![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F9e%2F5e%2F9e5efb38bdb33bf412e3adf017eea67ed3c76a14%2F9e5efb38bdb33bf412e3adf017eea67ed3c76a14.jpeg/full/!250,/0/default)
« ចូរយើងមកថ្វាយបង្គំព្រះអង្គ »
ការប្រជុំធម្មនិដ្ឋានពិធីបុណ្យគ្រីស្ទម៉ាស់របស់គណៈប្រធានទីមួយ ឆ្នាំ ២០២៣
ថ្ងៃអាទិត្យ ទី ៣ ខែ ធ្នូ ឆ្នាំ ២០២៣
បងប្អូនប្រុសស្រីជាទីស្រឡាញ់របស់ខ្ញុំ ឱ យើងពិតជារីករាយណាស់ក្នុងការចាប់ផ្តើមរដូវបុណ្យគ្រីស្ទម៉ាស់ម្តងទៀត ជាពេលដែលយើងរំឭកអំពីការប្រសូត្រមករបស់ព្រះអង្គសង្គ្រោះ និងព្រះប្រោសលោះរបស់យើង គឺព្រះអម្ចាស់ ព្រះយេស៊ូវគ្រីស្ទ ។
វាជាព្រឹត្តិការណ៍ដ៏វិសុទ្ធមួយ គ្រប់ ពេលដែលមានទារកកើតមក ។ សូមមើលប្រតិកម្មរបស់ចៅទួតប្រុសម្នាក់របស់យើង នៅពេលដែលគាត់បីប្អូនប្រុសរបស់គាត់ជាលើកដំបូង ។
[ វីដេអូ ]
មិននឹកស្មានសោះថា នៅយប់ដ៏បរិសុទ្ធបំផុតជាង ២០០០ ឆ្នាំមុន នៅជិតទីក្រុងតូចមួយនៃបេថ្លេហិម ពួកពលបរិវារកកកុញពីស្ថានសួគ៌បានច្រៀងដោយក្តីរីករាយ ! ទេវតាមួយអង្គបានបង្រៀនអ្នកគង្វាលអំពីសេចក្ដីពិតដ៏អស្ចារ្យនេះ ៖
« មើល ខ្ញុំមកប្រាប់ដំណឹងល្អដល់អ្នករាល់គ្នា ពីសេចក្តីអំណរយ៉ាងអស្ចារ្យ ដែលសម្រាប់បណ្តាជនទាំងអស់គ្នា » ។
« ដ្បិតនៅថ្ងៃនេះ មានព្រះអង្គសង្គ្រោះ១អង្គ ប្រសូតដល់អ្នករាល់គ្នានៅក្រុងហ្លួងដាវីឌ គឺជាព្រះគ្រីស្ទដ៏ជាព្រះអម្ចាស់ » ។១
ហើយឥឡូវនេះ បងប្អូនប្រុសស្រីជាទីស្រឡាញ់របស់ខ្ញុំ« ចូរយើងមក ថ្វាយបង្គំ ព្រះអង្គ » ។២
ដូចជាអ្នករាល់គ្នាដែរ ពិធីបុណ្យគ្រីស្ទម៉ាស់បានផ្លាស់ប្ដូរសម្រាប់ខ្ញុំក្នុងរយៈពេលជាច្រើនឆ្នាំកន្លងមកនេះ ។ អនុស្សាវរីយ៍កុមារភាពរបស់ខ្ញុំត្រូវបានដក់ជាប់នៅក្នុងគ្រាមួយនៃវិបត្តិសេដ្ឋកិច្ចដ៏ខ្លាំងនៅទសវត្សរ៍ ឆ្នាំ ១៩៣០ ។ លុយក្សត់ណាស់ ។ អំណោយមានតម្លៃជាពិសេសខ្លាំងណាស់ ។
ឪពុកម្ដាយខ្ញុំបានធ្វើពិធីបុណ្យគ្រីស្ទម៉ាស់ដ៏អស្ចារ្យសម្រាប់ខ្ញុំ និងបងប្អូនរបស់ខ្ញុំ ។ ជារៀងរាល់ឆ្នាំ យើងបានក្លាយជាគ្រួសារ « ដែលជំនួសឲ្យលោកតាសាន់តា » សម្រាប់គ្រួសារផ្សេងទៀត ។ យើងបានរៀបចំអំណោយដ៏សមរម្យ ហើយប្រគល់អំណោយទាំងនោះនៅយប់មុនថ្ងៃបុណ្យគ្រីស្ទម៉ាស់ ។ នៅពេលយើងបើកឡានចេញពីផ្ទះរបស់ពួកគេ ដៃគ្រវី និងទឹកភ្នែកនៅលើមុខរបស់ពួកគេ បាននាំឲ្យយើងមានអំណរដ៏ពិតប្រាកដនៃការផ្តល់អំណោយនោះ ។
កាលនោះខ្ញុំចូលចិត្តតន្ត្រីនៃពិធីបុណ្យគ្រីស្ទម៉ាស់ណាស់—ហើយឥឡូវនៅតែចូលចិត្តដដែល ។ ជារៀងរាល់ឆ្នាំ ស៊ីស្ទើរ ណែលសុន និងខ្ញុំចូលចិត្តស្តាប់ និងច្រៀងតាមជាមួយនឹងក្រុមចម្រៀង Handel Messiah ។ ខ្ញុំចូលចិត្តអត្ថន័យហេប្រានិចនៃពាក្យ hallelujah វាមានន័យថា « សរសើរតម្កើងដល់ព្រះ ជាព្រះអម្ចាស់ » ។៣ ពាក្យដែលបានច្រៀងនៅក្នុងរោងមហោស្រពខ្នាតធំមិនត្រឹមតែពណ៍នាចំពោះការប្រសូត្ររបស់ព្រះអម្ចាស់ប៉ុណ្ណោះទេ តែចំពោះការសោយរាជ្យនាពេលសហស្សវត្សរ៍របស់ទ្រង់ដែរ ៖
ដ្បិតមានបុត្រមួយកើតដល់យើង
ព្រះទ្រង់ប្រទានបុត្រាមួយមកយើងហើយ ៖
ឯការគ្រប់គ្រងនឹងនៅលើស្មារបស់បុត្រនោះ
ហើយគេនឹងហៅព្រះនាមទ្រង់ថា ព្រះដ៏ជួយគំនិតយ៉ាងអស្ចារ្យ
ព្រះដ៏មានព្រះចេស្តា
ព្រះវរបិតាដ៏គង់នៅអស់កល្ប
ម្ចាស់នៃមេត្រីភាព៤
វាស្ថិតក្នុងអំឡុងពេលយុវមជ្ឈិមវ័យ ដែលខ្ញុំបានចាប់ផ្ដើមទទួលបានទីបន្ទាល់ដ៏ជ្រាលជ្រៅមួយអំពីព្រះជាព្រះវរបិតា និងព្រះរាជបុត្រាជាទីស្រឡាញ់របស់ទ្រង់ គឺព្រះយេស៊ូវគ្រីស្ទ ។ ខ្ញុំបានដឹងដោយខ្លួនឯងថាព្រះយេស៊ូវគ្រីស្ទបានប្រសូត្រមកពីស្ត្រីព្រហ្មចារី ម៉ារា ដែលជា « ប្រដាប់ដ៏ជម្រើស ហើយពិសេសមួយ » ។៥ ខ្ញុំបានដឹងថាទ្រង់ពិត ជា ព្រះរាជបុត្រានៃព្រះ៦ និងជាតួអង្គសំខាន់នៅក្នុង គ្រប់ ប្រវត្ដិសាស្ដ្ររបស់មនុស្សជាតិទាំងអស់ ។
គ្រាន់តែគិតអំពីកម្រិតដែលមិនអាចយល់បាននៃអ្វីដែលព្រះយេស៊ូវគ្រីស្ទធ្វើបានសម្រេច—ទាំងអស់ស្របតាមឆន្ទៈរបស់ព្រះវរបិតារបស់ទ្រង់ ! ព្រះយេស៊ូវជាព្រះមួយអង្គរួចទៅហើយនៅពេលដែលទ្រង់យាងចុះមកផែនដីដើម្បីបំពេញនូវមុខងារដ៏សំខាន់បំផុតសម្រាប់យើងម្នាក់ៗ ។ ជាស្នាដៃមួយដែលបានជួយសង្រ្គោះជីវិត និងផ្លាស់ប្តូរជីវិត ។ ជាស្នាដៃមួយដែលគ្មាននរណាម្នាក់ក្នុងចំណោមពួកយើងអាចធ្វើបានសម្រាប់ខ្លួនឯងឡើយ ។
ព្រះអង្គសង្គ្រោះ « [ បាន ] រងការឈឺចាប់ និងទុក្ខវេទនានិងការល្បួងគ្រប់ប្រភេទ »៧ ដើម្បីទ្រង់អាចដឹង « ស្របតាមសាច់ឈាមថា តើត្រូវជួយ[ យើង ]បែបណាតាមជំងឺ[ របស់យើង ] » ។៨
ក្នុងអំឡុងពេលពីរបីខែកន្លងទៅនេះ ខ្ញុំបានរៀនច្រើនថែមទៀតអំពីការឈឺចាប់ និងឥទ្ធិពលរបស់វា ។ ចិត្តរបស់ខ្ញុំបានគិតទៅដល់ព្រះអង្គសង្គ្រោះរបស់យើង ពេលខ្ញុំព្យាយាមស្រមៃពីទំហំនៃការឈឺចាប់របស់ទ្រង់ ។ ចិត្តរមែងស្លាប់របស់ខ្ញុំមិនអាចយល់អំពីរបៀបដែលទ្រង់យកដាក់លើព្រះអង្គទ្រង់នូវ រាល់ ការឈឺចាប់ រាល់ អំពើបាប រាល់ ទុក្ខវេទនា និងរាល់ ទុក្ខព្រួយរបស់ មនុស្សគ្រប់គ្នា ដែលធ្លាប់រស់នៅនោះទេ !
នៅក្នុងទង្វើដ៏ខ្ពង់ខ្ពស់បំផុតនៃសេចក្ដីមេត្តាករុណាដែលប្រមាថដល់ការយល់ដឹងឬការពិពណ៌នារបស់មនុស្សរមែងស្លាប់ នោះព្រះអង្គសង្គ្រោះបានដាក់ព្រះអង្គទ្រង់ទៅនឹងភាពឈឺចាប់ខាងវិញ្ញាណ និងខាងរូបកាយដែលមិនអាចប្រៀបផ្ទឹមបាន ។
យើងគោរពព្រះឳរសយេស៊ូវយ៉ាងជាក់ច្បាស់ដោយសារតែក្រោយមក ទ្រង់បានផ្តល់នូវការលះបង់ដ៏អស់កល្បជានិច្ចដែលមិនអាចយល់បាននៅក្នុងសួនច្បារគេតសេម៉ានី និងនៅលើឈើឆ្កាងនៅកាល់វ៉ារី ។ ដង្វាយនេះប្រោសលោះយើងម្នាក់ៗនៅពេលយើងជ្រើសរើសប្រែចិត្ត ហើយដើរតាមទ្រង់។ បន្ទាប់មកពេលទ្រង់យាងមកសោយរាជ្យនៅលើផែនដី ទ្រង់បានក្រោកឡើងពីផ្នូរនៅថ្ងៃទីបី ប្រទានដល់យើងម្នាក់ៗនូវពរដែលមិនធ្លាប់មានពីមុនមកនៃការរស់ឡើងវិញ និងជីវិតបន្ទាប់ពីស្លាប់ ។
នៅរដូវកាលនេះ យើងតែងតែច្រៀង ឬនិយាយដោយរីករាយថា « យើងជូនពរឲ្យអ្នកមានថ្ងៃបុណ្យគ្រីស្ទម៉ាស់ដ៏សប្បាយរីករាយមួយ » ។ បងប្អូនប្រុសស្រីជាទីស្រឡាញ់របស់ខ្ញុំ បំណងប្រាថ្នាក្នុងចិត្តរបស់ខ្ញុំចំពោះបងប្អូនម្នាក់ៗនាយប់នេះមានសមាសធាតុជាច្រើន ។ តាមពិតទៅ វាមិនមែនជា បំណងប្រាថ្នារបស់ខ្ញុំសម្រាប់បងប្អូនទេ វាគឺជា ការអធិស្ឋានរបស់ខ្ញុំសម្រាប់បងប្អូននៅពេលពិធីបុណ្យគ្រីស្ទម៉ាស់ដ៏ពិសិដ្ឋនេះ ។
ទីមួយ ខ្ញុំសូមអធិស្ឋានឲ្យបងប្អូននឹងមានអារម្មណ៍នៃសេចក្ដីស្រឡាញ់ដ៏ជ្រាលជ្រៅ និងអស់កល្បជានិច្ចដែលព្រះអង្គសង្គ្រោះរបស់យើងមានសម្រាប់បងប្អូនផ្ទាល់ ។ ព្រះយេស៊ូវគ្រីស្ទស្គាល់បងប្អូនតាំងពីជីវិតមុនផែនដីមកម៉្លេះ ។ ទ្រង់ស្គាល់ ហើយទតឃើញបងប្អូនទាំងអស់គ្នា នៅពេលនេះ ។ ទ្រង់ទតឃើញភាពសប្បាយរីករាយ និងទុក្ខព្រួយរបស់បងប្អូន ។ ទ្រង់បានជួបប្រទះរឿងនីមួយៗទាំងអស់នោះ ។
ទ្រង់មានសេចក្ដីអាណិតអាសូរយ៉ាងល្អឥតខ្ចោះចំពោះការតស៊ូរបស់បងប្អូន ហើយ រីករាយរាល់ពេលដែលបងប្អូនឈានឆ្ពោះទៅមុខដោយសុចរិតក្នុងអំឡុងពេលល្អ និងអាក្រក់ ។
ខ្ញុំសូមអធិស្ឋានថាបងប្អូននឹងទទួលបានសាក្សីផ្ទាល់ខ្លួនរបស់បងប្អូនថា ព្រះយេស៊ូវគ្រីស្ទ គឺជាព្រះរាជបុត្រានៃព្រះ ដែលទ្រង់ពោរពេញទៅដោយអំណាចរបស់ព្រះ ហើយថាដោយសារតែពលិកម្មដ៏ធួនរបស់ទ្រង់ នោះបងប្អូនមិនចាំបាច់មានអារម្មណ៍ថាបងប្អូនត្រូវតែ ប្រឈមមុខនឹងឧបសគ្គដ៏លំបាករបស់ជីវិតតែម្នាក់ឯងនោះទេ ។ ពេលបងប្អូនសូម ស្វែងរក និងគោះដោយស្មោះត្រង់៩ នោះបងប្អូនមានសិទ្ធិចូលប្រើអំណាចរបស់ទ្រង់ជានិច្ចដើម្បីជួយបងប្អូន ដើម្បីពង្រឹងបងប្អូន និងដើម្បីព្យាបាលបងប្អូន ។១០
ខ្ញុំសូមអធិស្ឋានថាបងប្អូននឹងទាញយកប្រយោជន៍ដ៏ពេញលេញពីដង្វាយធួនរបស់ព្រះអង្គសង្គ្រោះដោយការប្រែចិត្តជារៀងរាល់ថ្ងៃ ធ្វើឲ្យជីវិតរបស់អ្នកកាន់តែបរិសុទ្ធ និងស្វែងរកការណែនាំពីស្ថានសួគ៌ចំពោះអ្វីៗទាំងអស់ដែលបងប្អូនធ្វើ ។ និយាយម្យ៉ាងទៀតថា ខ្ញុំសូមអធិស្ឋានឲ្យបងប្អូនមានបទពិសោធន៍សេចក្តីអំណរនៃការគិតដល់សេឡេស្ទាលជានិច្ច ។
ខ្ញុំក៏សូមអធិស្ឋានផងដែរថា បងប្អូននឹងប្រើរដូវវិស្សមកាលនេះដើម្បីចាប់ផ្តើមរដូវកាលនៃការថ្វាយបង្គំផ្ទាល់ខ្លួនកាន់តែប្រសើរឡើង ។ ចាប់ផ្ដើមអានជាថ្មីដើម្បីសិក្សាអំពីការបង្រៀន និងដង្វាយធួនរបស់ព្រះយេស៊ូវគ្រីស្ទ ។ នៅលើផែនដីនេះ គ្មាននរណាម្នាក់ស្រឡាញ់បងប្អូនដូចជាទ្រង់នោះទេ ។ គ្មាននរណាម្នាក់នៅទីនេះយល់ពីបងប្អូនកាន់តែប្រសើរ ឬពិតជាដឹងពីទុក្ខសោក និងភាពទន់ខ្សោយរបស់បងប្អូនឡើយ ។ គ្មាននរណាម្នាក់នៅលើផែនដីមានអំណាចដែលព្រះយេស៊ូវគ្រីស្ទមាននោះទេ ។ គ្មាននរណាម្នាក់នៅទីនេះចង់ឲ្យបងប្អូនក្លាយជាអ្វីៗគ្រប់យ៉ាងដែលបងប្អូនអាចក្លាយទៅជានោះទេ ។ គ្មាននរណាម្នាក់អង្វរព្រះវរបិតាជំនួសឲ្យបងប្អូនដូចជាទ្រង់នោះទេ ។
ព្រះអម្ចាស់ ព្រះយេស៊ូវគ្រីស្ទ គឺជាព្រះអង្គសង្គ្រោះ និងព្រះប្រោសលោះរបស់យើង ។ ទ្រង់គឺជាព្រះរាជបុត្រានៃព្រះ ជាព្រះដ៏បរិសុទ្ធមួយនៃអ៊ីស្រាអែល ។ ទ្រង់គឺជាអ្នកចាក់ប្រេងតាំង ។១១ នៅក្រោមការដឹកនាំរបស់ព្រះវរបិតា ទ្រង់ជាអ្នកបង្កើតរបស់ទាំងអស់ដែលបានបង្កើតឡើង ។១២ ព្រះយេស៊ូវគ្រីស្ទគឺជាព្រះយេហូវ៉ាដ៏មហិមា ជាព្រះនៃព្រះគម្ពីរសញ្ញាចាស់ ។១៣ ទ្រង់គឺជាអេម៉ាញូអែលដែលបានសន្យា ។១៤ ទ្រង់គឺជាព្រះគំរូដ៏អស្ចារ្យរបស់យើង១៥ និងជាព្រះគាំទ្ររបស់យើងជាមួយព្រះវរបិតា ។១៦ ដោយសារដំណឹងល្អដែលបានស្ដារឡើងវិញរបស់ទ្រង់ នោះរាល់ពរជ័យនៃបព្វជិតភាពទាំងអស់របស់ទ្រង់គឺមានសម្រាប់មនុស្សជាតិទាំងអស់ នៅពេលដែលពួកគេមករកទ្រង់ ហើយបានល្អឥតខ្ចោះនៅក្នុងទ្រង់ ។
បងប្អូនប្រុសស្រី ចូរយើងរស់នៅក្នុងវិញ្ញាណនៃ « ហាលេលូយ៉ា » ដែលសរសើរដល់ព្រះអម្ចាស់ព្រះយេហូវ៉ា ។ នៅក្នុងរដូវពិធីបុណ្យគ្រីស្ទម៉ាស់ដ៏រុងរឿងនេះ ចូរយើងមកថ្វាយបង្គំទ្រង់ព្រះគ្រីស្ទជាព្រះអម្ចាស់ !
ខ្ញុំដឹងថាព្រះមានព្រះជន្មរស់ ។ ព្រះយេស៊ូវគឺជាព្រះគ្រីស្ទ ! នេះគឺជាសាសនាចក្ររបស់ទ្រង់ ។ ទ្រង់ដឹកនាំការស្តារដំណឹងល្អរបស់ទ្រង់ឡើងវិញជាបន្តបន្ទាប់ ។ ខ្ញុំសូមថ្លែងទីបន្ទាល់អំពីការណ៍នេះ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕