9:41

Ia Manatua, Ia Manatua

Faigalotu o le Kerisimasi a le Au Peresitene Sili 2023

Tracy Y. Browning

Fesoasoani Lua i le Au Peresitene Aoao o le Peraimeri

Aso Sa, 3 Tesema, 2023

O le mea ou te nofo ai, e amata pe a i le masina o Novema, e foliga ai o le natura uma e siomia ai a’u e faiifo ma mamae. O le gasēsē o lau lanuvao, sa lelelelea malie ma pesepese mai ia te a’u i masina o le tautotogo ma le taumafanafana, ua liua nei i laau ua naumati ma le pa’ō gapāpā o laulaau mamago i lalo o o’u vae. O manulele sagisagi fiafia ua gūgū, ma e foliga mai ua mou atu le nanamu sasala manaia o fuga o laau. E galoma atu mo se taimi mea i le lalolagi natura ou te masani ai i le faaosofia o le olaga, ma i le gaogao ‘i’ī uma ua tuua—ma a o faapena foi ona tapunia le tausaga ma i le toetoe galo ia te a’u ona fiafia pea —ae taunuu loa le meaalofa o le Kerisimasi.

Ma i lo’u tulimanu o le lalolagi tele a le Atua, Ou te manatua. Ou te manatua e avatu le gauai i laau e tumau pea le lanulauava, e aumaia ai le manogi o ogalaau, feū, ma le palapala. Ou te manatua lo’u su’ea o fugalaau ma vinevao mu ulaula pe pa’emā ma faalogologo i pesepesega masani o le kerisimasi ia e ootia ai loto ma aiga ma maota o tapuaiga, e folafola atu ai “le lalolagi ia fiafia,” a o ou vaavaai atu mo faatusa o le Kerisimasi, “o loo pepese le lagi ma le natura” faatasi ma a’u ma valaaulia a’u ia manatua.

O se tasi o mea ofoofogia o lenei vaitau o le, e foliga mai o le lalolagi atoa o le Kerisimasi, ma le toatele i talaatu o o tatou tuaoi, e faaalu le taimi atoa e vaavaai ai ma le loto mo ma faatutumu ai o latou olaga i faatusa o le manatua i le Kerisimasi.

O le Kerisimasi o le alalaupapa lea tatou te malaga ai e taiala atu i tatou i le tausaga fou. Ma a o tatou folau, ua valaaulia i tatou e mafaufau i le vavega “o le Atua e faavavau, o le Alii, o le Foafoa o tuluiga o le lalolagi,”¹ o le na soifua mai i tulaga maualalo i le aai o Tavita ma “’aui i ie, o loo taoto i se moega vao.”² A o tatou faia la tatou malaga o le Kerisimasi, atonu e mafai ona tatou vaaia i tatou lava o ni alii ma ni tamaitai makoi o ona po nei, o autilotilo pe a i fetu i tumutumu o laau lanulauava ma moli o emoemo faataamilo ia i tatou ma “olioli i se olioli silisili”³ i faailoga ua tuu mai i o tatou luma e taiala ma faatonufolau ai la tatou malaga agai ia Iesu Keriso, ia te Ia o le “malamalama o le lalolagi.”⁴ A tatou maua le nanamu o se faamanogi patino o tautau i le ea i lenei vaitau, atonu o loo faamanatu mai ai ia i tatou ia tatou o mai ma aumai meaalofa e avatu i le “Alo o le Atua soifua”⁵—e le o ni “auro, pulu lipano, ma le pulu muro”⁶ ae o se taulaga tapua’i o o tatou “loto momomo ma se loto salamo.”⁷ Ma o i latou foi o ia i tatou, o e alolofa ma manatu i fanau, atonu e pei lava i tatou o ni leoleo mamoe o aso nei e “tausia ma vaavaaia a [tatou] lafu,”⁸ ma faalogologo i agelu i le lalolagi na auina mai e le Alii ma ni valaaulia e “aua le matatau,” aua o loo latou aumaia faatonuga i le mea e mafai ona maua ai lo tatou Faaola.⁹ Tatou te le manatua ea e musumusu atu nei “tala fiafia o le olioli tele” i taliga o a tatou fanau e fai ma se molimau? A oo ai ina latou vaaia, ma se maofa faatamaitiiti, ia lanu o le Kerisimasi o le mumu ma le lanuvao, auro ma le pa’epa’e, ona latou manatua lea o le taulaga togiola mama a’ia’i ma le atoatoa a lo latou Togiola, o Iesu Keriso, o lē na ofoina mai ia i latou le meaalofa o le faaolataga ma le ola fou ma le faavavau.

O le Kerisimasi ua mafai ai ona tatou faia se malaga faaleagaga i Peteleema e maua ai se molimau mo i tatou lava o lo tatou Faaola, o Iesu Keriso, ona tauave lea o lena molimau i luma ma laulaufaiva ua matalatala ma vae ma lima ua saunia e “faailoa atu i le lalolagi”¹⁰ ma molimau atu i mea uma ua tatou iloa e faatatau ia te Ia. E mafai ona tatou faia lena malaga i le Faaola e ala i le manatuaina.

Ua aumaia e le Atua ia i tatou le meaalofa o le manatua ina ia aua ai nei galo ia i tatou Le Foa’ia, ina ia tatou lagonaina ai Lona alofa e le faatuaoia mo i tatou ma aoao ai e alofa ia te Ia. Ua apoapoai mai le perofeta anamua o Moronae ia tatou manatua “o meaalofa lelei uma e mai ia Keriso.”¹¹ E tuuina mai e lo tatou Faaola ia meaalofa e le faapei ona aumai e le lalolagi—e le tumau, o se vaega, ma matafi ma mou atu i le aluga o taimi. O Iesu Keriso e tuuina mai meaalofa e tumau, o meaalofa e tatau ai, e aofia ai:

Meaalofa a le Agaga, e pei o le malamalama, poto, molimau, ma le faatuatua.¹²
O le meaalofa o le Agaga Paia.
O le meaalofa o le ola e faavavau.

Ma a o tatou tomanatu i le umi o se taimi o le olaga i “meaalofa lelei” tetelē ma laiti, ua oo mai i o tatou olaga, pe o mafai ona tatou vaaia le aao o le Alii o lavea’i i tatou, faamalosi i tatou, ma aumaia le toomaga mo i tatou?

E ui e i ai taimi e ono mou ese ai ma taamilomilo o tatou loto mai ia te Ia, o Lona tuuto ua faamautinoa mai ai ia i tatou e le faagaloina i tatou e le Alii—i le Kerisimasi po o se isi lava taimi. “Ua folafola mai e le Alii e faapea, ua uma ona togitogi i tatou i alofilima o Ona lima.¹³ E tausia e le aunoa Ana poloaiga. Na Te manatua feagaiga na Ia osia ma i tatou ma o tatou tamā. E faafofoga ma manatua e Ia a tatou tatalo i le Tama Faalelagi, pe tatou te aveina a’e i o tatou tulivae pe aioi atu mai o tatou afeafe pe teuina ni talosaga i o tatou loto. E manatua e Ia, e pei ona aoao mai Peresitene Russell M. Nelson, e “faasalavei i olaga o i latou o e talitonu ia te Ia.”¹⁴ Na Te manatua e faamagalo i tatou i taimi uma tatou te salamo ai. Na Te manatua e fetalai mai ia i tatou e ala mai i tusitusiga paia ma perofeta e fesoasoani pea ia i tatou ia maua lo tatou ala e toe foi atu ai i le aiga—po o le a lava le mamao ua tatou se ese ai ma pe o le a foi le umi. E manatua foi e Ia e auina mai Lona Agaga e tauivi pea ma i tatou pe a tatou faia ni taumafaiga e tausia ai la tatou folafolaga paia ia “manatua pea o ia.”¹⁵

Na aoao mai Peresitene Spencer W. Kimball: “Pe a e vaai i le lomifefiloi mo le upu aupito taua, … atonu o le manatua. Ona ua osia e outou uma ia feagaiga[,] … o lo tatou manaoga aupito sili o le manatua.” Na ia faaauau, “O le mafuaaga lea e o ai tagata uma i le sauniga faamanatuga i aso Sapati uma—e aai ma feinu i le faamanatuga ma faalogologo i ositaulaga o tatalo ‘ia latou manatua pea o ia ma tausi ana poloaiga ua ia tuuina mai ia te i latou.’ … Manatua o le upu. Manatua o le polokalama.”¹⁶

O le manatuaina o le Atua e musuia ai i tatou e faaola le mana o lo tatou malosiaga faaleagaga ma valaaulia i tatou i ala faaleatua. Mafaufau i nei aoaoga sa valaaulia i tatou e Peresitene Nelson ia manatua:

“Ia faamuamua le Atua i lou olaga” ma “avatu ia te Ia se vaega talafeagai o lou taimi.”
“Saili ma faamoemoe mo ni vavega.”
“Faauma feteenaiga i lou … olaga”¹⁷ ma avea o se e faatupuina le filemu.¹⁸

E mafai ona avea le Kerisimasi o se avanoa e faatino ai nei valaaulia ma utuvai saoloto mai i o tatou faamoemoega masani ia manatua e mafaufau atili e uiga ia Iesu Keriso, ia talileleia le manatunatu i le vavega o Lona soifua mai, ma lagonaina ma faatino i se lagona sili atu o le faaaumea ma fanau a le Atua. O faatusa o le manatua ia ua avea ma uiga o le vaitau o le Kerisimasi e tele ina mataulia a o tatou:

Manatua e tuuina atu faamanuiaga o le Kerisimasi i uo, aiga, ma tagata ese.
Manatua e avatu meaalofa e avea o ni faaailoaga o le alofa.
Manatua ia agalelei ia i latou e manaomia ma talileleia i latou o e ulufale atu i o outou fale.
Manatua e faamamafa le taua o faapotopotoga faaleaiga ma agaifanua ia e ese ai ma iloga le Kerisimasi.

O le toatele i lenei taimi o le tausaga, o lo tatou alofa loloto i le sauniaina o to’ana’i lava e tasi, toe faamatala tala faifai pea faaleaiga, ma le teuina o laau Kerisimasi i teuga tatou te faaalia i tausaga taitasi, o ni gaoioiga taua tele e tausisia ai lo tatou manao masani e manatua aafiaga ia e taua ia i tatou. O taumafataga faapitoa, tala patino, ma teuga o aso malolo e mafai ona avea o ni faamanatu iloga mo o tatou manatuaga o loo aoina. E oo lava i lo tatou manao faamalosia ia alolofa atili i lenei taimi o le tausaga e mafai ona fagua ai lo tatou gauai i o tatou faamoemoega ia manatua e lotofaafetai. O le ituaiga alofa faapitoa tatou te maua faatasi ma le oo mai o le Kerisimasi, o se avanoa foi lea ua faatuina i o tatou luma, e faatotonugalemu ai o tatou faamoemoega ma a tatou faatinoga ia Iesu Keriso: “Manatua, ia manatua o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae”¹⁹ Manatua a o tatou oo mai i le faaiuga o se tasi tausaga ma malaga e kolosia le alalaupapa i le tausaga fou—o ni alii ma ni tamaitai makoi, o ni leoleo mamoe mataala—o le malosiaga o le aao o le Alii²⁰ tatou te mafaia ai.

O lea la po o fea lava e te nofo ai i le lalolagi, manatua e gauai atu i faatusa eseese o loo valaaulia ai oe e vaavaai mo Keriso. I mea uma tatou te faamamafaina i lenei taimi o le tausaga, o faamanuiaga uma tatou te tuuina atu, mo tagata uma tatou te mafaufau i ai, ia aua lava nei o tatou toilalo e manatua Le Foa’ia moni—O Ia e le faagaloina lava i tatou ma aumaia ia i tatou le mana e manatua ai o Ia e ala i Lona Agaga, i le taimi o le Kerisimasi ma taimi uma lava. Na Te aumaia le “olioli i le lalolagi” ma valaaulia o tatou loto ia “saunia se avanoa mo ia”²¹ e talia ai lo tatou Tupu. O Ia o le faavae moni lea tatou te faimalaga ai. O Ia o le Malamalama o le Lalolagi ma le Alo o le Atua soifua. Ou te molimau atu ai i Lona suafa, o Iesu Keriso, amene.