Ua Fanau Mai, Keriso, Lo Tatou Faaola!
Faigalotu o le Kerisimasi a le Au Peresitene Sili 2023
Aso Sa, 3 Tesema, 2023
O’u uso e ma tuafafine pele, manuia le Kerisimasi!
Matou te faafetai i le potopoto faatasi ma la tatou Au Peresitene Sili pele i lenei faigalotu o le Kerisimasi. Po o fea lava o e i ai i lenei vaitau o le Kerisimasi, ia e lagonaina le alofa o le Atua i le faamanatuina o Iesu Keriso o le fatu o le Kerisimasi.
O le Kerisimasi o se taimi o musika, manogi sasala ma tofo, faanaunauga ma le agalelei. O se taimi o le faapotopotoina, pe tatou te nonofo felata’i pe mamao foi.
E tele taimi e avea ai le Kerisimasi ma Kerisimasi, pe a tatou aumaia lē leoa le olioli o le Kerisimasi i isi. E toatele aiga e suitulaga ia Santa. E toatele tagata taitasi e faamalamalamaina le lalolagi i le malamalama o Iesu Keriso.
O se manatuaga o le Kerisimasi e toe manatua, o se manatuaga lea ua toe faafou. I le gasologa o taimi, ua avea ai manatuaga o le Kerisimasi ma agamasani, lea e mafai ona loloto ai lo tatou alolofa mo Iesu Keriso—le Tamai Mamoe a le Atua, le Alo o le Tama e Faavavau, le Faaola o le lalolagi.1
Afai o i ai ni ou manatuaga sili ona fiafia i ai o le Kerisimasi, ia e patipatia ma le fiafia i lenei vaitau. Afai o e fatuina pea au agaifanua o le Kerisimasi, talosia ia loloto ai lou alofa mo Iesu Keriso ma faamanuia ai oe i tausaga taitasi.
E mafai ona ou faasoa atu ni agaifanua faaleaiga e fiafia i ai le aiga o Gong i le Kerisimasi?
Muamua, o tausaga taitasi, e ma te fiafia ai lava ma Sister Gong e toe vaavaai i teuga o le Kerisimasi lea e faamatala ai le tala a lo matou aiga.
A o avea o se ulugalii talavou, sa ma aooga ai ma Sister Gong i se a’oga faatikeri i Egelani. Sa ma nonofo i se tama’i faletotogi i se paketi utiuti faatamaiti a’oga. Sa ma faitaua a ma pene apa a o le’i faatauina si tama’i laau Kerisimasi faatauvaa semanu e oo lava ia Charlie Brown o misialofa mai ai.
E fatufatu mea fou lava Sister Gong, ma na te faaaogaina pine tautau lavalava e fai ai fitafita Peletania o la ma laau Kerisimasi. Sa na faia pulou uli o fitafita ma se foliga ataata.
Mo le 43 tausaga, o tutu ai lava nei fitafita Peletania pine tautau lavalava o ni leoleo i luga o la matou laau Kerisimasi. La te faamanatu mai ia i ma’ua le ma Kerisimasi muamua ina ua faaipoipo—e mamao mai le aiga—ma Kerisimasi taitasi e faamanuiaina.
Sa faia e le aiga o le ma atalii nei pine tautau lavalava ofu “tamai faatagata.” O loo faaalia ai faifeautalai i le salafa o le lalolagi. O mafai ona e vaai i o latou ataata? Laei faavaomalo? Pine o igoa? Na ta’u mai ia te a’u ua faia se tasi e foliga ia te a’u.
O a tatou mea teuteu o le Kerisimasi e faafou ai manatuaga mafanafana o uo ma aafiaga i le tele o nofoaga. O le solo fiafia ma le matagofie o manatuaga o le Kerisimasi i tausaga taitasi tatou te ataata ai.
Ua molimau mai le perofeta o Alema o loo gasolo le lalolagi i mamanu masani e faailoa mai ai o loo i ai se Atua. O le Kerisimasi ua faailoga ai se taimi fitoitonu i le 365¼ aso i tausaga taitasi e faataamilomilo ai i le la. A o toe taliu mai lea taamilosaga faaletausaga ia i tatou e faataua ai le vaitau o le Kerisimasi i tausaga taitasi, ou te manatu i le mea na tusia e le tusitala o E.B. White e uiga i le “The Ring of Time.”2
Na ia fautuaina mai e faapea, e na o le poto masani tatou te malamalama ai “e le minoi faataamilomilo lava le taimi.” O le mama o le taimi e ono foliga mai “ua mamanuina atoatoa, e le masuia lava, e mafai ona valoia, e aunoa ma se amataga po o se iuga.” Ae na o le taimi tatou te laiti ai tatou te mafaufau ai e mafai ona tatou faia se li’o atoa, ma e leai foi se suiga o ona i’uga nai lo le mea na tatou amata ai.
Mo a’u, o le oo mai o Kerisimasi taitasi e foliga o le mea lava e tasi ma pei e ese foi, e faaiteite mai ai le mafai e le taimi (ma le avanoa) ona laina ma taamilomilo i le taimi e tasi. O le ala e mafai ai e se “ala sa’o ma le vaapiapi”3 ma le “taamilosaga e faavavau e tasi”4 ona avea ma faamalamalamaga ogatusa lelei o le moni o se feagaiga e faatotonugalemu i se Keriso tamaitiiti na fanau mai i Peteleema.
I lea ala, mo a’u, o se vaega o le maneta o le Kerisimasi o le avea lea o se tamaitiiti ma se tagata matua i le taimi lava e tasi. Tatou te fiafia o se tagata matua i mea ua fiafia nei i ai le tamaitiiti lea na avea ai i tatou. Ma tatou te fiafia foi ma se tamaitiiti a o tatou fatufatuina ma toefatufatu faatasi manatuaga ma agaifanua.
O se agaifanua lona lua i le Kerisimasi e fiafia i ai le aiga o Gong o le faaalia lea o fale po o vaaiga o le fanau mai—o faaaliga o le soifua mai o le tamaitiiti paia o Keriso.
E te le fiafia i le ala e taulai atu ai le fanau mai o Iesu Keriso, ma valaaulia i tatou ia faia foi faapea? Pei ona fai mai se faifeautalai faatoa mae’a mai, “Ae ou te le’i alu i la’u misiona, sa avea Iesu Keriso ma vaega o lo’u olaga. O le taimi nei, o Ia o lo’u ola.”
O la matou fale o le soifua mai, e o mai i ituaiga tetelē ma tulaga eseese, e fai mai anomea uma e mafai ona mafaufauina, mai nofoaga uma e mafai ona mafaufauina. O fale taitasi o le soifua mai, e molimauina ai Iesu Keriso ma Ana faamanuiaga i atunuu uma, ituaiga, gagana, ma tagata.
Matou te fiafia ona e faaalia e fanau a le Atua i mea uma le pepe o Iesu, Maria, Iosefa, o le Au Makoi, leoleo mamoe, ma manu faatasi ai ma faatulagaga, matapule, ma faamatalaga e masani, ma fesootai i ai. O fale o le soifua mai e faamanatu mai ai foi ia i tatou e alofa le Atua i Ana fanau uma; e mafai ona matou vaaia le alofa o le Atua i matapule o a matou fale ma vaaiga o le soifua mai i soo se mea e aumai ai.
O se agaifanua lona tolu e fiafia i ai le aiga o Gong, e faaopoopo i le faitauina faatasi o tala faatusipaia o le soifua mai o lo tatou Faaola, o le faitauina leotetele lea o se aiga, o le A Christmas Carol a Charles Dickens.
Afai e fai so’u pulou umi ma se sikafu, tou te mafai ona vaai faalemafaufau ia te a’u mo sina minute, o fai ma Ebeneezer Scrooge i le A Christmas Carol?
I ni nai tausaga, e faitau ai e lo matou aiga A Christmas Carol mai le amataga e oo i le faaiuga. Matou te saeu a matou sukalati vevela i lole ma talie i mau faasino i le “Norfolk biffins” ma le “epikopo ulaula.” Matou te fefefe pe a faafeto’ai e le aitu o Jacob Marley ana filifili u’amea. Matou te fiafia ina ua fesoasoani agaga o le Kerisimasi Tuanai, Taimi Nei, ma le Lumanai ia Ebeneezer Scrooge e avea o se tagata fou.
I ni nai tausaga, ua faitauina ai e lo matou aiga se lomiga faapuupuu o le A Christmas Carol, na otootoina e le ma tama teine faaletulafono ma le atalii ina ia ofi i le taimi puupuu e gauai atu ai tagata laiti o le aiga.
Ma i ni nai tausaga, faatasi ai ma ataata ma aga malie lelei, e faitau ai e lo matou aiga le sitika A Christmas Carol. E na o le lua laina: “Bah, humbug” ma le “Faamanuia mai le Atua.”
Na amata tusia e Charles Dickens le A Christmas Carol ia Oketopa ae uma i le amataga o Tesema 1843—o se umi na o le ono vaiaso. O le uluai lomiga o kopi e 6,000 na lolomi i Lonetona i le aso 19 o Tesema, 1843. E oo atu i le Po o le Kerisimasi ua taulia uma.
O i latou na tusia le talaaga o le A Christmas Carol na ta’ua ai sa tusia e Charles Dickens i se taimi o le toe tautomanatu o tagata i le nofoaiga i Egelani a le Tupu Tamaitai o Vitoria i le uiga o le Kerisimasi. O le a se matafaioi e mafai ona fai e se vaitau o le Kerisimasi, laau Kerisimasi, faamanuiaga o le Kerisimasi, faapotopotoga faaleaiga i le Kerisimasi, kata o le Kerisimasi, e oo lava i pesepesega o le Kerisimasi?
I se taimi na lagona ai e le toatele le le mautonu, tuulafoaiina, ma le tuuatoatasi, o le A Christmas Carol a Dickens sa talanoaina ai se faananauga loloto mo se faauoga, alofa, ma le taula i tulaga faatauaina faaKerisiano, e pei lava ona maua e Epenesa Scrooge le filemu ma le faamalologa i lona taimi ua tuanai, taimi nei, ma le lumanai.
O lena taimi e faapei o le asō, o le uiga moni o le Kerisimasi e tosina atili atu ai i tatou ia Iesu Keriso, na soifua mai o se pepe i se fale o manu. Ua silafia e Iesu Keriso e tusa ai ma la le tino le ala e fesoasoani mai ai ia i tatou ma le loto ua tumu i le alofa mutimutivale. O lena taimi e faapei o le asō, e faamanatu mai e le Kerisimasi le avea ma ni ō o le feagaiga, sootaga, ma le nuu faatasi ia Iesu Keriso ma le tasi ma le isi.
Se’i o’u fai atu lava se fesili e ese e uiga i le A Christmas Carol . Aisea, pe a tatou manatu ia Scrooge, tatou te mafaufau muamua ai i se toeaina itaitagofie, se tagata e aamu i le Kerisimasi faapea o se mea’ole?
Aisea tatou te le aloa’ia atili ai le Scrooge fou? O le Scrooge fou, o le e foai atu ma le limafoai le pīpī aupito telē e avea o se faaofo o le Kerisimasi? O le Scrooge fou, o lē na toefaalelei ma si ona tei matafiafia o Feleti? O le Scrooge fou, o lē na si’ia le totogi o Bob Cratchit ma tausia Tiny Tim?
Tuu ai pea le au le talitonu e aamu. O le Scrooge fou “na faia mea uma, ma e le’i gata le mau mea na ia faia.” Na avea o ia ma se tagata lelei ma se uo lelei, e pei ona sa iloa ai e le lalolagi tuai.
Aisea la tatou te le manatua ai lena Mr. Scrooge? Pe o i ai nisi o siomia ai i tatou, atonu o i tatou lava, o ē mafai ona avea o se tagata ese pe ana tuu lo tatou manatu o le a latou faapea ma faapea, pe lalau lo latou tagata tuai?
E leai se tagata, leai se aiga e atoatoa. E tofu i tatou ma vaivaiga ma sese—mea tatou te moomoo ia lelei ona tatou faia. O le Kerisimasi lenei, atonu e mafai ona tatou talia—ma ofoina atu—meaalofa taua a Iesu Keriso o le suiga ma le salamo, o le faamagalo ma faagalo, o le tuuina atu o na meaalofa i isi ma i tatou lava.
Ina tatou faaleleia ia ma le tausaga ua te’a. Faate’a faalavefau faalelagona, o feteenaiga ma le feitaga’i, ua avea ma faasoesa i o tatou olaga. Ina tatou avatu ia i le tasi ma le isi itulelei fou tatou te mafaia nai lo le nopia’i i o tatou tuaoi ua tuana’i. Tatou tuu atu i le Scrooge fou ua i totonu o i tatou taitoatasi se avanoa e suia ai.
Na afio mai lo tatou Faaola i le Kerisimasi e faasaoloto e na saisaitia—ae le na o i latou i le falepuipui. E mafai ona Ia faasaolotoina i tatou mai aitu o o tatou tuanai ma talaia i tatou mai filifili ma faanoanoaga o a tatou agasala ma agasala a isi. E mafai ona Ia togiolaina i tatou mai lo tatou manatu faapito, manatu faapito e ala i le toefanauina ia te Ia.
“Aua o le aso nei ua fanau ai mo outou … lo outou Faaola, o le Alii ia o Keriso.”5
O lea, ia manuia le Kerisimasi!
Talosia ia fiafia ma manuia a outou agaifanua ma manatuaga o le Kerisimasi.
Tau ina ia tatou olioli ia Iesu Keriso, i le Kerisimasi ma aso uma.
Ou te olioli ma molimau atu ai ia te Ia i Lona suafa paia ma mamalu, o Iesu Keriso, amene.