Li profeetil esil chirix lix yo’lajik li Jesukristo
Sa’ li Ralankil a’in, laa’o laj paab’anel naqaninq’ehi lix yo’lajik li Jesukristo, li Ralal Junaj Yo’lajenaq chiru li Dios, li Junelikil Yuwa’b’ej. Jo’ xkomon li Xch’utam li Xb’eenil Awa’b’ejil re li Ralankil li nak’ojob’an re chanru tooninq’ehinq, tinaatinaq chirix li profeetil aatin re lix yo’lajik.
Maajun chik esil jwal aajel ta raj ru chiru naq li anjel kixk’ut rib’ chiru li xMaria.
“Toja’ naq kiyehe’ re xb’aan li anjel: Matxuwak, Maria, xb’aan naq usilal xataw rik’in li Dios.
“Tatkanaaq sa’ yu’am ut taawanq jun aak’uula’al, Jesus taak’e choq’ xk’ab’a’.
“A’an nimaq xwankil ut ralal li Nimajwal tixk’ab’a’in. Li Qaawa’ Dios tixk’e re lix k’ojarib’aal laj David lix yuwa’.
“Taa’awab’ejinq sa’ xb’een li rochoch laj Jakob chi junelik, ut li xnimal awa’b’ejihom ink’a’ taalajq taa’oso’q” (Lukas 1: 30–33).
Lix yo’lajik, lix yu’am, ut lix kamik li Ralal li Dios sa’ li ruchich’och’ jwal aajel ru sa’ lix k’uub’anb’il na’leb’ li qaChoxahil Yuwa’ re “xk’eeb’al chi uxmank lix kolb’al chiru li kamk ut lix yu’am chi junelik li winq” (Moises 1:39). Naq maji’ nayo’ob’tesiik li ruchich’och’, li Jesukristo kisik’e’ ru re xyalb’al li yu’amej nakam re naq a’anaq li Kolonel na’ajman re xb’aanunkil li k’uub’anb’il k’anjel a’an (chi’ilmanq Moises 4:2). Li yuwa’b’ej aj Adan kitaqlaak xb’aanunkil li mayejak jo’ “jun reetalil li mayej re li Junaj Yo’lajenaq chiru li Yuwa’b’ej, li nujenaq chi usilal ut chi yaal. Jo’kan naq [kik’ute’ chiru], taab’aanu jo’ k’ihal li nakab’aanu sa’ lix k’ab’a’ li K’ajolb’ej, ut taajal aak’a’uxl ut taapatz’ xk’ab’a’ li Dios sa’ lix k’ab’a’ li K’ajolb’ej chi junelik q’e kutan” (Moises 5:7–8).
Sa’ lix hu laj Moises naqil ajwi’ lix ch’olob’ankil naxk’e li Dios chirix lix “k’uub’anb’il na’leb’ re li kolb’a-ib’ choq’ re chixjunileb’ li winq, xb’aan lix kik’el li Junaj Yo’lajenaq chiwu, li taachalq sa’ xjachleb’aal ru li kutan” (Moises 6:62). Dios li Yuwa’b’ej koxtaqla chixjalb’al qak’a’uxl ut chi kub’eek qaha’ sa’ xk’ab’a’ lix “k’ab’a’ li Walal Junaj Chirib’il, li nujenaq chi usilal ut chi yaal, a’an li Jesukristo, li jun ajwi’ chi k’ab’a’ej li k’eeb’ilaq rub’el choxa, li taachalq wi’ li kolb’a-ib’ reheb’ li ralal xk’ajoleb’ li winq” (Moises 6:52).
Laj Isaias, jun nimla profeet re li Najter Chaq’rab’, kixjultika naq chal re xyo’lajik li Mesias: “… a’ ajwi’ li Qaawa’ tixk’ut cheru jun nimla eetalil,” kixjultika. “K’ehomaq reetal: li saaj ixq wank sa’ yu’am; taawanq jun xk’uula’al teelom, ut Emmanuel tixk’e cho’q xk’ab’a’ ” (Isaias 7:14).
Laj Isaias kixjultika ajwi’:
“Xb’aan naq jun k’uula’al xyo’laak choq’ qe ut xqamaatani jun ch’ina al. Li wankilal wanq sa’ ruq’, ut tixk’ab’a’in: Xnimal ru aj k’ehol na’leb’, Li Dios q’axal kaw rib’, Yuwa’b’ej chi junelik, Xnimal ru aj k’ehol tuqtuukil usilal.
“K’a’jo’aq lix wankilal, ut li tuqtuukilal maak’a’aq roso’jik sa’ lix k’ojarib’aal laj David ut lix awab’ejihom: a’an taak’ojob’anq re lix wankil sa’ xb’een li tiikilal ut li k’ulub’ej chalen anajwan ut toj chiruheb’ li kutan chalel” (Isaias 9:6–7).
Lix yo’lajik li Kristo kik’utb’esiik ajwi’ chiruheb’ li profeet re lix Hu laj Mormon. Waqib’ cient chihab’ chik ma xyo’lajik li Kolonel, laj Lehi kixk’ut naq tixwaklesi sa’ xyanqeb’ laj Judio “jun li Mesias, malaj sa’ jalan chik aatin, jun aj kolol re li ruchich’och’ ” (1 Nefi 10:4).
Li profeet aj Abinadi kixjultika:
“Ma ink’a’ kiraatinaheb’ laj Moises jo’ profeet chirix lix k’ulunik li Mesias, ut naq li Dios tixtoj rix lix tenamit? Relik chi yaal, ut chixjunileb’ ajwi’ li profeet li ke’yehok profeetil aatin chalen chaq naq kitikla li ruchich’och’—ma ink’a’ ke’aatinak chi naab’al malaj chi ka’ch’in chirix li k’a’aq re ru a’in?
“Ma ink’a’ ke’xye naq li Dios ajwi’ taakub’eeq sa’ xyanqeb’ li ralal xk’ajoleb’ li winq, ut tixk’ul sa’ xb’een jo’ xxaqalil li winq, ut taaxik rik’in xnimal ru wankilal chiru lix b’een li ruchich’och’?” (Mosiah 13:33–34).
Li profeet aj Nefi kixtz’iib’a naq jun li anjel kixk’ut chiru jun li tuq’ixq sa’ li tenamit Nazaret, xyeeb’al: “K’e reetal, li tuq’ixq nakawil a’an lix na’ li Ralal li Dios, jo’ chanru li tz’ejwalej” (1 Nefi 11:18).
“Ut kik’ulman [kixtz’iib’a laj Nefi] naq kiwil naq kik’ame’ chaq a’an sa’ li Musiq’ej; ut chirix naq k’amb’il chaq sa’ li Musiq’ej chiru jun k’amok, li anjel kinraatina, ut kixye: Chat-iloq!
“Ut kin’ilok ut kink’e wi’chik reetal li tuq’ixq, q’alq’o sa’ ruq’ jun li k’uula’al.
“Ut li anjel kixye we: K’e reetal lix karneer li Dios, relik chi yaal, a’an ajwi’ li Ralal li Junelik Yuwa’b’ej!” (1 Nefi 11:19–21; chi’ilmanq ajwi’ Alma 7:9–10).
Chiqajunilo naqanaw li xb’een esil li kik’eeman chirix lix yo’lajik li Jesus. Rik’in naq kik’eeman li choxahil esil a’in reheb’ li kristiaan jwal tuulaneb’, jo’ yeeb’il qe, sa’ li kutan a’an wan jun xnimal xyaalalil.
“Sa’ li na’ajej a’an wankeb’ aj k’aak’alenel ketomq, yookeb’ chi yo’lek re xk’aak’alenkil lix ketomq chiru q’oqyink.
“Ut jun lix anjel li Qaawa’ kixk’ut rib’ chiruheb’, ut lix nimajwal loq’al li Qaawa’ kixsuteb’ sa’ li xsaqenk: k’a’jo’ naq ke’xiwak.
“A’b’an li anjel kixye reheb’: “Mexxiwak xb’aan naq tinye eere jun chaab’il esilal, ut a’an jun xnimal sahil ch’oolej choq’ re chixjunil li tenamit:
“Anajwan, sa’ lix tenamit laj David, xyo’laak choq’ eere jun aj Kolonel, a’an li Kristo, li Qaawa’. …
“Xaqaamileb’ chixk’atq li anjel naab’aleb’ chik anjel li wankeb’ sa’ choxa, yookeb’ chixnimankil ru li Dios chi jo’ka’in:
“Nim lix loq’al li Dios taqe’q ut wank tuqtuukil usilal sa’ ruchich’och’ rik’ineb’ li raarookeb’ xb’aan li Qaawa’.” (Lukas 2:8–11, 13–14).
B’ab’ayaq chik xyo’lajik li Kolonel, kiyeeman resil reheb’ wiib’ li kristiaan jwal santeb’ (aj k’anjeleb’ sa’ li santil ochoch, jo’ te’k’ab’a’iiq raj anajwan):
“Aran Jerusalen wan jun li winq, aj Simeon xk’ab’a’ li winq a’an tiik xch’ool ut aj paab’anel, yoo chiroyb’eninkil lix k’ojob’ankil xch’ool li tenamit Israel; ut li Santil Musiq’ej wan chixb’een.
“Ak yeeb’il chaq re xb’aan li Santil Musiq’ej naq ink’a’ taakamq chi maji’aq taaril ru lix Kristo li Qaawa’.
“Chi toch’b’il lix ch’ool xb’aan li Musiq’ej, kiwulak sa’ li santil ochoch. Ut naq ki’oksiik li k’uula’al Jesus sa’ li santil ochoch xb’aan lix na’ xyuwa’ re xb’aanunkil li naxye li Chaq’rab’ chirix a’an,
“Kixq’alu li k’uula’al, kixnima ru li Dios ut kixye:
“Anajwan, at Qaawa’, chaq’rab’i laa moos sa’ tuqtuukilal, jo’ chanru yeeb’il sa’ laa waatin,
“Xb’aan naq ak xwil rik’in wu li kolb’a-ib’ ” (Lukas 2:25–30).
Li xkab’ esilal k’eeb’il re jun santil ixq, wan ajwi’ sa’ li santil ochoch. Li xAna, “jun profeet ixq, … ak xikenaq xchihab’, …
“Ut xmalka’an chik ut kaahib’ ro’k’aal chihab’ wan re. Ink’a’ naxkanab’ li santil ochoch, yoo chi k’anjelak chiru li Qaawa’ chi q’eq ut chi kutan rik’in kuyuk sa’ ut tijok.
“Sa’ ajwi’ li hoonal a’an kiwulak aran ut ki’ok chixnimankil ru li Dios ut chi aatinak chirix li k’uula’al rik’in chixjunileb’ li yookeb’ chiroyb’eninkil lix kolb’al li tenamit Jerusalen” (Lukas 2:36–38).
Li profeetil aatin ut li esilal toje’ xwil ru neke’aatinak chirix lix xb’een xk’ulunik li Kolonel. Anajwan yooko chixkawresinkil qib’ choq’ re xkab’ xk’ulunik li Qaawa’, jun hoonal li neke’royb’eni laj paab’anel rik’in sahil ch’oolejil ut li ink’a’ neke’paab’an rik’in xuwak ut q’etok. Nokotaqlaak “[chi wank] sa’eb’ li na’ajej sant, ut [moo’eek’asiik], toj reetal naq taachalq xkutankil li Qaawa’; xb’aan naq k’ehomaq reetal, chalk re chi seeb’ ” (Tz. ut S. 87:8). Relik chi yaal naq eb’ li “santil na’ajej” a’an, a’aneb’ ajwi’ li santil ochoch ut lix sumwank k’uulanb’ileb’ chi tiik, li junkab’al b’ar wi’ k’uulb’ileb’ ut tzolb’ileb’ li kok’al, ut li qana’aj re li qateneb’ankil k’eeb’il xb’aan lix wankilal li tijonelil, jo’ li mision, li santil ochoch, ut xkomon chik li qab’oqb’il k’anjel li k’anjelanb’ikeb’ chi tiik sa’ eb’ li uq’ej, li teep, ut li oqech.
Sa’ xkawresinkil qib’ choq’ re li xkab’ xk’ulunik, ut sa’ li wank sa’eb’ li santil na’ajej, toj yooqo chixninq’ehinkil li Ralankil, moko ka’aj ta wi’ jo’ jun hoonal re xk’eeb’al “xsahil ch’oolej” ut “sahil ninq’e,” jo’ b’an xninq’ehinkil lix yo’lajik li Ralal li Dios, ut jun hoonal re xjultikankil lix k’utum ut lix junelik aajelil ru lix tojb’al rix li maak kixb’aanu. Nintz’aama naq tiikaqo sa’ xb’aanunkil.
Ninch’olob’ xyaalal li k’a’aq re ru a’in, sa’ xk’ab’a’ li ani naqaninq’ehi, a’ li Jesukristo, amen.