Ang Kapangyarihan ng Personal na Paghahayag

Elder Kim B. Clark

Ng Pitumpu

Church Educational System Training Broadcast • Hunyo 12, 2019 • Church Office Building Main Floor Auditorium

Bago ko simulan ang mensahe ko ngayon, gusto kong ipahayag ang aking pasasalamat at pagmamahal. Kagalakan kong makibahagi sa inyo sa dakilang gawain ng pagtulong sa bagong henerasyon na lubos na matutuhan ang ebanghelyo ni Jesucristo. Mahal ko kayo at dalangin ko na pagpalain kayo at ang inyong pamilya ng Panginoon.

Gusto kong magsalita ngayon tungkol sa tatlong huwaran ng personal na paghahayag sa Aklat ni Mormon:

Ang una ay ang mga sagradong talaang nagpapatotoo kay Jesucristo at sa plano ng Ama. Ang pangalawa ay ang pagsaksi ng Espiritu Santo, na nagpapalakas ng pananampalataya kay Jesucristo at nagpapalalim ng pagbabalik-loob sa kanya. Ang pangatlo ay ang buhay na mga propeta na nagpapatotoo kay Jesucristo at lumalaban sa kasamaan.

Ang mga huwarang ito ay malinaw at mabisang inilahad sa Aklat ni Mormon dahil mahalaga ang mga ito—napakahalaga—sa ibayong pananampalataya kay Jesucristo at mas malalim na pagbabalik-loob sa Kanya sa ating panahon.¹

Nabubuhay tayo sa isang panahon na ginagawa ng masasamang lalaki at babaeng naliligaw ng landas ang lahat ng kanilang makakaya upang makumbinsi ang bagong henerasyon na ang mabuti ay masama at ang masama ay mabuti. Ginagamit nila ang mga pamamaraan ng mga katulad ni Serem, Nehor, at Korihor sa Aklat ni Mormon—mga tusong pangangatwiran, paninipsip, at mga bansag at larawang pinag-isipang mabuti—upang lumikha ng mga maling doktrina tungkol sa ating kaugnayan sa Diyos, pagmamahal, pagpaparaya, kasal, walang-hanggang pagkakakilanlan, pamilya, at marami pang iba. Marami sa mga ideolohiya at doktrinang ito ng mga tao ang may “anyo ng kabanalan, datapwat tinatanggihan [nilang lahat] ang kapangyarihan nito.”²

Ang ating mga estudyante ay nalalantad bawat minuto ng bawat araw sa mga mensaheng gaya nito, at kailangan nila ng personal na paghahayag upang mapalakas ang pananampalataya nila kay Jesucristo at mapalalim ang pagbabalik-loob nila sa Kanya. Umaasa ako at dalangin ko na gagawin ninyo ang lahat ng makakaya ninyo para tulungan ang ating mga estudyante na lubos na matutuhan ang mga huwarang ito ng personal na paghahayag.

Mga Sagradong Talaang Nagpapatotoo kay Jesucristo

Magsisimula ako sa mga Sagradong Talaang Nagpapatotoo kay Jesucristo Ito ay isang temang matatagpuan sa buong Aklat ni Mormon. Nagsimula ito sa mga laminang tanso.³

Ang karanasan ni Nephi kay Laban ay isang mahalagang pangyayari sa kanyang buhay. Nalaman ni Nephi kung gaano kahalaga ang mga talaang iyon para sa kanya at sa kanyang pamilya: “Karunungan sa Diyos na nararapat nating makuha ang mga talaang ito, upang mapanatili natin sa ating mga anak ang wika ng ating mga ama; at … ang mga salitang ipinahayag ng bibig ng lahat ng banal na propeta.”⁴

Ang mga laminang tanso ay nagkaroon ng malaking impluwensya sa pag-unlad ng mga Nephita sa espirituwal, relihiyon, at lipunan. Sila ang pinagmulan ng personal na paghahayag at maluluwalhating propesiya tungkol sa pagparito ng Anak ng Diyos, ang Banal ng Israel. Nagbigay rin sila ng malakas na patotoo tungkol sa kagila-gilalas na plano ng kaligtasan ng Ama. Nagpatotoo ang mga banal na propetang binanggit sa mga laminang tanso na magbabayad-sala ang Mesiyas para sa mga kasalanan ng sanlibutan, magdurusa at mamamatay, at muling babangon na matagumpay laban sa kasalanan at kamatayan.⁵

Nasa mga laminang tanso rin ang mga tipan ng Ama kay Abraham at sa buong sambahayan ni Israel. Natuklasan ni Lehi na siya ay inapo ni Jose at na ang kanyang mga inapo ay magiging mga anak ng tipan, mga tagapagmana sa lahat ng pangakong nagawa ng Diyos kay Abraham, pati na ang pagtitipon ng Israel sa mga huling araw.

Ginamit ni Lehi ang mga laminang tanso upang turuan ang kanyang mga anak tungkol sa Tagapagligtas at sa mga tipang ginawa ng Ama sa sambahayan ni Israel. Itinuloy ni Nephi at ng kanyang kapatid na si Jacob ang kagawiang iyon at idinagdag kalaunan ang sarili nilang mga talaan sa utos ng Panginoon.⁶ Talagang sumampalataya si Nephi sa kahalagahan ng pag-iingat ng mga permanenteng talaan, lalo na yaong sagrado.⁷

Mula sa pundasyon ng mga unang panahong iyon sa lupang pangako, nagkaroon ng kultura ang mga Nephita na itinuring ang pag-iingat ng mga sagradong talaan, pagbabasa, at pagtuturo bilang mataas at banal na mga responsibilidad. May pananampalataya kay Jesucristo at katapatan sa pagtatangi at pagpepreserba sa Kanyang salita, ang mga Nephita ay naging isang lipunan ng mga tagaingat ng mga sagradong talaan, mambabasa, at guro.⁸ Ang mga opisyal na talaan ay iningatan sa mga lamina, ngunit sa paglipas ng panahon, nagkaroon ng isang sistema ng paglalathala ang mga Nephita para makopya at maisulat ang mga sagradong talaan sa mga materyal na mas magaan at malawakang ipinalaganap.⁹

Ang malawakang pagpapalaganap ng mga sagradong talaan ay ginawang posible na maituro ng mga magulang sa kanilang mga anak at ng mga anak sa kanilang mga anak ang mga utos ng Panginoon hanggang sa paglipas ng mga siglo.¹⁰ Madadala ng mga missionary, gaya ng mga anak ni Mosias, ang mga talaan at magagamit ito para turuan ang mga Lamanita na may magagandang bunga.¹¹ Nang turuan ni Alma si Helaman, lumikha ng isang karanasan sa paghahayag ang mga sagradong talaan na “pinalawak … ang kaalaman ng mga taong ito, oo, at … dinala [ang libu-libong Lamanita] sa kaalaman ng Panginoon nilang Diyos, at upang magsaya kay Jesucristo na kanilang Manunubos.”¹²

Ang kagalakang ito ay umabot sa kasukdulan nang magpakita ang nabuhay na mag-uling Tagapagligtas sa mga tao sa templo sa lupaing Masagana.¹³ Mayroon tayo nitong kagila-gilalas at nakahihikayat na patotoo tungkol sa nagbabayad-salang sakripisyo at maluwalhating pagkabuhay na mag-uli ng buhay na Cristo sa Aklat ni Mormon ngayon sa pamamagitan ng awa, kaloob, at kapangyarihan ng Diyos.¹⁴ Gaya ng mga Nephita, dahil sa kanila, mayroon tayong mga sagradong talaan na nagpapatotoo kay Jesucristo at sa plano ng kaligtasan ng Ama. Tulad ng ipinropesiya ni Alma sa kanyang anak na si Helaman noong araw, ang Panginoon ay “[pinangalagaan ang mga bagay na ito] para sa isang matalinong layunin sa kanya, upang maipakita niya ang kanyang kapangyarihan sa mga darating na salinlahi.”¹⁵

Ang hinaharap na iyon ay ngayon. Ipinapakita ng Panginoon ang Kanyang kapangyarihan sa bagong henerasyon sa kagila-gilalas na paraan. Habang itinuturo natin ang kabuuan ng ebanghelyo ni Jesucristo sa Aklat ni Mormon, nadarama ng ating mga estudyante ang kapangyarihang iyon. Habang naghahangad ng personal na paghahayag ang ating mga estudyante sa pagpapakabusog nila sa Aklat ni Mormon, para sa kanila ay magiging katulad ito ng kung ano ang mga laminang tanso para sa mga tao ni Nephi—isang saksi ni Jesucristo at ng kapangyarihan Niyang tumubos at mapagkukunan ng personal na paghahayag at kagalakan.

Pagsaksi ng Espiritu Santo na Nagpapalakas ng Pananampalataya kay Jesucristo at Nagpapalalim ng Pagbabalik-loob sa Kanya

Pag-uusapan natin ngayon ang tungkol sa Espiritu Santo. Paglalakbay ni Lehi sa lupang pangako ay ang paglalakbay ng espirituwal na lakas. Ito ay isang panahon kung kailan tinuruan, ginabayan, at inaliw ng Panginoon sina Lehi at Saria at lahat ng anak nila sa pamamagitan ng kapangyarihan ng Espiritu Santo sa inspirasyon, mga panaginip, at mga pangitain; sa Kanyang sariling tinig; at sa pagpapakita ng mga sugo ng langit. Ipinahayag ni Nephi na ang mga pagpapalang ito na espirituwal na lakas ay dumating “sa pamamagitan ng kapangyarihan ng Espiritu Santo, na siyang kaloob ng Diyos sa lahat ng yaong masisigasig na humahanap sa kanya.”¹⁶

Talagang hinanap ni Nephi ang Panginoon at tumanggap siya ng mga dakilang paghahayag sa pamamagitan ng Espiritu Santo. Ang mithiin niyang malaman para sa kanyang sarili ang huwarang nakikita natin sa buong Aklat ni Mormon. Si Nephi ay nagkaroon ng “matinding pagnanais na malaman ang mga hiwaga ng Diyos.”¹⁷ Ang pagnanais na iyon ay nakaimpluwensya sa kanya, at siya “ay nagsumamo sa Panginoon”¹⁸ sa panalangin nang may tunay na layunin. Sa mithiing ito, sinabi kay Nephi ng Panginoon: “Pinagpala ka, Nephi, dahil sa iyong pananampalataya, sapagkat hinanap mo ako nang buong pagsisikap, nang may kapakumbabaan ng puso.”¹⁹

Ito ang huwaran: pagnanais na malaman, taimtim na panalangin na taos-puso, masigasig na paghahanap nang may pagpapakumbaba at pananampalataya kay Jesucristo, at ang kaloob na Espiritu Santo.²⁰ Nakikita natin ang huwarang ito sa buhay ni Enos, ni Alma, ng mga anak ni Mosias, ni Haring Lamoni at ng kanyang ama, ng mga tao ni Ammon, ni Helaman at ng kanyang mga kabataang mandirigma, at marami pang iba.²¹ Tunay ngang sa panahon ng kabutihan ng mga Nephita at Lamanita, laganap ang personal na paghahayag sa kanila sa pamamagitan ng Espiritu Santo.²²

Tulad ng matatapat na Nephita at Lamanita na tinugunan—at isinulat—ang inihayag ng Espiritu Santo sa kanila, pinagpala sila ng Panginoon ng higit pa. Dahil pinahalagahan nila²³ ang ibinigay Niya sa kanila, pinagpala sila ng Panginoon ng dagdag na pananampalataya sa Kanya, mas malalim na pagbabalik-loob, at diwa ng paghahayag. Lumaki ang kakayahan nilang tumanggap ng paghahayag sa pamamagitan ng kapangyarihan ng Espiritu Santo.

Ang karanasan ni Alma ay isang magandang halimbawa ng huwarang ito. Naalala niya na nakita niya ang mga anghel at tumanggap ng kagila-gilalas na mga pangitain, gayunma’y patuloy niyang hinangad ang pagsaksi ng Espiritu mula sa Panginoon: “Masdan, ako ay nagpapatotoo sa inyo na alam ko na ang mga bagay na aking sinabi ay totoo. At paano ninyo inaakala na alam ko ang kanilang katiyakan?

“Masdan, sinasabi ko sa inyo na ang mga yaon ay ipinaalam sa akin ng Banal na Espiritu ng Diyos. Masdan, ako ay nag-ayuno at nanalangin nang maraming araw upang aking malaman ang mga bagay na ito sa aking sarili. At ngayon nalalaman ko sa aking sarili na ang mga yaon ay totoo; sapagkat ang Panginoong Diyos ang nagbigay-alam nito sa akin sa pamamagitan ng kanyang Banal na Espiritu; at ito ang diwa ng paghahayag na nasa akin.”²⁴(Close quote.)

Ang pagsaksi ng Espiritu Santo ay nagkaroon ng malaking epekto sa mga Nephita at sa lipunang kanilang kinabilangan.²⁵ Wala nang mas magandang halimbawa kaysa sa misyon ng mga anak ni Mosias sa mga Lamanita 91 taon bago isinilang ang Tagapagligtas. Sa pamamagitan ng masigasig pagsasaliksik sa mga banal na kasulatan, pag-aayuno, at panalangin, mga dakilang misyonerong ito ay “taglay … ang diwa ng propesiya, at ang diwa ng paghahayag.”²⁶

Nagkaroon ng malaking impluwensya ang kanilang gawain sa mga Lamanita sa takbo ng kasaysayan ng mga Nephita at Lamanita. Sa unang pagkakataon sa loob ng 500 taon, “libu-libo [sa mga Lamanita] ang nadala sa kaalaman ng Panginoon, … at itinuro sa kanila ang mga talaan at propesiya.”²⁷ Ang paglalarawan ni Mormon sa karanasang ito ay isang pangako ng propeta tungkol sa maaaring mangyari sa sinuman sa mga anak ng Diyos na sumusunod sa huwaran ng personal na paghahayag sa pamamagitan ng Espiritu Santo: “Kasindami ng nadala sa kaalaman ng katotohanan, sa pamamagitan ng pangangaral ni Ammon at ng kanyang mga kapatid, alinsunod sa diwa ng paghahayag at ng propesiya, at ng kapangyarihan ng Diyos na gumagawa ng mga himala sa kanila … [ang] nagbalik-loob sa Panginoon, kailanman ay hindi nagsitalikod.”²⁸

Mga kapatid, ito ang pagsaksi at kapangyarihan ng Espiritu Santo na nagpapalakas ng pananampalataya kay Jesucristo at nagpapalalim ng pagbabalik-loob sa Kanya.

Mga Propetang Nagpapatotoo kay Jesucristo at Lumalaban sa Kasamaan

Ang ikatlong huwaran ng personal na paghahayag ay ang buhay na mga propeta na pinagkalooban ng kapangyarihan at awtoridad na sabihing, “ganito ang wika ng Panginoon,” sa oras na iyon mismo sa lahat ng tao. Ito ang dakilang huwaran ng propeta na nakikita natin sa buong Aklat ni Mormon: mga propetang nagpapatotoo kay Jesucristo, nagtuturo ng Kanyang ebanghelyo, pinagsisisi ang mga tao, at nagbababala at lumalaban sa kasamaan sa kanilang panahon.²⁹ Sa pamamagitan ng paghahayag, lalo na mula sa mga anghel, nabigyan tayo ng mga propeta sa Aklat ni Mormon ng napakalalim at kahanga-hangang kabatiran tungkol kay Jesucristo, sa Kanyang doktrina, at sa Kanyang Pagbabayad-sala.³⁰

Matapang at tahasan ang mga propeta sa panawagan sa mga tao na magsisi. Sa gayon, mayroon tayo sa Aklat ni Mormon ng kahanga-hangang mga turo nina Nephi, Jacob, Haring Benjamin, Alma, Amulek, mga anak ni Mosias, Kapitan Moroni, Mormon, at Moroni tungkol sa pagsisisi.³¹ Ang mga dakilang propetang ito ay nagturo nang malinaw, tuwiran, may pagmamahal, at may pag-asa. Naaalala pa rin natin ang kanilang mga turo sa pamamagitan ng kapangyarihan ng Espiritu Santo:

• “Kayo ba ay espirituwal na isinilang sa Diyos?”³²

• “Kung inyo nang nadama ang umawit ng awit ng mapagtubos na pag-ibig, itinatanong ko, nadarama ba ninyo ang gayon ngayon?”³³

• “Masdan, nahubad na ba sa inyo ang kapalaluan?”³⁴

• “Magsisi, magsisi, sapagkat ang Panginoong Diyos ang nagsalita nito! … siya ay nagpadala ng paanyaya sa lahat ng tao, sapagkat ang mga bisig ng awa ay nakaunat sa kanila, at kanyang sinabi: Magsisi, at akin kayong tatanggapin.”³⁵

Nilabanan ng mga propeta ng Aklat ni Mormon ang masasamang taong naghangad na ilayo ang mga tao kay Jesucristo at wasakin ang Kanyang Simbahan. Ang mga taong gaya nina Serem, Nehor, Amlici, Korihor, Amalikeo, at marami pang iba ay hinikayat ng kaaway na manlito at manlinlang nang buong husay.³⁶ Malaki ang kaalaman nila sa wika at gumamit sila ng tusong mga paraan o argumento para magmukhang masama ang mabuti at ang mabuti, masama.

Binola nila ang mga tao, inakit ang kanilang kayabangan, kapalaluan, pagnanasa sa kapangyarihan, at pagnanais na bigyang-kasiyahan ang kanilang mga pita. Sabi sa mga banal na kasulatan, nagkaroon sila ng “labis na mapanghikayat na pananalita, alinsunod sa kapangyarihan ng diyablo”³⁷ at “nangusap sa lumalakas na pananalita.”³⁸ Bagama’t maling lahat ang mga turo, pagtatalo, at pangakong ito, lubhang kaakit-akit ang mga ito sa likas na tao, at maraming tumiwalag sa Simbahan at naligaw ng landas hanggang sa tumindig ang mga propeta upang sawayin at labanan ang masasama.³⁹

Nang hindi sumapat ang mga salita, nanakot, pumatay, at nagnakaw ang masasamang tao at lihim na nakipagsabwatan upang itago ang kanilang masasamang gawa.⁴⁰

Lumaban ang mga propeta sa mga anyong ito ng kasamaan sa payak at simpleng salita ng Diyos, at nagbahagi ng kanilang patotoo sa pamamagitan ng kapangyarihan ng Espiritu Santo, at ng mga himalang ginawa ng kamay ng Panginoon. Sabi nga ni Jacob nang makaharap niya si Serem, “Ibinuhos ng Panginoong Diyos ang kanyang Espiritu sa aking kaluluwa, kung kaya’t nalito ko siya sa lahat ng kanyang salita.”⁴¹

Nagsasalita ang buhay na mga propeta para sa Panginoon sa ating panahon. Kapag naririnig natin ang kanilang mga salita nang may Espiritu, tumatanggap tayo ng tuwirang personal na paghahayag, kabilang na ang nagpapatibay na paghahayag na totoo ang sinabi ng propeta.⁴² Kapag tinuturuan natin ang ating mga estudyante na hanapin ang mga salita ng buhay na mga propeta upang sagutin ang kanilang mga tanong, inaakay natin sila sa mabisang mapagkukunan ng inihayag na katotohanan. Natututuhan ng ating mga estudyante na dumadaloy ang personal na paghahayag sa kanilang buhay kapag sinusunod nila ang buhay na mga propeta na nagpapatotoo kay Jesucristo at lumalaban sa kasamaan.⁴³

Lubos na Pag-aaral ng Alituntunin ng Personal na Paghahayag

Mga kapatid, sama-sama nating napag-aralan ang personal na paghahayag sa pamamagitan ng mga sagradong talaan, pagsaksi ng Espiritu Santo, at mga buhay na propeta na inilahad nang napakabisa sa Aklat ni Mormon.⁴⁴ Napag-aralan na natin ang mga ito nang magkakahiwalay, ngunit lubhang magkakaugnay ang mga ito. Tunay ngang ang mga ito ay bahagi ng dakilang “ [pagtitipon ng] lahat ng mga bagay kay Cristo”⁴⁵ sa dispensasyong ito.

Kapag pinagsama-sama, ang mga huwarang ito ng personal na paghahayag ay nagpapatotoo, nagpapalakas ng pananampalataya, at nagpapalalim ng pagbabalik-loob kay Jesucristo. Kailangang lubos na pag-aralan ng ating mga estudyante ang alituntunin ng personal na paghahayag upang malaman at maunawaan ito sa kanilang puso’t isipan Kailangan nila malaman kung paano epektibong kumilos nang matwid para matamo ito, kailangan nilang lumago sa alituntunin ng paghahayag at unti-unting maging higit na katulad ng kanilang Tagapagligtas na si Jesucristo.

Magmumungkahi ako ng ilang bagay na sana’y ituro ninyo sa inyong mga estudyante sa pagsisikap nilang lubos na pag-aralan ang walang-hanggang alituntunin ng personal na paghahayag?

Una, ang personal na paghahayag ay personal.

Kung itutuon ng ating mga estudyante ang kanilang puso’t isipan kay Jesucristo at sa Kanyang ipinanumbalik na ebanghelyo, madarama nila ang Kanyang pagmamahal, magagalak sila sa Kanyang ebanghelyo, at mas mapapalapit sila sa Kanya. Magkakaroon sila ng hangaring marinig ang Kanyang tinig at matanggap ang Kanyang liwanag. Ang personal na paghahayag ay pansarili.Kilala nang lubos at personal ng Panginoon ang ating mga estudyante. Mangungusap siya sa kanila nang personal sa sakdal na pagmamahal, pagdamay, at kaalaman tungkol sa kung ano ang kailangan nila. Ang paghahayag ay dumarating sa pamamagitan ng Espiritu Santo, ngunit ito ay salita ng Panginoon. Nagmamahal Siya. Nangungusap Siya. Gumagabay Siya. Nagbibigay Siya ng proteksyon. Ito ay personal.

Pangalawa, lahat ng estudyante natin ay may kakayahang tumanggap ng personal na paghahayag.

Nagkakaroon ng personal na paghahayag nang Espiritu sa espiritu; ito ay banal na pakikipag-ugnayan ng Espiritu Santo sa walang-hanggang espiritu ng ating mga estudyante.⁴⁶ Bawat isa sa ating mga estudyante ay may likas na kakayahang tumanggap ng personal na paghahayag mula sa Diyos. Gumagana iyon ayon sa batas ng Diyos. Kailangang pagsikapan iyon—sa masigasig na paghahangad sa paghahayag sa panalangin, pag-aayuno, pag-aaral, pakikinig, pagsulat, at pagkilos nang may pananampalataya kay Jesucristo. Ang gawaing iyon—at personal na kabutihan—ang nagbubukas sa daluyan ng personal na paghahayag na mayroon silang lahat.

Pangatlo, maaari at kailangang lumago ang kakayahan ng ating mga estudyante na tumanggap ng paghahayag.

Maaaring lumago ang kakayahan ng ating mga estudyante na tumanggap ng personal na paghahayag. Tunay ngang kailangan itong lumago kung nais nilang mabuhay sa espirituwal at tumanggap ng buhay na walang hanggan. Totoo rin ito para sa atin. Kaya nga hinimok at pinakiusapan sila (at tayo) ni Pangulong Nelson na “dagdagan ang inyong espirituwal na kakayahan na tumanggap ng paghahayag.”⁴⁷ Itinuro ni Propetang Joseph, “Sa pamamagitan ng pagkatuto tungkol sa Espiritu ng Diyos at pag-unawa rito, [ang ating mga estudyante] ay maaaring umunlad sa alituntunin ng paghahayag, hanggang sa maging sakdal [sila] kay Cristo Jesus.”⁴⁸

Sa huli, huwag na huwag ninyong maliitin ang naghahayag na kapangyarihan ng pagsunod sa propeta.

Nabubuhay ang ating mga estudyante sa maganda at mapanghamong panahon. Poprotektahan at pagpapalain sila at dadaloy ang paghahayag sa kanilang buhay kung susundin nila ang payo at mga paanyaya ng propeta ng Panginoon. Ang propeta ay nagsasalita para sa Panginoon. Narito ang isang halimbawa na nangyari kamakailan lamang, sa pagsasalita sa ating mga estudyante, isinulat ni Pangulong Russell M. Nelson, “Ang inyong kakayahang magkaroon ng higit na epekto sa mundo kaysa nagdaang mga henerasyon ay lubos na nakaasa sa antas ng inyong katapatan kay Jesucristo. Bawat isa sa inyo ay may pananagutang tumulong na maituro ang ebanghelyo sa inyong mga kasama sa bahay. Tutulungan kayo ng seminary at institute na baguhin ang inyong tahanan para maging kanlungan ng pananampalataya—isang lugar kung saan ang ebanghelyo ni Jesucristo ay itinuturo, pinag-aaralan, ipinamumuhay, at minamahal.”⁴⁹

Mga kapatid, tulungan sana ninyo ang ating mga estudyante na sundin ang propeta. Turuan silang suportahan ang kanilang mga magulang na gawing sentro ng pag-aaral ng ebanghelyo ang kanilang tahanan. Turuan silang ibahagi ang kanilang pagmamahal sa Panginoon at sa Kanyang ebanghelyo sa kanilang pamilya at mga kaibigan. Kapag ginawa nila ito, tatanggap sila ng “paghahayag sa paghahayag … yaon na nagdadala ng kagalakan, yaon na nagdadala ng buhay na walang hanggan.”⁵⁰ Magiging katulad sila ng hukbo ni Helaman, isang inspirasyon sa lahat ng nakakakilala sa kanila, lalo na sa mga tao sa sarili nilang tahanan.

Saksi

Mahal kong mga kapatid, pinatototohanan ko ang ating mapagmahal na Ama sa Langit. Siya ay buhay. Si Jesus ang Cristo, ang ating Tagapagligtas at Manunubos. Alam kong Siya ay buhay. Gumagabay ang Espiritu Santo sa ating buhay. Bukas ang kalangitan. Ito ay araw ng mga himala, isang araw ng paghahayag sa pamamagitan ng kapangyarihan ng “Espiritu … [na] ipinadala sa pamamagitan ng kalooban ng Ama sa pamamagitan ni Jesucristo, na kanyang anak.”⁵¹ Alam kong iyan ay totoo. Nawa’y maghangad ng paghahayag ang bawat isa sa atin mula sa Panginoon upang tulungan ang bawat estudyante, bawat isa, na lubos na matutuhan ang maluwalhating alituntuning ito at tumanggap ng personal na paghahayag sa kanilang buhay ngayon at magpakailanman.

Sa sagradong pangalan ni Jesucristo, amen.

© 2019 ng Intellectual Reserve, Inc. Lahat ng karapatan ay nakalaan. Bersyon: 5/19. Pagsasalin ng “The Power of Personal Revelation.” Tagalog. PD60009021 893

Mga Tala

1. Ang tatlong huwarang ito ay namalas sa pamilya ni Lehi nang sila ay maglakbay patungong lupang pangako. Si Lehi ay isang propeta at nagpropesiya sa kanyang pamilya: pinatotohanan niya si Jesucristo, pinagsisi sila, at sinugpo ang kasamaan sa kanila; naghangad si Nephi ng personal na paghahayag tulad ng ginawa ng kanyang ama at natanggap ito sa mga panaginip at pangitain, sa mga bulong ng Espiritu, sa tinig ng Panginoon, at sa paglilingkod ng mga anghel. At may mga sagradong talaan sila na nasa mga laminang tanso na nagpatotoo kay Jesucristo.

2. Tingnan sa Joseph Smith—Kasaysayan 1:19.

3. Nilinaw ni Nephi na ang kanyang amang si Lehi ay isang taong marunong at mahusay magsalita. Sa simula pa lamang ng kanyang talaan sinabi ni Nephi, “Ako, si Nephi, na isinilang sa butihing mga magulang, samakatwid, ako ay naturuan ng lahat ng karunungan ng aking ama; … ako ay gumawa ng isang talaan sa wika ng aking ama, na binubuo ng karunungan ng mga Judio at ng wika ng mga taga-Egipto. … Ako, si Nephi, ay hindi gumawa ng buong ulat ng mga bagay na naisulat ng aking ama” (1 Nephi 1:1–2, 16).

   Si Lehi ay isang taong edukado na sumulat ng sarili niyang mga salaysay tungkol sa kanyang mga panaginip at pangitain at kanyang mga propesiya. Gayunman, inutusan siya ng Panginoon na pabalikin ang kanyang mga anak sa Jerusalem para hanapin ang mga talaan ng mga Judio na hawak ni Laban.

4. 1 Nephi 3:19–20.

5. Tingnan sa 1 Nephi 19:10 para sa isang halimbawa ng mga isinulat ng mga propeta na nasa mga laminang tanso na hindi natin nakikita sa Biblia.

6. Tingnan sa 1 Nephi 6:4; 19:1, 21. Ang mga laminang tanso ay patuloy na pinagkunan ng kaalaman at paghahayag sa buong kasaysayan ng mga Nephita. Sumusulat 1,000 taon pagkamatay ni Lehi, sinipi ni Moroni si Isaias mula sa mga laminang tanso tungkol sa mga tipan ng Ama at nanawagan sa nakatutubos na kapangyarihan ni Jesucristo: “Gumising, at bumangon mula sa alabok, O Jerusalem; oo, at isuot mo ang iyong magagandang kasuotan, O anak na babae ng Sion; … upang ang mga tipan ng Amang Walang Hanggan na kanyang ginawa sa iyo, O sambahayan ni Israel, ay matupad.

   “Oo, lumapit kay Cristo, at maging ganap sa kanya, at pagkaitan ang inyong sarili ng lahat ng kasamaan” (Moroni 10:31–32).

7. Tingnan sa 1 Nephi 6:4; 19:21.

8. Ang kahalagahan ng wika at karunungan—ang kakayahang bumasa at sumulat at mag-ingat ng mga talaan—ay nakatanim nang malalim sa lipunan ng mga Nephita na kahit mga walang-pananalig ay nagkaroon ng kakayahang iyon. Halimbawa, si Amulon, isa sa masasamang saserdote ni Haring Noe, ay naging guro ng mga Lamanita at tinuruan silang bumasa at sumulat at mag-ingat ng mga talaan. Kahit ang mga tulisan ni Gadianton ay nagbasa at sumulat ng mga liham. Bukod pa riyan, ang paglikha ng isang lipunan ng mga tagaingat ng talaan, mambabasa, at guro ay napakahalaga sa pagpapatupad ng batas sa mga Nephita noong naghahari ang mga hukom. Ang mga talaan at pag-iingat ng talaan pati na ang pagbabasa at pagtuturo ay mahalagang paraan na napagpapala ng Panginoon ang mga Nephita kapwa sa temporal at sa espirituwal. May huwaran sa karanasang iyon para sa atin sa ating panahon.

9. Nakikita natin ang silbi ng mga talaang iyon sa mensahe ni Haring Benjamin nang ipasulat niya ang kanyang mga salita at ipamahagi niya sa kanyang mga tao na hindi makarinig sa kanya. Nakikita natin ito nang basahin ni Abinadi mula sa mga laminang tanso ang mga utos ng Panginoon sa masasamang saserdote ni Haring Noe. Nakikita natin ito sa mga tao sa Ammonihas na naniwala kina Alma at Amulek at “nagsimulang magsisi, at saliksikin ang mga banal na kasulatan” (Alma 14:1). Ang kababaihan at mga bata ng mga nananalig, pati na ang “kanilang mga talaan na naglalaman ng mga banal na kasulatan” (Alma 14:8) ay itinapon sa apoy at natupok.

10. Tingnan sa Mosiah 1:2–5.

11. Tingnan sa Alma 18:36 kung saan “inilatag [ni Ammon sa harapan ni Haring Lamoni] ang mga talaan at ang mga banal na kasulatan.”

12. Tingnan sa Alma 37:8–9.

13. Tingnan sa 3 Nephi 11:8–17. Napuspos ng kagalakan ang mga tao at nagpatotoo tungkol kay Jesucristo nang gabi ring iyon at sa loob ng maraming henerasyon pagkaraan niyon. Itinala ni Nephi, ang apo ng apo ni Nakababatang Alma, ang mga sagradong pangyayaring iyon, at bumubuo ito ng napakagandang patotoo sa pagkabuhay na mag-uli at nagbabayad-salang sakripisyo ng Anak ng Diyos.

14. Sinabi ng Panginoon kay Joseph na binigyan siya ng kapangyarihang isalin ang Aklat ni Mormon sa “awa ng Diyos” (Doktrina at mga Tipan 1:29). Sa pagwawakas ng kanyang buhay, naglabas ng malinaw na panawagan si Nephi sa lahat ng pumapasok sa landas ng tipan na pahalagahan ang salita ni Cristo. Inulit ang panawagang iyon sa paglipas ng mga siglo ng kasaysayan ng mga Nephita sa mga tahanan, sa mga santuwaryo, at sa mga turo ng mga propeta. Malaki ang impluwensya nito sa atin ngayon sa nakahihikayat nitong pangako: “Kaya nga, kinakailangan kayong magpatuloy sa paglakad nang may katatagan kay Cristo, na may ganap na kaliwanagan ng pag-asa, at pag-ibig sa Diyos at sa lahat ng tao. Samakatwid, kung kayo ay magpapatuloy, nagpapakabusog sa salita ni Cristo, at magtitiis hanggang wakas, masdan, ganito ang wika ng Ama: Kayo ay magkakaroon ng buhay na walang hanggan” (2 Nephi 31:20; idinagdag ang pagbibigay-diin).

15. Alma 37:18; tingnan din sa Alma 37:14–19. Ang mga laminang tanso ay naipreserba at nasa pangangalaga at pag-iingat ni Moroni. Pinatotohanan ni David Whitmer na totoo iyan nang interbyuhin siya nina Joseph F. Smith at Orson Pratt sa Richmond Missouri: “Hindi lamang namin nakita nina Joseph at Oliver ang mga lamina ng A[klat] ni M[ormon] kundi pati na ang mga Laminang tanso, ang mga Lamina ng Aklat ni Eter, … at maraming iba pang mga lamina. Ang totoo ay parang nakaupo lang kami nina Joseph at Oliver dito sa isang troso nang kubabawan kami ng isang liwanag, hindi gaya ng liwanag ng araw … kundi mas maluwalhati at maganda. … May lumitaw na parang mesa na may nakapatong na maraming Talaan o mga lamina maliban sa mga lamina ng Aklat ni Mormon, gayundin ang espada ni Laban, ang mga Direktor, ang Bola na ginamit ni Lehi, at ang mga Kasangkapan sa pagsasalin. Nakita ko sila nang kasinglinaw ng kamang ito … at narinig ko ang tinig ng Panginoon nang pinakamalinaw sa lahat ng narinig ko sa tanang buhay ko na nagpapahayag na ang mga talaan sa mga Lamina ng Aklat ni Mormon ay isinalin sa pamamagitan ng kaloob at kapangyarihan ng Diyos” (David Whitmer, sa liham ni Joseph F. Smith kay John Taylor, Set. 17, 1878, Joseph F. Smith papers, 1854–1918, Church History Library, Salt Lake City, 8–9).

16. 1 Nephi 10:17. Sa 2 Nephi, inilarawan ni Nephi kung paano nagiging karapat-dapat ang isang tao sa kaloob na Espiritu Santo at kung ano ang ginagawa ng Espiritu Santo: “Ang pasukang inyong dapat pasukin ay pagsisisi at binyag sa pamamagitan ng tubig; at pagkatapos darating ang kapatawaran ng inyong mga kasalanan sa pamamagitan ng apoy at ng Espiritu Santo. … At pagkatapos, kayo ay nasa makipot at makitid na landas na patungo sa buhay na walang hanggan, … at inyong tinanggap ang Espiritu Santo, na sumasaksi sa Ama at sa Anak, tungo sa katuparan ng pangakong kanyang ginawa, na kung kayo ay papasok sa daan ay inyong tatanggapin” (2 Nephi 31:17–18).

    “Kung kayo ay papasok sa daan, at tatanggapin ang Espiritu Santo, iyon ang magbibigay-alam sa inyo ng lahat ng bagay na nararapat ninyong gawin” (2 Nephi 32:5).

17. 1 Nephi 2:16.

18. 1 Nephi 2:16.

19. 1 Nephi 2:19.

20. Ang huwarang ito ay kitang-kita sa maraming karanasan sa personal na paghahayag sa Aklat ni Mormon. Isipin ang mga sumusunod:

    Hangaring Malaman para sa Ating Sarili

    Ang isang hangaring malaman ang katotohanan, tumanggap ng mga sagot, patnubay o kapanatagan o pagpapatawad, na madalas ay udyok ng salita ng Diyos, ay naghihikayat sa paghahanap ng personal na paghahayag. Si Nephi ay nagkaroon ng “matinding pagnanais na malaman ang mga hiwaga ng Diyos” (1 Nephi 2:16). Ang “kaluluwa [ni Enos] ay nagutom” para sa kapatawaran (Enos 1:4). Taos-pusong napabulalas si Alma, “O Jesus, ikaw na Anak ng Diyos, kaawaan ako” (Alma 36:18). Ito ay tunay na hangaring tumanggap ng paghahayag mula sa Diyos.

    Manalangin nang May Tunay na Layunin

    Ang tunay na hangarin ay humahantong sa panalangin, kadalasa’y sa isang tahimik na lugar. Naghahangad tayo ng paghahayag mula sa ating Ama sa Langit, at ginagawa natin iyan sa taos-pusong panalangin, dahil sa hangaring makaalam. Ito ay isang panalangin na may tunay na layuning kumilos ayon sa ating natatanggap. Gayon ang mga panalanging inialay nina Nephi, Enos, Alma, ng mga anak ni Mosias, at ni Helaman at ng kanyang mga kabataang mandirigma (tingnan sa 1 Nephi 2:16; Enos 1:4; Alma 17:3; Alma 58:10–12).

    Kasigasigan sa Paghahanap

    Ang paghahangad ng paghahayag ay nangangailangan ng kasigasigan sa paghahanap. Isipin si Alma na “nag-ayuno at nanalangin nang maraming araw upang [kanyang] malaman ang mga bagay na ito sa [kanyang] sarili” (Alma 5:46). Ang ibig sabihin ng kasigasigan sa paghahangad ng paghahayag ay pagsasaliksik sa mga banal na kasulatan, pagninilay, pagdarasal, at pag-aayuno tungkol sa ating binabasa at inaalam. Ang ibig sabihin nito ay madalas na paglapit sa Ama sa Langit at pagtitiwala sa Kanyang takdang panahon.

21. Tulad ng itinuro ni Jacob, ang kaloob na personal na paghahayag sa pamamagitan ng Espiritu Santo ay naghatid din ng mga espirituwal na kalooban, ibayong pananampalataya kay Jesucristo, at mas malalim na pagbabalik-loob sa Panginoon: “Anupa’t aming sinasaliksik ang mga propeta, at marami kaming mga paghahayag at diwa ng propesiya; at taglay ang lahat ng patotoong ito kami ay nagtamo ng pag-asa, at ang aming pananampalataya ay naging matatag, kung kaya nga’t tunay na nakapag-uutos kami sa pangalan ni Jesus at sinusunod kami maging ng mga punungkahoy, o ng mga bundok, o ng mga alon sa dagat.

    “Gayon pa man, ipinaaalam sa amin ng Panginoong Diyos ang aming kahinaan upang malaman namin na dahil sa kanyang biyaya, at kanyang dakilang pagpapakababa sa mga anak ng tao, kung kaya’t may kapangyarihan kaming gawin ang mga bagay na ito” (Jacob 4:6–7).

22. Totoo iyan sa lahat ng paraan na nakipag-ugnayan ang Diyos sa Kanyang mga tao. Halimbawa, ang paglilingkod ng mga anghel ay karaniwan sa mga matwid. Ipinahayag n Alma, “Masdan, ang mga anghel ay ipinahahayag [ang pagsisisi] sa marami sa panahong ito sa ating lupain” (Alma 13:24). Bago isinilang ang Tagapagligtas, “Ang mga anghel ay nagpakita sa mga tao, mga pantas, at ipinahayag sa kanila ang masayang balita ng malaking kagalakan” (Helaman 16:14).

23. Tingnan sa Doktrina at mga Tipan 84:85.

24. Alma 5:45–46.

25. Nang turuan niya ang mga tao ng Ammonihas, ibinuod ni Alma ang pambihirang mga pagpapalang tinamasa ng mga Nephita at ang katangian ng komunidad ng mga tipan na nilikha ng Panginoon sa kanila. Nakasaad sa Alma 9:20 – 22 na sila ay “labis na mga pinagpalang tao ng Panginoon”; “lahat ng bagay ay ipinaalam sa kanila, alinsunod sa kanilang mga naisin, at kanilang pananampalataya, at mga panalangin, niyaong nakalipas, at ngayon, at darating pa”; “dinalaw ng Espiritu ng Diyos; … nakipag-usap sa mga anghel, at kinausap ng tinig ng Panginoon”; at tinaglay “ang diwa ng propesiya, at ang diwa ng paghahayag, at marami pang kaloob.”

26. Alma 17:3; tingnan din sa Alma 17:1–3.

27. Alma 23:5; tingnan din sa Alma 23:5–7.

28. Alma 23:6.

29. Nakatuon tayo rito sa papel ng mga propeta ngunit alam natin na ang mga propeta ay mga tagakita at tagapaghayag din. Tulad ng itinuro ni Ammon: “Ang tagakita ay tagapaghayag at propeta rin; … maaaring malaman ng tagakita ang mga bagay na nakalipas na, at gayon din ang mga bagay na mangyayari pa lamang, at sa pamamagitan nila ay ipahahayag ang lahat ng bagay, o, sa lalong maliwanag, ang mga lihim na bagay ay maipaaalam, at ang mga nakatagong bagay ay malalagay sa liwanag, at ang mga bagay na hindi pa nalalaman ay ipaaalam nila, at ang mga bagay rin na hindi sana malalaman ay maipaaalam nila” (Mosias 8:16–17).

30. Ginawa nila iyon nang may matinding espirituwal na lakas kaya tumagos ang mensahe sa puso ng mga tao na handang makinig. Sa loob ng mahigit 1,000-taong kasaysayan, mababasa natin ang tungkol sa mga taong “napuspos ng galak” (1 Nephi 5:1; Mosias 4:3), ang “kanilang mga kaluluwa ay naliwanagan sa pamamagitan ng liwanag ng walang hanggang salita” (Alma 5:7), at “tinubos ng Panginoon; … isinilang … sa Espiritu” (Mosias 27: 24). Sa maraming pagkakataon “libu-libo ang isinapi ang kanilang sarili sa simbahan at bininyagan tungo sa pagsisisi” (Helaman 3:24). Para sa isang halimbawa ng papel ng mga anghel sa paghahayag sa mga propeta na nagpapalalim sa ating kaalaman tungkol sa doktrina ni Cristo, tingnan sa Mosias 3.

31. Tingnan sa 2 Nephi 31; Jacob 2; Mosias 3; Alma 5; Alma 18, Alma 34; Alma 46; Moroni 7; Moroni 8; Moroni 10.

32. Alma 5:14.

33. Alma 5:26.

34. Alma 5:28.

35. Alma 5:32–33.

36. Tingnan sa Jacob 7:1–20 (Serem); Alma 1:3–15 (Nehor); Alma 2:1–31 (Amlici); Alma 30:3–59 (Korihor); Alma 46:3–11 (Amalikeo).

37. Tingnan sa Jacob 7:4.

38. Tingnan sa Alma 30:31.

39. Habang papalapit ang pagsilang ng Tagapagligtas, lalong nagpakasama ang mga tao—lihim silang nagsabwatan (tingnan sa Helaman 1:9–12; Helaman 2:4–5). Sa isang sinaunang proseso na nagsimula noon pang panahon nina Adan at Eva, nagbuo ng pangkat ang masasamang taong ito na naghangad na magkaroon ng kapangyarihan, magkamal ng kayamanan, at wasakin ang Simbahan at pamahalaan sa pamamagitan ng lihim na pagpaslang at panloloob. Ang mga gamit nila ay hindi mga salita kundi mga pamalo, espada, at kutsilyo. Protektado sila ng mga sumpa at tipan na ginawa nila sa isa’t isa upang mapanatiling lihim ang kanilang masasamang gawain para hindi sila maparusahan ng kamatayan kung sakaling may tumiwalag (tingnan sa Helaman 6:20–33; 3 Nephi 1:27–30).

40. Tingnan sa Helaman 1:9–12; Helaman 2:4–5; Helaman 6:20–33; 3 Nephi 1:27–30.

41. Tingnan sa Jacob 7:8.

42. Para sa isang talakayan tungkol sa mga alituntuning ito, tingnan sa Henry B. Eyring, “Patuloy na Paghahayag,” Ensign o Liahona, Nob. 2014, 70–73.

43. Ito ang kahulugan ng mensahe ng Panginoon kay Propetang Joseph: “Yaong sa Diyos ay liwanag; at siya na tumatanggap ng liwanag, at nagpapatuloy sa Diyos, ay tumatanggap ng marami pang liwanag; at ang liwanag na yaon ay lumiliwanag nang lumiliwanag hanggang sa ganap na araw” (Doktrina at mga Tipan 50:24). Bagama’t ang mga Nephita ay hindi palaging naging matwid, at bagama’t palaging may mga tumiwalag, pinanatili ng mga propeta na nag-aalab ang ningas ng pananampalataya. May tapang at kapangyarihan ng paghahayag, tinulungan nila ang mga taong pinanghinaan ng loob at pinahirapan. Tinulungan nila ang marami na isalig ang kanilang buhay sa Tagapagligtas at tumanggap ng personal na paghahayag na nagdala o nagpanumbalik sa kanila kay Jesucristo at sa Kanyang ebanghelyo.

44. Maaaring basahin at tingnan ng ating mga estudyante kung paano pinagpala ng mga sagradong talaan, personal na paghahayag, at buhay na mga propeta ang mga Nephita at Lamanita. Sa sandali mismong mabasa ng ating mga estudyante ang kagila-gilalas na mga pagpapalang ito, mararanasan nila ito para sa kanilang sarili kung tatanggapin nila ang mga ito. Sa pag-aaral at pagsasaliksik sa Aklat ni Mormon at pagdarasal para sa espirituwal na patnubay, ang ating mga estudyante ay maaaring tumanggap ng kaalaman at pag-unawa sa ebanghelyo ni Jesucristo at sa plano ng Ama, maaari nilang matututuhan kung paano ipamuhay ang ebanghelyo, at maaari silang tumanggap ng patotoo na ang nabasa nila ay totoo—lahat sa pamamagitan ng kapangyarihan ng Espiritu Santo.

45. Tingnan sa Mga Taga Efeso 1:10.

46. Itinuro ni Joseph Smith na habang tayo ay nasa mortalidad, dumarating ang personal na paghahayag “sa ating mga espiritu na tila ba wala tayong mga katawan” (Mga Turo ng mga Pangulo ng Simbahan: Joseph Smith [2007], 557).

47. Russell M. Nelson, “Paghahayag para sa Simbahan, Paghahayag para sa Ating Buhay,” Ensign o Liahona, Mayo 2018, 96.

48. Mga Turo ng mga Pangulo ng Simbahan: Joseph Smith (2007), 153.

49. Instagram page ni Pangulong Russell M. Nelson, post mula sa Mar. 22, 2019. Ang post na ito ay nagpapahayag ng mga pagbabago sa kalendaryo at kurikulum ng seminary simula sa Enero 2020.

50. Doktrina at mga Tipan 42:61.

51. Doktrina at mga Tipan 50:27.