យុថ្កាខាងវិញ្ញាណ

ការចាក់ផ្សាយប្រចាំឆ្នាំ ២០២៤ សម្រាប់ថ្នាក់ ស&វ.

បងប្រុស ឆាដ អេច វិប

អ្នកគ្រប់គ្រងថ្នាក់សិក្ខាសាលា និងថ្នាក់វិទ្យាស្ថានសាសនា

ថ្ងៃ សុក្រ ទី ២៦ ខែ មករា ឆ្នាំ ២០២៤

ភរិយាខ្ញុំ គ្រីស្ទី បានធំឡើងនៅក្បែរឆ្នេរសមុទ្រក្នុងរដ្ឋកាលីហ្វ័រញ៉ាភាគខាងត្បូង ហើយតែងតែចូលចិត្តសមុទ្រ ។ រឿងមួយដែលនាងចូលចិត្តធ្វើគឺទៅលេងសើនប៉មពន្លឺ ។ ទោះបីជាឥឡូវនេះរស់នៅឆ្ងាយពីសមុទ្រក្ដី ក៏យើងបានទៅមើលសើនប៉មពន្លឺប្រហែល ១៥ កន្លែងផ្សេងគ្នាជាមួយគ្នា ហើយខ្ញុំបានដឹងអំពីមូលហេតុដែលនាងស្រឡាញ់វាខ្លាំង ។ រូបភាពនៃសើនប៉មពន្លឺ ធ្វើឲ្យខ្ញុំជាប់ចិត្ត ព្រោះវាឈរយ៉ាងមាំទប់ទល់នឹងខ្យល់ និងរលកចាក់ជាប់ទៅនឹងគ្រឹះយ៉ាងជ្រៅ ហើយមានសុវត្ថិភាពខ្លាំងទោះបីជាមានខ្យល់ព្យុះកំណាចក៏គ្មានអ្វីអាចបំបែកវាចេញពីគ្រឹះដែលវាបានចាក់យ៉ាងជ្រៅនោះដែរ ។ ដូចគ្នានេះដែរ យើងសង្ឃឹមថាសិស្សរបស់យើងនឹងអាចឈរទប់ទល់នឹងព្យុះដែលអាចកើតឡើងនៅក្នុងជីវិតរបស់ពួកគេបាន ។ សូមអរគុណចំពោះការផ្ដល់ជាយុថ្កាខាងវិញ្ញាណដែលពួកគេត្រូវការ និងជួយពួកគេឲ្យស្ថាបនាគ្រឹះនៅលើព្រះយេស៊ូវគ្រីស្ទ ។

ព្រោះតែកិច្ចខិតខំប្រឹងប្រែងដ៏អស្ចារ្យរបស់បងប្អូនក្នុងរយៈពេលពីរឆ្នាំចុងក្រោយនេះ ថ្នាក់វិទ្យាស្ថានមានសិស្សកើនបន្ថែមចំនួន ៥៧០០០ នាក់ ហើយការចុះឈ្មោះថ្នាក់សិក្ខាសាលាបានកើនឡើងដល់ទៅ ២២០០០ នាក់ ទោះបីជាមានសិស្សតិចចុះឈ្មោះក៏ដោយ ។ ឥឡូវនេះយើងមានភាគរយនៃការចុះឈ្មោះសិស្សថ្នាក់សិក្ខាសាលាខ្ពស់បំផុតដែលយើងមិនធ្លាប់ទទួលរបាយការណ៍ពីមុនមក ។ សូមអរគុណដែលបានឆ្លើយតបនឹងការអញ្ជើញរបស់ប្រធាន ណិលសុន ដើម្បីជួយប្រមូលក្មួយៗជំនាន់ក្រោយ ។ ដូចដែលលោកបានបង្រៀនថា រាល់ពេលដែលយើងធ្វើអ្វីមួយដើម្បីជួយនរណាម្នាក់ឲ្យធ្វើ និងរក្សាសេចក្តីសញ្ញាជាមួយនឹងព្រះ នោះយើងកំពុងជួយប្រមូលផ្តុំអ៊ីស្រាអែលហើយ ។^១ បន្ថែមពីកំណើនការចុះឈ្មោះកាលពីឆ្នាំមុន មិត្តភក្តិជំនឿផ្សេងជាង ២៥០០០ នាក់បានចូលរួមនៅក្នុងថ្នាក់រៀន ហើយពួកគេ ៩០០០ នាក់ បានទទួលពិធីបុណ្យជ្រមុជទឹក ។

សូមអរគុណចំពោះការអញ្ជើញផ្ទាល់ខ្លួនរបស់បងប្អូន និងការធ្វើការជាមួយថ្នាក់ដឹកនាំសាសនាចក្រ និងឪពុកម្ដាយ ព្រមទាំងការលើកទឹកចិត្តសិស្សរបស់បងប្អូនឲ្យអញ្ជើញមិត្តភក្តិពួកគេ ។ អ្វីដែលបងប្អូនកំពុងធ្វើគឺធ្វើឲ្យមានភាពខុសគ្នាដ៏អស្ចារ្យ មិនត្រឹមតែជាតួលេខនៃការចុះឈ្មោះប៉ុណ្ណោះទេ ។ ភាពខុសគ្នាដ៏ពិតនោះគឺឥទ្ធិពលដែលបងប្អូនកំពុងមាន ។ ជីវិតមនុស្សជាច្រើនកំពុងផ្លាស់ប្ដូររាល់ថ្ងៃនៅពេលពួកគេចូលរួមក្នុងថ្នាក់រៀនរបស់បងប្អូន ដោយពួកគេទទួលអារម្មណ៏នូវសេចក្ដីស្រឡាញ់ និងសេចក្តីជំនឿ ហើយពេលដែលពួកគេទទួលយកការអញ្ជើញរបស់បងប្អូនដើម្បីសិក្សាអំពីព្រះគម្ពីរ និងស្តាប់ឮព្រះសូរសៀងរបស់ព្រះ ។ សូមអរគុណចំពោះការអនុវត្តសេចក្ដីជំនឿរបស់បងប្អូនដើម្បីផ្តល់ពរជ័យដល់បុត្រាបុត្រីរបស់ព្រះវរបិតាសួគ៌កាន់តែច្រើនឡើងៗ កាលបងប្អូនផ្ដល់ជាយុថ្កាខាងវិញ្ញាណដែលពួកគេត្រូវការយ៉ាងខ្លាំងបំផុតនោះ ។

ប៉ុន្មានឆ្នាំមុន កាលយើងខិតខំប្រឹងប្រែងដើម្បីបន្តសិក្សាស្វែងយល់ឲ្យកាន់តែប្រសើរ ដើម្បីផ្តល់ពរជ័យដល់សិស្សរបស់យើង នោះយើងបានសាកល្បងវគ្គសិក្សាថ្មីមួយនៅក្នុងថ្នាក់សិក្ខាសាលា ។ យើងបានបង្រៀនសិស្សថ្នាក់សិក្ខាសាលាឆ្នាំទីមួយពេញមួយឆមាសអំពីកំណែកែសម្រួលនៃវគ្គសិក្សាថ្នាក់វិទ្យាស្ថាន មូលដ្ឋានគ្រឹះនៃការសិក្សាព្រះគម្ពីរ ។ បន្ទាប់ពីចប់ឆមាស សិស្សក្នុងថ្នាក់ទាំងនោះមានសមត្ថភាពនាំមុខមិត្តភក្តិរបស់ពួកគេយ៉ាងខ្លាំងក្នុងការសិក្សាព្រះគម្ពីរផ្ទាល់ខ្លួនដ៏មានអត្ថន័យ និងចូលរួមក្នុងការពិភាក្សាក្នុងថ្នាក់ ។ ស្របពេលនេះដែរ កម្មវិធីមួយដែលហៅថា Succeed in School [ ជោគជ័យនៅសាលារៀន ] បានទទួលជោគជ័យយ៉ាងខ្លាំងក្នុងការជួយសិស្សឲ្យរៀនបានប្រសើរនៅសាលា ហើយត្រៀមខ្លួនបន្ថែមសម្រាប់ឱកាសអប់រំនាពេលអនាគត ។ បទពិសោធន៍ទាំងពីរនេះបានទាក់អារម្មណ៍របស់អែលឌើរ ហ្គីលបឺត ហើយលោកបានចាប់ផ្តើមលើកទឹកចិត្តយើងយ៉ាងខ្លាំងឲ្យពិចារណាអំពីអ្វីដែលព្រះអម្ចាស់កំពុងបង្រៀនយើង ។

ពេលរឿងនេះកំពុងកើតឡើង នោះក៏មានការពិភាក្សាជាមួយនឹងសមាជិកនៃនាយកដ្ឋានអ្នកផ្សព្វផ្សាយសាសនាអំពីអ្វីដែលថ្នាក់សិក្ខាសាលាអាចធ្វើបន្ថែមទៀតដើម្បីជួយរៀបចំពួកអ្នកផ្សព្វផ្សាយសាសនានៅពេលអនាគត ។ ការពិភាក្សាផ្សេងទៀតបានធ្វើឡើងជាមួយនឹងសមាជិកនៃនាយកដ្ឋានព្រះវិហារបរិសុទ្ធ អំពីការជួយអ្នកចូលរួមក្នុងព្រះវិហារបរិសុទ្ធលើកដំបូងឲ្យមានបទពិសោធន៍ដ៏មានអត្ថន័យនៅព្រះវិហារបរិសុទ្ធ និងយល់អំពីសេចក្តីសញ្ញាដែលពួកគេនឹងធ្វើ ។ អ្នកឯទៀតបាននិយាយនឹងសមាជិកនៃនាយកដ្ឋានសេវាកម្មសុខុមាលភាព និងភាពខ្លួនទីពឹងខ្លួនអំពីការជួយបំពេញតម្រូវការនៃកំណើនទៅលើផ្នែកភាពរឹងមាំខាងផ្លូវចិត្ត និងភាពខ្លួនទីពឹងខ្លួន ។ ជាមួយគ្នានេះដែរក៏មានការពិភាក្សាអំពីបំណងប្រាថ្នារបស់មនុស្សជាច្រើន ដែលចង់ផ្តោតកាន់តែខ្លាំងទៅលើការបង្រៀនរបស់ព្យាការីសម័យទំនើប ។

ប្រៀបដូចជាដៃទន្លេដែលហូរចាក់ចូលទៅក្នុងទន្លេដែរ គំនិតជាច្រើនហាក់ដូចជារួមគ្នាចង្អុលបង្ហាញយើងទៅទិសដៅស្រដៀងគ្នានោះ ។ នៅពេលយើងបានពិចារណាអំពីលទ្ធភាព នោះយើងបានដឹងថាថ្នាក់សិក្ខាសាលាគឺស្ថិតក្នុងស្ថានភាពពិសេសមួយ ។ មនុស្សល្អផ្សេងទៀត ដូចជាទីប្រឹក្សាសាលា ឬគ្រូពេទ្យគ្រួសារ ក៏អាចជួយដោះស្រាយប្រធានបទនៃតម្រូវការនោះ និងអាចជាជំនួយយ៉ាងខ្លាំង ប៉ុន្តែយើងមានសមត្ថភាពដ៏ពិសេសក្នុងការដោះស្រាយប្រធានបទទាំងនោះតាមរយៈកញ្ចក់នៃដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ ។ យើងក៏បានដឹងផងដែរថា យើងមានលក្ខណៈពិសេសសូម្បីតែនៅក្នុងសាសនាចក្រ ព្រោះតែយើងមានពេលជាមួយនឹងយុវវ័យរបស់យើងជារៀងរាល់សប្តាហ៍ ។

យើងក៏ស្ថិតនៅក្នុងស្ថានភាពដ៏ពិសេសនៃប្រវត្តិសាស្ត្ររបស់យើងផ្ទាល់ផងដែរ ។ ចាប់តាំងពីបានដាក់កាលវិភាគរបស់យើងឲ្យត្រូវជាមួយនឹងសៀវភៅ ចូរមកតាមខ្ញុំ ឥឡូវនេះ យើងសិក្សាព្រះគម្ពីរដូចគ្នានឹងសមាជិកម្នាក់ៗ ក្រុមគ្រួសារ និងថ្នាក់ដទៃទៀតក្នុងសាសនាចក្រផងដែរ ។ រឿងនេះបានធ្វើឲ្យយើងឆ្ងល់ថាតើយើងអាចទុកពេលវេលាដ៏មានតម្លៃមួយចំនួនរបស់យើង ដើម្បីដោះស្រាយប្រធានបទជាក់លាក់ដោយផ្ទាល់នៅក្នុងបរិបទនៃការសិក្សារបស់យើងអំពីព្រះគម្ពីរដែរឬទេ ។ ដោយមានយោបល់ទាំងអស់នេះហូរចូលទៅក្នុងគំនិត នោះយើងបន្តកាន់ខ្ជាប់នូវគំនិតមូលដ្ឋានមួយចំនួន ។ យើងប្តេជ្ញាចិត្តជានិច្ចថានឹងផ្តោតទៅលើព្រះគ្រីស្ទ ដោយផ្អែកលើព្រះគម្ពីរ និងសិស្ស ។ យើងនឹងខិតខំជានិច្ចដើម្បីអញ្ជើញព្រះវិញ្ញាណបរិសុទ្ធ ហើយផ្តោតលើគោលបំណងរបស់យើងក្នុងការពង្រឹងដល់ការផ្លាស់ប្រែចិត្តជឿទៅលើព្រះយេស៊ូវគ្រីស្ទ និងដំណឹងល្អដែលបានស្ដារឡើងវិញរបស់ទ្រង់ ។

ពេលយើងពិចារណាប្រកបដោយការអធិស្ឋានអំពីរបៀបដែលគំនិតទាំងនេះទាក់ទងទៅនឹងការខិតខំប្រឹងប្រែងរបស់យើងដើម្បីប្រទានពរដល់យុវវ័យ នោះយើងបាននឹកឃើញពីអែលឌើរ ដេវីឌ អេ បែដណា ដែលបានបង្រៀនអំពីតម្លៃនៃការសិក្សាព្រះគម្ពីរតាមវិធីបីយ៉ាងគឺ ៖ តាមលំដាប់ ប្រធានបទ និង ជាអត្តបទខ្លីៗ ។ លោកបានបង្រៀនថា ៖

« ការអាន គម្ពីរមួយតាំងពីដើមរហូតដល់ចប់គឺជាការចាប់ផ្តើមទន្លេទឹករស់ទៅក្នុងជីវិតរបស់យើងដោយណែនាំដល់យើងនូវដំណើររឿងសំខាន់ៗ គោលលទ្ធិនៃដំណឹងល្អ និងគោលការណ៍អស់កល្បទាំងឡាយ ។ …

… ការសិក្សាតាមប្រធានបទពង្រីកចំណេះដឹងរបស់យើងកាន់តែជ្រៅជ្រះ » ។

អែលឌើរ បែដណា បានបន្ថែមថា ៖

« ការស្រាវជ្រាវដោយឧស្សាហ៍ព្យាយាមដើម្បីស្វែងរកនូវទំនាក់ទំនង គំរូ និងប្រធានបទនានាគឺជាផ្នែកមួយនៃអ្វីដែលមានន័យថា ‹ ទទួលទាន › នូវព្រះបន្ទូលទាំងឡាយនៃព្រះគ្រីស្ទ ។ វិធីសាស្ត្រនេះអាចបើកទ្វារឃ្លាំងខាងវិញ្ញាណ បំភ្លឺការយល់ដឹងរបស់យើងតាមរយៈព្រះវិញ្ញាណរបស់ទ្រង់ និងបង្កើតឲ្យមានអំណរគុណកាន់តែជ្រាលជ្រៅចំពោះព្រះគម្ពីរដ៏បរិសុទ្ធទាំងឡាយ និងកម្រិតនៃការតាំងចិត្តខាងវិញ្ញាណមួយដែលមិនអាចត្រូវបានទទួលតាមវិធីណាផ្សេងទៀតឡើយ ។ ការស្វែងរកបែបនេះអាចឲ្យយើងសង់លើថ្មដានៃព្រះប្រោសលោះរបស់យើង ហើយទប់ទល់នឹងខ្យល់នៃអំពើទុច្ចរិតនៅថ្ងៃចុងក្រោយនេះ » ។^២

ដោយដឹងថាយើងចាំបាច់ត្រូវស្មោះត្រង់ចំពោះប្រវត្តិដ៏យូរលង់ និងមានតម្លៃរបស់យើងអំពីការបង្រៀនព្រះគម្ពីរតាមលំដាប់លំដោយ ព្រមទាំងបន្តទទួលបានប្រយោជន៍មកពីការដាក់ឲ្យត្រូវនឹងសៀវភៅ ចូរមកតាមខ្ញុំ ហើយយើងក៏ដឹងផងដែរថា យុវវ័យរបស់យើងមានឧបសគ្គជាក់លាក់ និងតម្រូវការក្នុងការត្រៀមខ្លួនសម្រាប់អនាគត នោះយើងបានយកអនុសាសន៍ដូចខាងក្រោមទៅកាន់ក្រុមប្រឹក្សាភិបាលនៃការអប់រំ ។ ឥឡូវខ្ញុំសូមអានពីរបាយការណ៍ការប្រជុំក្រុមប្រឹក្សាភិបាល ។

« [ រដ្ឋបាលនៃថ្នាក់សិក្ខាសាលា និងថ្នាក់វិទ្យាស្ថានសាសនា ]បានណែនាំឲ្យបង្កើតកម្មវិធីសិក្សាថ្នាក់សិក្ខាសាលាដែលបង្រៀនសៀវភៅ ចូរមកតាមខ្ញុំ តាមវិធីសាស្រ្តជាលំដាប់ចំពោះព្រះគម្ពីរ រយៈពេល៣–៤ថ្ងៃ ក្នុងមួយសប្ដាហ៍ និងមេរៀនអត្ថបទខ្លីៗ ១–២ដង ក្នុងមួយសប្ដាហ៍ ( ដែលមានពីប្រធានបទដូចជា បេសកកម្ម ព្រះវិហារបរិសុទ្ធ និងការរៀបចំការអប់រំ ជំនាញសិក្សាព្រះគម្ពីរ ភាពរឹងមាំខាងផ្លូវចិត្ត ជំនាញជីវិត និងការបង្រៀនរបស់ព្យាការីថ្ងៃចុងក្រោយ ) ។ មេរៀនអត្ថបទខ្លីៗក៏នឹងចាក់ឫសនៅក្នុងព្រះគម្ពីរ ហើយផ្តោតលើគោលការណ៍នៃដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទផងដែរ » ។

អនុសាសន៍នេះត្រូវបានអនុម័តឲ្យអនុវត្តទូទាំងពិភពលោកដោយសាទរ ដែលចាប់ផ្តើមនៅ ខែ មករា ឆ្នាំ ២០២៥ ។

សូមកត់សម្គាល់ថា រៀងរាល់សប្តាហ៍យើងនឹងបន្តបង្រៀនព្រះគម្ពីរតាមលំដាប់លំដោយ ។ វាជាការចាំបាច់ដែលយើងបន្តជួយសិស្សឲ្យមានទំនុកចិត្តលើសមត្ថភាពរបស់ពួកគេក្នុងការសិក្សា និងយល់អំពីព្រះគម្ពីរ ព្រមទាំងដឹង និងរស់នៅតាមគោលការណ៍ដែលពួកគេបង្រៀន ។ យើងក៏នឹងបន្តជួយយុវវ័យឲ្យស្វែងរកចម្លើយចំពោះសំណួររបស់ពួកគេ តាមរយៈគោលការណ៍នៃការទទួលបានចំណេះដឹងខាងវិញ្ញាណ និងទទួលបានអត្ថប្រយោជន៍នៃចំណេះចំណានខាងគោលលទ្ធិ ។ មេរៀនប្រធានបទថ្មីដែលត្រូវបានគេហៅថា « មេរៀនរៀបចំសម្រាប់ជីវិត » ក៏នឹងត្រូវបានបន្ថែមទៅក្នុងកម្មវិធីសិក្សាថ្មីនេះផងដែរ ។ មេរៀនទាំងនេះនឹងលើកឡើងអំពីតម្រូវការជាក់លាក់របស់សិស្សថ្នាក់សិក្ខាសាលា តាមរបៀបដែលនឹងបន្តផ្តោតលើព្រះគ្រីស្ទ ដោយផ្អែកលើព្រះគម្ពីរ និងការផ្ដោតរបស់សិស្ស ។

មេរៀនទាំងនេះនឹងអនុញ្ញាតឲ្យបងប្អូនប្រើជំនាញ បទពិសោធន៍ និងអំណោយទាននានាដែលបងប្អូនបានប្រើក្នុងនាមជាគ្រូបង្រៀនព្រះគម្ពីរតាមលំដាប់លំដោយ ។ ការនេះមិនចាប់ផ្ដើមឡើងវិញទេ ។ យើងមិនសុំឲ្យបងប្អូនក្លាយជាអ្នកជំនាញលើប្រធានបទថ្មីៗទាំងនេះទេ ។ តាមពិតទៅ យើងសង្ឃឹមថាគ្មានអ្នកណាម្នាក់នឹងដើរតួនាទីជាឪពុកម្ដាយ ឬគ្រូពេទ្យព្យាបាល ទីប្រឹក្សា ឬអ្នកជំនាញនោះទេ ។ យើងគ្រាន់តែសុំឲ្យបងប្អូនបន្តចាក់ឫសយ៉ាងរឹងមាំនៅក្នុងការបង្រៀនអំពីព្រះយេស៊ូវគ្រីស្ទ ដូចដែលបានគូសបញ្ជាក់នៅក្នុងសម្ភារដែលពាក់ព័ន្ធ និងដែលបានអនុម័តថ្មីទាំងនេះប៉ុណ្ណោះ ។

ដើម្បីជួយបងប្អូនត្រៀមខ្លួនសម្រាប់ឆ្នាំ ២០២៥ សម្ភារថ្មីនឹងត្រូវផ្ញើទៅកាន់បងប្អូននៅខែ កក្កដា ឆ្នាំ ២០២៤ ដែលនឹងដាក់បញ្ចូលទាំងមេរៀន ចូរមកតាមខ្ញុំ និងមេរៀនត្រៀមសម្រាប់ជីវិតផងដែរ ។ យើងសូមលើកទឹកចិត្តបងប្អូនឲ្យពិនិត្យមើលមេរៀនទាំងនេះឡើងវិញនៅពេលនោះ ហើយក៏លើកទឹកចិត្តបងប្អូនឲ្យចាប់ផ្ដើមចែកចាយសេចក្ដីប្រកាសនេះដល់ឪពុកម្តាយ ថ្នាក់ដឹកនាំក្នុងមូលដ្ឋាន និងសាលាដើម្បីលើកទឹកចិត្តដល់យុវវ័យឲ្យចុះឈ្មោះចូលរៀននៅក្នុងថ្នាក់សិក្ខាសាលាបន្ថែមទៀត ។ យើងសង្ឃឹមថានឹងបើកអាងស្តុកទឹកខាងវិញ្ញាណដែលយើងមិនធ្លាប់បានឃើញពីមុនមក តាមរយៈការដាក់បញ្ចូលវិធីសាស្ត្រការសិក្សាព្រះគម្ពីរតាមលំដាប់លំដោយ និងជាអត្ថបទខ្លីៗនេះ ។

សេចក្ដីសង្ឃឹមរបស់យើង គឺដើម្បីជួយរៀបចំជំនាន់យុវវ័យឲ្យដឹងអំពីរបៀបសិក្សាព្រះគម្ពីរ ហើយតោងជាប់ទៅនឹងការបង្រៀនរបស់ព្យាការីដែលនៅរស់ ។ ជំនាន់នៃយុវវ័យដែលមានភាពរឹងមាំខាងផ្លូវចិត្តមានជំនាញ និងសមត្ថភាពដើម្បីទទួលបានជោគជ័យនៅក្នុងសាលា ហើយក្លាយជាឪពុក និងម្ដាយដ៏សុចរិត និងជាអ្នកដឹកនាំក្នុងសាសនាចក្រ និងសហគមន៍របស់ពួកគេ ។ សេចក្ដីសង្ឃឹមរបស់យើង គឺដើម្បីជួយដល់ជំនាន់មួយឲ្យត្រៀមខ្លួនយល់ដឹងអំពីសេចក្ដីសញ្ញានៃព្រះវិហារបរិសុទ្ធ ជាជំនាន់ដែលប្តេជ្ញាចិត្តយ៉ាងខ្លាំងក្នុងការរក្សាសេចក្ដីសញ្ញាទាំងនោះ និងជាជំនាន់នៃពួកអ្នកផ្សព្វផ្សាយសាសនាដែលមានភាពសក្ដិសម មានគុណសម្បត្តិគ្រប់គ្រាន់ មានថាមពលខាងវិញ្ញាណ និងត្រៀមខ្លួនដើម្បីធ្វើជាតំណាងឲ្យព្រះអង្គសង្គ្រោះនៅក្នុងការអញ្ជើញពិភពលោកឲ្យមករកទ្រង់ ។

សេចក្ដីសង្ឃឹមរបស់យើង គឺដើម្បីរៀបចំជំនាន់នៃពួកសិស្សរបស់ព្រះយេស៊ូវគ្រីស្ទដែលបានផ្លាស់ប្រែចិត្តជឿយ៉ាងខ្លាំងទៅលើទ្រង់ និងដំណឹងល្អដែលបានស្ដារឡើងវិញពេញមួយជីវិតរបស់ពួកគេ ។ សូមអរគុណម្តងទៀតចំពោះការប្រមូលជំនាន់យុវវ័យ និងឥទ្ធិពលដ៏អស្ចារ្យដែលបងប្អូនមានទៅលើពួកគេ ។ យើងដឹងថាបងប្អូនមានតួនាទីត្រូវបំពេញជាច្រើន ។ អរគុណបងប្អូនទាំងអស់គ្នាដែលកំពុងធ្វើបានយ៉ាងល្អប្រសើរណាស់ ។ នៅពេលដែលបងប្អូនបន្តអនុវត្តសេចក្តីជំនឿ ខ្ញុំជឿថាបងប្អូននឹងមើលឃើញអព្ភូតហេតុ ដែលថាព្រះអម្ចាស់បានរៀបចំដើម្បីពង្រឹង និងការពារសិស្សយើងឲ្យឈរទប់ទល់នឹងព្យុះសង្ឃរានាថ្ងៃចុងក្រោយនេះ ។ ព្រះអម្ចាស់នឹងបន្តជួយដល់បងប្អូន ។ នោះគឺជាអ្វីដែលទ្រង់ធ្វើ ។ នោះគឺជាជារបៀបរបស់ទ្រង់ ។ ខ្ញុំសូមធ្វើទីបន្ទាល់អំពីទ្រង់នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទអាម៉ែន ៕