Mga Anghel ug Katingala
Pagbansay nga Sibya sa Church Educational System • Hunyo 12, 2019 • Church Office Building Main Floor Auditorium
Sa pangbukas nga pag-ampo ni Brother Peterson, migamit siya og pulong nga “pamilya,” ug natandog ko ganina ug natandog ko karon. Malipayon kaayo ko nga makauban kamo sa tinuig nga kalihokan nga, para nako, usa ka panagpundok sa pamilya. Nadasig ko sa matag pulong nga gisulti ni Brother Webb, ug sa nasulti ni Elder Clark. Ug nag-ampo nga mahiuyon ko sa unsay gipamulong niadtong tulo.
Sa akong pagtimbaya ninyo sumala sa akong giingon ni Brother Peterson, kining ideya nga pamilya tinuoray nga maoy akong pagbati kaninyo, ug gusto ko nga motuo kamo niana. Nasayud ko nga sigurado kining miabut gikan sa mga opisyal sa Hunta [Board], apan sa espesyal kaayo nga paagi, gikan kanako.
Si Pat ug ako mipirma sa among kontrata sa CES 54 ka tuig na ang milabay niining summer, ug nakauban namo kamo sa usa ka paagi o sa virtual nga paagi kada tuig sa among kinabuhi sukad niana—sa bisan unsang paagi. Sa dihang siya ug ako midesisyon nga maningkamot nga himoon ang among kinabuhi, pamaagi ug pagpakabuhi pinaagi sa seminaries and institutes, wala kami masayud kon unsa diay kana kalig-on, kapermanente nga kasuod alang kanamo. Sa among kamabalak-on, kon dili pa tungod sa mga pakighigala ug tinuoray nga inigsoon nga gugma sa isig ka magtutudlo, superbisor, mga administrador, ug sa uban nga nahatag ngari kanamo sa among unang katuigan, nagtuo gyud ko nga wala unta kami salig sa kaugalingon nga makapadayon. Kadto nga koneksyon sa among labing sayo nga higayon diha sa programa mao gihapon ang labing tam-is nga panaghigala nga among naangkon karon lima na ka tuig ang milabay. Ug, siyempre, wala pa kanay labut sa gatusan—ug siguro miabut na gyud tingali sa liboan?—sa mga estudyante nga atong natudloan ug gihigugma sa pagpadayon. Mag-ampo ko nga dili gayud nato wad-on kana nga pagbati sa pamilya diha sa Church Educational System. Usa kini sa mga rason nga gusto kami nga moserbisyo diha.
Ug uban nianang gugma nga gisulti nako sa sinugdanan, usa sa mga butang nga gusto nakong ipaabut karon mao nga kon unsa ka dako ang paghigugma sa tanang General Authorities ug sa mga General Officer sa Simbahan diha kaninyo ug misalig usab kaninyo. Sa atong mga konseho ug mga komitiba, migahin kita og dako kaayo sa atong panahon, sumala sa gipakita sa daghang Opisyal sa Kinatibuk-ang Auxilliary nga anaa dinhi karon, ato kining buhaton og dungan. Wala ko kahibalo kon unsa kadak-a ang panahon nga atong igahin, apan akong bana-banaon (mahimo ko nilang korehian pagkahuman) kana mahimong mokabat ngadto sa mga 30 o 35 porsyento sa tanang panahon nga gigahin sa atong General Authority/General Officer, sa bisan unsang paagi, maghisgut mahitungod sa mga batan-on sa Simbahan—kana nga mga edara, sa laktud nga pagkasulti, nga inyong gikauban, nga kamo gitahasan sa pagtudlo, dugangan pa niadtong andam na nga moanha kaninyo. Nag-istoryahanay kita bahin sa kalibutan nga ilang nahimutangan, sa mga hagit nga ilang giatubang, sa mga lahi nga reyalidad nga ingon og miabut sa mga batan-on sa linghud pa kaayo nga pangidaron. Karon, dili tanang reyalidad mga dautan, apan ang uban niini. Kining mga batan-on nagkinahanglan sa tanang tabang nga ilang makuha, ug maayo na lang nga ilaha kining makuha. Ang Dios mao ang nagtimon niining simbahan, ug kini mapanalipdan. Siya mihimo sa tanang gikinahanglan nga pagpangandam alang niana.
Pananglitan, wala gyud ko nagdahum nga sulagma kaayo nga atong gipasugod ang atong mga estudyante sa programa sa seminary diha sa gyud sa pangidaron ni Joseph Smith nga siya nakadawat og Unang Panan-awon. Nagtuo ko nga ang atong Langitnong Amahan mibati nga sa edad 14 si Joseph mitangkod sa pagkahingkod igo na nga magsugod sa iyang talagsaon nga propitikanhong misyon. Magtuo ba usab kita nga, sa ato pa, mao usab kini ang pangidaron nga ang batan-on magsugod na sa pagkahingkod sa pagpamatuod sa ebanghelyo ni Jesukristo, ang makakita niana nga pagpamatuod nga molambo (hinaut pa) nga sa umaabut nga katuigan mahimong gamhanan nga pwersa sa paggiya nga mahitabo alang sa kahangturan?
Sigurado gyud nga mao kanay hinungdan nga ang Ginoo midasig sa atong programa nga ingon niini ang estraktura—motandog sa kasingkasing sa usa ka batang lalaki o babaye samtang gisugdan nila kanang talagsaong lihok ngadto sa pagkahingkod, gipanghingusgan ang atong pakigkita kanila, naghatag kanila og kasinatian sulod sa semana kay sa mag-agad lang sa kasinatian nga nakat-unan sa adlaw nga Igpapahulay. Samtang magpadayon ang Simbahan ngadto sa mas nakasentro sa panimalay, gisuportan sa Simbahan nga kurikulum, mapagarbuhon kita nga ang CES inubanan sa sinemana sa panimalay nga pagtuon kanunayng nagpuntarya nianang paagiha. Kining kasamtangang pag-adjust mopalihok sa seminary ug institute nga mas mapaduol ngadto sa naandan nga paningkamot sa Simbahan kay sa naa sa kasaysayan.
Samtang naghisgot pa ko niana, tuguti ko nga mohatag og nindot nga komplemento sa nagdumala nga kaigsoonan nga naningkamot sa paghangyo kanamo nga ang kurikulum sa seminary magkuyog sa upat ka tuig nga magpuli-puli nga kurikulum sa kasulatan sa Simbahan. Usa na kana ka butang para namo ang makadawat og ingon nga komplemento, apan partikular kini nga magantihon kon ang chairman mao ang maningkamot sa pagbuhat niini. Pahinumduman ko kamo kon kinsa ang chairman sa atong hunta. Mao kini ang giingon ni Presidente Nelson diha sa pagpahibalo niining kalamboan:
“Sugod sa tuig 2020, ang kurso nga tun-an alang sa seminary mobalhin ngadto sa tinuig nga kalendaryo. Ang mga klase magtuon sa samang basahon sa kasulatan nga gigamit alang sa kurikulum sa Dali, Sunod Kanako. Kini nga kausaban makapalambo sa pamaagi sa pagtuon sa ebanghelyo nga nakasentro sa panimalay ug gisuportahan sa Simbahan pinaagi sa hiniusang pagtuon diha sa panimalay, sa Sunday School, ug sa seminary.
“Samtang nagkonsiderar kamo niini nga kausaban, ako kamong dapiton sa paghunahuna sa inyong kaugmaon. Ang inyong potensyal nga maadunay mas dako og epekto sa kalibutan kay sa nangaging henerasyon nakadepende sa lebel sa inyong debosyon ngato ni Ginoong Jesukristo. Matag usa ninyo responsable sa pagtabang og tudlo sa Iyang ebanghelyo sa inyong panimalay niadtong anaa sa inyong gipuy-an. Ang seminary ug institute makatabang ninyo sa paghimo sa inyong panimalay nga santuwaryo sa pagtuo—usa ka dapit diin ang ebanghelyo ni Jesukristo matudlo, makat-unan, masunod, ug mahigugma.”
Ambot lang kaha ninyo, apan dugay nakong naglangas kabahin niining programa, ug daghan nang katuigan sukad nga sa akong hunahuna nakabaton kita og presidente sa Simbahan nga piho kaayong namulong ug makadasig kaayo kabahin niana ug personal nga namulong kanato. Mapasalamaton ako niana, Presidente Nelson. Karon, tuguti nga pinaagi niining kasamtangang panahon sa dagko ug gagmay nga mga kausaban, ang Kaigsoonan mas naghisgut pa mahitungod niini, ug mas gihunahuna pa, ug mas direktang giatubang uban sa mga kawani sa seminary ug institute ug polisiya kay sa bisan unsang panahon nga akong mahinumduman sa mga kautigan sa akong pagserbisyo dinhi. Pagkanindot sa panahon nga maanaa sa pamilya sa Church Educational System.
Karon, hisgutan na nako ang tumong niini, ang rason sa atong panagtigum karon ug ang rason sa atong pagtudlo sa inadlaw ug sinemana—ang estudyante, ang sentro sa atong kabalaka ug pagbati.
Samtang nagkadako ang pagka-dili espirituhanon sa kalibutan, kinahanglan gayud kita nga makat-on kon unsaon nga mahimong mas matinabangon ug maayong ehemplo sa arong batan-ong lalaki ug babaye kinsa nanalipod sa ilang hugot nga pagtuo samtang nagpuyo sa usa ka kultura nga naghikaw niini o, mas grabe pa, mipakaubos niini. Ang haw-ang tali sa atong matinud-anon nga batan-on ug ang usahay nga antagonistang kalibutan sa ilang palibut, sa labing minus maoy kinatibuk-ang panglantaw, nagkadako sa kada adlaw nga molabay. Kana, siyempre, “nahibaloan na” sa mga panagna sa ulahing mga adlaw, apan dili kana mas makapanindot sa panaghisgut dili usab makalingaw nga atubangon. Niining gamay nga kasayuran sa kalibutan, ang atong mga estudyante maayo kaayong gianggaan og Generation Z tungod sa piho nga kinaiya. Kining mga kinaiya naghatag og gibug-aton sa uban natong mga hagit sa pagtudlo:2
-
Kanunay silang nakakonektar ngadto sa usa ka butang. “Wala gayud silay nahibaloang dapit sa kalibutan nga walay internet, o cell phone [o ear buds]. … Ang Google anaa gayud kanunay [alang kanila].”3 Mahimong wala na sila makakita og tuyokon ang pag-dial sa telepono o nakahimo og tawag diha sa usa ka butang nga ginganlan og booth. Apan OK ra na kay kining grupo mas mopili man lang sa pag-text.
-
Tungod niining naghitak nga network sa elektronik, sila dayag nga maladlad, sa makadaut nga pornograpiya sa linghod kaayo nga pangidaron.
-
Malagmit sila nga “[mosuporta] sa kaminyoon sa mahuyang ug sa mga katungod sa transgender … [isip] tipik sa inadlaw-adlaw nga kinabuhi. Talagsa ra kaayo nga ang sa usa ka Z dili makabaton og usa ka [suod] nga higala gikan sa kumunidad sa LGBT.”4 Tungod niining pakigsuod, ang gamayng kalainan tali sa panaghigala ug pagpauyon-uyon sa kinaiya magsugod sa pagkahanap ug lisud nang mabawi.
-
“Sila mga taphaw nga Kristiyano. Hapit usa ka quarter,” (kini dili atong mga estudyante nga LDS, apan sila sa pagkatinuod ang kalibutan nga atong gitan-aw), “Hapit usa ka quarter (23 porsyento) sa mga hamtong sa Amerika—ug tulo ka bahin sa mga millenials—‘walay gituohan,’ moangkon nga walay giapilan nga relihiyon. Daghang mga Z nagdako sa panimalay diin walay relihiyon sa bisan unsa, [sila walay] kasinatian [o bisan lang og konteksto] alang sa relihiyon [sa ilang kaugalingong kinabuhi].”5
-
Usa ka bag-ohayng pagtuon kabahin sa kinaiya sa Australyanong mga batan-on ngadto sa relihiyon nakahimo og mga ulohan sa balita tungod sa nasuta niini nga 52 porsyento kanila walay giapilan nga bisan unsa nga relihiyon ug 37 porsyento lamang ang nagtuo sa Dios.6
-
Ang Pastor ug tagsulat nga si James Emery White misulat og daghan kabahin sa ilang espirituwal nga kahimtang. Miingon siya, “Una, nahisalaag sila. Dili lang sila basta nagpakabuhi ug giumol pinaagi sa konteksto sa kultura sa taphaw nga Kristiyano. Wala gani sila nakabaton og panumduman sa ebanghelyo [o konteksto sa ebanghelyo]. Ang gidak-on sa kawalay alamag sa pagka-espirituhanon makahingangha gayud. … [Ikaduha], wala silay mga lider. Diyutay ra kon naa man gani direksyon nga maggikan sa ilang mga pamilya, ug gani mas gamay ra gikan sa ilang paningkamot sa paggamit sa internet.”7
-
Sumala sa usa ka artikulo nga gimantala sa USA Today, ang Generation Z maoy labing nag-inusara nga gamayng pundok nga atong nailhan sa katilingban.8 Ang artikulo nga gikutlo sa usa ka pagtuon sa BYU niadtong 2010 nga mitapos (quote), “Ang kamingaw adunay epekto sa mortalidad sama sa pagpanigarilyo og 15 ka sigarilyo sa usa ka adlaw, gani mas kuyaw pa sa sobrang pagkatambok [obesity].”9
-
Anaa sa mga 53 porsyento sa 13 anyos nga batang Amerikana nga wala nalipay sa ilang lawas. Kini nga gidaghanon mosaka ngadto sa 78 porsyento sa panahon nga ang batang babaye moedad na og 17, sa atoa gihapon. Kapin sa 50 porsyento sa mga batan-on nga babaye ug 30 porsyento sa batan-on nga lalaki adunay kinaiya sa dili maayo nga pagkontrolar sama sa pagpalta sa kaon, magpuasa, pagpanigarilyo, pagsuka, ug pagtumar og mga laxative.10
-
Sa katapusan, mubo ra ang ilang panahon sa pag-focus. Sa ubang mga taho mo-average ang gidugayon sa pag-focus sa mga Z anaa ra sa mga walo ka segundo.11 Giwala na unta nako sila sa unang tulo ka bullet nga atong gipakita dinhi.
Nan, ang mga magtutudlo sa seminary ug institute dili makasulbad sa tanan niining mga problemaha sa usa lang ka gabii, apan ang mga Kaigsoonan naglaum kaninyo nga mahimong batid, andam kaayo, nasubay sa pagka-espirituhanon, ug mahinungdanon nga makatubag sa mga pangutana niining mga isyu kon kini motumaw ug moatubang niini kon gikinahanglan sa husto nga panahon. Sa inyong pakigkita sa tunga-tunga sa semana, mas maistorya kamo sa mga estudyante kay sa ubang mga magtutudlo sa Simbahan, mao nga pagmaalamon kon unsaon ninyo kini pagbuhat, apan siguro nga ang Kaigsoonan gusto ug naglaum kaninyo sa pagtabang—sa pormal ug dili pormal nga paagi, diha sa sulod ug sa gawas sa klase—sa pagtudlo sa mga polisiya, pamaagi, ug doktrina sa Simbahan.
Magpabilin nga bukas—ilabi na gayud sa Espiritu. Paggahin og igong kapailin-ilinan sa inyong plano sa leksyon. Kon gikinahanglan ninyo nga pamub-an ang usa ka leksyon og gamay aron sa paghatag sa inyong pagpamatuod ug makapasiugda og diskusyon kabahin sa kasamtangang isyu, palihug buhata kon giaghat sa Espiritu nga kini tukma.
Siyempre, buhaton ninyo kini nga dili makalapas sa utlanan sa katungdanan sa pagkapari o sa lider sa auxiliary nga dili atoang katungod. Ang pag-amping maoy nahimong usa ka hagit sa atong sistema sukad pa sa sinugdanan, ug kanunayon gayud kini. Gikinahanglan ang maayong paghukom ug ang giya sa Espiritu aron ipatuman kini, apan usa kini ka hagit nga angayang dawaton ug ang mga Kaigsoonan mopasalmat sa inyong paningkamot. Ang tanan gikinahanglan, ug ang mensahe sa tanang ang-ang kinahanglang klaro ug makanunayon.
“Kon ang tingog sa trumpeta dili tin-aw kinsa may maandam aron sa pagdasdas sa panggubatan? … Paningkamuti nga mahanas kamo niini alang sa pagpatubo sa simbahan.”12
Tataw gayud, inubanan sa dili katuohang pwersa nga naggamit sa atong panahon, gikinahanglan ang panudlo sa ebanghelyo nga hilabihan ka gamhanan nga wala gayuy makatay-og sa pagtuo o makapasimang sa dalan sa atong mga batan-on kon sila mogawas na sa inyong klase og mobalik sa kalibutan. Kanang matang sa pagtudlo mas sayon ra isulti kay sa buhaton, mosaad ko ninyo ug kamo nasayud niini, apan kitang tanan makahimo og mas maayo. Mas mahimo kitang gamhanan nga mga magtutudlo kay sa usahay lang. Sa pag-atubang sa ingon ka lisud nga tahas, palihug hinumdumi kining usa ka butang gikan sa akong panahon uban kaninyo karon—hinumdumi nga ang usa ka estudyante dili usa ka sudlanan nga pun-on; ang usa ka estudyante ang usa ka kalayo nga pasigahon.
Isip mga magtutudlo sa ebanghelyo, kita kinahanglan nga mahimong tigpasilaub sa pagka-espirituhanon. Ang atong leksyon maoy magsilbing himan sa pagpasiga. Kita ang mga pyromaniacs, kuhaon ang “maniac” nga bahin—ibilin ang “pyros.” Karon, akong ipasabut sa dili pa ko ninyo isumbong sa Kaigsoonan o sa pulis, okay?
Kanunay gyud ko nga nakadayeg nga sa hapit tanang makahuluganon nga sitwasyon sa pagtudlo diha sa Basahon ni Mormon, ang mga hugpong sa pulong nga gigamit sa paghulagway nga mao ang higayon nga ang indibidwal natudloan inubanan sa “gahum ug pagtugot.”13 Mao kana ang akong kinadak-ang tinguha sa akong pagtudlo, ug manghinaut ko nga ingon usab niana ang inyoha.
Palihug ayaw saypa sa pagsabut. Wala ko nagpasabut kabahin sa pagpataas sa inyong tingog, ipaagi og pasundayag ang pagpresentar; wala ko maghisgot kabahin sa dili tinuod nga pagbati. Nagpasabut ko kabahin sa kamahinungdanon sa espiritu, sa usa ka diwa nga makita sa daghang nagkadaiyang pamaagi sama sa kalahi ninyo. Kinahanglan kamo nga magpakakamo. Dili kamo mahimong si Bruce McConkie o si Boyd Packer o si Russell Nelson, hinoon makapangutana kita sa atong kaugalingon kon nganong makaimpluwenya ang mga pamaagi niadtong mga magtutudlo ngari kanato. Pagkat-on kutob sa inyong mahimo gikan sa bantugang magtutudlo (nangagi ug sa kasamtangan), apan siyempre, sa katapusan, kinahanglan natural kamong magtudlo; kinahanglang magtudlo sa inyong pamaagi. Hinoon, bisan unsa man ang pamaagi, ang resulta kinahanglan gayud nga gamhanan, dunay awtoridad sa pagtudlo.
Tuguti ko nga mogamit og mga ehemplo nga narekord diha sa Basahon ni Mormon. Helaman 5 nagtimaan sa istorya ni Nephi ug Lehi, nga ginganlan sunod sa ilang nag-unang mga apuhan, kinsa gihatagan og responsibilidad sa pagtudlo sa mga Lamanite sa yuta sa Zarahemla. Agig dugang sa pagtudlo nianang mahagiton nga mga grupo, si Nephi ug Lehi miatubang usab sa “mga masupilon,” kadtong miapostasiya nga mga Nephite kinsa misukwahi ug miapil sa mga Lamanite diha sa ilang kawsa batok sa mga propeta sa Dios. Ambot kaha ninyo, apan kadtong duha ka grupo nga nagrepresentar sa matang nga agresibo nga tigpaminaw dili ko mahinangop nga makigkita ilabi na sayo sa buntag sa Lunes. Niining puntoha, ang mga Lamanite mga agresibo, suko, ug puno sa determinasyon nga makabalos sa mga Nephite tungod sa panaglalis, nga ang sinugdanan sa kadaghanan niini dugay nang nahikalimtan. Ug unya, ingon og kana dili pa igo, anaa pa ang mga ex-Mormon batok ni Jesus (mao kana ang ilang gigamit nga pulong “Mormon,” dili na akoa, okay?), ang lokal nga mga apostate kinsa sa makausa diha sa priest korum, mahimong nakaserbisyo og matinud-anon nga mga misyon galing lang karon nahisalaag na. Sa makausa nagtudlo sila dapig kanato ug karon sila nagtudlo batok kanato, batok sa gingharian sa Dios.
Bisan pa niana, niadtong duha ka dagkong hagit nga mga grupo ang mga kasulatan nag-ingon kabahin ni Nephi ug Lehi, “Sila nagsangyaw uban sa dako nga gahum, hangtud nga sila milibug sa daghan niadto nga mga masupilon kinsa mibiya gikan sa mga Nephite. … Ug nahinabo nga [sila] nagsangyaw ngadto sa mga Lamanite uban sa dako nga gahum ug pagtugot, kay sila adunay gahum ug pagtugot nga gihatag ngadto kanila nga sila unta makapamulong, ug sila usab aduna sa unsay gikinahanglan nga ilang ipamulong nga gihatag ngadto kanila.”14 Karon, hunong og kadiyot uban kanato. Hunong aron sa pagpamalandong kon unsa kini kanindot nga butang kon ang matag magtutudlo diha sa Church Educational System—o diha sa Simbahan—makahibalo niadtong duha ka mga butang—kon unsaon sa pagsulti ug kon unsay isulti kanus-a ninyo isulti. Mao kana ang tinuod nga gasa sa mga dila bisan kon kini inyong lumad nga pinulongan. Ug sa akong pagsabut niini, kana dayag kaayo nga gasa nga kining duha nahatag samtang kini gihunahuna. Aduna kini talagsaong “gahum ug pagtugot, kay sila adunay gahum ug pagtugot nga gihatag ngadto kanila nga sila unta makapamulong, ug … sa unsay gikinahanglan nga ilang ipamulong. … Busa sila namulong ngadto sa dako nga katingala sa mga Lamanite.”15
Kana bang pulong nga katingala nakapahinumdom ba diha ninyo og bisan unsang matang sa istorya diha sa Basahon ni Mormon? Hunahunaa ang Mosiah 27, diin si Alma ug ang mga anak nga lalaki ni Mosiah “naglibut nga misukol batok sa Dios.” Diha sa bersikulo 11, “Ang anghel sa Ginoo mipakita ngadto kanila; ug siya mikunsad ingon sa usa ka panganod; ug siya naumulong ingon uban sa usa ka tingog sa dugdog, diin nakahimo sa yuta sa pag-uyog diha diin sila nagbarug.”16
Pasayloa ko nga hagatan ko kamo og dyutayng editorial nga komentaryo hapit diha-diha dayon. Sa inyong paminaw, sa inyong paminaw usa ba gyud kadto ka linog? Sa inyong paminaw kon kamo adunay Richter scale gibutang sa matag 40 pye kadto mahimang anaa sa lima o walo o siyam, nga makamugna og mga tsunami sa lawod ug sa tibuok yuta sa kalibutan nga makausab sa yuta? Nan, siguro. Tingali sa laing panahon. Sigurado gayud unta kadto, apan niining partikular nga kahimtang sa gihatag nga konteksto, lagmit dili nako hunahunaon. Sa akong paminaw usa kini niadtong mga personal nga linog nga ipadala sa Ginoo sa mga indibidwal, gihimo nga pinatuyo. Sa akong hunahuna ang yuta miuyog alang ni Alma ug sa mga anak nga mga lalaki ni Mosiah, apan kinsay nasayud kon nakapauyog usab kini sa lain pa.
Sigurado, sigurado gayud nga nakasinati kamo niana sa pagtudlo sa klase. Dunay inyong nasulti nga gamhanan kaayong nakaapekto sa usa ka estudyante nga siya nangluspad, nakahilak, o ang duha, nga midulot sa kahiladman sa ilang kalag, ug gani ang estudyante diha sa tuo, estudyante sa ingon og wala lang naapektuhi. Kana mahitabo sa natad sa misyon sa tanang higayon. Nasayud kamo niana; nahitabo na ninyo! Usa ka managkauban nagtudlo og usa ka pamilya diha sa usa ka apartment complex sa usa ka dapit. Sila adunay makapauyog sa yuta, makapausab sa kasingkasing nga leksyon uban sa usa ka magtiayon nga nadasig diha sa Apartment 106, apan ang mga tawo sa tubad sa 105, malipayon silang nagtan-aw sa American Idol, ug ang mga tawo sa 107 nagbantay sa mga score sa dula sa Green Bay Packers/ San Francisco 49er. Wala ko kahibalo nga ang Richter-scale sa linog mahimong saaran, sa geological nga pagkasulti, apan paminaw nako ang Ginoo ug ang mga kasulatan kanunayng nagsaad kaninyo sa personal nga linog nga makapausab sa usa ka estuyante ngadto sa kinauyokan sa ilang pagkatawo nga ang yuta mangurog diha sa atubangan sa ilang tiilan. Apan, pasayloa ko—nausab ang akong istorya!
Padayon sa bersikulo 12 sa Mosiah 27:
“Hilabihan ang [ilang] pagkatingala” si Alma ug ang anak nga mga lalaki ni Mosia, “hilabihan ang ilang pagkatingala, nga sila nangatumba sa yuta, ug wala makasabut sa mga pulong diin siya [ang anghel] numolng ngadto kanila. …
“ … Ug karon si Alma ug kadto nga uban kaniya natumba pag-usab ngadto sa yuta, kay dako kaayo ang ilang katingala; kay uban sa ilang kaugalingon nga mga mata sila nakakita sa anghel sa Ginoo; ug ang iyang tngog ingon og dugdog, diin nakauyog sa yuta. …
“ … Ug karon ang katingala ni Alma hilabihan ka dako nga siya nahimo nga amang, nga siya dili na makabuka sa iyang ba-ba; oo, siya nahimo nga nawad-an og kusog, gani siya dili na makalihok sa iyang mga kamot.”17
Unsa ang akong gihunahuna, giampo, ug gilauman nga moabut ngadto sa Church Educational System tinud-anay gayud nga makapatingala nga pagtulun-an. Kinahanglan gayud nga kita makapatingala sa mga estudyante ug buhaton kini inubanan sa “gahum ug pagtugot sa Dios”18 nga nahatag ngadto sa usa ka magtutudlo—propesyunal man o bulontaryo—kinsa nagtudlo sa ebanghelyo ni Jesukristo nga maisugon ug matinuoron. Nakahibalo ba kamo sa gigikanan sa pulong nga tingala? Wala ko kahibalo unsa kini sa reformed nga Ehiptuhanon o Hebreohanon, apan sa Iningles gikuha kini gikan sa ugat nga pulong “tonare”—nagpasabut og dugdog.19
Nakatabang ba kana ninyo nga masabtan kon nganong unya, human niining panag-istorya, si Alma moingon, “O nga ako unta usa ka anghel, ug makaangkon sa pangandoy sa akong kasingkasing, nga ako makalakaw ug makasulti uban sa trumpeta sa Dios, uban sa tingog nga makapakurog sa yuta, ug mosinggit og paghinulsol ngadto sa matag katawhan!
“Oo, ako mopadayag ngadto sa matag kalag, ingon sa tingog sa dugdog, sa paghinulsol ug sa laraw sa katubsanan, nga sila kinahanglan maghinulsol ug moduol ngadto sa atong Dios, nga aron unta wala nay dugang pa nga kasubo diha sa ibabaw sa tibuok yuta.”20
Nan, minahal kong mga higala sa CES, maklaro man nganong si Alma gusto og impluwensya sa anghel, usa ka tingog sa dugdog nga ang tunog sama sa trumpeta sa Dios ug mouyog sa yuta. Yano lang kini—unsay nahitabo diha niya mahimong mahitabo sa uban! Ang mga estudyante wala kalihok sa paghinulsol sulod sa tulo ka adlaw, usa ka paglunsay sa hilabihan nga sila dili makahimo ug dili gayud mahilayo sa epekto niini, mga kinabuhi nga hingpit ug kompleto nga gipahinungod sa pagtukod sa gingharian sa Dios hangtud sa kahangturan human niana. Karon, kana ang gamhanang pagtudlo. Kita makaamgo sama ni Alma nga dili kita mga anghel, ug dili kita makaapekto sa tanang higayon nga moatubang kita sa usa ka grupo sa mga estudyante. Apan ang maanindot nga butang mahitungod sa atong CES nga mga calling ug propesyon mao nga kita adunay mga oportunidad sa pagsulay sa pagbuhat niini, nga, sa pasumbingay nga pagkasulti, gibalik lang nato ang kahimtang sa klasehanan diin mahimo kita nga maningkamot.
Karon, balik sa Helaman 5. Hinumdumi nga si Nephi ug si Lehi dili usab mga anghel; maayo lang gyud sila, mortal nga mga matutudlo nga dunay misyon ug usa ka mensahe nga nagtudlo inubanan sa “talagsaong gahum ug pagtugot.” Kining duha nakakita sa 8,000 ka mga Lamanite nga “nabunyagan ngadto sa paghinulsol” ug miapil sa Simbahan sa Dios.21 Uban sa kalayo nga mikanaug gikan sa langit, nahinumdom kamo sa istorya, ug ang kalayo sa Espiritu nagdilaab diha, niining tibuok panagtigum sa “mga estudyante,” kon buot ninyo, ang ilang mga kalag mosiga pinaagi sa kamatuoran. Sa akong kasinatian, 8,000 nindot na nga sinemanang report sa zone gikan sa bisan unsa nga managkompanyon sa bisan unsang natad sa misyon sa bisan asang dapit sa kalibutan.
Palihug tuguti ko ninyo sa usa pa ka higayon nga mamulong mahitungod sa usa pa ka magtutudlo kinsa dili lang mipasunog sa ilang kalag apan mibugti og labing dako tungod sa iyang pagserbisyo gamit ang iyang lawas nga gidauban sa kalayo.
Si Abinadi, gikan sa akong pagkabata, maoy usa sa akong labing dinayeg nga mga propeta sa atong tibuok kasulatan nga sumbanan sa buhat. Sa una natong pagkahibalo ni Abinadi siya ang tawo nga hapit wala mailhi, walay propetikanhong kagikan ingon man walay bisan unsang kaliwat nga iladong pamilya. Tungod sa nagkahugno nga pagkagahi sa colonya ni Zeniff, si Abinadi gitawag aron sa pagsangpit og paghinulsol ngadto sa anak nga mga lalaki ni Zeniff ug sa walay pulos nga sumusunod, si Haring Noah. Nakahibalo na kamo sa istorya.
Si Noah daling miluwat og usa ka pahamtang sa kamatayon, ug si Abinadi napugos sa pagkagiw. Human sa duha ka tuig nga pagtago, si Abinadi mipatim-aw na usab aron sa pagtudlo ug pagpamatuod. Mohunong ko dinhi aro mopahiyum sa maklaro nga kainosente sa propheta sa tanan niini. Hingpit siya nga nalahi sulod sa 24 ka bulan, karon nagtakuban aron magpadayon nga dili siya mailhan, ug gani sa iyang pagbalik sa unang hugpong sa mga pulong nga migawas sa iyang baba mao kini, “Ang Ginoo nagsugo kanako, nag-ingon—Abinadi, lakaw ug pagpanagna.”22 Niining tungura naghunahuna ko kabahin sa kaepektibo sa pagtakuban, apan sigurado nga wala kita makahunahuna mahitungod sa iyang hugot nga pagtuo ug determinasyon.
Maisugon kaayo nga nanagna batok sa mga pagkasalawayon ni Haring Noah ug sa iyang hukmanan, gidakop si Abinadi ug sa katapusan gitaral diha mismo nianang hukmanan nga iyang gipanghimaraut. Walay puangod nga gisukit-sukit niining konseho, ang bantugan nga propeta “mitubag kanila sa walay kahadlok, ug nakasugakod sa tanan nila nga mga pangutana, … milibug kanila diha sa tanan nila nga mga pulong.”23 Dayon mibali gikan sa depensa ngadto sa pag-atake, iyang gisugdan ang pipila sa lima ug tunga ka mga kapitulo sa doktrina nga naapil tali sa labing gamhanan nga nahatag diha sa entiro sa Basahon ni Mormon. Sa iya palang pagsugod, bisan pa man, sa dihang si Noah, nahasol nga tanlag ug kayugot, mimando aron siya patyon.
Ang tanan nag-andam og agianan alang niining panghitabo nga mahimong permanenting kabahin sa akong kalag, dili kaayo sama sa paagi nga si Arnold Friberg mihulagway niini sa iyang matahum kaayo nga painting,24 apan duol na, igo ra. Sa bisan unsang kahimtang, isip usa ka binilanggo si Abinadi sigurado gayud nga ginapos, ang paggaid sa kadena nianang panahona. Sa iyang edad, wala kita masayud. Si Friberg miisip kaniya isip usa ka tigulang na nga lalaki o (mas tigulang pa), apan ang teksto wala mag-ingon niana. Wala ko kahibalo kon unsa siya ka katigulang. Kusgan ba? Wala ko masayud, apan gikan lang siya sa duha ka tuig nga pagpalayo sa usa ka matango uban pa ug mahimong didto sa dapit diin aduna o walay daghang pagkaon. Hunahunaa si Elias nga ang mga uwak ang nagpakaon. 25 Nakakita na ba kamo sukad og koko sa uwak? Dili ko motuo nga ang mga pako niining mga langgama makadala og butang nga dagko. Wala kita masayud, apan tingali si Abinadi gutom, ug gikapoy, ug gani luya ang lawas tungod sa iyang mga kahimtang.
“Ipalayo kini nga tawo, ug patya siya,” Misinggit si Haring Noah, “kay unsa ang atong buhaton kaniya. …
“ … Ug sila mibarug ug misulay sa pagdapat sa ilang mga kamot diha kaniya; apan siya nakasagubang kanila, ug miingon ngadto kanila:
“Ayaw ako og hikapa, kay ang Dios mohampak kaninyo kon kamo modapat sa inyong mga kamot ngari kanako kay ako wala pa makasulti sa mensahe nga ang Ginoo misugo kanako sa pagsulti. …
“ … Kay ang Espiritu sa Ginoo diha kaniya; ug ang iyang nawong mihayag sa hilabihan nga kasiga, gani sama kang Moises samtang didto sa bukid sa Sinai, samtang nakigsulti sa Ginoo.
“Ug siya namulong uban sa gahum ug katungod gikan sa Dios.”26
“Gahum og pagtugot.” Anaa na usab. Sa dihang gisugdan nako sa pagsulat niining pakigpulong ug gustong mogamit ni Abinadi, wala ko makahinumdom, o tingali wala ko masayud, nga kining istorya mitapos sa samang mga pulong, nga siya mitudlo kanako inubanan sa gahum ug pagtugot. Kahigalaan, mga higala, usa ka butang ang magbasa diha sa pahina, apan lahi ang makita diha sa atong mga hunahuna ug mabati sa atong mga kasingkasing sama sa tingog sa dugdog, “Ayaw ako og hikapa, kay ang Dios mohampak kaninyo kon kamo modapat sa inyong mga kamot ngari kanako.”27 Sa kada basa nako niining mga pulong lisud kaayo nga dili makahilak. Gamhanan pa gihapon kaayo kini, ang ingon nga kaisug, ug hilabihan nga kalig-on nagpabilin sa akong kasingkasing. Walay timailhan nga siya misinggit. Walay timailhan nga siya nangusog. Ubos sa armadong gwardiya ug sa gapos, wala siyay malihok nga bisan unsa. Apan maklaro unsay iyang gisulti ug kon giunsa niya kini pagsulti miepekto. Moingon ko “maklaro” tungod kay walay timailhan sa bisan unsang matang nga kadtong mga gwardiya milihok bisan kausa, aron kuhaon siya, ni si Haring Noah o bisan kinsa sa iyang mga pari nga nakasulti pa sulod sa upat ka makapahingangha nga mga kapitulo.
Nan, kita dili makapamalandong sa tanang kahibulongan nga mga ehemplo nianang matang sa pagtudlo diha sa mga kasulatan, apan anaa kini bisan asa. Dapiton nako ang matag usa kanato sa pagpangita niini, pamalandungan kini, ug pangutan-on ang atong kaugalingon alang sa tipik nianang gasa nga mauyon sa atong mga calling.
Kining matang sa pagtudlo maoy butang nga lisud buhaton, ug dali kaayong mahanaw. Kon kamao pa ko unsaon sa pagtudlo sa ingon niana nga paagi, sigurado nga mas malampuson ko sa pagbuhat niini. Apan kini ang akong nahibaloan: hangtud nga mobati kamo og kabug-os bahin sa usa ka butang, dili kamo posible nga, makahimo sa inyong mga estudyante nga mobati og kabug-os kabahin niini. Akong usbon? Hangtud mobati kamo og kabug-os bahin sa usa ka butang, dili kamo posible nga, makahimo sa inyong mga estudyante nga mobati og kabug-os kabahin niini. Siyempre, ang labing dako nga tinubdan niana nga pagbati mao ang gipamulong ni Abinadi: “Kay ang Espiritu sa Ginoo diha Kaniya; ug ang iyang nawong mihayag sa hilabihan nga kasiga.”28
Kon ang Espiritu mao ang yawe sa epektibo nga pagtudlo—ug kini—adunay dakong risgo sa pagsulti gikan sa karaan nga mga sulat o gamit ang usa sa inyong ehemplo sa isig ka magtutudlo, o makapuol nga pagsulti sa usa sa mga gipamulong gikan sa kinatibuk-ang komperensya. Pulos kadto maayo nianang dapita ug maanindot kon kini orihinal nga nahatag, busa gamita ang bisan unsang butang kutob sa inyong mahimo aron og kinabuhi ug pagkadaiya sa inyong pagtudlo. Apan ang labing importante mao ang unsay inyong gibati kon kamo mosulti sa mga pulong. Walay laing ikapuli niana. “O nga ako unta usa ka anghel … nga ako … makasulti … uban sa tingog nga makapakurog sa yuta!”29 Hinumdumi, ang usa ka estudyante dili usa ka sudlanan nga pun-on. Ang usa ka estudyante usa ka kalayo nga pasigahon. Ug kon ato kanang buhaton nga maayo kaayo, lagmit mahimo kitang takus usa ka adlaw nga atong mahimamat kadtong kinsa gisunog alang lang gayud sa maong abilidad aron sa pagdasig sa mga estudyante. Palihug, panglakaw kamo, kamong mga anghel sa himaya sa tibuok kalibutan—magmahunahunaon sa mga tawo nga inyong gikaistorya—palihug lakaw ug himoa nga matingala ang inyong mga estudyante. Ako mopamatuod sa kabalaan niining buhat. Ako mopamatuod sa kabalaan sa inyong calling. Minahal kong kaigsoonan, kini ang buhat sa Makagagahum nga Dios. Wala nako gitugyan ang akong kinabuhi sa usa ka fairy tale. Wala nako gitugyan ang akong kinabuhi, ingon usab kamo, sa unsay giingon ni Pedro nga gipasangil nga atong gibuhat, kana ang pagtinguha sa bakak, pagtinguha og kutay, pagtinguha og maliputon nga pag-ugmad sa dili tinuod. Kini ang kamatuoran. Dili kini tumo-tumo nga istorya. Akong gitugyan ang akong kinabuhi, kamo sa inyong kinabuhi, ang labing maayo nga katawhan nga akong nailhan nga nakahatag ug naghatag sa ilang kinabuhi. Mao kini ang kamatuoran sa Makagagahum nga Dios, ug Siya mopanalangin kaninyo hangtud sa kahangturan diha sa inyong pagtudlo niini. Sa ngalan ni Jesukristo, amen.
© 2019 pinaagi sa Intellectual Reserve, Inc. All rights reserved. Bersyon: 5/19. Hubad sa “Angels and Astonishment.” Cebuano. PD60009021 853