18:16

“Fetalai Mai, Ieova e; ua Faalogo Lau Auauna”

Faasalalauga Faaletausaga a le S&I Ianuari 2024

Elder Clark G. Gilbert

Komesina o Ofisa o Aoga a le Ekalesia

Aso Faraile, 26 Ianuari, 2024

Ou te faafetai i lo tatou faatasi ai i lenei faasalalauga faaleaoaoga i le lalolagi atoa. Ua fiafia lava i le mea sa faasoa atu e Brother Webb i faafouga ua lupe mo mataupu aoaoina o a tatou seminare. O se atina’ega faasolopito lenei o le a siitia ai tapenaga mo le olaga o talavou i le Ekalesia atoa. E faavae ia Iesu Keriso ma taula i tusitusiga paia, ua ou vaaia alii ma tamaitai talavou ua sili atu tapenaga mo misiona, ua tauivi mo a latou feagaiga i le malumalu, ua sili ona malolosi faalelagona, sili ona tutoatasi, ma sili ona saunia mo kolisi.

I o tatou faiaoga seminare, o outou o se vaega o le tapenaga taua o le olaga e manaomia e o tatou talavou ma mea o le a latou manaomia ia avea ai o ni soo o Iesu Keriso i le lumanai fenumia’i ua oo mai. Ou te faamoemoe o le a outou vaai i musumusuga i tua o nei lesona ma iloa ai lau matafaioi i le tapenaina o a tou talavou mo lo latou lumanai. Tatalo mo le malamalamaaga ma musumusuga ia iloa o latou ala o le lumanai. Saili talitonuga maumaututu e musuia i latou ia saunia. Se taimi ina a ofoofogia e faiaoga ai i le seminare, ma so tatou tiutetauave foi ina a matagofie.

O le a taulai atu nei a’u faamatalaga i o tatou faiaoga inisitituti, ae o le a taua mataupu faavae ia i tatou uma o loo tauivi e faalogo ma faalautele upu a o tatou perofeta. I le Feagaiga Tuai, na fautua ai e Eli le perofeta i le lumanai o Samuelu e tali atu i le valaau mai le lagi i le faapea atu, “Fetalai mai ia, Ieova e; aua o loo faalogologo atu lau auauna.”¹ O le mamanu lea ua mafai ai ona avea Samuelu ma fofoga taumomoli o le Alii i ona aso. O se vaega o le vavega o se perofeta soifua o le, i ai lea o so tatou ta’ita’i e mafai ona faatuatuaina e le Alii e faalogo ia te Ia ma aoao atu Lana Upu.

Le tausaga ua mavae, sa ou faasoa atu ai ni faamamafa faaperofeta se lima, na faamamafaina mai e perofeta ma aposetolo i o tatou talavou matutua.

Ia iloa lou faasinomaga paia.
Utuvai mai le mana o Iesu Keriso i au feagaiga.
Ia faamuamua le Atua ma mulimuli i Lana perofeta.
Aoao atu upumoni ma le alofa.
Ma ia pulea lau molimau.

Atonu e sili atu ona taua nai lo autu lava latou, o savali patino latou te utuvai mai ai, o savali na tuuina mai faaperofeta i talavou matutua i o tatou aso. Mo se faataitaiga, o se tasi o savali e taula i ai na tatou taumafai e faamamafa e maua mai le faigalotu a Peresitene Nelson i talavou matutua i le lalolagi atoa sa faaautuina “O Filifiliga mo le Faavavau.” O autu o le “Iloa lou faasinomaga paia” ma le “Ia pulea lau molimau” e aumai sa’o lava mai lena savali.² Na matou fautuaina outou e suesue i faamamafa faaperofeta taitasi nei. Na matou talosagaina outou ia iloa na faamamafa, tuu i totonu o au aoaoga ma au mataupu aoaoina. E sili ona taua, na matou valaaulia outou ia faaaoga i le ala tou te tali atu ai i fesili ma le auala tou te auauna atu ai i manaoga o a outou tamaiti a’oga.

Ou te faafetai i le toatele o outou na taliaina na valaaulia ma sailia auala e faalautele ai upu a o tatou perofeta ma aposetolo i talavou matutua o le Ekalesia. O mea faavae nei, na talosagaina faiaoga o mataupu faalelotu ma le inisitituti e faafou le silapasi o le kosi o Aoaoga a Perofeta Soifua ia aofia ai faamamafa faaperofeta o le taimi nei i o tatou talavou matutua. Ae ua toatele naua outou ua iloaina le ala e mafai ai e upu a perofeta soifua ona faamalolosia ma faalauteleina isi kosi e faavae i tusitusiga paia. Mo se faataitaiga, na maua e se faiaoga BYU ni auala e faafesootai ai le lauga “O Filifiliga mo le Faavavau” ma isi savali faaperofeta i lana kosi o Mataupu Faalelotu 275 O Aoaoga ma Aoaoga Faavae o le Tusi a Mamona. Sa ia ta’ua: “O aoaoga a le Tusi a Mamona e faamalolosia e nei faamamafa faaperofeta o le taimi nei ma faapena ai lava. E faia moni ai lava se eseesega i le malamalama i mataupu faavae o le talalelei le tuufaatasia o na punaoa e lua.”

Sa faasoa mai e se taitai faamaopoopo i Atalana le ala na ia mafai ai ona tuu ia faamamafa faaperofeta i lana kosi o le Mataupu Faalelotu 250 O Iesu Keriso ma le Talalelei e Faavavau. Mo se faataitaiga, i le lesona e lua, “O Le Faamalolosia o a Tou Molimau ia Iesu Keriso,” sa mafai ona ia tuufaatasia autu o le faasinomaga paia ma le pulea lau molimau mai le saunoaga “O Filifiliga mo le Faavavau” a Peresitene Nelson. I le lesona 10, “Mulimuli i le Faataitaiga a Iesu Keriso o le Gauai Atu,” sa ia faataulai atu ai le vasega i le lauga “Ia Faamuamua le Atua.”³ Ma i le lesona 18, “Mauaina o le Meaalofa Paia a le Faaola o le Alofa Tunoa,” sa ia taulai atu ai i le lauga “O Le Feagaiga e Faavavau.”⁴

Ua faamatala mai e isi le ala ua fesoasoani ai le i ai o se masani loloto i nei faamamafa faaperofeta, ia i latou e tali atu ai i fesili o le talalelei i se tulaga masani. Sa faasoa mai e se faiaoga inisitituti a le iunivesite le ala na faatagaina ai o ia e se talanoaga e uiga i le auai i le malumalu i se talanoaga a le vasega ona liliu atu i le saunoaga a Peresitene Nelson “O Le Malumalu ma Lou Faavae Faaleagaga.”⁵ Sa ia fai mai, “O le faaaogaina o upu a Peresitene Nelson, o le savali o le ‘O pea’ sa manino ia i latou o e na tauivi e sue le olioli i a latou auaunaga i le malumalu.” Na faasoa mai e se faiaoga inisitituti i Panama, le ala na fesoasoani ai aoaoga mai ia Peresitene Nelson ma Elder Neil L. Andersen ia i latou e tali atu o ni e faatupu le filemu i se mataupu na afua ai ni fevaevaeaiga tele i le lotoifale. Sa faasoa mai e se isi faiaoga le ala na fesiligia ai o ia pe aisea e le mafai ai ona tatou lē amanaiaina tulafono a le Atua pe afai e tauivi tagata, sa mafai ona ia liliu atu i le saunoaga a Elder D. Todd Christofferson “O Le Poloaiga Muamua.”⁶

A o tatou faaauau ona faamamafa ia aoaoga a perofeta soifua, ua tatou vaai i fua o a tatou taumafaiga o faaalia mai i o tatou lava tamaiti a’oga a o latou utuvai mai faamamafa faaperofeta. I se vasega, “Taliina o A’u Fesili o le Talalelei” sa faamatala ai e se tasi o faiaoga inisitituti se fesili i mataupu o le LGBTQ lea na vave ma tali masani atu ai tamaiti a’oga ma ta’ua ai le savali a Peresitene Nelson i le iloaina o lou faasinomaga paia “O Filifiliga mo le Faavavau.” O le isi na faamatalaina le ala na ta’ua ai e tamaiti a’oga le savali a Peresitene Dallin H. Oaks ia tutu mausali ma le alofa i le folafolaina atu o le upumoni i taimi na latou feagai ai ma fesili faigata o le talalelei i se talanoaga ma o latou paaga.

Ua ou mauaina a’u lava uunaiga patino e faalautele atu ia faamamafa faaperofeta i talavou matutua. O le taumalulu talu ai, sa ma ‘au ma Dean Scott Esplin i le semesa atoa e aoao atu le kosi o le O Aoaoga a Perofeta Soifua i le BYU. I le kosi lea, sa ma faamamafaina ai faamamafa faaperofeta taitasi e lima. A o matou talanoaina nei autu ma a ma tamaiti a’oga, sa manino mai ia te au le mamana o le fautuaga faaperofeta i le taimi nei, mo nei talavou matutua i lenei vaitau taua o o latou olaga.

Sa fesoasoani le vasega ia te au e faaleleia ai le ala sa ou aoao atu ai nei mataupu faavae, ma sa fesoasoani ou te malamalama atili ai i vaega o nei savali e tatau ona ou utuvai ai pe a i ai ni fesili a talavou matutua. O le isi uunaiga na ou mauaina o le auai lea i se faasologa o mafutaga faleaoga a le inisitituti. E pei ona tou silafia, o se vaega o le taumafaiga o le “faama’ite le inisitituti” e aofia ai le foafoaga o mafutaga pupuu faaleaoaoga, lea e fesoasoani e aumaia ai tagata i le inisitituti ia atonu ua leva ona o mai.

O le faigaluega muamua ai ma le Inisitituti a Logan i le Iunivesite o le Setete o Iuta, ona sosoo ai lea ma le Inisitituti a Sate Leki i le Iunivesite o Iuta, ma talu ai nei i Aferika i le Inisitituti a Kinshasa i le Democratic Republic of the Congo, sa matou atia’e ai se mafutaga faaleaoaoga e lua ni vaega e taula i le saunoaga a Peresitene Nelson “O Filifiliga mo le Faavavau.” O le mafutaga i le vaiaso muamua na taulai i faamamafa faaperofeta ia iloa lou faasinomaga paia. O le mafutaga o le vaiaso lona lua na taulai i le faamamafa faaperofeta ia pulea lau molimau. O faamamafa faaperofeta muamua ma le mulimuli ia na matou talosagaina outou e faalautele.

Ina ua maea le mafutaga muamua, sa ou valaaulia a’u tamaiti aoga e aumai se uo mo le mafutaga lona lua—aumai se uo o e atonu o tauivi ma le faatuatua ia fesili e uiga i lana molimau. I se tasi mafutaga, na toeitiiti a faaluaina le auai. A o faaauau pea ona matou faaaogaina nei mafutaga faaleaoaoga e faateleina ai le taua ma le faigofie ona maua le inisitituti, ou te fia tuuina atu se valaaulia i faiaoga taitasi o a tatou inisitituti e sue ni avanoa e atia’e ai mafutaga faaleaoaoga tulimata’i, e taulai i faamamafa faaperofeta ua matou otooto atu. Ou te fia fautuaina outou ia tuu atu se gauai faapitoa i aoaoga a Peresitene Nelson, faatasi ai ma se faamamafa i lenei savali e taula i ai, “O Filifiliga mo le Faavavau.”

Talu ona matou faasoa atu la matou fautuaga amata e faalautele le faamamafa faaperofeta i talavou matutua, ua tatou mauaina se fautuaga faaopoopo mai le Alii e ala i Ana auauna soifua i faigalotu a talavou matutua i le lalolagi atoa ma i le konafesi aoao. I lana savali i le lalolagi atoa i le tautoulu o le 2023 i talavou matutua, na toefaamalosia ai e Elder Quentin L. Cook le fautuaga a Peresitene Nelson ia iloa lou faasinomaga paia. Na ia ta’ua faapea o se vaega o le luitau i le mauaina o le faatuatua i le Atua e afua mai le atuatuvale i lo tatou faasinomaga paia.

Sa faamatalaina e Elder Cook: “Sa talanoaina e Peresitene Russell M. Nelson lenei mea i se auala mamana. Sa ia faamamafaina ni tautinoga tumau se tolu: ‘o se atalii/afafine o le Atua,’ ‘o se tama o le feagaiga,’ ma se ‘soo o Iesu Keriso.’” I se taimi muamua atu i lana saunoaga, na toe faamalosia ai e Elder Cook le autu a Peresitene Nelson ia pulea lau molimau ina ua ia ta’ua: “E feagai tupulaga uma ma tulaga e mafai ona tata’i atu ai i se luitau o lo latou faatuatua. … E manaomia e tupulaga taitasi ona iloa ma maua lo latou lava malamalama ma le molimau i le Atua.”⁷

I lana faigalotu i le lalolagi atoa i talavou matutua ia Me 2023, na faamanatu mai ai e Peresitene Dallin H. Oaks ia i tatou le tutu mo le upumoni faatasi ai ma le alofa e ala i le faamamafaina o poloaiga sili e lua.⁸ Na ia ta’ua lona lava uso a Aposetolo o Elder Christofferson D. Todd e faapea: “O le faamuamua o le poloaiga muamua e lē faaitiitia ai … lo tatou gafatia e tausia le poloaiga lona lua. I se isi itu, e faateleina ai ma faamalosia ai. … O lo tatou alofa i le Atua e siitia ai lo tatou tomai e alolofa atoatoa ai i isi … ona ua [tatou] faipaaga i le ute ma le Atua i le tausiga o Ana fanau.”⁹

Ona faamanatu mai lea e Peresitene Oaks e mafai lava ona tatou alolofa i isi ma maua tulaga e tutusa ai e aunoa ma le taufetu’una’ia o upumoni ua tatou iloa. I lana saunoaga i le konafesi aoao aupito lata mai sa faaigoaina “Mafaufau Faaselesitila,” na tuuina mai ai e Peresitene Nelson lenei faamamafa faaperofeta e tasi e tutu atu mo le upumoni tusa lava pe luitauina, ma saunoa ai: “O manatu faalauaitele e le o se sooupu o le upumoni. … Pe a osofa’ia e se tasi e te alofa i ai le upumoni, mafaufau faaselesitila, ma ‘aua ne’i fesiligia lau molimau.”¹⁰

I le avea ai o se vaega o lenei aoaoga i le lalolagi atoa, ou te faamalosia ai foi la’u valaaulia talu ai, e suesue ma faatatau ia faamamafa faaperofeta o le taimi nei mo talavou matutua. O le avea ai ma faiaoga seminare ma inisitituti, o se tasi o auala e mafai ona tatou fai atu ai, “Fetalai mai ia, le Alii e; aua o loo faalogologo atu lau auauna,” o le faalogo lea ma suesue ma le faaeteete ia afioga a le Alii a o faaalia e ala mai i Ana perofeta soifua. E mafai ona avea i tatou ma se i’uleo faaperofeta o aoaoga ua uma ona faasoa mai e perofeta i o tatou talavou matutua.

O le avea ai o se vaega o lo’u valaauga o se Pulega Aoao, e tatau ona avea a’u o se molimau i le Faaola. O se isi tiutetauave e tauaveina e Fitugafulu, o le avea o se punaoa i le Toasefululua i luma atu o se isi lava. Ua ou i ai iinei i le aso i se tofiga faatasi ma Elder D. Todd Christofferson, o lē ou te lagolagoina i la’u matafaioi o le komesina o aoga, ma i lana matafaioi o le taitaifono o le Komiti Faafoe o le Aufaatonu o Aoga a le Ekalesia. Ou te taumafai e avea o se punaoa ia Elder Christofferson o se vaega o lena tofiga. Ae e tusa foi pe le tofiaina a’u faatasi ma Elder Christofferson, ou te galue lava e faalautele le fautuaga ma aoaoga a Aposetolo taitasi aemaise o le perofeta o le Ekalesia.

Pe a ou i ai i faatulagaga faaleekalesia i se konafesi faalesiteki po o se fonotaga a le au taitai, o le tele lava o a’u savali e na o se faalautelega o upu a perofeta ma aposetolo. E faapena foi, pe a ou fautua atu ma auauna atu i isi, ou te utuvai mai upu a nei uso. I le tulaga o a’oga faalelotu, e saunoa le perofeta ma aposetolo e fai ma sui o le Alii i Ana tagata talavou. Ua ia i tatou se tiutetauave e iloa ma faalautele na savali. Uso e ma tuafafine, o loo ola o tatou talavou matutua i taimi matautia, ae ua saunia e le Alii ia perofeta ua i ai le valaauga ma le gafatia e fai atu ai, “Fetalai mai ia, le Alii e; aua o loo faalogologo atu lau auauna.” Ia tatou maua foi le lototele, le amio pulea, ma le faatuatua e faalogologo atu ai ia latou upu ma, i le faia o lena mea, avatu le savali a le Atua i Ana fanau i le lalolagi atoa. I le suafa o Iesu Keriso, amene.

O lo’u avanoa lenei e faalauiloa atu ai lo tatou tootoo autu. Na valaauina Elder D. Todd Christofferson i le Korama a Aposetolo e Toasefululua o Le Ekalesia a Iesu Keriso o le Au Paia o Aso e Gata Ai i le aso 5 o Aperila, 2008. Sa i ai tiutetauave faasupavaisa o Elder Christofferson i vaega eseese o le Ekalesia, e aofia ai ona tofiga i le taimi nei i Eria i Iuta ma Aferika i Sisifo. E pei ona ta’ua muamua, ua tofia nei foi o ia o le taitaifono o le Komiti Faafoe o le Aufaatonu o Aoga a le Ekalesia.

I talaatu o soo se tofiga patino, o le Toasefululua uma ua i ai se valaauga faapitoa e avea o se molimau faapitoa o le suafa o le Faaola. Sa ou matauina lenei tulaga iloga a o matauina Elder Christofferson ina ua totofi faatasi i ma’ua mo se asiasiga i le lotoa o BYU-Hawaii. Sa tofia muamua Elder Holland e pulefaamalumalu, ae ona o se faafitauli na tula’i mai i le toe taimi, o lea na faafuasei ai ona pau atu lena tiutetauave i luga o Elder Christofferson.

Sa ia taliaina lelei le matafaioi pulefaamalumalu, ae i se tasi o a matou fonotaga na ia saunoa ai i se mea sa olaola pea ia te a’u. Fai mai a ia, “I le iuga, po o le a lava lo tatou tiutetauave i le eria po o le autu, o lo tatou tofiga taula o le avea lea ma se molimau faapitoa o le suafa o Keriso i le lalolagi atoa.” A o ia saunoa i na upu i Laie, Hawaii, sa molimau mai le Agaga ia te au e uiga i le natura paia o le valaauga o Elder Christofferson ma le ala na te faamamaluina ai lena valaauga ma le malualii ma le faaeteete. O lo tatou avanoa lenei e faalogologo atu ai ia Elder Christofferson.

Elder Christofferson …