« សូមទ្រង់មានព្រះបន្ទូលមកចុះ ដ្បិតទូលបង្គំ ជាអ្នកបម្រើទ្រង់ប្រុងស្តាប់ហើយ »

ការចាក់ផ្សាយប្រចាំឆ្នាំ ខែ មករា ឆ្នាំ ២០២៤ សម្រាប់ថ្នាក់ ស&.វ.

អែលឌើរ ក្លាក ជី ហ្គីលប៊ឺត

គណៈអភិបាលនៃប្រព័ន្ធអប់រំរបស់សាសនាចក្រ

ថ្ងៃ សុក្រ ទី ២៦ ខែ មករា ឆ្នាំ ២០២៤

ខ្ញុំមានអំណរគុណយ៉ាងខ្លាំង ដែលបាននៅជាមួយបងប្អូនក្នុងការចាក់ផ្សាយការបំពាក់បំប៉នទូទាំងពិភពលោកនេះ ។ ខ្ញុំរំភើបនឹងអ្វីដែលប្អូនប្រុស វិប បានចែកចាយនឹងបងប្អូនទាក់ទងនឹងបច្ចុប្បន្នភាពនៃកម្មវិធីសិក្សាថ្នាក់សិក្ខាសាលារបស់យើងនាពេលខាងមុខ ។ នេះគឺជាការអភិវឌ្ឍជាប្រវត្តិសាស្ត្រមួយ ដែលនឹងលើកកម្ពស់ការរៀបចំជីវិតរបស់យុវវ័យនៅទូទាំងសាសនាចក្រ ។ ពេលពឹងផ្អែកលើព្រះយេស៊ូវគ្រីស្ទ ហើយបោះយុថ្កានៅក្នុងបទគម្ពីរ ខ្ញុំមើលឃើញយុវជន និងយុវនារីបានត្រៀមខ្លួនកាន់តែប្រសើរសម្រាប់ការបម្រើបេសកកម្ម ព្យាយាមនៅក្នុងសេចក្តីសញ្ញាព្រះវិហារបរិសុទ្ធរបស់ពួកគេ កាន់តែរឹងមាំខាងផ្លូវចិត្ត និងភាពខ្លួនទីពឹងខ្លួន ហើយត្រៀមខ្លួនកាន់តែប្រសើរដើម្បីចូលមហាវិទ្យាល័យ ។

ចំពោះគ្រូបង្រៀនថ្នាក់សិក្ខាសាលា បងប្អូនគឺជាផ្នែកមួយដ៏សំខាន់នៃការរៀបចំយុវវ័យរបស់យើង និងអ្វីដែលពួកគេនឹងត្រូវការដើម្បីក្លាយជាសិស្សរបស់ព្រះយេស៊ូវគ្រីស្ទក្នុងគ្រាដ៏ភ្ញាក់ផ្អើលនាពេលខាងមុខនេះ ។ ខ្ញុំសង្ឃឹមថាបងប្អូននឹងមើលឃើញការបំផុសគំនិតនៅពីក្រោយមេរៀនទាំងនេះ ហើយស្គាល់ពីតួនាទីដែលបងប្អូនមានក្នុងការរៀបចំយុវវ័យសម្រាប់អនាគតដែលនៅខាងមុខពួកគេ ។ សូមអធិស្ឋានទូលសុំការយល់ដឹង និងការបំផុសគំនិតដើម្បីមើលឃើញផ្លូវនៃអនាគតរបស់ពួកគេ ។ ចូរស្វែងរកជំនឿដើម្បីបំផុសគំនិតពួកគេឲ្យត្រៀមខ្លួន ។ ឱ ! នេះ វាជាពេលវេលាដ៏អស្ចារ្យណាស់ដើម្បីបង្រៀនថ្នាក់សិក្ខាសាលា និងជាការទទួលខុសត្រូវដ៏អស្ចារ្យដែលយើងចែករំលែកជាមួយគ្នា ។

សុន្ទរកថារបស់ខ្ញុំឥឡូវនេះនឹងផ្តោតទៅលើគ្រូបង្រៀនថ្នាក់វិទ្យាស្ថានរបស់យើង ប៉ុន្តែគោលការណ៍ទាំងនោះនឹងទាក់ទងជាមួយយើងទាំងអស់គ្នា ដែលព្យាយាមស្តាប់ និងអភិវឌ្ឍតាមប្រសាសន៍របស់ព្យាការីរបស់យើង ។ នៅក្នុងព្រះគម្ពីរសញ្ញាចាស់ អេលី បានផ្តល់ដំបូន្មានដល់សាំយូអែល ជាព្យាការីនាពេលអនាគតឲ្យតបនឹងការហៅមកពីស្ថានសួគ៌ដោយថ្លែងថា « សូមទ្រង់មានព្រះបន្ទូលមកចុះ ដ្បិតទូលបង្គំ ជាអ្នកបម្រើទ្រង់ » ។^១ គំរូនេះបានអនុញ្ញាតឲ្យសាំយូអែលក្លាយជាអ្នកនិយាយជំនួសព្រះអម្ចាស់នៅក្នុងជំនាន់របស់លោក ។ ផ្នែកមួយនៃអព្ភូតហេតុរបស់ព្យាការីនៅរស់ គឺយើងមានអ្នកដឹកនាំដែលព្រះអម្ចាស់អាចទុកព្រះទ័យថាស្តាប់ទ្រង់ ហើយបង្រៀនព្រះបន្ទូលរបស់ទ្រង់ ។

កាលពីឆ្នាំមុន ខ្ញុំបានចែកចាយនូវការបញ្ជាក់របស់ព្យាការីចំនួនប្រាំដែលព្យាការី និងសាវកបានសង្កត់ធ្ងន់ទៅលើយុវមជ្ឈិមវ័យរបស់យើង ៖

ស្គាល់ពីអត្តសញ្ញាណដ៏ទេវភាពរបស់បងប្អូន ។
ទទួលយកព្រះចេស្ដានៃព្រះយេស៊ូវគ្រីស្ទចូលទៅក្នុងសេចក្ដីសញ្ញារបស់បងប្អូន ។
ទុកឲ្យព្រះឈ្នះ ហើយធ្វើតាមព្យាការីរបស់ទ្រង់ ។
បង្រៀនសេចក្ដីពិតដោយសេចក្ដីស្រឡាញ់ ។
ទទួលខុសត្រូវលើទីបន្ទាល់របស់បងប្អូន ។

ដែលសំខាន់ជាងគោលគំនិតនេះទៅទៀត គឺជាសារលិខិតជាក់លាក់ដែលបានដកស្រង់ ពីសារលិខិតដែលព្យាការីបានថ្លែងដល់យុវមជ្ឈិមវ័យនៅសម័យយើង ។ ជាឧទាហរណ៍ សារលិខិតសំខាន់មួយក្នុងចំណោមសារលិខិតនានាដែលយើងបានព្យាយាមគូសបញ្ជាក់នោះ គឺបានមកពីការប្រជុំធម្មនិដ្ឋានទូទាំងពិភពលោករបស់ប្រធាន ណិលសុន ទៅកាន់យុវមជ្ឈិមវ័យដែលមានចំណងជើងថា « ការជ្រើសរើសដែលជះឥទ្ធិពលលើភាពអស់កល្បជានិច្ច » ។ គោលគំនិត « ស្គាល់អត្តសញ្ញាណដ៏ទេវភាពរបស់ក្មួយៗ » និង « ឲ្យចេះទទួលខុសត្រូវលើទីបន្ទាល់របស់ក្មួយៗ » គឺដកចេញមកដោយផ្ទាល់ពីសារលិខិតនោះឯង ។^២ យើងបានលើកទឹកចិត្តបងប្អូនឲ្យសិក្សាអំពីការគូសបញ្ជាក់របស់ព្យាការីនីមួយៗទាំងនេះ ។ យើងបានសុំឲ្យបងប្អូនស្គាល់ការគូសបញ្ជាក់ទាំងនេះ ហើយ ដាក់បញ្ចូលវាក្នុងការបង្រៀន និងកម្មវិធីសិក្សារបស់បងប្អូន ។ សំខាន់ជាងនេះទៅទៀត យើងសូមអញ្ជើញបងប្អូនឲ្យដាក់បញ្ជូលវាទៅក្នុងរបៀបដែលបងប្អូនឆ្លើយតបទៅនឹងសំណួរ និងរបៀបបងប្អូនផ្ដល់ការងារបម្រើដល់តម្រូវការសិស្សរបស់បងប្អូន ។

ខ្ញុំមានអំណរគុណចំពោះបងប្អូនជាច្រើនដែលបានទទួលយកការអញ្ជើញទាំងនោះ ហើយស្វែងរករបៀបដើម្បីពង្រីកប្រសាសន៍របស់ព្យាការី និងសាវករបស់យើងដល់យុវមជ្ឈិមវ័យនៃសាសនាចក្រនេះ ។ មហាវិទ្យាល័យសាសនា និងវិទ្យាស្ថានត្រូវបានស្នើឲ្យធ្វើបច្ចុប្បន្នភាពមុខវិជ្ជាសិក្សាអំពី ការបង្រៀនរបស់ព្យាការីនៅរស់របស់ពួកគេ ដើម្បីរួមបញ្ចូលការគូសបញ្ជាក់មកពីព្យាការីថ្មីៗនេះទៅកាន់យុវមជ្ឈិមវ័យរបស់យើង ។ ប៉ុន្តែបងប្អូនជាច្រើនក៏បានឃើញពីរបៀបដែលប្រសាសន៍របស់ព្យាការីនៅរស់អាចពង្រឹង និងអភិវឌ្ឍវគ្គសិក្សាដែលផ្អែកទៅលើបទគម្ពីរផ្សេងទៀតដែរ ។ ជាឧទាហរណ៍ សាស្រ្តាចារ្យនៅសាកលវិទ្យាល័យ ប៊ី.វាយ.យូ. ម្នាក់បានរកឃើញរបៀបដើម្បីភ្ជាប់សុន្ទរកថា« ការជ្រើសរើសដែលជះឥទ្ធិពលលើភាពអស់កល្បជានិច្ច » និងសារលិខិតរបស់ព្យាការីផ្សេងទៀតទៅនឹងវគ្គសិក្សាសាសនា ២៧៥ របស់នាងអំពី « ការបង្រៀន និងគោលលទ្ធិនៃព្រះគម្ពីរមរមន » ។ គាត់បានថ្លែងថា ៖ « ការបង្រៀនរបស់ព្រះគម្ពីរមរមនត្រូវបានពង្រឹងដោយការគូសបញ្ជាក់របស់ព្យាការីបច្ចុប្បន្នទាំងនេះ ហើយវាបកបញ្ច្រាស់មកវិញ ។ វាពិតជាធ្វើឲ្យមានភាពខុសគ្នាក្នុងការយល់ដឹងអំពីគោលការណ៍ដំណឹងល្អ ក្នុងការដាក់ធនធានទាំងពីរនេះជាមួយគ្នា » ។

អ្នកសម្របសម្រួលថ្នាក់វិទ្យាស្ថាននៅទីក្រុងអាត្លង់តា បានចែកចាយពីរបៀបដែលគាត់អាចបញ្ចូលការគូសបញ្ជាក់របស់ព្យាការីទៅក្នុងវគ្គសិក្សាសាសនា ២៥០ អំពីព្រះយេស៊ូវគ្រីស្ទ និងដំណឹងល្អដ៏នៅអស់កល្បអស់កាលជានិច្ច ។ ឧទាហរណ៍ក្នុងមេរៀនទីពីរ « ការពង្រឹងទីបន្ទាល់របស់យើងអំពីព្រះគ្រីស្ទ » គាត់អាចបញ្ចូលគោលគំនិតនៃអត្តសញ្ញាណដ៏ទេវភាព និងការទទួលខុសត្រូវលើទីបន្ទាល់មកពី « ការជ្រើសរើសដែលជះឥទ្ធិពលលើភាពអស់កល្បជានិច្ច » របស់ប្រធានណិលសុន ។ នៅក្នុងមេរៀនទី ១០ « ការធ្វើតាមគំរូនៃការងាយប្រដៅរបស់ព្រះយេស៊ូវគ្រីស្ទ » គាត់បានឲ្យសិស្សផ្ដោតលើសុន្ទរកថា « ទុកឲ្យព្រះឈ្នះ » ។^៣ ហើយនៅក្នុងមេរៀនទី ១៨ « ការទទួលអំណោយទាននៃ ព្រះគុណដ៏ទេវភាពរបស់ព្រះអង្គសង្គ្រោះ » គាត់បានផ្ដោតលើសុន្ទរកថារបស់ប្រធានណិលសុន « សេចក្តីសញ្ញាដ៏នៅអស់កល្បអស់កាលជានិច្ច » ។^៤

អ្នកផ្សេងទៀតបានរៀបរាប់ពីរបៀបដែលការស្គាល់អំពីការបញ្ជាក់របស់ព្យាការីទាំងនេះយ៉ាងជ្រាលជ្រៅ ជួយដល់ពួកគេឲ្យដោះស្រាយសំណួរដំណឹងល្អដោយសាមញ្ញ ។ សាស្ត្រាចារ្យនៃមហាវិទ្យាល័យថ្នាក់វិទ្យាស្ថានមួយបានចែកចាយពីរបៀបដែលការពិភាក្សាទាក់ទងនឹងការចូលព្រះវិហារបរិសុទ្ធក្នុងការពិភាក្សាក្នុងថ្នាក់គាត់បានអនុញ្ញាតឲ្យគាត់ងាកទៅរកសុន្ទរកថារបស់ប្រធានណិលសុន « ព្រះវិហារបរិសុទ្ធ និងគ្រឹះខាងវិញ្ញាណរបស់បងប្អូន » ។^៥ គាត់បានចែកចាយថា « តាមរយៈការប្រើប្រាស់ប្រសាសន៍របស់ប្រធានណិលសុន នោះសារលិខិតនៃ ‹ ការបន្តឆ្ពោះទៅមុខ › គឺច្បាស់លាស់ចំពោះអស់អ្នកដែលកំពុងពុះពារស្វែងរកអំណរនៅក្នុងការបម្រើក្នុងព្រះវិហារបរិសុទ្ធរបស់ពួកគេ » ។ គ្រូបង្រៀនថ្នាក់វិទ្យាស្ថាននៅប្រទេសប៉ាណាម៉ា បានចែកចាយពីរបៀបដែលការបង្រៀនមកពីប្រធានណិលសុន និងអែលឌើរ នែល អិល អាន់ឌើរសិន បានជួយពួកគាត់ឲ្យឆ្លើយតប ក្នុងនាមជាអ្នកផ្សះផ្សារគេ ចំពោះបញ្ហាមួយដែលឲ្យមានការបែកបាក់យ៉ាងធំនៅក្នុងមូលដ្ឋាន ។ គ្រូបង្រៀនម្នាក់ទៀតបានចែកចាយពីរបៀបនៅពេលគេសួរគាត់ថា ហេតុអ្វីយើងមិនអាចព្រងើយកន្ទើយនឹងក្រឹត្យវិន័យរបស់ព្រះ បើមនុស្សកំពុងជួបការលំបាក នោះគាត់អាចងាកទៅមើលសុន្ទរកថារបស់អែលឌើរ ឌី ថត គ្រីស្តូហ្វឺសិន « បទបញ្ញត្តិទីមួយជាចម្បង » ។^៦

នៅពេលយើងបន្តបញ្ជាក់អំពីការបង្រៀនរបស់ព្យាការីនៅរស់ នោះយើងកំពុងតែឃើញផលផ្លែនៃការខិតខំរបស់យើង ដែលបង្ហាញឡើងនៅក្នុងខ្លួនរបស់សិស្ស នៅពេលដែលពួកគេអនុវត្តនូវការបញ្ជាក់របស់ព្យាការីទាំងនេះ ។ នៅក្នុងផ្នែកមួយនៃថ្នាក់ « ការឆ្លើយសំណួរដំណឹងល្អរបស់ខ្ញុំ » គ្រូបង្រៀនថ្នាក់វិទ្យាស្ថានម្នាក់បានរៀបរាប់ពីការពិភាក្សាទាក់ទងនឹងបញ្ហាស្រឡាញ់ភេទដូចគ្នា ភ្លាមនោះសិស្សបានលើកឡើងសេចក្តីយោងសាមញ្ញៗរបស់ប្រធានណិលសុន អំពីការស្គាល់ពីអត្តសញ្ញាណដ៏ទេវភាពរបស់ខ្លួន ចេញមកពីសុន្ទរកថា « ការជ្រើសរើសដែលជះឥទ្ធិពលលើភាពអស់កល្បជានិច្ច » ។ ម្នាក់ទៀតបានរៀបរាប់ពីរបៀបដែលសិស្សបានយោងទៅសារលិខិតរបស់ប្រធាន ដាល្លិន អេក អូក ក្នុងការឈរយ៉ាងរឹងមាំក្នុងក្តីស្រឡាញ់ដើម្បីប្រកាសសេចក្តីពិត នៅពេលពួកគេប្រឈមមុខនឹងការសួរសំណួរពិបាកៗពីដំណឹងល្អក្នុងការពិភាក្សាជាមួយមិត្តភក្តិរបស់ពួកគេ ។

ខ្ញុំបានទទួលចំណាប់អារម្មណ៍ផ្ទាល់ខ្លួនដើម្បីពង្រីកការបញ្ជាក់របស់ព្យាការីទៅកាន់យុវមជ្ឈិមវ័យ ។ នៅរដូវរងារឆ្នាំមុន ខ្ញុំបានបង្រៀនរួមគ្នាជាមួយគ្រូម្នាក់ទៀតរយៈពេលមួយឆមាសក្នុងវគ្គសិក្សា ការបង្រៀនរបស់ព្យាការីនៅរស់ នៅសាកលវិទ្យាល័យ ប៊ី.វាយ.យូ. ជាមួយនឹង ឌីន ស្កត់អ៊ីស្ពីន ។ នៅក្នុងវគ្គសិក្សានេះ យើងបានគូសសំខាន់ពីការសង្កត់ធ្ងន់នីមួយៗនៃការគូសបញ្ជាក់ទាំងប្រាំរបស់ព្យាការី ។ ពេលយើងបានពិភាក្សាអំពីគោលគំនិតទាំងនេះជាមួយសិស្សរបស់យើង ខ្ញុំដឹងច្បាស់ ថាតើដំបូន្មានរបស់ព្យាការីបច្ចុប្បន្នមានឥទ្ធិពលប៉ុនណាចំពោះយុវមជ្ឈិមវ័យទាំងនេះនៅពេលពួកគេប្រឈមមុខនឹងរដូវកាលដ៏សំខាន់នៃជីវិត ។

ថ្នាក់រៀននេះបានជួយខ្ញុំឲ្យកែលម្អរបៀបដែលខ្ញុំបានបង្រៀនគោលការណ៍ទាំងនេះ ហើយវាបានជួយខ្ញុំឲ្យយល់កាន់តែច្បាស់ពីផ្នែកនៃសារលិខិតទាំងនេះដែលខ្ញុំគួរទាញយកមកប្រើ នៅពេលដោះស្រាយចម្ងល់របស់មជ្ឈិមវ័យ ។ ចំណាប់អារម្មណ៍មួយទៀតដែលខ្ញុំបានទទួល គឺចូលរួមក្នុងសិក្ខាសាលាថ្នាក់វិទ្យាស្ថានតាមលំដាប់លំដោយ ។ ដូចដែលបងប្អូនបានដឹងហើយ ផ្នែកមួយនៃការផ្តួចផ្តើម « គំនិតបង្កើតថ្មីរបស់ថ្នាក់វិទ្យាស្ថាន » របស់យើងមានរួមទាំងការបង្កើតសិក្ខាសាលាខ្លីៗ ដែលជួយនាំមនុស្សឲ្យចូលរៀនថ្នាក់វិទ្យាស្ថាន ដែលពេលខ្លះប្រហែលជាមិនទាន់បានចូលរៀននៅឡើយទេ ។

ដំបូងឡើយ ចាប់ផ្ដើមធ្វើការជាមួយថ្នាក់វិទ្យាស្ថាននៅ ឡូហ្គេន នៃសាកលវិទ្យាល័យរដ្ឋយូថាហ៍ បន្ទាប់មកថ្នាក់វិទ្យាស្ថាននៅទីក្រុងសលត៍ លេកនៅឯសាកលវិទ្យាល័យ យូថាហ៍ ហើយថ្មីៗនេះនៅឯទ្វីបអាហ្វ្រិក នៅថ្នាក់វិទ្យាស្ថាននៅទីក្រុង ប្រាស្សាវីល ក្នុងសាធារណរដ្ឋប្រជាធិបតេយ្យកុងហ្គោ ដោយមានការសម្របសម្រួលជាមួយថ្នាក់វិទ្យាស្ថាននៅទីក្រុង គីនហ្សាសា ក្នុងសាធារណរដ្ឋប្រជាធិបតេយ្យកុងហ្គោ យើងបានបង្កើតសិក្ខាសាលាដែលមានពីរផ្នែកដោយផ្ដោតសំខាន់ទៅលើសុន្ទរកថារបស់ប្រធាន ណិលសុន « ការជ្រើសរើសដែលជះឥទ្ធិពលលើភាពអស់កល្បជានិច្ច » ។ វគ្គនៅសប្ដាហ៍ទី១ ផ្តោតលើការបញ្ជាក់មកពីព្យាការីដើម្បីដឹងពីអត្តសញ្ញាណដ៏ទេវភាពរបស់បងប្អូន ។ សប្តាហ៍ទីពីរ ផ្តោតទៅលើការបញ្ជាក់របស់ព្យាការីដើម្បីទទួលខុសត្រូវលើទីបន្ទាល់របស់បងប្អូន ។ នេះគឺជាការបញ្ជាក់ដំបូង និងចុងក្រោយមកពីព្យាការីដែលយើងបានស្នើសុំឲ្យបងប្អូនសិក្សា និងអភិវឌ្ឍ ។

បន្ទាប់ពីបង្រៀនវគ្គទីមួយនេះ ខ្ញុំបានអញ្ជើញសិស្សរបស់ខ្ញុំឲ្យនាំមិត្តភក្តិម្នាក់មកចូលរួមនៅវគ្គទីពីរ—នាំមិត្តភក្តិដែលអាចពុះពារនឹងសំណួរនៃសេចក្តីជំនឿទាក់ទងនឹងសេចក្តីជំនឿរបស់គាត់ ឬនាង ។ នៅក្នុងសិក្ខាសាលាមួយ ចំនួនអ្នកចូលរួមមានចំនួនស្ទើរតែទ្វេដង ។ នៅពេលយើងបន្តប្រើសិក្ខាសាលាដើម្បីបង្កើនទំនាក់ទំនង និងការចូលទៅកាន់ថ្នាក់វិទ្យាស្ថាន ខ្ញុំសូមផ្ដល់ការអញ្ជើញទៅកាន់ក្រុមប្រឹក្សាថ្នាក់វិទ្យាស្ថាននីមួយៗឲ្យស្វែងរកឱកាសក្នុងការអភិវឌ្ឍសិក្ខាសាលាដែលមានគោលដៅផ្តោតលើការគូសបញ្ជាក់របស់ព្យាការីដែលយើងបានចែងឡើង ។ ខ្ញុំសូមលើកទឹកចិត្តបងប្អូនឲ្យយកចិត្តទុកដាក់ជាពិសេសទៅលើការបង្រៀនរបស់ប្រធាន ណិលសុន ដោយបញ្ជាក់លើសារលិខិតគ្រឹះរបស់លោក « ការជ្រើសរើសដែលជះឥទ្ធិពលលើភាពអស់កល្បជានិច្ច » ។

ចាប់តាំងពីយើងបានចែកចាយដំបូន្មានពីដំបូងរបស់យើងដើម្បីគាំទ្របន្ថែមលើការបញ្ជាក់របស់ព្យាការីទៅកាន់យុវមជ្ឈិមវ័យ យើងបានទទួលដំបូន្មានបន្ថែមពីព្រះអម្ចាស់តាមរយៈពួកអ្នកបម្រើរបស់ទ្រង់ដែលនៅរស់នៅក្នុងការប្រជុំធម្មនិដ្ឋានរបស់យុវមជ្ឈិមវ័យទូទាំងពិភពលោក និងក្នុងសន្និសីទទូទៅ ។ នៅក្នុងសារលិខិតនារដូវស្លឹកឈើជ្រុះឆ្នាំ ២០២៣ របស់លោកទៅកាន់យុវមជ្ឈិមវ័យ អែលឌើរ ឃ្វីនថិន អិល ឃុក បានគាំទ្របន្ថែមទៅលើដំបូន្មានរបស់ប្រធាន ណិលសុន ក្នុងការស្គាល់ពីអត្តសញ្ញាណដ៏ទេវភាពរបស់បងប្អូន ។ លោកបានថ្លែងថា ឧបសគ្គមួយក្នុងការស្វែងរកជំនឿលើព្រះគឺកើតចេញមកពីការបារម្ភអំពីអត្តសញ្ញាណពិតប្រាកដរបស់បងប្អូន ។

អែលឌើរ ឃុក បានពន្យល់ថា ៖ « ប្រធាន រ័សុល អិម ណិលសុន បានលើកឡើងពីចំណុចនេះតាមរបៀបដ៏មានអានុភាពមួយ ។ លោកបានបញ្ជាក់លើការកំណត់អត្តសញ្ញាណចំនួនបីដែលមានជាយូរមកហើយ នោះគឺ ៖ ‹ បុត្ររបស់ព្រះ › ‹ បុត្រនៃសេចក្ដីសញ្ញា › និង ‹ សិស្សនៃព្រះយេស៊ូវគ្រីស្ទ › » ។ មុននេះនៅក្នុងសុន្ទរកថារបស់លោក អែលឌើរ ឃុក បានគាំទ្របន្ថែមទៅលើគោលគំនិតរបស់ប្រធាន ណិលសុន ថាឲ្យទទួលខុសត្រូវលើទីបន្ទាល់របស់បងប្អូនកាលលោកបានថ្លែងថា ៖ « មនុស្សគ្រប់ជំនាន់ទាំងអស់ប្រឈមមុខនឹងកាលៈទេសៈនានា ដែលអាចនាំឲ្យមានឧបសគ្គដល់សេចក្ដីជំនឿរបស់ពួកគេ… ។ នោះមនុស្សគ្រប់ជំនាន់ត្រូវតែស្វែងយល់ និងទទួលចំណេះដឹង និងទីបន្ទាល់អំពីព្រះផ្ទាល់ខ្លួន » ។^៧

នៅក្នុងការប្រជុំធម្មនិដ្ឋានទូទាំងពិភពលោករបស់លោកទៅកាន់យុវមជ្ឈិមវ័យ នាខែឧសភា ឆ្នាំ ២០២៣ នេះប្រធាន ដាល្លិន អេក អូក បានរំឭកយើងឲ្យឈរការពារសេចក្ដីពិតដោយសេចក្តីស្រឡាញ់ តាមរយៈការសង្កត់ធ្ងន់ទៅលើបទបញ្ញត្តិដ៏ធំពីរនេះ ។^៨ លោកបានលើកឡើងពីប្រសាសន៍របស់សាវកអែលឌើរ ឌី ថត គ្រីស្តូហ្វឺសិន ថា ៖ « ការដាក់បទបញ្ញត្តិទីមួយជាចម្បង ពុំបានកាត់បន្ថយ … សមត្ថភាពរបស់យើងក្នុងការគោរពតាមបទបញ្ញត្តិទីពីរនោះទេ ។ ផ្ទុយទៅវិញ វាបង្កើន និងពង្រឹងដល់បទបញ្ញត្តិទីមួយវិញ ។ … សេចក្ដីស្រឡាញ់របស់យើងចំពោះព្រះជួយបង្កើនសមត្ថភាពរបស់យើងឲ្យស្រឡាញ់អ្នកដទៃកាន់តែពេញលេញ និងឥតខ្ចោះដោយសារ … ក្នុងន័យនេះ [យើង]គឺជាដៃគូជាមួយព្រះនៅក្នុងការថែរក្សាបុត្រាបុត្រីរបស់ទ្រង់ » ។^៩

បន្ទាប់មក ប្រធាន អូក បានរំឭកយើងថា យើងនៅតែអាចស្រឡាញ់អ្នកដទៃ ហើយស្វែងរកមូលដ្ឋានរួមដោយមិនបំពានលើសេចក្តីពិតដែលយើងដឹងឡើយ ។ នៅក្នុងសុន្ទរកថាសន្និសីទទូទៅថ្មីៗរបស់លោក ក្រោមចំណងជើងថា « គិតដល់សេឡេស្ទាល ! » ប្រធាន ណិលសុន បានផ្ដល់ការបញ្ជាក់ក្នុងនាមជាព្យាការីថាឲ្យឈរការពារសេចក្តីពិត ទោះបីជាមានការជំទាស់ក៏ដោយ ដោយថ្លែងថា ៖ « ប៉ុន្តែមតិសាធារណៈមិនមែនជាអ្នកកំណត់សេចក្តីពិតនោះទេ ។ … នៅពេលអ្នកដែលបងប្អូនស្រឡាញ់វាយប្រហារលើសេចក្តីពិត សូមគិតដល់សេឡេស្ទាល ហើយកុំមានការសង្ស័យលើទីបន្ទាល់របស់បងប្អូនឡើយ » ។^១០

នៅក្នុងការបំពាក់បំប៉នទូទាំងពិភពលោកនេះ ខ្ញុំក៏កំពុងគាំទ្របន្ថែមទៅលើការអញ្ជើញពីមុនៗរបស់ខ្ញុំ ឲ្យសិក្សា និងអនុវត្តតាមការបញ្ជាក់របស់ព្យាការីបច្ចុប្បន្នទៅកាន់យុវមជ្ឈិមវ័យផងដែរ ។ ក្នុងនាមជាគ្រូបង្រៀនថ្នាក់សិក្ខាសាលា និងវិទ្យាស្ថាន របៀបមួយដែលយើងអាចនិយាយបានថា « សូមទ្រង់មានព្រះបន្ទូលមកចុះ ដ្បិតទូលបង្គំ ជាអ្នកបម្រើទ្រង់ » គឺស្តាប់ និងសិក្សាដោយយកចិត្តទុកដាក់នូវព្រះបន្ទូលរបស់ព្រះអម្ចាស់ ដូចដែលបានបើកសម្តែងតាមរយៈព្យាការីនៅរស់របស់ទ្រង់ ។ យើងអាចធ្វើជាសំឡេងបន្លឺរបស់ព្យាការីអំពីការណែនាំដែលព្យាការីកំពុងចែកចាយជាមួយយុវមជ្ឈិមវ័យផងដែរ ។

ជាផ្នែកមួយនៃការហៅរបស់ខ្ញុំក្នុងនាមជាពួកចិតសិបនាក់ដែលមានសិទ្ធិអំណាចទូទៅ ខ្ញុំត្រូវធ្វើជាសាក្សីរបស់ព្រះអង្គសង្គ្រោះ ។ ការទទួលខុសត្រូវដ៏សំខាន់មួយទៀតដែលពួកចិតសិបនាក់ត្រូវអនុវត្ត គឺធ្វើជាធនធានមួយដល់ពួកដប់ពីរនាក់គ្មាននរណាផ្សេងទៀតឡើយ ។ ខ្ញុំនៅទីនេះថ្ងៃនេះ ខ្ញុំបំពេញការចាត់តាំងជាមួយអែលឌើរ ឌី ថត គ្រីស្តូហ្វឺសិន ដែលខ្ញុំគាំទ្រក្នុងតួនាទីរបស់ខ្ញុំ ដែលជាអភិបាលផ្នែកអប់រំ និងតួនាទីរបស់លោក ជាប្រធានគណៈកម្មការប្រតិបត្តិរបស់ក្រុមប្រឹក្សាអប់រំនៃសាសនាចក្រផងដែរ ។ ខ្ញុំព្យាយាមធ្វើជាធនធានមួយដល់អែលឌើរ គ្រីស្តូហ្វឺសិន ដែលជាផ្នែកមួយនៃការចាត់តាំងនោះ ។ ប៉ុន្តែ ទោះបីជាខ្ញុំមិនត្រូវបានចាត់តាំងឲ្យមកជាមួយអែលឌើរ គ្រីស្តូហ្វឺសិន ក៏ដោយ ក៏ខ្ញុំធ្វើការដើម្បីគាំទ្របន្ថែមទៅលើដំបូន្មាន និងការបង្រៀនរបស់ពួកសាវកម្នាក់ៗ និងជាពិសេសព្យាការីនៃសាសនាចក្រ ។

នៅពេលដែលខ្ញុំនៅឯបរិយាកាសខាងសាសនាក្នុងសន្និសីទស្តេក និងការបំពាក់បំប៉នថ្នាក់ដឹកនាំ សារលិខិតរបស់ខ្ញុំភាគច្រើនគឺជាការគាំទ្របន្ថែមនូវប្រសាសន៍របស់ព្យាការី និងសាវក ។ ដូចគ្នានេះដែរ នៅពេលខ្ញុំប្រឹក្សា និងធ្វើការងារបម្រើដល់អ្នកដទៃ ខ្ញុំលើកយកប្រសាសន៍របស់ពួកគាត់មកចែកចាយ ។ ក្នុងករណីនៃការអប់រំខាងសាសនា ព្យាការី និងពួកសាវកមានប្រសាសន៍ជំនួសឲ្យព្រះអម្ចាស់ទៅកាន់យុវវ័យនៃសាសនាចក្រ ។ យើងមានទំនួលខុសត្រូវក្នុងការដឹង និងគាំទ្របន្ថែមទៅលើសារលិខិតរបស់ពួកលោក ។ បងប្អូនប្រុសស្រី យុវមជ្ឈិមវ័យរបស់យើងកំពុងរស់នៅក្នុងគ្រាដ៏មានគ្រោះថ្នាក់ ប៉ុន្តែព្រះអម្ចាស់បានរៀបចំពួកព្យាការីដែលមានការហៅនេះ និងសមត្ថភាពដើម្បីមានប្រសាសន៍ថា « សូមទ្រង់មានព្រះបន្ទូលមកចុះ ដ្បិតទូលបង្គំ ជាអ្នកបម្រើទ្រង់ » ។ សូមឲ្យយើងមានភាពក្លាហាន មានវិន័យ និងសេចក្តីជំនឿដើម្បីស្តាប់ប្រសាសន៍របស់ពួកលោក ហើយពេលធ្វើដូច្នេះ សូមនាំយកសារលិខិតរបស់ព្រះទៅកាន់បុត្រាបុត្រីរបស់ទ្រង់នៅទូទាំងផែនដី ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។

ឥឡូវនេះគឺជាឯកសិទ្ធិរបស់ខ្ញុំដើម្បីណែនាំទៅកាន់បងប្អូននូវអ្នកឡើងនិយាយសំខាន់របស់យើង ។ អែលឌើ ឌី ថត គ្រីស្តូហ្វឺសិន ត្រូវបានហៅឲ្យបម្រើជាសមាជិកក្នុងកូរ៉ុមនៃពួកសាវកដប់ពីរនាក់ នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នៅថ្ងៃទី ៥ ខែ មេសា ឆ្នាំ ២០០៨ ។ អែលឌើរ គ្រីស្តូហ្វឺសិន មានទំនួលខុសត្រូវគ្រប់គ្រងកិច្ចការសាសនាចក្រជាច្រើន រួមទាំងការចាត់តាំងបច្ចុប្បន្នរបស់លោក នៅតំបន់យូថាហ៍ និងអាហ្វ្រិកខាងលិច ។ ដូចដែលបានលើកឡើងពីមុន លោកក៏ត្រូវបានចាត់តាំងជាប្រធានគណៈកម្មការប្រតិបត្តិរបស់ក្រុមប្រឹក្សាអប់រំនៃសាសនាចក្រផងដែរ ។

ក្រៅពីការចាត់តាំងជាក់លាក់ ពួកសាវកដប់ពីរនាក់ទាំងអស់មានការហៅពិសេសមួយ គឺដើម្បីធ្វើជាសាក្សីពិសេសនៃព្រះនាមរបស់ព្រះសង្រ្គោះ ។ ខ្ញុំបានសង្កេតឃើញភាពខុសគ្នានេះពេលមើលទៅអែលឌើរ គ្រីស្តូហ្វឺសិន នៅពេលយើងត្រូវបានចាត់តាំងជាមួយគ្នាឲ្យទៅទស្សនកិច្ចទីតាំងមួយទៅកាន់សាកលវិទ្យាល័យ BYU–Hawaii ។ អែលឌើរ ហូឡិន ពីមុនត្រូវបានចាត់តាំងឲ្យធ្វើជាអធិបតី ប៉ុន្តែដោយសារមានបញ្ហានៅនាទីចុងក្រោយ ការទទួលខុសត្រូវនោះបានធ្លាក់មកលើអែលឌើរ គ្រីស្តូហ្វឺសិន ភ្លាមៗ ។

លោកធ្វើតួនាទីជាអធិបតីដ៏គួរឲ្យគោរព ប៉ុន្តែនៅក្នុងការប្រជុំមួយរបស់យើង លោកបានមានប្រសាសន៍អ្វីមួយដែលតែងតែឲ្យខ្ញុំរោទិ៍ដូចកណ្ដឹង ។ លោកបានមានប្រសាសន៍ថា ៖ « ជាចុងក្រោយ មិនថាតំបន់ ឬការទទួលខុសត្រូវបច្ចុប្បន្នរបស់យើងជាអ្វីនោះទេ កិច្ចការគ្រឹះរបស់យើងគឺធ្វើជាសាក្សីពិសេសម្នាក់នៃព្រះនាមរបស់ព្រះគ្រីស្ទនៅក្នុងពិភពលោកទាំងមូល » ។ នៅពេលលោកមានប្រសាសន៍ពាក្យទាំងនេះនៅទីក្រុងឡាអេ រដ្ឋហាវ៉ៃ ព្រះវិញ្ញាណបានធ្វើជាសាក្សីដល់ខ្ញុំពីលក្ខណៈពិសិដ្ឋនៃការហៅរបស់អែលឌើរ គ្រីស្តូហ្វឺសិន និងរបៀបដែលលោកគោរពដល់ការហៅនោះដោយភាពថ្លៃថ្នូរ និងការយកចិត្តទុកដាក់ ។ ឥឡូវនេះ វានឹងជាឯកសិទ្ធិរបស់យើងក្នុងការស្តាប់ពីអែលឌើរ ឌី ថត គ្រីស្តូហ្វឺសិន ។

អែលឌើរ គ្រីស្ដូហ្វឺសិន …