Faalagolago i le Atua
Faasalalauga Faaletausaga a le S&I Ianuari 2024
Aso Faraile, 26 Ianuari, 2024
O se faamanuiaga le lauga atu ia te outou—outou o e ua tele naua mea o outou faia e taitai ai tupulaga talavou ia Keriso. O lau galuega o le aoao atu ma le liuaina. O lau soa o le Agaga Paia lea. O lou taui e le mafaamatalatalaina. I afioga a le Faaola, “E matua tele lava [lou] olioli … i le malo o lo’u Tama!”1
Ou te talisapaia mea ua tatou faalogoina mai le Komesina o aoga, Elder Clark G. Gilbert, faapea le taitai o Seminare ma Inisitituti, o Uso Chad H. Webb. Ou te faamemelo ma fiafia e galulue faatasi ma i la’ua. Ou te faamaonia le taitaiga ma fautuaga poto ua faatoa tatou maua mai ia i la’ua taitasi. La te malamalama lelei i mea na la saunoa i ai. Ua ou fiafia lava i le faatupula’ia o seminare ma inisitituti na lipotia mai e Uso Webb. Faamalo ma faafetai atu ia i latou uma sa i ai se matafaioi i lena mea.
Ou te faamoemoe o le a outou manatuaina upu a Elder Gilbert e uiga i le suesueina ma le faalauteleina o faamamafa faaperofeta a Peresitene Russell M. Nelson, ma isi o aposetolo ma perofeta. O faataitaiga na ia ta’ua i le ala ua faia ai lenei mea, ma lelei lona faiga, e aoga tele. Atonu e mafai ona e faaluaina nisi o na mea ma iloa ai musumusuga mo isi faaaogaaga i o outou tulaga. O se faama’ite taua lenei i a’oga a le Ekalesia ma o le a fua mai ai ni fua taua.
E faapitoa lo’u fiafia--faagaeetia, aemaise--o le mea na fofogaina mai e Uso Webb e faatatau i lesona faaleautu i le seminare. Na ia faamamafa mai faapea o le a faaauau pea ona tatou faaaogaina le auala faalefaasologa o tusitusiga paia e fai ma faavae mo mataupu aoaoina i le seminare ae o le a tatou faaopoopo i ai ni isi lesona eseese i le tele o vaiaso, lea e taulima ai autu e pei o misiona, le malumalu, tapenaga faaleaoaoga, tomai e suesue ai tusitusiga paia, malosiaga faalelagona, tomai o le olaga, aoaoga a perofeta o aso e gata ai, ma isi. Ia te a’u, e foliga mai ua faaopoopo atu i ai ni isi fua ma sina luutaga fou o mea faamanogi i le pai. O le a manaia tele. Faatasi ai ma outou, ua ou naunau e aoao mai lenei auala, ma ou te fiafia i le mafai ona tuuina atu se isi mea faaopoopo ia i latou o loo taumafai ma ositaulaga ina ia i ai i le seminare. Ia, taumafa fiafia i le pai!
Ou te fia tautala e uiga i se popolega ua foliga mai ua pagatia ai i tatou nai lo se isi lava taimi muamua i o tatou tupulaga talavou. O loo ou faatatau i lagona moni lava o le atuatuvale ma le popolevale ma le fua oona e mafai ona afua mai i nei lagona--e aofia ai, i o’oo’oga, faaaoga sese o fualaau faasaina, faatama’ia o le tagata lava ia, ma e oo lava i le pule i le ola. O ni nai fuainumera:
I le lalolagi atoa, i le va o le 2004 ma le 2021, o lipoti i le popolevale ogaoga o le tupulaga ua siitia mai le 13.1% i le 29.2% mo tamaitai ae mai le 5% i le 11.5% mo alii.2 I le matutua o le 12 e oo i le 17 tausaga, e 21% na oo i se tulaga ogaoga o le popolevale e le itiiti ifo ma le faatasi i o latou olaga, ma le 15% i le tausaga na te’a nei.3 O fuainumera nei e le aofia ai le luitau itiiti ane ae taua o le popolevale ma le atuatuvale e le ogaoga tele lea e aafia ai le toatele atu o le autalavou.4 E tusa ai ma le lipoti a le WebMD, toeitiiti 60% o i latou e pagatia i le atuatuvale e pagatia foi i le popolevale, po o le isi foi itu.5
O suesuega mo se taimi umi a le Ekalesia e uiga i talavou a le ekalesia ua faaalia ai i le ekalesia aoao i le 2018, e 29% sa tauivi i tulaga ogaoga o le atuatuvale. E moni, e eseese lenei mea i atunuu ma atonu e le fai lea ma sui o talavou uma i atunuu taitasi, ae o le fuainumera mo le atuatuvale ogaoga, mo se faataitaiga, i le Iunaite Setete, 28%; Chile, 32%; Farani ma Peleseuma, 16%; Aferika i Saute, 46%; Taiwan, 18%; Niu Sila, 32%.6
Ioe, e tele vaega e ono saofaga i le pe o faatasi ma le tuputupu a’e o le popolevale ma le atuatuvale. I nisi o tulaga, atonu o loo galue ai ni vaega tau i kenera. O loo i ai foi se vaega o tulaga mai fafo e mafai ona saofaga ai, e pei o puapuaga (e aofia ai aafiaga tuga ma le tuulafoaiina), oo i le mamafatu, sitaili faamatua, aoaoga i tulaga faalefeusuaiga, faatosinaga a tupulaga ma vaega faaleagafesootai, vaega faaleaoaoga, ma uiga faaletagata lava ia, ma isi lava mea.
O se tasi o vaega fou e fesootai ma le faateleina o le faifaipea o le atuatuvale ma le popolevale o le faaaogaina lea o ala o faasalalauga faaagafesootai. Ua tosina mai e lenei mea le gauaiga ma lapataiga mai le ofisa o le US Surgeon General. I le Iunaite Setete, ua taumateina o le 95% o le tupulaga e i ai ni sootaga i ala o faasalalauga faaleagafesootai, ma e toeitiiti lua-vae-tolu e faaaogaina ala o faasalalauga faaleagafesootai i aso uma. Ua maua i suesuega e faapea, o nei tupulaga e faaaluina le averesi o le 3.5 itula i le aso i luga o ala o faasalalauga faaleagafesootai ma lipotia mai, e i ai ni aafiaga le lelei e uiga ia i latou lava. E i ai mamanu patino o le auai i luga o le initoneti e valoia ai taunuuga le lelei: sauaga i luga o le initoneti, feusuaiga, ma le doomscrolling, mo se faataitaiga. (“Doomscrolling,” i se faauigaga—mo outou o e, e pei o a’u, e le’i faalogo lava i ai—e faasino i le faaaluina o se taimi umi i le telefoni po o se komepiuta e se tasi e taulai atu ai i ni tala le lelei o talafou. E manino lava, mo nisi, o lena mausa o se mea e le mataofiofia ma o se tulaga faanoanoa.) O le faaaoga faasauatoa o faasalalauga faaagafesootai--o lona uiga, o le faaalu vale o le taimi e soona iloilo ai ‘anotala o faasalalauga faaagafesootai--e faateleina ai lagona o le vaai maualalo ma faatusatusaga le lelei, ae o le faaaoga tatau pe faatasi ma se faamoemoega lelei o faasalalauga faaagafesootai (e pei o le tuu i luga o se tala, faaali se manatu, ma le fesootai) e le i ai na sootaga e le lelei.
Ua faaalia foi i sailiiliga e faapea e i ai auala e puipuia ai ia e mafai ona fesoasoani e taofia ai le atuatuvale ma le popolevale. O nei auala e aofia ai gaoioiga faaletino, gaualofa, faatauanau, ma le amio pulea.
Ou te talitonu lava a’u o le tele o le lotovaivai ma le atuatuvale e sau mai le le malamalama pe manatua le fuafuaga a le Atua ma talitonu i Lona mana pe a tulai mai faafitauli. A aunoa ma le talitonuga maumaututu i le moni o le Atua, Lona alofa, ma Lana fuafuaga o le fiafia mo Ana fanau, e mafai e mafaufau laiti ona vaai atu i le naumati ma le maaleale o lo latou lumanai. Tatou te le o vaavaai mo ni faiaoga seminare ma le inisitituti e avea ma faufautua po o tagata tomai faapitoa o le soifua maloloina faalemafaufau. Ae, tatou te tuuina atu se mamafa paleni i tulaga i tagata e saofaga ai i le maualuga faateleina o le atuatuvale ma uunaiga. O i tatou o ni tagata e faalauiloa atu le faamoemoe. O i tatou o le leo o le faamoemoe, o le faamoemoe e mauaa i le faatuatua ma le faalagolago i le Atua.
O se malamalamaaga i le fuafuaga o le togiola a lo tatou Tama Faalelagi—aemaise lava le elemene autu o lena fuafuaga, o le Togiola a Iesu Keriso—ua aumaia ai le faamautinoaga sili. E fausia ai ma faasaoina le malosiaga faalelagona--e iloa ai le mafuaaga o lo tatou i ai iinei ma lo tatou faamoemoega i le olaga faitino. Tatou te aoao atu, i mataupu ma faataitaiga e mafai ona latou vaavaai atu i ai mo le laveaiga ma le lagolago. Ia tuu afioga a le Faaola ia ola i o latou loto: “Ua ou fai atu nei mea ia te outou, ina ia outou maua le manuia ia te a’u. E maua foi outou e le puapuaga i le lalolagi: a ia outou loto tetele; ua ou manumalo i le lalolagi.”7 O a tatou feagaiga e fusia ai i tatou ia te Ia, ma faatasi ma Ia, tatou te manumalo ai foi i le lalolagi.
E mafai ona tatou fesoasoani i tamaiti aoga ma isi e faatu o latou faavae patino i luga o le papa o lo tatou Togiola, o Keriso lea, le Alo o le Atua, ina ia “pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te [i latou] ana uatoa uma ma lana afa malosi, o le a leai sona mana i luga o [i latou] e toso ifo ai [i latou] i lalo i le to o le pagatia ma le malaia e le gata.”8 Na faaupu mai e Peresitene Russell M. Nelson faapea: “Ua tautino mai e le Alii e faapea, e ui i luitau faigata tele o nei aso, ae o i latou o ē atia’e o latou faavae i luga o Iesu Keriso, ma aoao i le auala e utuvai ai mai Lona mana, e lē manaomia ona lolo atu i lagona popolevale o lenei vaitau.”9
Ua ia i tatou se avanoa e le mafaatusalia ma le kosi suesue o lenei tausaga, o le Tusi a Mamona. E leai se isi tusitusiga paia o matua manino ona faataoto mai ai o le fuafuaga o le togiola. E leai se isi voluma o tele atu sona a’oa’o mai faatauanau i le moni ma le uiga o le Togiola a Iesu Keriso. E leai se isi vaega o anotusi paia e maua ai le mana e liua ai o le Tusi a Mamona i lana molimau o Iesu o le Keriso ma ua Ia manumalo i le oti, faaletino ma le faaleagaga. O le Tusi a Mamona o se faamalamalamaga manino o upumoni o le talalelei ma le olioli e maua i le mulimuli i poloaiga o le talalelei. O ona faamatalaga e tumu i faataitaiga o le manumalo. O le Tusi a Mamona o le afioga a le Atua, ma “o le mana o le afioga a le Atua”10 e maua ai le faatuatua i le Faaola—o le faatuatua lea e tuleia ese ai le masalosalo, popolevale, ma le atuatuvale lea atonu e lofituina ai i tatou ma tuua ai i lo latou tulaga le malosi ma le faamautinoaga.
Manatu i ni nai faataitaiga:
E i ai le folafolaga masani na ta’ua e le Tupu o Peniamina: “Ma e lē gata i lea, ou te manao ia outou manatunatu i le tulaga manuia ma le fiafia o i latou o e e tausi i poloaiga a le Atua. Aua faauta, e faamanuiaina i latou i mea uma, i mea uma faaletino ma faaleagaga; ma afai latou te tutumau i le faamaoni e oo i le iuga, e talia i latou i le lagi, ina ia mafai ona latou mau faatasi ma le Atua i se tulaga o le fiafia e lē gata. E, ia manatua, ia manatua lava ua moni nei mea; ona ua fetalai mai ai le Alii le Atua.”11
Manatua le tautinoga faamautinoa a Nifae a o feagai o ia ma sauaga ma le lotopopole i le taimi o le maliu o lona tama:
“E ui i lea, e ui i le agalelei tele o le Alii, i le faaali mai ia te aʼu o ana galuega tetele ma le ofoofogia, ua alaga aʼe pea loʼu loto: E, le tagata leaga e ua i ai aʼu! Ioe, ua faanoanoa loʼu loto ona o loʼu tino … ona o a’u soligatulafono.
“Ua siosiomia au ona o tofotofoga ma agasala ua faigofie ona taumaileia ai au.
“Ma pe a ou fia olioli, e oi loʼu loto ona o aʼu agasala; e ui i lea, ua ou iloa lē ua ou faalagolago i ai. …
“E, o lea, afai ua ou vaai i mea tetele faapea, afai na asiasi mai le Alii i lona faamaualalo i le fanauga a tagata i le alofa mutimutivale tele faapea, aisea ea ua tagi ai loʼu loto ma nofo ai pea loʼu agaga i le vanu o le faanoanoa, ma alu ai loʼu tino, ma faavaivai ai loʼu malosi, ona o oʼu puapuaga? …
“Le Alii e, ua ou faalagolago ia te oe, ma o le a ou faalagolago pea ia te oe e faavavau.”12
Na faamatala e Alema le olioli o le toefanauina ona faalagolago ai lea i le Atua:
“Ma o lenei, mo le tolu ao ma le tolu po sa falo tigaina ai au, i tiga o se agaga lava ua faasalaina.
“Ma sa oo ina aʼo faapea ona falo tigaina o au i le mafatia, aʼo lagā au i le atuatuvale i le manatuaina o au agasala e tele, faauta, sa ou manatuaina foi loʼu faalogo i loʼu tamā o vavalo atu i tagata e uiga i le afio mai o se tasi o Iesu Keriso, o se Atalii o le Atua, e togiola mo agasala a le lalolagi.
“O lenei, ina ua tau ane lou mafaufau i lenei manatu, sa ou tagi ifo i totonu o loʼu loto: E, Iesu e, oe le Alo o le Atua, ia e alofa mutimutivale mai ia te au, o se ua i ai i le au oona, ma ua siomia faataamilo e filifili tumau-faavavau o le oti.
“Ma o lenei, faauta, ina ua ou mafaufauina lenei mea, sa ou le toe manatuaina ou tiga; ioe, sa ou le toe lagā atuatuvaleina au i le manatuaina o au agasala.
“Ma ʼoi, le olioli e, ma le malamalama ofoofogia tele na ou vaaia; ioe, sa faatumulia loʼu agaga i le olioli sa sili atu ona tele e pei o loʼu tiga! …
“Ioe, ma mai i lena taimi e oo mai i le taimi nei, o ou galue e le taofia, ina ia mafai ona ou aumai o agaga i le salamo; ina ia mafai ona ou aumai i latou e totofo i le olioli tele lea sa ou tofo i ai; ina ia mafai foi ona fanauina i latou i la le Atua, ma faatumuina i le Agaga Paia. …
“Ma sa lagolagoina au aʼo ou i ai i lalo o tofotofoga ma faalavelave o ituaiga eseese uma, ioe, ma puapuaga uiga eseese uma; ioe, sa laveaiina au e le Atua mai le falepuipui, ma mai i noanoaga, ma mai i le oti, ioe, ma ou te tuu atu loʼu faalagolago ia te ia; ma o le a ia laveai mai pea ia te au.”13
O ai se tasi e mafai ona sili atu ni mafuaaga o le atuatuvale ma le lotopopole loloto nai lo Mamona, o lē na tagiaue, “Sa i luma o o’u mata talu mai le taimi na mafai ai ona [la] vaai i ala o le tagata, se vaaiga faaauau pea o le amioleaga ma mea inosia.”14 Ae, e ui i se olaga atoa o taua ma faafitauli, sa mafai lava ona ia fai atu ia Moronae, “Lo’u atalii e, ia e faamaoni ia Keriso; ma ia le avea mea ua ou tusia ma mea e te faanoanoa ai, e faamamafa ai oe i lalo sei e oti; ae talosia ia sii ae oe i luga e Keriso, ma talosia ia mau e faavavau i lou mafaufau ona mafatia ma lona maliu, ma le faaali mai o lona tino i o tatou tamā [Lona Toetu], ma lona alofa mutimutivale ma le tali-tiga, ma le faamoemoe o lona mamalu ma le ola faavavau.”15
Sa faamatala e Alema le faataitaiga a le Faaola lava ia o le taulimaina o mafatiaga e le mafai ona malamalama ai ma le ala tatou te, liliu atu ai ia te Ia mo le toomaga ma le faamalologa, ae le o le faavauvau.
“Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a ia ave i ona luga tiga ma ma’i o ona tagata.
“Na te ave foi le oti i ona luga, ina ia tatalaina e ia noanoaga o le oti o loo ua noanoatia ai nei lona nuu; na te ave foi i ona luga o latou vaivai, ina ia faatumuina lona alo i le alofa e tusa ma le faaletino, ina ia silafia e ia e tusa ma le tino le ala e tausi ai lona nuu e tusa ma o latou vaivai.
“… E mafatia le Alo o le Atua e tusa ai ma la le tino, ina ia mafai ona ia ave i ona luga agasala a ona tagata, ina ia mafai ona ia soloi ese a latou solitulafono e tusa ai ma le mana o lana laveaiga; ma o lenei faauta, o le molimau lenei ua i ai ia te au.
“O lenei ou te fai atu ia te outou e ao ina outou salamo, ma toe fanauina; ona o loo fetalai mai le Agaga afai e lē toe fanauina outou, e lē mafai ona outou mautofi i le malo o le lagi; o lea ia o mai ia ma papatiso i le salamo, ina ia mafai ona fufuluina outou mai ia outou agasala, ina ia mafai ona outou maua le faatuatua i le Tamai Mamoe a le Atua, o lē na te aveesea agasala a le lalolagi, o lē ua malosi e faaola ma faamama mai i amioletonu uma.”16
I le Tusi a Mamona, tatou te aoao ai i le uiga moni ma le faagasologa o le toefanauina ma le “[avea] o se tagata paia e ala i le togiola a Keriso le Alii.”17 Afai e mafai ona tatou taitai atu a tatou talavou ma talavou matutua i le toefanauina faaleagaga, o le a mou ese atu le atuatuvale ma soo se popolega i o latou olaga (e pei o le tuuina atu o se lauga ina ia faasalalauina atu i le lalolagi atoa) o le a matuai mafai lava ona taulimaina. E oo i le oti lava ia e le mafai ona faamata’uina lo latou filemu pe afai ua fanauina i latou i le Agaga ma ua aoao e faalagolago i le Atua.
Sa saunoa i se tasi taimi ia Elder Neal A. Maxwell e uiga i “gasu a le tagata soifua,” le mea moni faapea e muta mea uma i le oti. O a tatou mea na ausia, o a tatou mea na maua, o a tatou fegalegaleaiga ua i ai uma se mutaaga, ma afai e leai se isi mea e sili atu, e pei ona fai mai ai “le Failauga” i le Failauga, “o mea faatauvaa uma lava ia ma le ‘ai i le matagi.”18 O le oti o se mea moni, ma ua faamalosia i tatou e faailoa atu faapea, a aunoa ma se mana e faatoilalo ai le oti, o le a itiiti se faamoemoega tumau o o tatou olaga. O le mea e sili ai, ua tatou iloa ua uma ona faatoilalo le oti, e i ai le faamoemoega ma le uiga o le olaga, e le faatauvaa mea uma. E ala i Lana Togiola, ua faatoilalo ai e Iesu Keriso le faigata faaletagata o le oti, ma e pei ona matauina e Elder Maxwell i le taimi nei, “e na o le pau lava ia o faigata faaletagata [o a tatou lava agasala, mea sese, ma toilaloga], ma mai nei foi mea e mafai ona laveaiina ai i tatou e ala i le mulimuli i aoaoga a ia o le na laveaiina i tatou mai le faate’aeseina lautele.”19
O nei mea uma, o loo tatou faalauiloa atu ai le vaaiga umi atu na pu’e mai i le fasifuaitau talu ai nei a Peresitene Nelson, “Mafaufau Faaselesitila!” E tatau ona tatou fesoasoani i tupulaga faia’e e teena le uiga faaalia o le “Aai, feinu, ma fiafia, aua o taeao tatou feoti” ua faateleina le iloatino i le tele o aganuu. O lenei faiga toilalo i le olaga e faatuatuana’i ai le fuafuaga sili o le togiola ma le fiafia ma na ona taulai atu ai i mea faamalieloto i le taimi nei lava. E taitai atu ai i mamanu ma auala e le malagolagoina o le olaga. O se auala tuusa’o i le atuatuvale faataumaoi ma le lotopopole e faaumatia ai. Na saunoa Peresitene Nelson i lenei faafitauli i lana saunoaga i le konafesi aoao ia Oketopa talu ai. Na ia fautua mai faapea:
“O le olaga faaletino o se vasega aupito sili lea e aoao ai e filifili mea e silisili ona taua e faavavau. Ua matua toatele na’ua tagata ua ola e peisea’i ua na o le pau lenei o le olaga. Peitai, o au filifiliga i le asō o le a filima’otia ai ni mea se tolu: o fea o le a e ola ai i le faavavau atoa, o le ituaiga tino o le a e toetu mai ma oe, ma i latou o le a outou nonofo faatasi e faavavau. O lea la, ia mafaufau faaselesitila.”20
I se tusi sa ia lolomiina talu ai nei ua faaautuina Heart of the Matter, sa faalauteleina ai e Peresitene Nelson lenei manatu, ma ta’ua ai se aafiaga patino taufaafefe. Sa Ia saunoa:
“E tele ni taimi i lo’u olaga, ou te faafesagai ai ma le oti. O se tasi o na taimi na tupu i Maputo, Mozambique, i le faaiuga o Me 2009. A o talisua i le fale o le misiona ma Elder William W. Parmley, le Peresitene o le Eria a Aferika Sautesasa’e, ma lona faletua o Shanna, ma le peresitene o le Misiona o Mozambique Maputo, o Blair J. Pakard, ma lona faletua o Cindy, sa tulioso atu i le potu ni tamaloloa se toatolu ua faaauupegaina i auupega otometi.
“I le fetauiga na sosoo ai, sa tuu e se tasi faomea se fana i lo’u ulu, fai mai na o mai e fasioti a’u ae ave faamalosi lo’u toalua, ona toso lea o le amoti. Sa kiliki le fana ae le’i pa. O le le pa o le fana na ita tele ai le faomea, ona ia kikiina lea o o’u foliga ma ou palasi ai i le fola. Sa ou mautinoa o lo’u iuga lea. Ou te manatua lo’u mafaufau, ‘e le o toe mamao ona ou tuua lea o lenei olaga ae se’e atu i le isi. O le a avea lenei mea o se aafiaga mataina.”
“O le taimi foi lea, sa oomi atu ai e se isi faomea se fana i le papatua o Wendy ma amata ona lue lona nofoa i se taumafaiga e toso ese mai ai o ia, ma fai atu, ‘O le a e sau ma matou! O le a e sau ma matou!’
“E ala i se aula’iga o mea na tutupu faavavega—ma le faafetai faapitoa i faatinoga toa a Sister Cindy Packard—na faasaoina ai o ma ola. Peitai, e pei ona ou i ai i nisi taimi taufaafefe muamua, sa ou iloa ai le maaleale o le olaga ma le matuai laitiiti o mea o i ai i lenei lalolagi e taua e faavavau. A o faamata’uina e na faomea o ma ola, ou te le’i mafaufau i ni taui po o ni faailoga faaleaoaoga po o ni faaviiviiga. Sa ou mafaufau i lo’u aiga ma feagaiga sa ou osia ma le Alii.
“Ou te fefe ua toatele naua i tatou o loo ola i ni olaga e faapei o le olaga lenei ua na o le pau lea, ma o le a le faaauauina le olaga pe a mavae le oti, ma o mea tatou te faia iinei e le aafia ai le lumanai. E matuai le moni lava lena.
“E taua lo tatou le faasalaveia ma toso ese ai mai le ala o feagaiga ona o ‘mea fe’ilafi’ o le lalolagi, o lona uiga o mamalu ma gauaiga a tagata. E leai se taua o na mea i le isi lalolagi. O le mea o le a taua pe afai ua tatou osia feagaiga ma le Atua ma tausia.”21
O la’u tatalo ia mafai ona tatou fesoasoani ia i latou uma e mafai ona tatou tosinaina, ia osi feagaiga ma le Atua ma ia tausia. Fesoasoani ia i latou e atia’e le faatuatua ma faalagolago i le Atua ma maua ai le faamoemoe. Fesoasoani ia latou salamo ma tumau i le alofa tunoa togiola o le Faaola ma maua ai le filemu. Fesoasoani ia i latou ia toefanauina o ni “fanau a Keriso, o ona atalii, ma ona afafine”22 ma maua le olioli. Ma talosia ia e maua le afioga fiafia a le Atua, “Ua lelei ia, le auauna lelei e ma le faamaoni.”23
Ou te tuuina atu ia te outou la’u molimau mausali ma le mautinoa i le Toetu o Iesu Keriso. O le moni o Lona Toetu ua faamaonia ai le moni o mea ua tatou aoao atu i le talalelei a Iesu Keriso ma ua faamautu ai ua ia te Ia le mana uma i le lagi ma i le lalolagi—ma e mafai ma o le a Ia faataunuuina Ana folafolaga. O loo soifua o Ia! O outou o Ana leoleo mamoe fesoasoani, ma ou te faamanuia ia te outou i Lona alofa ma le gafatia sili atu e aoao atu ai ma tausia Ana tamai mamoe. I le suafa o Iesu Keriso, amene.