ato’a ia fa’aorahia, nā roto i te ha’apa’ora’a i te mau ture ’e te mau ’ōro’a nō te ’evanelia ».16 Tē fa’a’ite pāpū nei au i te reira i te i’oa mo’a o Iesu Mesia, ’āmene.