11:38

“O Mai, Tatou Vivii ia te Ia”

Faigalotu o le Kerisimasi a le Au Peresitene Sili 2023

Russell M. Nelson

Peresitene o Le Ekalesia a Iesu Keriso o le Au Paia o Aso e Gata Ai

Aso Sa, 3 Tesema, 2023

O’u uso e ma tuafafine pele, e ma’eu le olioli i le toe amatalia ai o le isi vaitau o le Kerisimasi ina ua tatou faamanatuina le soifua mai o lo tatou Faaola ma le Togiola, le Alii o Iesu Keriso.

O se mea paia e tupu i taimi uma e fanau mai ai se pepe. Maimoa i taga a se tasi o atalii o le atalii o le ma afafine a o ia siiina lona uso pepe mo le taimi muamua lava.

[vitio]

E leitioa i lena po sili ona paia i le silia ma le 2,000 tausaga talu ai e latalata i le aai o Peteleema, na vivii ai ‘au o le lagi i le olioli! Sa aoao atu ai e se agelu i leoleo mamoe le upumoni ofoofogia lenei:

“Aua faauta, ou te aumai ia te outou le tala lelei e olioli tele i le nuu uma.

“Aua o le aso nei ua fanau ai i le aai o Tavita, lo outou Faaola, o le Alii ia o Keriso.”¹

Ma o lenei o’u uso e ma tuafafine pele, “O mai, tatou vivii ia te Ia.”²

E pei o le toatele o outou, ua suia lava le Kerisimasi mo a’u i le gasologa o tausaga. O o’u manatuaga a o o’u laitiiti ua tamau manino i le tulaga o le Pa’u Tele o le Tamaoaiga o le vaitau o le 1930. Sa utiuti le seleni. O meaalofa sa patino lava le taua.

Sa faia e o’u matua le Kerisimasi ia ofoofogia mo a’u ma o’u tei. O tausaga taitasi e avea ai le matou aiga ma sui mo Santa mo se isi aiga. Sa matou saunia ni meaalofa talafeagai ma auina atu ia i latou i le tauafiafi e sosoo ma le Kerisimasi. Pe a matou o ese mai i o latou aiga, o o latou lima o talotalo mai ma foliga loimatā na aumaia lava ia i matou le olioli moni o le lotofoai.

Sa ou fiafia i musika o le Kerisimasi i na taimi—ma o loo ou fiafia ai lava. O tausaga uma, ma te fiafia ai lava ma Sister Nelson e faalogologo ma usuusu i le pese o le Handel’s Messiah. Ou te fiafia i le uiga Faa-Eperu o le upu aleluia. O lona uiga moni o le “vivii i le Alii le Atua o Ieova.”³ O upu o loo lagiina i lenei musika tele mo aufaipese e le gata e faatatau i le soifua mai o le Alii ae faapena foi i Lona nofotupu ai i le meleniuma:

Aua ua fanau mai mo i tatou se tama,
Ua foaiina mai mo i tatou le atalii:
Ma o le a i Lona ua le malo;
Ma o Lona igoa foi, o le Silisili Ese, o le Faipule,
O le Atua malosi,
O Le Tama Faavavau,
O le Alii o le Filemu.4

O le vaitau o lo’u talavou matua na amata ai ona maua sa’u molimau loloto e uiga i le Atua le Tama ma Lona Alo Pele, o Iesu Keriso. Na oo ina ou iloa mo a’u lava ia sa soifua mai Iesu Keriso i le taupou o Maria, o le sa avea ma se “ipu pele ma filifilia.”⁵ Sa ou iloa o Ia moni o le Alo o le Atua⁶ ma o le tagata tutotonu i le talafaasolopito atoa o tagata soifua.

Mafaufau i le tulaga le mafaamatalaina o mea na faataunuuina e Iesu Keriso—o mea uma sa tusa ma le finagalo o Lona tama! Ua uma lava ona avea Iesu ma se Atua ina ua afio maualalo mai o Ia i le lalolagi e faamae’a le galuega aupito sili ona taua mo i tatou taitoatasi. O se galuega na laveaiina moni ai le ola ma suia ai le olaga. O se galuega e leai ma se tasi o i tatou e mafai ona faia mo i tatou lava.

O le Faaola sa “mafatia i tiga ma puapuaga ma faaosoosoga o ituaiga eseese uma”⁷ ina ia mafai ai ona Ia silafia “e tusa ai ma la le tino, le ala e fesoasoani ai [ia i tatou] e tusa ai ma o [tatou] vaivaiga.”⁸

I ni nai masina ua mavae, ua tele mea na ou aoaoina e uiga i le tiga ma ona aafiaga faaleleia. Sa ta’aina atu lo’u loto i lo tatou Faaola a o ou taumafai e vaai faalemafaufau i le loloto o Ona puapuaga. Sa le mafai e lo’u mafaufau faaletino ona malamalama i le ala na Ia ave ai i luga o Ia lava ia tiga uma, o agasala uma, o puapuaga uma, ma mafatiaga uma o tagata uma ua ola ma soifua!

I le faatinoga aupito maualuga o le mutimuti alofa lea e le tusa ai ma le malamalamaaga po o faamatalaga faaletino, sa gauai atu ai e le Faaola o Ia lava i mafatiaga faaleagaga ma faaletino e le mafaatusalia.

Tatou te migao tonu lava i le Pepe o Peteleema ona sa Ia ofoina atu mulimuli ane le taulaga le i’u ma lē mafaamatalaina, i le Faatoaga o Ketesemane ma luga o le satauro i Kalevaria. O lenei taulaga e togiola ai i tatou taitoatasi pe a tatou filifili e salamo ma mulimuli ia te Ia. Ma, i le avea ai ma Ana galuega silisili i le lalolagi, sa Ia toetu mai le tuugamau i le aso lona tolu, ma tuuina mai ia i tatou taitoatasi le faamanuiaga silisili o le toetu ma le olaga pe a mavae le oti.

I lenei vaitau, e tele lava ina tatou pepese ma le fiafia pe fai atu, “Matou te faamanuia atu le Kerisimasi.” O’u uso e ma tuafafine pele, o moomooga o lo’u loto mo outou taitoatasi i lenei po e i ai ni ona vaega. O le mea moni, e le o so’u moomooga mo outou; ae o la’u tatalo mo outou i lenei taimi paia o le Kerisimasi.

Muamua, ou te tatalo o le a outou lagonaina le alofa loloto e faavavau o lo tatou Faaola mo outou taitoatasi. Sa silafia lava e Iesu Keriso outou talu mai le muai olaga. Na te silafia ma silasila atu ia te oe i le taimi nei. Na te silafia ou olioliga ma ou faanoanoaga. Ua Ia oo i na mea taitasi.

E ia te Ia se mutimuti alofa atoatoa mo ou tauiviga ma olioliga i taimi uma e te fetaomi atu ai i luma i le amiotonu, i taimi lelei ma leaga.

Ou te tatalo o le a e maua sau oe lava ia molimau patino o Iesu Keriso o le Alo o le Atua, ma ua faatumulia o Ia i le mana faaleatua ma ona o Lana taulaga togiola silisili, e te le manaomia lava ona lagonaina e tatau ona e feagai ma luitau o le olaga na o oe. Pe a e ole atu, saili, ma tuitui atu ma le naunautai,⁹ e te maua pea le avanoa i Lona mana e fesoasoani ia te oe, e faamalosia oe, ma faamalolo oe.¹⁰

Ou te tatalo o le a e faaaogaina atoa le Togiola a le Faaola e ala i le salamo i aso taitasi, faia o lou olaga ia faateleina le mama, ma saili atu i le taitaiga faalelagi i mea uma e te faia. I ni isi upu, ou te tatalo mo oe ia e lagonaina le olioli o le mafaufau faaselesitila i taimi uma.

Ou te tatalo foi o le a e faaaogaina lenei vaitau o aso malolo e amata ai se vaitau o tapuaiga sili atu faaletagata lava ia. Toe amata faafou le suesueina o aoaoga ma le Togiola a Iesu Keriso. E leai ma se tasi i lenei lalolagi e alofa ia te oe e pei o Ia. E leai ma se tasi iinei e sili atu ona malamalama ia te oe pe silafia moni ou faanoanoaga ma vaivaiga. E leai ma se tasi i le lalolagi e i ai le mana o loo ia Iesu Keriso. E leai se tasi iinei e sili atu ona naunau mo oe ia avea ma mea uma e mafai ona avea ai oe. E leai se tasi e aioi atu i le Tama mo oe e pei ona Ia faia.

O le Alii o Iesu Keriso, o lo tatou Faaola ma lo tatou Togiola. O Ia o le Alo o le Atua, le Paia e Toatasi o Isaraelu. O Ia o Le ua Faauuina.¹¹ I lalo o le taitaiga a le Tama, o Ia o le Foafoa o mea uma ua foafoaina.¹² O Iesu Keriso o le Ieova Silisili, le Atua o le Feagaiga Tuai.¹³ O Ia o le Emanuelu folafolaina.¹⁴ O Ia o lo tatou Faataitaiga sili¹⁵ ma lo tatou Puluvaga i le Tama.¹⁶ Ona o Lana talalelei toefuataiina, ua avanoa ai faamanuiaga uma o Lana perisitua i tagata uma pe a latou o mai ia te Ia ma faaatoatoaina ia te Ia.

Uso e ma tuafafine, ia tatou ola i le agaga o le “aleluia,” ma viia pea le Alii le Atua o Ieova. I lenei vaitau mamalu o le Kerisimasi, o mai, tatou vivii ia te Ia, o Keriso le Alii!

Ou te iloa o loo soifua le Atua! O Iesu o le Keriso! O Lana Ekalesia lenei. O loo Ia taitaia le Toefuataiga faifai pea o Lana talalelei. Ou te molimau atu ai i nei mea i le suafa paia o Iesu Keriso, amene.