Komperensiya sa mga Magtutudlo sa Relihiyon sa CES
Mahinungdanong mga Nutrina sa Ebanghelyo
36:9

Mahinungdanong mga Nutrina sa Ebanghelyo

Hunyo 2024 CES nga Komperensiya alang sa mga Magtutudlo sa Relihiyon

Elder Dale G. Renlund

Sa Korum sa Napulog Duha ka mga Apostoles

Minahal kong kaigsoonan, mapasalamaton ko sa oportunidad nga mamulong sa mga magtutudlo sa relihiyon niining tibuok kalibotan nga sibya. Salamat sa paggahin sa inyong panahon, ug salamat sa tanan ninyong gihimo sa pagtabang nga magpadayon ang buhat sa Ginoo. Palihog hibaloi nga ang inyong kalamposan “unang masukod sa inyong pasalig sa pagtabang sa mga anak sa Dios nga mahimong matinud-anong mga disipulo ni Jesukristo.” Ang inyong kalamposan wala gitino kon pila sa inyong mga estudyante ang nahimong matinud-anon nga mga disipulo sa Manluluwas; wala kini magdepende kon sa unsang paagi sila mipili sa pagtubag sa inyong pagtudlo, mga pagdapit, o sinsero nga mga buhat sa pagkamabination. Ang inyong responsibilidad mao ang pagtudlo sa klaro ug sa gamhanang paagi aron sila makahimo og maalamon nga pagpili nga mopanalangin kanila. Matag indibidwal adunay kabubut-on. Sumala niini, ako mosulti ninyo sama sa gisulti ni Propeta Joseph Smith ngadto sa unang mga misyonaryo sa Simbahan niini nga dispensasyon, “Kon kamo mohimo sa inyong katungdanan, makaayo kini kaninyo, sama sa tanan nga mihangop sa ebanghelyo.”

Niadtong 1916, si Elder David O. McKay miingon, “Walay mas dakong responsibilidad ang anaa ni bisan kinsang tawo, kay sa mahimong usa ka magtutudlo sa mga anak sa Dios.” Ang sama nahitabo usab karon. Ang usa ka magtutudlo nga adunay hugot nga pagtuo, ug nagtudlo og hugot nga pagtuo, mahinungdanon sa Ang Simbahan ni Jesukristo sa mga Santos sa Ulahing mga Adlaw, ilabi na sa nagtubo nga henerasyon.

Sa pipila lang ka gutlo, akong basahon ang kinutlo ni Presidente Jeffrey R. Holland, ug makita ninyo ang koneksiyon. Apan nagdapit ko og pipila ka boluntaryo aron motabang. Ug atong paarion sa atubangan ang mga Reese ug mga Ashton, ug matag usa nila mokuha og Twinkie. Ug kahibalo mo, ang Twinkie usa ka vanilla nga cake nga adunay cream sa tunga. Ug gusto nako nga ablihan nila ang ilang Twinkie ug sugdan ang pagkaon niini. Matag usa nila mokuha og napkin. Ug sulayan nako ang paghimo niini og koneksiyon dinhi.

Si Presidente Jeffrey R. Holland mipasabot og maayo sa kaimportante sa pagtutok diha sa pagtudlo sa mahinungdanong mga elemento sa ebanghelyo niadtong 1998. Sa iyang pakigpulong siya mitudlo: “Kita kinahanglang mopalagsik pag-usab ug mohimo pag-usab sa mas maayo nga pagtudlo diha sa Simbahan—sa panimalay, sa pulpito, … ug labi na sa klasehanan. …

“… Kon moabot ang kalisdanan sa atong kinabuhi … ang mga pilosopiya sa mga tawo nga gigamitan og pipila ka kasulatan ug mga balak dili mosalir. Ato ba gayod nga giamuma ang atong [mga estudyante] sa paagi nga makapalahutay nila kon ang mga kalisod sa kinabuhi motunga? O ato ba silang gitagaan og Twinkie nga klase sa mensahe—nindot nga ideya nga walay espirituwal nga kahulogan?”

Karon nga nakakaon na kamo niana, Presidente Reese, sa imong hunahuna pila ang dietary fiber ang anaa sa imong Twinkie? Sa pagkatinuod, wala.

Sister Reese, sa imong hunahuna pila kaha ka milligram sa calcium ang anaa niana nga Twinkie? Sa pagkatinuod, wala.

Ug Sister Ashton, sa imong hunahuna pila kaha ka microgram sa bitamina A ang anaa diha? Sa pagkatinuod, wala.

Ug Brother Ashton, pila kaha ka milligram sa bitamina C ang anaa diha? Oo, aduna kini sundanan. Kini walay bitamina C.

Sa bata pa ko, ganahan ko og mga Twinkie. Kon gitugotan pa ko sa akong mga ginikanan, wala koy laing kaonon kondili mga Twinkie alang sa pamahaw, paniudto, ug panihapon. Karon, kon gitugotan pa ko sa pagkaon niana, kahibalo ba kamo kon unsa ang inyong makita? Sa pagkatnuod, maglisod unta ko og kalibang, osteoporotic nga buta nga tawo nga adunay scurvy. Dili kini nindot tan-awon.

Salamat ninyo mga boluntaryo. Wala gyod ko moanhi aron hisgotan ang epekto sa kakulangan sa nutrisyon sa atong pisikal nga kahimsog. Ang mga Twinkie tingali lami kaayo, apan kini walay nutrisyon. Apan mianhi ko aron hisgotan ang espirituwal nga nutrisyon nga inyong ihatag sa inyong mga estudyante.

Kon kita adunay matinguhaon nga mga estudyante nga naminaw kanato, kinahanglan nato silang amumahan sa maayo nga pulong sa Dios dili sa espirituwal nga mga Twinkie nga walay espirituwal nga kaayohan. Kadtong giamumahan pinaagi sa espirituwal nga mga Twinkie lagmit dili mahimong mga disipulo ni Jesukristo sa tibuok kinabuhi—mga indibidwal nga nagtubo diha sa Ginoo ug nakadawat sa “kahingpitan sa Espiritu Santo.” Giamumahan pinaagi sa espirituwal nga mga Twinkie, sila mas lagmit, hinuon, nga motubo nga masinupakon, walay pagtuo, ug maglibog sa espirituhanong paagi.

Aron masugpo ang espirituwal nga malnutrisyon, ang atong mga estudyante nagkinahanglan og labing minos upat ka puno sa nutrina sa mahinungdanong mga elemento sa pagpalig-on. Ang una mao ang pagpamatuod bahin sa Langitnong Amahan ug sa Iyang plano, ni Jesukristo ug sa Iyang Pag-ula, ug sa Pagpahiuli sa kahingpitan sa ebanghelyo ni Jesukristo niining ulahing mga adlaw. Aron mahimo kini, kita kinahanglang motudlo sa gipahiuli nga kamatuoran ug mohatag og pagpamatuod bahin niana nga mga kamatuoran.

Mohatag ko og ehemplo bahin niini. Pipila ka tuig ang milabay, usa ka Insik nga doktor nga ginganlan og Grace migahin og 18 ka bulan sa pagbisita sa medikal nga mga institusyon sa Siyudad sa Salt Lake. Iyang nakat-onan ang medikal nga mga aspesto sa pag-ilis sa kasingkasing. Ang akong pamilya nakighigala niya, ug gipaapil namo siya sa daghang kalihokan. Sa usa ka Pasko nga natumong og Dominggo, gidapit namo siya sa Simbahan alang sa panagtigom sa sakramento. Nanghinaot kami nga ang mga mensahe magtudlo bahin ni Jesukristo ug maghatag og gibug-aton sa mga rason alang sa mga pagsaulog og Pasko. Nagserbisyo ko isip presidente sa stake ug naglingkod dapit sa pulpito atol sa miting. Ang akong asawa ug anak naglingkod tupad ni Grace diha sa kongregasyon.

Human sa sakramento, ang unang mamumulong naghisgot bahin sa nailhan apan dili tinuod nga istorya bahin sa ikaupat nga maalamon nga tawo. Nindot kaayo ang pagka-istorya niini ug makapahinuklog. Ang sunod nga mamumulong mibase sa iyang pamahayag sa istorya bahin sa tulo ka gipasumbingay nga mga kahoy. Ang usa gusto nga mahimong usa ka nindot nga kahon apan nahimong kahon nga sudlanan sa pagkaon sa mga hayop, usa ka pasungan nga gihigdaan sa bata sa Betlehem. Ang ikaduha gusto nga mahimong dinayeg nga panglawig nga sakayan. Apan, nahimo kining yano ra nga sakayan nga gigamit sa ordinaryo nga mga mangingisda sa Dagat sa Galilea. Atol sa naghaguros nga unos, usa ka tawo nga gitawag sa uban og “Agalon” miingon, “Hunong,” ug ang unos mihunong. Ang ikatulo nga kahoy gusto nga himoong usa ka butang nga pagadaygon gikan sa layo. Apan, nahimo kining mga troso diin gilansang ang usa ka tawo didto sa bungtod nga gitawag og Kalbaryo. Lain na usab nga dili tinuod apan makapahinuklog nga istorya sa Pasko.

Nasagmuyo ko sa nahisgotan sa panagtigom ug mibati nga dili ko katugot nga matapos lang niana nga paagi alang ni Grace. Bisan kon kami wala nay oras, mipaduol ko sa bishop, ug nangutana, “Ikaw ba ang mosulbad niini nga panagtigom, o ganahan ka nga ako?” Miingon siya nga siya ra ang mosulbad niini. Miadto siya sa pulpito ug migahin og lima ka minuto ug mipasabot kon kinsa ang Bata sa Betlehem ug unsay Iyang mahimo. Ang bishop mihatag og gamhanan nga pagpamatuod bahin ni Jesukristo isip ang Manluluwas sa tanang katawhan. Siya mipahibalo sa panapos nga himno ug kinsa ang mag-ampo ug milingkod.

Sa dihang ang panapos nga himno gikanta, si Grace mipaduol sa akong asawa ug miingon, “Ruth, sa dihang misulti kana nga bishop, adunay nausab sa panagtigom!” Mao gayod. Ang mga mamumulong maayo apan mipadangat og mga Twinkie nga mga mensahe, walay espirituhanon nga calories, anemic nga mga pagpahayag sa pagtuo ug pagpamatuod nga walay sulod nga gahom sa Dios ug ingon man usab sa Espiritu.

Ang sinsero nga pagpamatuod sa bishop nakabase sa mga kamatuoran nga gitudlo diha sa mga kasulatan ug sa mga pagtulon-an sa mga propeta sa Ginoo; nga mao ang nakadapit sa Espiritu ngadto sa miting. Nakaingon ko nga maglisod ang Espiritu sa pagsaksi sa kamatuoran sa dili tinuod nga istorya. Bisan unsa pa ang atong gihimo sa atong pagtudlo, kita sa kanunay kinahanglang modala og balik sa atong pagtudlo ngadto ni Jesukristo ug sa Iyang Pag-ula, sa Langitnong Amahan ug sa Iyang plano, ug sa Pagpahiuli sa Iyang ebanghelyo. Siyempre, nindot nga mogamit og mga istorya, bisan mga dili tinuod, aron makuha ang pagtagad sa mga estudyante. Akong gipasabot, migamit ko og mga Twinkie aron makuha ang inyong pagtagad. Apan sa higayon nga makuha na nato ang pagtagad sa atong mga estudyante, kinahanglan dayon natong ihatag ang pag-amuma nga makapausab sa kinabuhi. Tingali kinahanglan nga pagasundan nako ang mga Twinkie ug mohatag og mga carrot, broccoli, hummus—apan wala nako himoa.

Si Apostol Pablo mipahayag, “Kay ang tanan nga nagtawag sa ngalan sa Ginoo maluwas.” Si Pablo nangutana og sunod-sunod nga mga pangutana nga makatabang nato nga masabtan ang kaimportante sa awtorisado nga magtutudlo nga nagtudlo niining mahinungdanon nga mga elemento. Nangutana siya, “Apan unsaon man sa mga tawo sa pagtawag kaniya nga wala nila tuhoi? ug unsaon man nila sa pagtuo kaniya nga wala gayod nila madunggi? ug unsaon man nila sa pagkadungog kon walay magwawali? Ug unsaon man nila sa pagwali, kondili sila ipadala?” Dayon si Pablo mihatag niini nga pamatuod: “Busa ang pagtuo naggikan sa pagpamati ug ang pagpamati pinaagi sa pulong sa Dios.” Aron ang inyong mga estudyante makapalambo og hugot nga pagtuo diha ni Jesukristo ug sa Iyang mahinungdanong tahas sa plano sa Amahan, ang pagtudlo nila mahitungod sa Langitnong Amahan ug ni Jesukristo mao ang labing importante. Ang tema alang niini nga komperensiya naghisgot niining tanan: “[Pangitaa kini] nga Jesus diin ang mga propeta ug apostoles misulat.”

Ang sikat nga Scottish nga reformer ug tigsangyaw sa relihiyon nga si Thomas Chalmers misulat mahitungod niini nga mga kasinatian sa pagkat-on niini nga baroganan. Si Chalmers nagpuyo gikan sa 1780 ngadto sa 1847. Paingon sa kataposan sa iyang kinabuhi, si Chalmers nakaamgo nga nagpahigayon siya og wala planoha nga eksperimento atol sa iyang pagsangyaw. Sulod sa katuigan, nagsangyaw siya batok sa tanang matang sa imoralidad ug mga problema sa kinaiya. Gitutokan niya ang panggawas nga kinaiya sa iyang mga parokyano, nga nagtudlo gayod sa Napulo ka Sugo. Ang resulta makapasagmuyo. Iyang nakita nga ang iyang mga pulong “gamay ra kaayo og epekto sa moral nga kinaiya” sa mga parokyano. Naamgohan niya nga bisan kon kumbinseron niya ang usa ka tawo nga dili mangawat, ang kalag sa tawo dili gihapon mausab; ang tawo mao ra gihapon sa sulod, bisan kon ang tawo mihunong sa bati nga kinaiya. Sa laing pagkasulti, makausab ka sa kinaiya nga dili mausab ang kasingkasing sa estudyante.

Dayon si Chalmers misugod sa pagsangyaw sa pagpahiuli ngadto sa Dios ug sa kapasayloan sa mga sala pinaagi sa dugo ni Kristo. Diha lamang nga gitudloan niya ang iyang mga parokyano sa ingon niini nga paagi nga nag-usab sila sa ilang kinabuhi. Ang mahinungdanong leksiyon nga iyang nakat-onan mao nga “ang pagsangyaw bahin ni Kristo mao lamang ang epektibong paagi sa moralidad.” Iyang naamgohan ang iyang sayop sa una—nga nagtrabaho siya aron mausab ang kinaiya, dili ang mga kasingkasing. Karon nagtrabaho siya aron mausab ang mga kasingkasing, ug ang kinaiya natural ug dungan nga mausab.

Ang pagkasayod nga si Jesus mao ang Kristo, nga Siya mao ang akong Manluluwas ug Manunubos, nakapausab sa akong kinabuhi ug sa akong kasingkasing. Kini nga kahibalo nakapausab sa akong kinaiya sa paagi nga walay laing makahimo. Nasayod ko nga nakabenepisyo ko sa Iyang walay kinutoban nga maulaong sakripisyo. Kana nga kahibalo mao gayod ang makapausab sa kinabuhi.

Ang ikaduhang puno sa nutrina nga mahinungdanong elemento sa pagpalig-on alang sa mga estudyante mao ang personal nga relasyon nganha ninyo. Tungod kini kay ang personal nga relasyon nganha ninyo makatabang sa mga estudyante nga mapaduol ngadto sa Manluluwas. Siya sa kanunay mao ang tinuod nga tinubdan sa espirituwal nga nutrisyon. Apan ang relasyon tali sa magtutudlo ug sa tigkat-on makatabang sa mga tigkat-on nga mahimong bukas sa mga pulong sa Manluluwas. Bisan sa katuigan human matapos ang inyong pormal nga pagtudlo sa mga estudyante, ang inyong mga relasyon makapadayon sa paghatag og positibo nga impluwensya sa ilang kinabuhi. Ang inyong malungtarong impluwensya mahitabo tungod kay kamo, tungod sa dakong gugma ug pagpakabana sa ilang kaayohan, mipunting nila ngadto sa Ginoo ug sa Iyang doktrina kaysa nganha sa inyong kaugalingon.

Nakasinati ko niini. Usa sa akong mga magtutudlo sa Primary, si Becky, adunay sama niana nga impluwensya ngari nako. Sa bata pa ko, imbes mobadlong sa akong klaro nga mga sayop, nagbantay si Becky nga maghimo ko og maayo, mopislit sa akong aping, mohapuhap sa akong ulo, ug moingon, “Dale, buotan kaayo ka nga bata.” Sa akong tan-aw dili kini makapaubos; kondili, naghinamhinam ko nga mahitabo kana nga mga higayon. Unya, sa dihang batan-on na ko, dili na Primary, ang akong pamilya mibalik niana nga ward human sa katuigan nga pagpuyo sa Finland ug sa Sweden. Si Becky miduol nako human sa akong pagpangalagad sa sakramento, mipislit sa akong aping, mihapuhap sa akong ulo ug miingon, “Dale, buotan kaayo ka nga bata.” Sa dihang mipauli ko gikan sa akong misyon, human sa akong pag-report mahitungod sa akong mga kasinatian sa misyon diha sa panagtigom alang sa sakramento, si Becky miduol nako human sa akong pagpangalagad sa sakramento, mipislit sa akong aping, mihapuhap sa akong ulo ug miingon, “Dale, buotan kaayo ka nga bata.” Sulod sa mga dekada, mihimo ko og mas maayo nga mga pagpili nga dili unta nako mahimo—isip kabahin tungod kay si Becky migiya nako ngadto sa Manluluwas, ug dili ko gusto nga masagmuyo siya.

Usa ka Dominggo human sa akong pagkatawag sa Ikanapulog Duha, mipauli ko sa ward diin nagdako ko. Si Becky anaa gihapon nagpuyo niana nga ward. Milingkod ko sa tumoy dapit sa pulpito, misulti og kadali sa panagtigom alang sa sakramento, ug milingkod. Human sa panapos nga pag-ampo, si Becky, anaa na sa iyang pangedaron nga sobra sa 80, kalit nga miduol. Misaka siya dapit sa gilingkoran sa choir nga anaa sa luyo nako, mipislit sa akong aping, mihapuhap sa akong ulo ug miingon, “Dale, buotan kaayo ka nga bata.”

Ang matag estudyante nagkinahanglan og usa o mas daghan pa nga mga Becky sa ilang kinabuhi—mga magtutudlo nga adunay malungtarong relasyon ngadto nila, usa ka tawo nga mopunting nila ngadto sa Manluluwas, usa ka tawo nga makaapekto sa ilang panghunahuna ug kinaiya, usa ka tawo nga dili nila gusto nga masagmuyo. Kon ang mga estudyante maapektohan sa kalisdanan nga sa walay pagduhaduha masinati nila, makahatag kamo og luwas nga dapit nga ilang kadangpan alang sa gugma ug kaseguroan. Moangkon ko, tingali adunay pipila nga magdumili sa imong mga tinguha nga makaila nila, apan dili kana makapugong nimo sa paghigugma nila. Tingali ikaw adunay mas dakong impluwensya sa nagdumili nga mga estudyante kaysa imong gihunahuna.

Ang ikatulong puno sa nutrina nga mahinungdanong elemento sa pagpalig-on nga gikinahanglan sa matag estudyante mao ang abilidad sa pagtubag sa ilang mga pangutana ug sa mga kabalaka mahitungod sa Simbahan. Walo ka tuig ang milabay, si Elder M. Russell Ballard mitambag sa mga magtutudlo sa relihiyon:

“Wala na ang panahon nga kon ang estudyante mangutana og usa ka matinuoron nga pangutana tubagon lang sa magtutudlo, ‘Ayaw og kabalaka kabahin niana!’ Wala na ang mga panahon nga kon ang estudyante dunay tinuorayng problema mohatag lang og pagpamatuod ang magtutudlo isip tubag sa tuyo nga likayan ang isyu. Wala na ang mga panahon nga ang mga estudyante panalipdan gikan sa mga tawo nga moatake sa Simbahan. …

“Sa dili pa ninyo ipadala ang [inyong mga estudyante] ngadto sa kalibotan, iandam [sila] pinaagi sa paghatag og matinud-anon, mahunahunaon, ug tukmang interpretasyon sa doktrina sa ebanghelyo, mga kasulatan, atong kasaysayan, ug kadtong mga hilisgotan nga usahay masaypan sa pagsabot.”

Mga magtutudlo, makatabang kamo sa mga estudyante pinaagi sa pagtudlo nila sa unsay ipasabot nga tiponon ang pagtuon ug hugot nga pagtuo samtang magkat-on sila. Makatudlo kamo kanila pinaagi sa pagpakita niini nga kahanas ug pamaagi diha sa klase.

Ang ebanghelyo ni Jesukristo gipahiuli sa atong panahon pinaagi sa pagpadayag. Busa nahibalo kita kon unsaon sa pagbalik ngadto sa atong langitnong panimalay, apan tingali aduna gihapon kitay mga pangutana ug mga kabalaka nga tinuoray natong gipangandoy nga matubag. Ang inyong mga estudyante mag-obserbar kon unsaon ninyo pagtubag ang lisod nga mga pangutana; ang paglikay o pagbaliwala sa tinud-anay nga mga pangutana makapatumaw og mas daghan pa nga mga pangutana. Kinahanglan nga andam kamo sa paggiya sa uban sa ilang pagpangita og mga tubag ug sa pagtabang nila sa pagpalig-on og pagtuo sa Ginoo ug sa Iyang balaanong mga tinubdan sa kamatuoran. Si Elder Dieter F. Uchtdorf mitudlo, “Ang pagpangutana dili timailhan sa kahuyang; kini ang mag-una sa paglambo.” Niana nga katuyoan, ang Simbahan nagtigom og nindot, kasaligan nga kapanguhaan alang sa mga indibidwal nga nangita og mga tubag sa ilang kaugalingong mga pangutana ug alang sa uban nga naningkamot sa pagtabang nila. Ang atong tumong mao ang pagtabang sa pagpalig-on sa pagtuo diha ni Jesukristo, ingon nga kita naghatag og pipila ka sugyot kon unsaon pagtudlo sa komplikado ug usahay lisod nga mga hilisgotan.

Kini nga kapanguhaan makita diha sa ChurchofJesusChrist.org nga website ug sa Librarya sa Ebanghelyo nga app. Kon dili kamo pamilyar niini nga mga kapanguhaan, ipakita nako ninyo ang lokasyon diha sa Librarya sa Ebanghelyo app. I-open ang inyong Librarya sa Ebanghelyo nga app. Gikan sa home page, adto sa librarya. Tuploka ang tile “Mga Hilisgotan ug mga Pangutana.” Dinhi inyong makita ang seksiyon nga gitawag og “Pagpangita og mga Tubag sa Imong mga Pangutana,” ang laing seksiyon gitawag og “Pagtabang sa Uban sa Ilang mga Pangutana,” ug alpabetikal nga lista sa daghang hilisgotan nga posibleng makainteres.

Ang seksiyon sa “Pagpangita og mga Tubag sa Imong mga Pangutana” nagtudlo og mga baroganan nga makagiya sa atong pagtuon samtang makugihon kita nga mangita sa mga tubag sa atong mga pangutana—mahitungod man sa hugot nga pagtuo, sa doktrina, o sa kasaysayan sa Simbahan. Ang pasiuna niini nga seksiyon nagpasabot nga ang mga pangutana importante nga bahin sa espirituwal nga paglambo ug ang pagpangita sa mga tubag usa ka tibuok kinabuhi nga paningkamot. Ang mga baroganan nga makita dinhi niini nga seksiyon makaawhag nato sa pagsentro sa atong kinabuhi diha ni Jesukristo tungod kay diha Kaniya kita kinahanglang motukod sa atong pundasyon sa hugot nga pagtuo. Kita gipahinumdoman nga ang plano sa Dios sa kaluwasan naghatag og panglantaw alang sa atong mga pangutana. Kana nga panglantaw makatabang nato sa pag-ila sa mahinungdanong mga kamatuoran kon itandi sa mga butang nga walay kapuslanan. Aron molambo ang hugot nga pagtuo, kinahanglan gayod kita nga mopili sa pagbaton og hugot nga pagtuo. Dayon kita molihok inubanan sa hugot nga pagtuo ug mohupot sa unsay atong nahibaloan. Kon kita mohimo niini, atong mapalawman ang atong pagsabot ug hugot nga pagtuo diha ni Jesukristo.

Ang dugang nga mga baroganan nga gihisgotan niini nga seksiyon makaawhag nato nga magmapailobon sa atong kaugalingon, sa uban, ug sa tukmang panahon sa Ginoo. Kinahanglan nga atong hinumdoman nga ang pagpadayag usa ka proseso nga kasagaran nagsugod sa mga pangutana, sa kanunay moabot pinaagi sa pagtulon-an human sa usa ka pagtulon-an, ug usahay lisod kaayo. Samtang mangita kita sa mga tubag, mangayo kita og giya sa Espiritu Santo ug maningkamot nga makasabot sa nangagi pinaagi pagpahiluna sa mga butang sumala sa konteksto.

Ang seksiyon sa “Pagtabang sa Uban sa Ilang mga Pangutana” nagsugyot og mga baroganan nga makagiya nato samtang nakighinabi kita sa uban nga adunay mga pangutana. Bisan unsa pa man, kinahanglan nga matinahoron kita nga mosulti, maminaw uban sa empatiya, ug mopakita og Kristohanong gugma. Busa paminaw ug tubaga inubanan sa gugma. Tinguhaa nga makasabot, ilha ang kasinatian sa uban, ug likayi ang pagpahunong dayon ug paghukom. Kon kita mohimo niini, kita makaila sa atong mga limitasyon. Palihog hinumdomi nga bisan anaa kanato ang kahingpitan sa ebanghelyo, kita walay tubag sa tanang pangutana. Ang pipila sa mga tubag nagkinahanglan pa nga maghulat sa dugang nga pagpadayag. Kabahin sa ubang pangutana ug sa ubang mga tigpangutana, kita wala gayoy igong kahibalo mahitungod sa kabubut-on sa Ginoo ug sa kahingpitan sa doktrina sa Simbahan nga hingpit nga makatubag sa mga estudyante. Niini nga mga sitwasyon, ang pagsulay sa pagdani sa mga nangutana gamit ang dugang nga mga lohika o rason dili makatabang.

Ang usa ka laang nga sa dili tinuyo makalaang sa mga magtutudlo mao ang paghatag og mga rason o mga pagpasabot nga wala gihatag sa Ginoo. Kon mahitabo kana, ang rason o tubag nga gihatag sa kaulahian mahanaw, ug unya mokunhod ang hugot nga pagtuo sa estudyante. Mas maayo nga mosulti nga wala kita mahibalo kaysa maghimo-himo og rason o pagpasabot. Ang hugot nga pagtuo, human sa tanan, usa ka pagpili, ug usahay ang bugtong tubag mao lamang ang pagsalig sa hugot nga pagtuo diha ni Ginoong Jesukristo ug hugot nga pagtuo diha sa Pagpahiuli sa Iyang ebanghelyo ug pagpailob sa paghulat sa mga tubag gikan sa Ginoo sa higayon nga Siya mopili sa pagpadayag niini. Mosalig kita sa Ginoo ug maningkamot nga mahimong usa ka luwas ug kasaligan nga tinubdan nga kadangpan sa uban alang sa tabang.

Moawhag kita sa mga estudyante sa pagpalambo sa ilang kaugalingong espirituwal nga pagsaksi sa gugma sa ilang Langitnong Amahan ug nga si Jesukristo mitubos nila. Hinumdomi nga bisan kon ang mga estudyante dili mohangop sa kinatibuk-an sa ebanghelyo, motuo gihapon sila ug magmatinud-anon ngadto sa mga pulong ni Jesukristo. Kon naglisod sila sa usa ka aspeto sa Simbahan, makabaton gihapon sila og lig-ong pagpamatuod nga ang Langitnong Amahan nahigugma nila ug nagtinguha sa unsay labing maayo alang nila ug nga si Jesukristo mao ang ilang Manluluwas.

Hinumdomi ninyo nga daghan sa mga sugyot sa pagtabang sa uban sa ilang mga pangutana labing epektibo kon buhaton sa tinagsa-tagsa. Nagtuo ko nga mao kini ang labing maayo nga paagi. Dili maalamon nga ang magtutudlo motugot nga ang tibuok klase igahin sa pagtubag sa importante nga pangutana sa usa ka tawo. Ang mga pangutana sa mga estudyante kinahanglang dili makapatipas sa giplano nga kurikulom nga gihimo aron sa pagpalig-on sa pagtuo. Hinumdomi kanunay nga ang inyong tumong mao ang pagpalig-on sa pagtuo sa tibuok klase, dili magpabalda sa pipila nga moinsister sa ilang mga pangutana. Sama sa tanang pagtudlo, ang pagdumala sa mga pangutana nagkinahanglan og giya sa Espiritu.

Ang sulod niini nga seksiyon mopahinumdom usab nato sa pag-amuma sa atong kaugalingong hugot nga pagtuo samtang magtabang kita sa uban. Si Sister Tamara W. Runia mitambag nato nga dili “mopugos sa mga minahal kinsa mibati nga nahisalaag.” Kondili, sama ni Lehi sa panan-awon sa kahoy sa kinabuhi, “pagpuyo kon asa ka ug tawaga sila. Moadto kamo sa kahoy, magpabilin diha sa kahoy, padayon sa pagkaon sa bunga ug, inubanan sa pahiyom sa inyong panagway, padayon sa pag-awhag niadtong inyong gihigugma ug ipakita pinaagi sa ehemplo nga ang pagkaon sa bunga usa ka malipayon nga butang!”

Ang mga baroganan nga anaa diha sa “Mga Hilisgotan ug mga Pangutana,” ilabi na niadtong mga kamatuoran nga gitudlo diha sa mga seksiyon sa “Pagpangita sa mga Tubag sa Imong mga Pangutana” ug sa “Pagtabang sa Uban sa Ilang mga Pangutana”, nakatabang nako sa pagpangita sa mga tubag sa akong kaugalingong mga pangutana sa paagi nga nakapalig-on sa akong pagtuo ug nakapalawom sa akong pagsabot bahin Kaniya ug sa Iyang buhat. Ang mga baroganan nakatabang usab nako sa pagtabang sa uban sa pagsuhid sa ilang mga kabalaka ug mga pangutana. Ang dugang nga mga sulod idugang sa umaabot aron sa pagtabang uban sa piho nga mga pangutana ug mga hilisgotan, mao nga palihog balik kanunay niini nga kapanguhaan ug ayaw gayod paghunahuna nga, “Nakabasa na ko niana.” Masaligon ko nga makita ninyo kini nga mga seksiyon ug kini nga mga hilisgotan nga makatabang gihapon. Mag-ampo ko nga ang inyong paggamit niini nga mga materyal makatabang ninyo ug sa uban nga mapalig-on ang pagtuo diha sa Manluluwas.

Ang ikaupat ug kataposang puno sa nutrina nga mahinungdanong elemento sa pagpalig-on sa esirituwal nga gusto nakong mabatonan sa mga estudyante mao ang bisan unsa nga mahinungdanong elemento nga makamugna ug makatunhay og usa ka humok nga kasingkasing. Akong buot ipasabot sa usa ka humok nga kasingkasing mao nga ang usa ka tawo sensitibo sa Espiritu. Ang gahi nga kasingkasing, ang kaatbang sa humok ng kasingkasing, makadaot sa espirituwal. Ang mga kasulatan kanunay nga naghulagway sa mga peligro nga nagpaabot niadtong adunay gahi og kasingkasing. Si Nephi nakakat-on nga “ang mga gabon sa kangitngit [nakita diha sa panan-awon bahin sa kahoy sa kinabuhi] mao ang mga pagtental sa yawa, nga nakapabuta sa mga mata, ug nakapatig-a sa mga kasingkasing sa mga katawhan, ug midala kanila ngadto sa lapad nga mga dalan, nga sila mamatay ug malaglag.”

Ang tig-a o gahi nga pisikal nga kasingkasing maglisod nga mapuno sa dugo. Mao nga samtang ang kasingkasing napuno, samtang andam na kini sa pagpitik, ang gahi nga kasingkasing maglisod sa pagpalapad aron makasulod ang dugo. Ug mao kini ang hinungdan sa usa ka matang sa sakit sa kasingkasing nga ingon ka grabe sama sa sakit sa kasingkasing nga hinungdan sa dili tukma nga pagpitik sa kasingkasing. Sa samang paagi ang gahi nga kasingkasing maglisod nga mapuno sa dugo, ang espirituwal nga gahi nga kaisngkaisng maglisod usab nga mapuno sa Espiritu.

Diha sa 2 Nephi 33, si Nephi mipasabot nga ang mga tawo nga mipagahi sa ilang mga kasingkasing dili magtugot sa Balaang Espiritu sa pagpadangat sa mga pulong sa Dios ngadto sa kasingkasing. Siya miingon, “Kay kon ang tawo mamulong pinaagi sa gahom sa Espiritu Santo ang gahom sa Espiritu Santo modala niini ngadto sa mga kasingkasing sa katawhan.” Si Nephi mipadayon, “Apan tan-awa, adunay daghan nga nagpatig-a sa ilang mga kasingkasing batok sa Balaang Espiritu, nga kini walay luna diha kanila; busa, sila misalikway sa daghan nga mga butang nga nahisulat ug giisip kini nga mga butang nga walay bili.”

Si Elder David A. Bednar mipasabot, “Palihog timan-i kon sa unsang paagi ang gahom sa Espiritu modala sa mensahe ngadto pero dili gayod pasulod sa kasingkasing. … Sa kaulahian, … hinuon, ang sulod sa usa ka mensahe ug ang saksi sa Espiritu Santo mosulod lamang sa kasingkasing kon ang nagdawat motugot niini nga mosulod.”

Kon ang atong mga estudyante dili humok og kasingkasing, sila mahimong sama niadtong moingon nga: “Kami nakadawat, ug wala na kami magkinahanglan og dugang pa! … kay igo na kini kanamo!” Ngadto kanila, “sa ingon niana miingon ang Ginoong Dios: Ako mohatag sa mga anak sa katawhan og pagtulon-an human sa usa ka pagtulun-an, sugo human sa usa ka sugo, diyotay dinhi ug diyotay didto; ug bulahan kadtong mopatalinghog sa akong mga sugo, ug mopatalinghog sa akong mga tambag, kay makaangkon sila og kaalam; kay siya nga modawat akong hatagan og dugang pa; ug gikan kanila nga magaingon nga, Igo na kini kanamo, gikan kanila pagabawion gani bisan kana nga anaa na kanila.”

Pinaagi sa gahi nga mga kasingkasing, ang atong mga estudyante mahimong mobabag sa agianan diin mahimo nilang madawat ang pulong o mga tubag sa ilang mga pag-ampo. Sila, sama nato, kinahanglan nga mahimong bukas sa Espiritu aron matudloan sila sa tanang butang nga kinahanglan nilang buhaton. Sama sa gitudlo ni Alma, “Ug sila nga mopatig-a sa ilang mga kasingkasing, kanila ihatag ang mas gamay nga bahin sa pulong hangtod nga sila wala nay mahibaloan mahitungod sa iyang mga misteryo; ug unya dad-on sila nga mga bihag sa yawa, ug dad-on pinaagi sa iyang kabubut-on ngadto sa kalaglagan.” Ang humok nga mga kasingkasing mopasiugda sa resulta nga gisaad sa Manluluwas. “Siya nga maghupot sa mga sugo sa [Dios] makadawat og kamatuoran ug kahayag, hangtod siya pagahimayaon diha sa kamatuoran ug masayod sa tanang mga butang.” Ang gahi nga mga kasingkasing, hinuon, mohimong posible nga ang “usa ka daotan [moabot] ug [mokuha] sa kahayag ug kamatuoran.”

Si Hari Benjamin mihatag og katingbanan sa mga naglangkob niining puno sa nutrina sa mahinungdanong elemento sa pagpalig-on nga makamugna ug makapabilin og humok nga kasingkasing. Siya namahayag, “Nagtinguha ako nga kamo mahinumdom, ug sa kanunay magpabilin sa inyong panumdoman, ang pagkahalangdon sa Dios, ug ang inyong kaugalingon nga pagkawalay kapuslanan, ug ang iyang kaayo ug ang pagkamainantoson nganha kaninyo … ug pagpaubos sa inyong kaugalingon bisan ngadto sa kinahiladman sa pagkamapainubsanon, pagtawag sa ngalan sa Ginoo matag adlaw, ug pagbarog nga makanunayon diha sa pagtuo niana nga moabot.” Ang mga naglangkob mao kini: nga kanunay natong hinumdoman nga ang katubsanan moabot lamang tungod ni Jesukristo, nga kon wala Siya ang atong sitwasyon walay paglaom. Nga nag-aghat nato nga magpaubos sa atong kaugalingon sa hilabihan nga kamapainubsanon ug nagdasig nato nga mag-ampo kada adlaw, ug unya lig-on kita nga mobarog diha sa atong hugot nga pagtuo ni Jesukristo ug sa Iyang Pag-ula. Ang natural nga sangpotanan mao nga kita “magmaya … sa kanunay, ug mapuno sa gugma sa Dios, ug sa kanunay makabaton sa kapasayloan sa [atong] mga sala; ug … magtubo kamo sa kahibalo sa himaya kaniya nga naglalang [kanato].”

Tabangan ninyo ang inyong mga estudyante nga mahinumdom ug sa kanunay magpabiling mahinumdom sa kamaayo sa Dios kon kamo magmakugihon sa pag-agni nila nga motuo ni Kristo “ug makig-uli sa Dios [aron] [m]ahibalo nga pinaagi sa grasya [sila] maluwas, human sa tanan nga [ilang] mabuhat.” Mao nga kamo ug ako “naghisgot kami kang Kristo, nagmaya kami diha kang Kristo, nagsangyaw kami mahitungod kang Kristo, … nga ang atong mga [estudyante] mahimo nga masayod sa unsa nga tinubdan sila mahimo nga mangita alang sa kapasayloan sa ilang mga sala.” Kana nga kahibalo motabang nila nga magpabiling mapaubsanon, moaghat nila sa pagtawag sa ngalan sa Dios matag adlaw ug sa pagbarog nga dili matarog inubanan sa hugot nga pagtuo. Makatabang kini nila nga makapabilin og humok nga mga kasingkasing nga may kalagmitan nga mapuno sa Espiritu Santo.

Ang tanang upat nga puno sa nutrina nga mahinungdanong mga elemento sa pagpalig-on nga akong gihisgotan makatabang ug makapalig-on sa nagtudlo ug sa gitudloan. Karon mao ang maayo nga adlaw sa paghimo og pagsusi sa atong kaugalingon bahin sa atong pagtudlo. Palihog pangutan-a ang imong kaugalingon:

  • Ang akong pagtudlo nakasentro ba ni Jesukristo?

  • Nagtudlo ba ko inubanan sa pagpamatuod ug paghigugma?

  • Nagtinguha ba ko sa pagpalambo og tibuok kinabuhi nga mga relasyon ngadto sa akong mga estudyante?

  • Nagtabang ba ko sa mga estudyante sa pagtubag sa ilang kaugalingong mga pangutana ug dili mobiya nila nga adunay lain pa nga mga pangutana?

  • Nagpakita ba ko og ehemplo sa usa ka humok og kasingkasing, nagpahayag og pasalamat sa Dios ug nagbarong nga lig-on diha sa hugot nga pagtuo?

  • Unsa ang nakat-onan sa akong mga estudyante gikan sa akong ehemplo ingon man usab sa akong pagtudlo?

Mga kaigsoonan, salamat sa inyong gibuhat sa pagtabang sa mga anak sa Langitnong Amahan nga mahimong matinud-anon nga mga disipulo ni Jesukristo, sa pagtabang nila nga makapabilin og humok nga mga kasingkasing, sa pagtabang nila sa pagtugot sa Espiritu nga mosulod sa ilang mga kasingkasing, ug sa klaro nga pagpunting nila ngadto ni Jesukristo, ang Manunubos sa kalibotan. Sama sa atong nadungog sa kanta, kitang tanan posibling matipas sa tumong, posibling mobiya sa Dios nga atong gimahal. Kinahanglan kita nga mapahinumdoman sa Iyang kamaayo aron kana nga kamaayo, sama sa usa ka talikala, mobugkos sa atong walay tumong nga mga kasingkasing ngadto sa Dios. Ug mao nga si Robert Robinson, sa dihang siya misulat niana, miingon, “Ania ang akong kasingkasing. Kuhaa ug selyohi kini. Selyohi kini alang sa mga gingharian sa ibabaw.” Gusto siya nga mapahinumdoman kon ngano nga ganahan siya nga mokanta niana nga awit sa matubsanong gugma sa higayon nga siya usahay dili ganahan nga mokanta niini. Ug ingon usab niana sa atong buluhaton, nga mao ang pagtabang sa atong mga estudyante diha niana nga dalan.

Ang Dios mopanalangin ninyo alang sa unsay inyong gibuhat. Ang Dios mopanalangin ninyo sa inyong kamaayo, ang Dios mopanalangin ninyo sa inyong hugot nga pagtuo, sa inyong pagkamatinud-anon, sa inyong pagpamatuod. Salamat sa pagserbisyo sa Agalon. Salamat nga kamo Iyang Higala, tungod kay Siya mao ang atong mabination, maalamon, langitnong higala. Ako nasayod gayod nga kana tinuod. Sa ngalan ni Jesukristo, amen.