ទុកចិត្តលើព្រះ
ការចាក់ផ្សាយប្រចាំឆ្នាំ ខែ មករា ឆ្នាំ ២០២៤ សម្រាប់ថ្នាក់ ស&.វ.
ថ្ងៃ សុក្រ ទី ២៦ ខែ មករា ឆ្នាំ ២០២៤
វាជាពរជ័យណាស់ដែលបានថ្លែងទៅកាន់បងប្អូន—ដែលជាអ្នកអនុវត្តជាច្រើនក្នុងការដឹកនាំជំនាន់ក្មេងៗទៅកាន់ព្រះគ្រីស្ទ ។ ការងាររបស់បងប្អូនគឺជាការងារនៃការបង្រៀន និងការផ្លាស់ប្រែចិត្តជឿ ។ ដៃគូរបស់បងប្អូនគឺជាព្រះវិញ្ញាណបរិសុទ្ធ ។ រង្វាន់របស់បងប្អូនគឺហួសពីការថ្លែង ។ នៅក្នុងព្រះបន្ទូលនៃព្រះអង្គសង្រ្គោះ « នោះអ្នកនឹងមានសេចក្តីអំណរដ៏មហិមា … នៅក្នុងនគរនៃព្រះវរបិតារបស់យើង ! » ។១
ខ្ញុំអរគុណចំពោះអ្វីដែលយើងបានស្តាប់ឮពីអែលឌើរ ក្លាក ជី ហ្គីលប៊ឺត ដែលជាអ្នកតំណាងផ្នែកអប់រំ និងប្អូនប្រុស ឆាដ អេច វិប ជាអ្នកគ្រប់គ្រងផ្នែកថ្នាក់សិក្ខាសាលា និងវិទ្យាស្ថាន ។ ខ្ញុំកោតសរសើរ និងរីករាយក្នុងការបម្រើជាមួយបុរសទាំងពីររូបនេះ ។ ខ្ញុំគាំទ្រការដឹកនាំ និងដំបូន្មានដ៏ឈ្លាសវៃដែលយើងទើបតែបានទទួល ។ ពួកគាត់ចេះសេចក្តីដែលពួកគាត់និយាយ ។ ខ្ញុំរំភើបចំពោះការរីកចម្រើនទាំងនៅក្នុងថ្នាក់សិក្ខាសាលា និងវិទ្យាស្ថាន ដែលប្អូនប្រុស វិប បានរាយការណ៍ ។ សូមអបអរសាទរ និងអរគុណដល់អស់អ្នកដែលមានតួនាទីក្នុងនោះ ។
ខ្ញុំសង្ឃឹមថា បងប្អូននឹងចងចាំពាក្យសម្តីរបស់អែលឌើរ ហ្គីលបឺត អំពីការសិក្សា និងការពង្រីកការគូសបញ្ជាក់របស់ព្យាការីដែលជាប្រធាន រ័សុល អិម ណិលសុន ព្រមទាំងពួកសាវក និងព្យាការីផ្សេងទៀត ។ គំរូដែលលោកបានលើកឡើងអំពីរបៀបដែលកិច្ចការនេះត្រូវធ្វើហើយធ្វើឡើងដោយមានប្រសិទ្ធភាព គឺមានអត្ថប្រយោជន៍ជាពិសេស ។ បងប្អូនអាចចម្លងគោលគំនិតផ្សេងៗ និងស្វែងរកការបំផុសគំនិតដែលអនុវត្តក្នុងស្ថានភាពរបស់បងប្អូន ។ នេះគឺជាគំនិតផ្តួចផ្តើមដ៏សំខាន់មួយក្នុងការអប់រំរបស់សាសនាចក្រ ហើយនឹងទទួលបានផលផ្លែដ៏សំខាន់ ។
ខ្ញុំរំភើបចិត្តជាពិសេស—ថែមទាំងចាប់អារម្មណ៍—នូវអ្វីដែលប្អូនប្រុស វិប បានប្រកាសទាក់ទងនឹងមេរៀនខ្លីៗក្នុងថ្នាក់សិក្ខាសាលា ។ គាត់បានសង្កត់ធ្ងន់ថា យើងនឹងបន្តប្រើវិធីសាស្ត្រនៃការបង្រៀនបទគម្ពីរជាលំដាប់លំដោយរបស់យើងដែលជាគ្រឹះសម្រាប់កម្មវិធីសិក្សាថ្នាក់សិក្ខាសាលា ប៉ុន្តែថាយើងនឹងបន្ថែមមេរៀនជាផ្សេងៗនៅក្នុងសប្តាហ៍ភាគច្រើន ដែលវាជាគោលគំនិតដូចជា បេសកកម្ម ព្រះវិហារបរិសុទ្ធ ការរៀបចំខ្លួនទទួលការអប់រំ ជំនាញសិក្សាព្រះគម្ពីរ ភាពធន់ផ្នែកអារម្មណ៍ ជំនាញជីវិត ការបង្រៀនរបស់ព្យាការីថ្ងៃចុងក្រោយ ។ល។ ចំពោះខ្ញុំ ការណ៍នេះវាហាក់ដូចជាការថែមផ្លែឈើ និងគ្រឿងទេសស្រស់ៗទៅក្នុងនំផាយ ។ វាប្រាកដជាឆ្ងាញ់ណាស់ ។ ខ្ញុំអន្ទះសាចង់រៀនពីវិធីសាស្ត្រនេះជាមួយបងប្អូន ហើយខ្ញុំរីករាយដែលអាចផ្តល់អ្វីមួយបន្ថែមទៀតដល់បងប្អូនដែលប្រឹងប្រែង និងជាការលះបង់ដើម្បីចូលរៀនថ្នាក់សិក្ខាសាលា ។ ទោះជាយ៉ាងណា សូមបរិភោគនំផាយឲ្យបានឆ្ងាញ់ !
ខ្ញុំចង់និយាយពីការព្រួយបារម្ភមួយដែលហាក់ដូចជាញាំញីយើងដែលវាមិនធ្លាប់មានក្នុងជំនាន់យុវវ័យរបស់យើង ។ ខ្ញុំសំដៅទៅលើអារម្មណ៍ពិតនៃការថប់បារម្ភ និងការធ្លាក់ទឹកចិត្ត និងផលផ្លែល្វីងដែលអារម្មណ៍ទាំងនេះមាន—រួមទាំងការប្រើសារធាតុញៀន ការធ្វើបាបខ្លួនឯង និងសូម្បីតែការធ្វើអត្តឃាត ។ ស្ថិតិមួយចំនួន ៖
ចន្លោះ ឆ្នាំ ២០០៤ ដល់ឆ្នាំ ២០២១ របាយការណ៍ជាសាកលអំពីជំងឺធ្លាក់ទឹកចិត្តដេកពេទ្យក្នុងចំណោមយុវវ័យបានកើនឡើងពី ១៣.១% ទៅ ២៩.២% សម្រាប់ស្ត្រី និងពី ៥% ទៅ ១១.៥% សម្រាប់បុរស ។២ ក្នុងចំណោមយុវវ័យអាយុពី ១២ ឆ្នាំ ទៅ ១៧ ឆ្នាំ ហើយ ២១%បានជួបប្រទះនឹងរឿងធ្លាក់ទឹកចិត្តដ៏ច្រើនយ៉ាងហោចណាស់ម្តងក្នុងមួយឆាកជីវិតរបស់ពួកគេ ហើយកាលពីឆ្នាំមុនមាន ១៥% ។៣ តួលេខទាំងនេះពុំមែនថើរនោះទេ តែវាជាបញ្ហាប្រឈមដ៏សំខាន់នៃការធ្លាក់ទឹកចិត្ត និងការថប់បារម្ភ ដែលប៉ះពាល់ដល់យុវវ័យជាច្រើនទៀត ។៤ យោងតាមវិបសាយ WebMD មានអ្នកទទួលរង ការថប់បារម្ភក៏ដូចជាជំងឺធ្លាក់ទឹកចិត្ត ឬអ្នកមានបញ្ហាជិត ៦០% ។៥
ការសិក្សាស្រាវជ្រាវរបស់សាសនាចក្រអំពីសមាជិកជាយុវវ័យបានបង្ហាញថានៅទូទាំងពិភពលោកក្នុងឆ្នាំ ២០១៨ យុវវ័យ ២៩% បានពុះពារនឹងការថប់បារម្ភធ្ងន់ធ្ងរ ។ ជាការពិតណាស់ បញ្ហានេះមានផ្សេងៗគ្នាទៅតាមប្រទេស ហើយវាអាចនឹងមិនតំណាងឲ្យយុវវ័យទាំងអស់នៅប្រទេសនីមួយៗនោះទេ ប៉ុន្តែនោះគឺជាតួលេខនៃការថប់បារម្ភធ្ងន់ធ្ងរដែលមាន ជាឧទាហរណ៍នៅសហរដ្ឋអាមេរិក ២៨% ឈីលី ៣២% បារាំង និងបែលហ្ស៊ិក ១៦% អាហ្វ្រិកខាងត្បូង ៤៦% តៃវ៉ាន់ ១៨% នូវែលសេឡង់ ៣២% ។៦
ជាការពិតណាស់ មានកត្តាជាច្រើនដែលនាំឲ្យ ឬមានទំនាក់ទំនងជាមួយនឹងការវិវឌ្ឍនៃជំងឺធ្លាក់ទឹកចិត្ត និងការថប់បារម្ភ ។ ក្នុងករណីខ្លះ អាចមានកត្តាដែលកើតឡើងនៅកន្លែងធ្វើការ ។ ក៏មានកត្តាខាងក្រៅមួយចំនួនដែលទាក់ទង ដូចជាភាពមិនអនុគ្រោះ ( រួមទាំងការប៉ះទង្គិចផ្លូវចិត្ត និងការមិនយកចិត្តទុកដាក់ផងដែរ ) ពោលគឺមានភាពតានតឹង របៀបចញ្ចឹមកូនរបស់ឪពុកម្តាយ ទំនោរខាងផ្លូវភេទ ឥទ្ធិពលមិត្តភក្តិ និងក្រុមសង្គម កត្តាសាលារៀន និងចរិតលក្ខណៈជាដើម។
កត្តាថ្មីមួយដែលទាក់ទងនឹងកំណើននៃការរីកសាយបញ្ហាថប់បារម្ភ និងជំងឺធ្លាក់ទឹកចិត្តគឺការប្រើប្រាស់ប្រព័ន្ធផ្សព្វផ្សាយសង្គម ។ បញ្ហានេះមានការយកចិត្តទុកដាក់ និងផ្ដល់ព្រមានមកពីការិយាល័យរបស់អគ្គគ្រូពេទ្យវះកាត់របស់សហរដ្ឋអាមេរិក ។ នៅសហរដ្ឋអាមេរិក គេប៉ាន់ស្មានថា ៩៥% នៃក្មេងជំទង់ពាក់ព័ន្ធនឹងប្រព័ន្ធផ្សព្វផ្សាយសង្គម ដែលជិតពីរភាគបីប្រើប្រាស់វាជារៀងរាល់ថ្ងៃ ។ ការសិក្សាស្រាវជ្រាវបានរកឃើញថាក្មេងជំទង់ទាំងនេះបានចំណាយពេលជាមធ្យម៣ម៉ោងកន្លះក្នុងមួយថ្ងៃនៅលើប្រព័ន្ធផ្សព្វផ្សាយសង្គម និងរាយការណ៍ថា វាមានផលប៉ះពាល់អវិជ្ជមានដល់ការយល់ឃើញពីខ្លួនពួកគេ ។ មានគំរូមួយចំនួននៃការចូលរួមតាមអ៊ីនធឺណិតដែលព្យាករណ៍ពីលទ្ធផលអវិជ្ជមាន៖ ឧទាហរណ៍ ការគំរាមកំហែងតាមអ៊ីនធឺណិត ការរួមភេទ និង ការចំណាយពេលច្រើនអានរឿងអវិជ្ជមាន ។ ( និយាយអញ្ចឹង សម្រាប់បងប្អូនដែលមិនធ្លាប់ឮដូចជាខ្ញុំ « ការចំណាយពេលច្រើនអានរឿងអវិជ្ជមាន » គឺជាការសំដៅលើការចំណាយច្រើននៅលើទូរសព្ទ ឬកុំព្យូទ័រដោយផ្តោតលើព័ត៌មានអវិជ្ជមាន ។ ជាក់ស្តែង មនុស្សមួយចំនួន ទម្លាប់នោះគឺអត់ពុំបាន ទេ និងលួងលោមចិត្តដោយងងឹតងងុល ) ។ ការប្រើប្រាស់ប្រព័ន្ធផ្សព្វផ្សាយសង្គមដោយអកម្ម—ពោលគឺការចំណាយពេលមើលមាតិការវាដោយគ្មានគោលដៅ—វាបង្កើនអារម្មណ៍នៃភាពអន់ខ្សោយ និងការប្រៀបធៀបអវិជ្ជមាន ខណៈដែលការប្រើប្រាស់ប្រព័ន្ធផ្សព្វផ្សាយសង្គមដោយសកម្ម ឬមានគោលដៅ ( ដូចជាការចុះផ្សាយ ការបញ្ចេញមតិ និងការភ្ជាប់ទំនាក់ទំនង ) នោះវាពុំមានភាពអវិជ្ជមានដូចគ្នានេះទេ ។
ការស្រាវជ្រាវក៏បានបង្ហាញផងដែរថាមានកត្តាការពារមួយចំនួនដែលអាចជួយទប់ស្កាត់ជំងឺថប់បារម្ភ និងធ្លាក់ទឹកចិត្តបាន ។ ទាំងនេះរួមមានសកម្មភាពរាងកាយ សេចក្ដីស្រឡាញ់ ការតស៊ូ និងការគ្រប់គ្រងខ្លួនឯង ។
ខ្ញុំផ្ទាល់ជឿថាការបាក់ទឹកចិត្ត និងការថប់បារម្ភជាច្រើនកើតឡើងមកពីការមិនយល់ ឬមិនចាំអំពីផែនការរបស់ព្រះ ហើយទុកចិត្តលើព្រះចេស្តារបស់ទ្រង់នៅពេលមានបញ្ហាកើតឡើង ។ បើពុំជឿលើការពិតនៃព្រះ សេចក្ដីស្រឡាញ់របស់ទ្រង់ និងផែនការនៃសុភមង្គលរបស់ទ្រង់សម្រាប់បុត្រាបុត្រីរបស់ទ្រង់ទេ នោះគំនិតវ័យក្មេងអាចមើលឃើញអនាគតរបស់ពួកគេថាងងឹតងងល់ និងអន់ខ្សោយ ។ យើងពុំស្វែងរកគ្រូបង្រៀនថ្នាក់សិក្ខាសាលា និងវិទ្យាស្ថាន ដើម្បីធ្វើជាអ្នកប្រឹក្សា ឬអ្នកឯកទេសសុខភាពផ្លូវចិត្តនោះទេ ។ ផ្ទុយទៅវិញ យើងធ្វើប្រឆាំងទៅនឹងកត្តាសង្គមដែលជម្រុញឲ្យមានកំណើននៃការថប់បារម្ភ និងការធ្លាក់ទឹកចិត្ត ។ យើងជាអ្នកជំរុញឲ្យមានក្តីសង្ឃឹម ។ យើងជាសំឡេងនៃសេចក្ដីសង្ឃឹម ជាសេចក្ដីសង្ឃឹមដែលចាក់ឫសដោយសេចក្ដីជំនឿ និងការទុកចិត្តលើព្រះ ។
ការយល់ដឹងអំពីផែនការនៃការប្រោសលោះរបស់ព្រះវរបិតាសួគ៌យើង—ជាពិសេសផ្នែកសំខាន់នៃផែនការនោះ គឺដង្វាយធួននៃព្រះយេស៊ូវគ្រីស្ទ—ផ្តល់នូវការធានាដ៏មហិមាបំផុត ។ វាបង្កើត និងរក្សាភាពធន់ខាងវិញ្ញាណ និងអារម្មណ៍—ដោយដឹងពីមូលហេតុនៃការរស់នៅរបស់យើង និងគោលបំណងរបស់យើងក្នុងជីវិតរមែងស្លាប់ ។ យើងបង្រៀនតាមសិក្ខាបទ និងគំរូដល់អ្នកណាដែលពួកគេអាចស្វែងរកការជួយសង្គ្រោះ និងការគាំទ្រ ។ សូមឲ្យព្រះបន្ទូលរបស់ព្រះអង្គសង្រ្គោះរស់នៅក្នុងដួងចិត្តរបស់ពួកគេថា « ខ្ញុំប្រាប់សេចក្តីទាំងនេះ ដើម្បីឲ្យអ្នករាល់គ្នាបានសេចក្តីសុខសាន្តនៅក្នុងខ្ញុំ ។ ដោយសារខ្ញុំនៅលោកីយ៍នេះ នោះអ្នករាល់គ្នាមានសេចក្តីវេទនាមែន ប៉ុន្តែ ត្រូវសង្ឃឹមឡើង ដ្បិតខ្ញុំបានឈ្នះលោកីយ៍ហើយ » ។៧ សេចក្ដីសញ្ញារបស់យើងចងភ្ជាប់យើងទៅនឹងទ្រង់ ហើយដោយសារទ្រង់ នោះយើងក៏អាចយកឈ្នះពិភពលោកនេះ ។
យើងអាចជួយសិស្ស និងអ្នកដទៃឲ្យស្ថាបនាគ្រឹះផ្ទាល់ខ្លួនរបស់ពួកគេនៅលើ« សិលានៃព្រះដ៏ប្រោសលោះរបស់យើង ដែលជាព្រះយេស៊ូវគ្រីស្ទ ជាព្រះរាជបុត្រារបស់ព្រះ » ដើម្បី« ឲ្យកាលណាអារក្សបញ្ចេញខ្យល់ដ៏ខ្លាំងក្លារបស់វាមក មែនហើយព្រួញរបស់វានៅក្នុងខ្យល់គួច មែនហើយ កាលណាព្រិល និងខ្យល់ព្យុះកំណាចទាំងអស់របស់វាបោកបក់មកលើ [ ពួកគេ ] នោះវានឹងគ្មានអំណាចមកលើ [ ពួកគេ ] ឡើយ ដើម្បីទាញ [ ពួកគេ ] ចុះទៅក្នុងជង្ហុកនៃសេចក្ដីវេទនា និងទុក្ខលំបាកដ៏មិនចេះចប់មិនចេះហើយ » ។៨ ប្រធាន រ័សុល អិម ណិលសុន បង្ហាញតាមបែបនេះថា ៖ « ព្រះអម្ចាស់បានប្រកាសថា ទោះជាមានឧបសគ្គដែលមិនធ្លាប់មានពីមុនមកក្តី ក៏អស់អ្នកដែលសង់គ្រឹះនៅលើព្រះយេស៊ូវគ្រីស្ទ ហើយរៀនប្រើប្រាស់ព្រះចេស្តារបស់ទ្រង់ ពុំចាំបាច់ចុះចាញ់នឹងជំងឺថប់បារម្ភប្លែកៗនៅយុគសម័យនេះដែរ » ។៩
យើងមានឱកាសដ៏អស្ចារ្យការសិក្សាគម្ពីរមរមននៅឆ្នាំនេះ ។ គ្មានព្រះគម្ពីរណាផ្សេងទៀតបញ្ជាក់យ៉ាងច្បាស់ពីផែនការនៃការប្រោសលោះនោះទេ ។ គ្មានសៀវភៅណាផ្សេងទៀតបង្រៀនឲ្យមានការបញ្ចុះបញ្ចូលខ្លាំងអំពីការពិត និងអត្ថន័យនៃដង្វាយធួននៃព្រះយេស៊ូវគ្រីស្ទឡើយ ។ គ្មានផ្នែកណាមួយផ្សេងទៀតនៃព្រះគម្ពីរដែលមានអំណាចនៃការផ្លាស់ប្រែចិត្តជឿជាងព្រះគម្ពីរមរមនដែលមាននូវសាក្សីថា ព្រះយេស៊ូវ គឺជាព្រះគ្រីស្ទ ហើយថាទ្រង់បានយកឈ្នះលើសេចក្តីស្លាប់ទាំងខាងរូបកាយ និងខាងវិញ្ញាណ ។ ព្រះគម្ពីរមរមនគឺជាការបង្ហាញដ៏សាមញ្ញនៃសេចក្តីពិតនៃដំណឹងល្អ និងអំណរដែលមានមកពីការធ្វើតាមព្រះបញ្ញត្តិនៃដំណឹងល្អ ។ ការរៀបរាប់របស់វាពោរពេញទៅដោយគំរូនៃការយកឈ្នះ ។ ព្រះគម្ពីរមរមនគឺជាព្រះបន្ទូលរបស់ព្រះ ហើយ « គុណធម៌នៃព្រះបន្ទូលរបស់ព្រះ »១០ គឺថាវាបង្កើតសេចក្តីជំនឿលើព្រះអង្គសង្គ្រោះ—ជំនឿដែលរុញច្រានចោលការសង្ស័យ ការធ្លាក់ទឹកចិត្ត និងការថប់បារម្ភដែលអាចនឹងគ្របដណ្ដប់លើយើង ហើយបន្សល់ទុកនូវភាពរឹងមាំ និងការធានានៅកន្លែងរបស់ពួកគេ។
សូមពិចារណាឧទាហរណ៍ពីរបីនេះ ៖
មានសេចក្តីសន្យាដែលស្រដៀងគ្នានេះ ដែលស្ដេចបេនយ៉ាមីន បានថ្លែងថា ៖ « ហើយថែមទៀត ខ្ញុំចង់ឲ្យអ្នករាល់គ្នាគិតពិចារណាអំពីស្ថានភាពដ៏មានពរ និងរីករាយនៃអស់អ្នកណាដែលកាន់តាមព្រះបញ្ញត្តិទាំងឡាយនៃព្រះ ។ ដ្បិតមើលចុះ ពួកគេបានពរគ្រប់យ៉ាង ទាំងខាងសាច់ឈាម និងខាងវិញ្ញាណផង ហើយបើសិនជាពួកគេរក្សាការស្មោះត្រង់ដរាបដល់ចុងបំផុត នោះពួកគេនឹងត្រូវបានទទួលនៅស្ថានសួគ៌ ដើម្បីឲ្យពួកគេអាចរស់នៅជាមួយនឹងព្រះក្នុងស្ថានភាពសុភមង្គលដ៏មិនចេះចប់មិនចេះហើយ ។ ឱ សូមចាំ សូមចាំថា រឿងទាំងនេះពិត ព្រោះព្រះអម្ចាស់ដ៏ជាព្រះ ទ្រង់មានព្រះបន្ទូលថាដូច្នោះ » ។១១
សូមចងចាំសេចក្ដីប្រកាសដ៏ទទូចរបស់នីហ្វៃ ពេលលោកប្រឈមមុខនឹងការបៀតបៀន និងការធ្លាក់ទឹកចិត្តនៅពេលឪពុកលោកស្លាប់ ៖
« តែទោះបីសេចក្ដីល្អដ៏ធំរបស់ព្រះអម្ចាស់ដែលបានបង្ហាញដល់ខ្ញុំពីការណ៍ដ៏ធំ ហើយអស្ចារ្យក៏ដោយគង់តែចិត្តខ្ញុំស្រែកថា ៖ ឱ !រូបខ្ញុំអើយវេទនាអ្វីម្ល៉េះ ! មែនហើយ ចិត្តខ្ញុំសោកសៅ … ដោយព្រោះសេចក្ដីទុច្ចរិតទាំងឡាយរបស់ខ្ញុំ ។
« ខ្ញុំត្រូវបានហ៊ុមព័ទ្ធ ព្រោះតែការល្បួងទាំងឡាយ និងអំពើបាបទាំងឡាយដែលរំខានខ្ញុំដោយងាយ ។
« ហើយពេលខ្ញុំចង់សប្បាយ ចិត្តខ្ញុំថ្ងូរទៅវិញ ព្រោះតែអំពើបាបខ្ញុំ ទោះជាយ៉ាងណា គង់តែខ្ញុំស្គាល់អ្នកដែលខ្ញុំទុកចិត្ត ។ …
« ឱបើដូច្នេះ បើសិនខ្ញុំបានឃើញការណ៍ដ៏អស្ចារ្យជាច្រើន បើសិនជាព្រះអម្ចាស់ទ្រង់បានយាងចុះមកឯកូនចៅមនុស្ស ហើយបានមករកមនុស្សលោកដោយសេចក្ដីមេត្តាករុណាដ៏ទន់ភ្លន់ ហេតុអ្វីបានជាចិត្តខ្ញុំយំ ហើយព្រលឹងខ្ញុំរេរានៅលើច្រកភ្នំនៃសេចក្ដីសោកសៅ ហើយសាច់ខ្ញុំរីងរៃទៅ ហើយកម្លាំងខ្ញុំត្រូវទន់ខ្សោយ ព្រោះតែទុក្ខវេទនាទាំងឡាយរបស់ខ្ញុំដូច្នេះ ? …
« ឱព្រះអម្ចាស់អើយ ទូលបង្គំបានទុកចិត្តទៅលើព្រះអង្គ ហើយទូលបង្គំនឹងទុកចិត្តទៅលើព្រះអង្គជារៀងដរាប » ។១២
អាលម៉ាបានរៀបរាប់អំពីអំណរនៃការកើតម្តងទៀត រួចហើយពឹងផ្អែកលើព្រះ ៖
« ហើយឥឡូវនេះ អស់បីយប់បីថ្ងៃ ឪពុកត្រូវបានញាំញី ដោយការឈឺចាប់នៃព្រលឹងដែលជាប់ទោស ។
« ហើយហេតុការណ៍បានកើតឡើងថា នៅពេលដែលឪពុកត្រូវញាំញីដោយសេចក្ដីទុក្ខវេទនា នៅពេលដែលឪពុកកើតទុក្ខដោយការនឹកឃើញដល់អំពើបាបដ៏ច្រើនរបស់ឪពុក មើលចុះ ឪពុកក៏នឹកឃើញថា ធ្លាប់បានឮបិតារបស់ឪពុក ព្យាករទៅកាន់ប្រជាជនអំពីការយាងមកនៃព្រះយេស៊ូវគ្រីស្ទជាព្រះរាជបុត្រានៃព្រះ ដើម្បីមកធ្វើឲ្យធួននឹងអំពើបាបទាំងឡាយនៃមនុស្សលោក ។
« ឥឡូវនេះ នៅពេលដែលឪពុកនឹកគិតទៅលើរឿងនេះ នោះឪពុកបានយំនៅក្នុងចិត្ត ៖ ឱព្រះយេស៊ូវអើយ ព្រះអង្គជាព្រះរាជបុត្រានៃព្រះ សូមព្រះអង្គមានសេចក្ដីមេត្តាករុណាមកលើទូលបង្គំផង ដែលជាអ្នកនៅក្នុងប្រមាត់ល្វីងជូរចត់ ហើយកំពុងតែឡោមព័ទ្ធទៅដោយច្រវាក់ដ៏អស់កល្បជានិច្ចនៃសេចក្ដីស្លាប់ ។
« ឥឡូវនេះ មើលចុះ នៅពេលដែលឪពុកកំពុងតែគិតយ៉ាងនេះ នោះឪពុកក៏ឈប់នឹកឃើញការឈឺចាប់ទៀត មែនហើយ ឪពុកក៏អស់កើតទុក្ខដោយការនឹកឃើញអំពើបាបរបស់ខ្លួនទៀត ។
« ហើយ ឱ សេចក្ដីអំណរ និង រស្មីដ៏អស្ចារ្យដែលឪពុកបានឃើញ មែនហើយ ព្រលឹងឪពុកបានពោរពេញទៅដោយសេចក្ដីអំណរលើសជាងការឈឺចាប់របស់ឪពុកទៅទៀត ! …
« មែនហើយ ចាប់តាំងពីពេលនោះមកដល់ពេលឥឡូវនេះឪពុកបានធ្វើការមិនឈប់ឈរ ដើម្បីឪពុកអាចនាំមនុស្សឲ្យប្រែចិត្ត ដើម្បីឪពុកអាចនាំគេឲ្យភ្លក់នូវសេចក្ដីអំណរដ៏លើសលប់ដូចដែលឪពុកធ្លាប់បានភ្លក់ដើម្បីឲ្យគេអាចកើតមកអំពីព្រះដែរ ហើយបានពោរពេញទៅដោយព្រះវិញ្ញាណបរិសុទ្ធ ។ …
« ឪពុកបានទទួលការគាំទ្រនៅគ្រប់ការសាកល្បង និងវិបត្តិគ្រប់ប្រការ មែនហើយ នៅក្នុងសេចក្ដីទុក្ខវេទនាគ្រប់បែបយ៉ាង មែនហើយ ព្រះទ្រង់បានដោះលែងឪពុកឲ្យរួចពីគុក ពីចំណង និងពីសេចក្ដីស្លាប់ មែនហើយ គឺឪពុកដាក់ទីទុកចិត្តរបស់ឪពុកទៅលើទ្រង់ ហើយទ្រង់នឹងនៅតែដោះលែងឪពុក » ។១៣
តើអ្នកណាអាចមានហេតុផលមានការថប់បារម្ភ និងការធ្លាក់ទឹកចិត្តខ្លាំងជាង មរមន ដែលបានទួញសោកថា « ឆាកអំពីអំពើទុច្ចរិត និងអំពើគួរខ្ពើមឆ្អើមទាំងឡាយកើតឡើងចំពោះភ្នែកខ្ញុំមិនឈប់ឈរ ចាប់តាំងពីខ្ញុំបានដឹងក្ដីល្មម ហើយមើលឃើញអំពើទាំងឡាយរបស់មនុស្ស » ។១៤ យ៉ាងណាក៏ដោយ ទោះបីជាមានសង្គ្រាម និងរបួសអស់មួយជីវិតក៏ដោយ លោកអាចនិយាយទៅកាន់មរ៉ូណៃថា « ឱកូនប្រុសរបស់ឪពុកអើយ ចូរនៅស្មោះត្រង់ចំពោះព្រះគ្រីស្ទចុះ ហើយសូមកុំឲ្យអ្វីដែលឪពុកសរសេរនេះ ធ្វើឲ្យកូនកើតទុក្ខរហូតដល់ស្លាប់ឡើយ តែសូមឲ្យព្រះគ្រីស្ទលើកកូនឡើង ហើយសូមសេចក្ដីស៊ូទ្រាំ និងការសុគតរបស់ទ្រង់ និងការបង្ហាញព្រះកាយទ្រង់ដល់ពួកអយ្យកោយើង [ ការមានព្រះជន្មរស់ឡើងវិញរបស់ទ្រង់ ] និងសេចក្ដីមេត្តាករុណារបស់ទ្រង់ និងការអត់ធ្មត់ និងសេចក្ដីសង្ឃឹមចំពោះសិរីល្អរបស់ទ្រង់ និងចំពោះជីវិតដ៏នៅអស់កល្បជានិច្ច ស្ថិតនៅក្នុងគំនិតរបស់កូនជារៀងរហូតតទៅ » ។១៥
អាលម៉ាបានពិពណ៌នាអំពីគំរូរបស់ព្រះអង្គសង្រ្គោះផ្ទាល់អំពីការដោះស្រាយនឹងការរងទុក្ខដែលមិនអាចយល់បាន និងរបៀបដែលជំនួសការអស់សង្ឃឹមដោយ យើងអាចងាកទៅរកទ្រង់ដើម្បីបានសង្គ្រោះ និងការព្យាបាល ។
« ហើយទ្រង់នឹងយាងទៅដោយរងការឈឺចាប់ និងទុក្ខវេទនា និងការល្បួងគ្រប់បែបយ៉ាង ហើយទ្រង់ធ្វើយ៉ាងនេះ គឺដើម្បីឲ្យបានបំពេញនូវពាក្យទាំងឡាយ ដែលបានចែងទុកមកថា ទ្រង់នឹងលើកដាក់លើខ្លួនទ្រង់នូវការឈឺចាប់ និងជំងឺទាំងឡាយរបស់រាស្ត្រទ្រង់។
« ហើយទ្រង់នឹងមកដាក់លើរូបអង្គទ្រង់នូវសេចក្តីស្លាប់ ដើម្បីទ្រង់អាចស្រាយចំណងទាំងឡាយនៃសេចក្តីស្លាប់ដែលចងរាស្ត្រទ្រង់ ហើយទ្រង់នឹងដាក់រូបអង្គទ្រង់នូវជំងឺ ឈឺចាប់របស់ពួកគេ ដើម្បីឲ្យព្រះហឫទ័យទ្រង់បានពោរពេញទៅដោយសេចក្តីមេត្តាករុណាស្របតាមសាច់ឈាម ដើម្បីទ្រង់អាចដឹងស្របតាមសាច់ឈាមថា តើត្រូវជួយរាស្ត្រទ្រង់បែបណាតាមជំងឺរបស់គេ ។
« …ព្រះរាជបុត្រានៃព្រះស៊ូរងឈឺចាប់ស្របតាមសាច់ឈាម ដើម្បីទ្រង់អាចយកដាក់លើរូបអង្គទ្រង់នូវអំពើបាបទាំងឡាយរបស់រាស្ត្រទ្រង់ ដើម្បីទ្រង់អាចលុបចោលនូវអំពើរំលងទាំងឡាយរបស់គេ ស្របតាមព្រះចេស្ដានៃការដោះលែងរបស់ទ្រង់ ហើយឥឡូវនេះ មើលចុះ នេះគឺជាទីបន្ទាល់ដែលនៅក្នុងខ្លួនខ្ញុំ ។
« ឥឡូវនេះ ខ្ញុំសូមប្រាប់អ្នកថា អ្នករាល់គ្នាត្រូវតែប្រែចិត្ត ហើយកើតម្ដងទៀត ដ្បិតព្រះវិញ្ញាណទ្រង់មានព្រះបន្ទូលថា បើសិនជាអ្នករាល់គ្នាមិនបានកើតម្ដងទៀតទេ នោះអ្នករាល់គ្នាមិនអាចគ្រងនគរស្ថានសួគ៌ទុកជាមរតកបានឡើយ ហេតុដូច្នេះហើយ ចូរមក ហើយទទួលបុណ្យជ្រមុជទឹកចំពោះការប្រែចិត្តចុះ ដើម្បីឲ្យអ្នករាល់គ្នាអាចបានជ្រះពីអំពើបាបទាំងឡាយរបស់អ្នក ដើម្បីឲ្យអ្នករាល់គ្នាអាចមានសេចក្ដីជំនឿជឿដល់កូនចៀមនៃព្រះ ដែលនឹងដកយកអំពើបាបទាំងឡាយពីមនុស្សលោក ដែលមានឥទ្ធិឫទ្ធិដើម្បីសង្គ្រោះ និងដើម្បីជម្រះឲ្យជ្រះពីអស់ទាំងអំពើដ៏ឥតសុចរិត » ។១៦
នៅក្នុងព្រះគម្ពីរមរមនយើងរៀនពីអត្ថន័យ និងដំណើរការពិតប្រាកដនៃការកើតជាថ្មី និង[ ការប្រែក្លាយ ]ជាពួកបរិសុទ្ធតាមរយៈដង្វាយធួនរបស់ព្រះគ្រីស្ទជាព្រះអម្ចាស់ ។១៧ ប្រសិនបើយើងអាចដឹកនាំយុវវ័យ និងមជ្ឈិមវ័យរបស់យើងទៅរកការកើតឡើងវិញខាងវិញ្ញាណ ការធ្លាក់ទឹកចិត្តនឹងរលាយបាត់ ហើយការថប់បារម្ភណាមួយនៅក្នុងជីវិតរបស់ពួកគេនឹងអាចគ្រប់គ្រងបានយ៉ាងពិតប្រាកដ ( ដូចជាបញ្ហានៅក្នុងការថ្លែងសុន្ទរកថាដើម្បីចាក់ផ្សាយទូទាំងពិភពលោក ) ។ សូម្បីតែសេចក្ដីស្លាប់នោះឯង ក៏មិនអាចគំរាមកំហែងដល់សេចក្ដីសុខសាន្តរបស់ពួកគេដែរនៅពេលពួកគេបានកើតពីព្រះវិញ្ញាណ ហើយបានរៀនទុកចិត្តលើព្រះនោះ ។
អែលឌើរ នែល អេ ម៉ាក់ស្វែល នៅគ្រាមួយបានមានប្រសាសន៍អំពី« ទុក្ខលំបាករបស់មនុស្សលោក »ថា អ្វីៗត្រូវបញ្ចប់ដោយសេចក្ដីស្លាប់ ។ សមិទ្ធិផលរបស់យើង ទ្រព្យសម្បត្តិរបស់យើង ការរួបរួមរបស់យើងទាំងអស់ត្រូវមានទីបញ្ចប់ ប្រសិនបើគ្មានអ្វីក្រៅពីនេះទេ នោះដូចជាអ្នកផ្សាយដែលនិយាយនៅក្នុងសាស្ដាថា ‹ ការទាំងនោះសុទ្ធតែឥតប្រយោជន៍ទទេ ក៏ជាអសារឥតការផង › ។១៨ សេចក្តីស្លាប់គឺជាភាពពិត ហើយយើងត្រូវបង្ខំឲ្យទទួលស្គាល់ថា បើគ្មានអំណាចដែលយកឈ្នះលើសេចក្តីស្លាប់ទេ នោះជីវិតរបស់យើងនឹងមានគោលបំណងតិចណាស់ ។ ជាសំណាងល្អ យើងដឹងថាសេចក្តីស្លាប់ត្រូវបានយកឈ្នះ ជីវិត គឺមានគោលបំណង និងអត្ថន័យ ហើយការទាំងអស់មិនមែនជាការឥតប្រយោជន៍នោះទេ ។ តាមរយៈដង្វាយធួនរបស់ទ្រង់ ព្រះយេស៊ូវគ្រីស្ទបានយកឈ្នះលើទុក្ខលំបាកនៃសេចក្តីស្លាប់របស់មនុស្ស ហើយឥឡូវនេះដូចដែលប្រសាសន៍របស់ អែលឌើរ នែល អេ ម៉ាក់ស្វែល ថ្លែងថា ៖ « មានតែស្ថានភាពលំបាកផ្ទាល់ខ្លួនប៉ុណ្ណោះទេ [ អំពើបាប កំហុស និងការបរាជ័យរបស់យើងម្នាក់ៗ ] ហើយពីស្ថានភាពលំបាកទាំងនេះ យើងអាចបានសង្គ្រោះ តាមរយៈការធ្វើតាមការបង្រៀនរបស់ទ្រង់ដែលបានសង្គ្រោះយើងពីការវិនាសទូទៅ » ។១៩
ទាំងអស់នេះ យើងកំពុងផ្សព្វផ្សាយនូវទស្សនៈយូរអង្វែងដែលមាននៅក្នុងឃ្លាថ្មីៗរបស់ប្រធាន ណិលសុនថា « គិតដល់សេឡេស្ទាល ! » ។ យើងត្រូវតែជួយដល់ជំនាន់ដែលកំពុងពេញវ័យឲ្យបដិសេធអាកប្បកិរិយា « ស៊ីផឹក ហើយអរសប្បាយទៅចុះ ដ្បិតស្អែកឡើង យើងត្រូវស្លាប់ហើយ » កាន់តែច្បាស់នៅក្នុងវប្បធម៌ជាច្រើន ។ វិធីសាស្រ្តបរាជ័យក្នុងជីវិតនេះគឺមិនខ្វល់ខ្វាយនឹងផែនការដ៏មហិមានៃការប្រោសលោះ និងសុភមង្គលឡើយ ហើយផ្តោតតែលើការរីករាយបណ្ដោះអាសន្នប៉ុណ្ណោះ ។ វានាំទៅរកគំរូ និងរបៀបនៃការរស់នៅដែលមិនស្ថិតស្ថេរ ។ វាជាផ្លូវទៅកាន់ការថប់បារម្ភដ៏ល្ហិតល្ហៃ និងការធ្លាក់ទឹកចិត្តដ៏មហន្តរាយ ។ ប្រធាន ណិលសុន បានថ្លែងអំពីបញ្ហានេះនៅក្នុងសុន្ទរកថាសន្និសីទទូទៅរបស់លោកកាលពីខែតុលាមុន ។ លោកបានទូន្មានថា ៖
« ជីវិតរមែងស្លាប់គឺជាថ្នាក់រៀនកម្រិតជាន់ខ្ពស់ក្នុងការរៀនជ្រើសរើសអ្វីៗដែលមហិមាបំផុតនាំចូលដល់ភាពអស់កល្បជានិច្ច ។ មានមនុស្សជាច្រើនដែលរស់នៅមួយជីវិតនេះគិតថាវាមានតែប៉ុណ្ណឹង ។ ទោះជាយ៉ាងណា ការជ្រើសរើសរបស់បងប្អូននៅថ្ងៃនេះនឹងកំណត់ចំណុចបីយ៉ាង ៖ កន្លែងដែលបងប្អូននឹងរស់នៅអស់ទាំងភាពអស់កល្បជានិច្ច ប្រភេទរូបកាយដែលបងប្អូននឹងរស់ឡើងវិញ និងអស់អ្នកដែលបងប្អូននឹងរស់នៅជាមួយជារៀងរហូត ។ ដូច្នេះ សូមគិតដល់សេឡេស្ទាល ! »២០
ក្នុងសៀវភៅមួយក្បាលដែលលោកបានបោះពុម្ពកាលពីពេលថ្មីៗនេះមានចំណងជើងថា បេះដូងនៃរឿងសំខាន់ ប្រធាន ណិលសុន បានពន្យល់យ៉ាងលម្អិតអំពីគំនិតនេះ ដោយលើកឡើងពីបទពិសោធន៍ផ្ទាល់ខ្លួនដ៏គួរឲ្យភ័យខ្លាច ។ លោកបានថ្លែងថា ៖
« ខ្ញុំបានប្រឈមមុខនឹងសេចក្តីស្លាប់ជាច្រើនដងនៅក្នុងជីវិត ។ ពេលមួយនោះបានកើតឡើងនៅ ម៉ាពូតូ ប្រទេស ម៉ូសំប៊ិក នៅចុងខែ ឧសភា ឆ្នាំ ២០០៩ ។ ពេលកំពុងទទួលទានអាហារនៅឯផ្ទះបេសកកម្មនៅទីនោះជាមួយអែលឌើរ វីល្លាម ដបុលយូ ផាមលី ប្រធានតំបន់អាហ្រ្វិកអាគ្នេយ៍ និងភរិយារបស់គាត់ សាន់ណា និងជាមួយប្រធានបេសកកម្ម ម៉ូហ្សំប៊ិក ម៉ាពូតូ ប្រធាន ប្ល័រ ជេ ផាកកឺ និងភរិយារបស់គាត់ ស៊ីនឌី នោះក៏មានបុរសបីនាក់ប្រដាប់ដោយអាវុធស្វ័យប្រវត្តិបានសម្រុកចូលក្នុងបន្ទប់ ។
« នៅក្នុងការប៉ះទង្គិចគ្នានោះ ចោរម្នាក់បានយកកាំភ្លើងភ្ជង់ក្បាលខ្ញុំ ស្រែកថា ពួកគេមកនេះដើម្បីសម្លាប់ខ្ញុំ និងចាប់ពង្រាត់ប្រពន្ធខ្ញុំ រួចទាញកៃ ។ សំឡេងកេះកៃបានបន្លឺឡើង ប៉ុន្តែគ្មានគ្រាប់កាំភ្លើងនោះទេ ។ គ្រាប់កាំភ្លើងស្អុយនោះបានធ្វើឲ្យចោរខឹង ហើយវាបានទាត់ខ្ញុំចំមុខ ដួលទៅលើឥដ្ឋ ។ ខ្ញុំដឹងច្បាស់ថានេះគឺជាទីបញ្ចប់សម្រាប់ខ្ញុំហើយ ។ ខ្ញុំចាំថាខ្ញុំបានគិតថា ខ្ញុំជិតចេញពីជីវិតនេះ ទៅជីវិតបន្ទាប់ហើយ ។ រឿងនេះគឺជាបទពិសោធន៍ដ៏គួរឲ្យចាប់អារម្មណ៍ › ។
« ក្នុងពេលជាមួយគ្នានោះ ចោរម្នាក់ទៀតបានយកកាំភ្លើងខ្លីមកភ្ជង់ វេនឌី ហើយចាប់ផ្តើមអង្រួនកៅអីរបស់នាងក្នុងគោលបំណងទាញនាងចេញពីកៅអី ដោយនិយាយថា ‹ នាងមកជាមួយយើង ! នាងមកជាមួយយើង › !
មានព្រឹត្តិការណ៍ដែលជាអព្ភូតហេតុជាបន្តបន្ទាប់—ហើយអរគុណជាពិសេសចំពោះទង្វើដ៏វីរភាពរបស់ស៊ីស្ទើរ ស៊ីនឌី ផាកកឺ—ជីវិតរបស់យើងក៏បានរួចផុត ។ ទោះជាយ៉ាងណា ដោយសារខ្ញុំធ្លាប់ឆ្លងកាត់គ្រាដែលគួរឲ្យភ័យខ្លាចជាច្រើនពីមុនមក ខ្ញុំបានដឹងថា ជីវិតមានភាពផុយស្រួយណាស់ និងថាមានរឿងតិចតួចតិចតួចនៅក្នុងពិភពលោកនេះដែលមានសារៈសំខាន់ដ៏នៅអស់កល្បជានិច្ច ។ ខណៈដែលពួកចោរទាំងនោះបានគំរាមកំហែងដល់អាយុជីវិតរបស់យើង ខ្ញុំមិនគិតអំពីពានរង្វាន់ ឬកម្រិតវប្បធម៌ ឬការសរសើរនោះទេ ។ ខ្ញុំបានគិតអំពីគ្រួសារខ្ញុំ និងសេចក្ដីសញ្ញាដែលខ្ញុំបានចុះជាមួយព្រះអម្ចាស់ ។
ខ្ញុំភ័យខ្លាចថាយើងជាច្រើននាក់កំពុងរស់នៅ តាមបែបផែននៃជីវិតដែលថាជីវិតនេះនឹងមិនបន្តបន្ទាប់ពីសេចក្តីស្លាប់នេះឡើយ ហើយថាអ្វីដែលយើងធ្វើនៅទីនេះគ្មានលទ្ធផលដល់អនាគត ។ ការណ៍នោះមិនពិតនោះទេ ។
ជាការចាំបាច់ដែលយើងមិនត្រូវវង្វេង ហើយដកខ្លួនចេញពីផ្លូវនៃសេចក្តីសញ្ញាពីព្រោះតែវត្ថុភ្លឺចែងចាំងរបស់លោកិយឡើយ គឺមានន័យថាជា កិត្តិយស និងចេតនារបស់មនុស្ស ។ ព្រឹត្តិការណ៍ទាំងនោះគ្មានសារៈសំខាន់អ្វីឡើយនៅក្នុងជីវិតបន្ទាប់ ។ អ្វីដែលនឹងសំខាន់គឺយើងបានចុះសេចក្ដីសញ្ញាជាមួយព្រះ ហើយរក្សាសេចក្ដីទាំងនោះ » ។២១
ការអធិស្ឋានរបស់ខ្ញុំគឺសូមឲ្យយើងនឹងអាចជួយអស់អ្នកដែលយើងមានឥទិ្ធពលលើ ឲ្យ ចុះសេចក្តីសញ្ញាជាមួយព្រះ ហើយរក្សាសេចក្តីសញ្ញាទាំងនោះ ។ ជួយពួកគេបណ្ដុះសេចក្ដីជំនឿ និងទំនុកចិត្តលើព្រះ ហើយស្វែងរកសេចក្ដីសង្ឃឹម ។ សូមជួយពួកគេឲ្យប្រែចិត្ត ហើយនៅជាប់នឹងព្រះគុណនៃការប្រោសលោះរបស់ព្រះអង្គសង្គ្រោះ ហើយស្វែងរកសេចក្តីសុខសាន្ត ។ សូមជួយពួកគេឲ្យកើតជាថ្មី « ជាបុត្ររបស់ព្រះគ្រីស្ទ ជាបុត្រា និងបុត្រីរបស់ទ្រង់ »២២ ហើយស្វែងរកអំណរ ។ ហើយសូមឲ្យអ្នកទទួលបានព្រះបន្ទូលដ៏គាប់ព្រះហឫទ័យនៃព្រះ ៖ « ប្រពៃហើយ បាវល្អស្មោះត្រង់អើយ » ។២៣
ខ្ញុំសូមធ្វើជាសាក្សីដ៏រឹងមាំ និងប្រាកដដល់បងប្អូនអំពីការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ។ ការពិតនៃការមានព្រះជន្មរស់ឡើងវិញរបស់ទ្រង់បង្ហាញការពិតនៃអ្វីដែលយើងបង្រៀននៅក្នុងដំណឹងល្អនៃព្រះយេស៊ូវគ្រីស្ទ ហើយបញ្ជាក់ថា ទ្រង់មានអំណាចទាំងអស់នៅស្ថានសួគ៌ និងនៅលើផែនដី—ដែលថាទ្រង់អាច ហើយនឹងបំពេញការសន្យារបស់ទ្រង់ ។ ទ្រង់មានព្រះជន្មរស់ ! បងប្អូនគឺជាពួកអ្នកគង្វាលរបស់ទ្រង់ ហើយខ្ញុំសូមផ្ដល់ពរដល់បងប្អូនមានសេចក្តីស្រឡាញ់របស់ទ្រង់ និងកាន់តែមានសមត្ថភាពខ្ពស់ក្នុងការបង្រៀន និងមើលថែកូនចៀមរបស់ទ្រង់ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕